من وزارة الدفاع للاهرام.. تامر حسني والتدرج الوظيفي

للاسف ماحدش معايا يصورني هههههههههههه او الحمد لله، لان لو حد صورني فيتيون وانا في الحالة دي ممكن اعدائي يمسكوها عليا زلة ويقولوا: صدقتوا بقى انها مجنونة؟ 

من ساعة ما قريت الكاتب الكبير، والمؤرخ الاريب، والشاعر الاديب، العلامة الفهامة تامر حسني وهو يشرح لنا الظروف اللي كتب فيها اخر معلقاته: كام واحد فينا، والتي يسبقها تحذير لكل من يسمع هذه الاغنية انه ما يسمعهاش قدام مراته، لان الاغنية بتقلع في النص

طبعا كلنا عارفين ان الاستاذ تامر حسني ساب المناصب عشان يتفرغ للادب والشعر لان عنده رسالة

فمثلا تهرب من الجيش، مع ان الجيش كان حيموت عليه، والدليل انه هو الوحيد اللي عرف يطمن الجماهير الغفيرة على الجمهور المصري في السودان وقال بالحرف: وزارة الدفاع اتصلت بيا دلوقت وبلغتني اطمن كل الناس على جمهورنا في السودان

يذكر ان وزارة الدفاع كانت اتصلت بيه بعد ما كان تهرب من الجيش 

وغالبا تهرب من الضرايب لانه مش بتاع فلوس وعشان كده كتبوه في الاهرام

انا مش حاعلق على مكال تامر حسني

انا حاسيبكوا تستمتعوا بكل حرف وكل كلمة خصوصا الحتة دي:

وهناك من تزوجا بشكل متسرع لمجرد احساسهم بأنهم سيكونون في منتهي السعادة وخصوصا في العلاقة الحميمة‏,‏ ويتفاجأ كلا منهما بعد فترة قصيرة أن الزواج لا يتعلق بهذه المسألة فقط ولكنه مسئولية كبيرة لكلا الطرفين واحترام متبادل بينهما‏..‏ وهات وخد‏.‏

انا ما فهمتش هات وخد دي عايدة على الاحترام وللا على العلاقة الحميمة؟ انتوا عارفين الكلام الراقي ده يصعب على امثالي فهمه
اقروا واتعلموا.. شالله اشوفكوا كده ملو هدومكوا ومتهربين من الجيش