Thursday 19 June 2008

هو احنا لينا مصمصمين نقرقص باليه ونغني اوبرا


ح تروحوا باليه روريو وخوليت؟
انا عايزة افهم مش كل شعب له تراثه وله ثقافته؟ يعني هم يعني بيعرفوا يغنوا زي ام كلثوم ويرقصوا زي نعيمة عاكف؟ مش كل شعب وله خصوصيته؟
احنا مخارج الالفاظ بتاعة اللغة بتاعتنا بتطلع من المعاميع، هم صوتهم بيطلع من المناخير بسبب مخارج الفاظهم، عشان كده اخترعوا الاوبرا لانها مناسبة للغتهم ومخارج الفاظهم اللي بتدي الصوت شوية سرسعة، احنا اخترعنا الغنا بتاعنا عشان مناسب لمخارج الفاظنا، وبعدين مش ح نفاضل مين احسن، بس ايه اللي يخلي الاوبرا ارقى من الغنا بتاعنا؟ وللا عشان هم قالوا ده راقي؟ بالعكس بقى احنا بنتكلم من البوكس اللي في القفص الصدري وبنتسخدم كل المخارج الممكنة، ودي حاجة المفروض انها كويسة، حتى ذهنيا كويسة، اللي بينطق الحروف كويس زي ما ربنا خلقها بيبقى قدراته الذهنية عالية، بس عشان كده لما حد فينا يغني اوبرا بيبقى صوته مدي حتة تجعيرة مش مناسبة للاوبرا زي ماهم صوتهم بيضحك لما بيغنوا شرقي
ونفس الحكاية بالنسبة للرقص، ليه يعني الباليه ارقى من الرقص البلدي انا عايزة افهم، وللا عشان الرقص البلدي بتاعنا والباليه بتاعهم، طب ده حتى الرقاصة البلدي بتقف ترقص في حالها لا حد بيشيلها ولا يهبدها ولبسها احشم كمان، ثم احنا طبيعة اكلنا واجسامنا مهما خسينا ما تنفعش للباليه، زي ما هم برضه لما بيرقصوا بلدي بيرقصوا مكسر وبيبقى شكلهم زي الهابلة اللي مسكوها طبلة عشان طبيعة اجسامهم مختلفة
ليه نضحك علينا الناس ما احنا عندنا ثقافتنا وفننا اللي ما حدش بيعرف يعمله غيرنا
انا مرة رحت باليه زوربا، الباليرينا مصرية، بالصلاة ع النبي حاجة متربية على الغالي، بطن وهانش وجناب وفخاد، بطة يعني، حاجة تملا العين، وتيجي تنط تسمع صوت الهبدة على المسرح كأن عمارة مصر الجديدة بتقع على اكثم، والواد الباليرينا برضه ياعيني جسمه مصري، قصير ومعصعص وركبه قابة من رجليه وييجي ياعيني يشيل البت يتمزع واكيد اكيد جاله فتاء بعد العرض ده
وكان عرض كوميدي، وكان فيه واد مجنح جنابه كده عامل زي: انا ميمو ياااااه
ثم انا مش شايفة يعني ان البت المصرية لما لبست بدلة الباليه بفخادها دي كان شكلها مؤدب اكتر من اللي لابسة بدلة رقص، بالعكس بقى بدلة الرقص مستورة ومدارية كل الفخاد دي، دي ركبها كانت منغزة يا ناس، فيه رقاصة باليه ركبها منغزة ومدورة؟
وبعدين ما دي رقاصة ودي رقاصة، يعني رقاصة الباليه دي بتبيع سبح يعني؟ ماهي رقاصة برضه
والكلام عن ان الرقص البلدي بيثير الغرائز لكن الباليه لا يثير الغرائز، والله ما حكاية رقص، حكاية اللي بترقص بس، ماهي اللي ركبها منغزة لو فقرت في حضرة الحسين برضه ح تثير الغرائز
والله احنا بقينا عاملين زي خدامين مصر الجديدة اللي تاخد اللبس اللي قدم على ستها وتتآلط بيه على جيرانها في عزبة النخل

No comments: