Friday 6 June 2008

كلمت كريم البحيري

اخيرا عرفت اوصل له الحمد لله، من اول ما خرج وانا عمالة اتصل بيه على الرقمين اللي عندي ومقفولين وبعت له عليهم مسج بندنج لحد دلوقت، لما دخل وساب لي تعليق رديت عليه وقلت له قافل تليفونك ليه؟ قوم احمد عبد الفتاح يبعت لي مسج ويقول لي نمرة كريم لتاني مرة! شوف الواد، تاني مرة؟ وياترى اول مرة بعتها لمين انا ولا وصلني منه حاجة، وللا وصلت لبطرس، انت مش ح تبطل الغيرة الجنونية دي يا بطرس؟
الحمد لله كلمته، بس واد ايه، وتد...صحيح رفيع ومعصعص ومافيهوش زقة بس راجل وروحه المعنوية زي الفل بعد كل اللي شافه، كريم بيقول لي انهم وهم بيكهربوه كانوا ناسيين التلفزيون مفتوح ولجل البخت كان مشاري راشد بيقرا سورة المؤمنون، كريم بيقول لي حاجة غريبة، انا قعدت اركز مع السورة والايات اللي في اخر السورة ادتني قوة بقيت مستحمل التعذيب، قلت له هم مشغلين لك قرآن ليه انت عليك عفريت وللا حاجة؟ قال لي واضح انهم نسيوا التلفزيون، والحمد لله انهم عملوا كده
ربك مع المنكسرين جابر، لا
بس كريم مش مكسور، وخارج اقوى من الاول، هو هو كريم اللي اعرفه بنفس حماسه ونفس روحه الحلوة وضحكته وكل حاجة، مع انهم كانوا بيتعمدوا يسربوا له اخبار انه هو الوحيد اللي مش حيطلع
بس ما عرفوش يكسروه
ومش ح يعرفوا ان شاء الله
انا مبسوطة قوي اني كلمته
----
بكرة الساعة سبعة في مركز الدراسات الاشتراكية فيه احتفالية بكريم وطارق وكمال واحنا حاضرين ان شاء الله
المركز في سبعة شارع مراد قدام جاز...قصدي جاد

No comments: