بمناسبة قانون حنفي

كل البشرية، ومن ضمنهم انا كمان يعني انا بشرية برضه، مزبهلين من قانون حنفي اللي بيحكم البلد
النيابة تقول: اللي يدخل جيب السبع لا ممكن يخرج ابدا
امن الدولة: حنفي
النيابة: مافيش حنفي، انا كلمتي لا ممكن تنزل الارض ابدا
امن الدولة: حنفي
النيابة: خلاص تنزل المرة دي انما اعملي حسابك المرة الجاية لا ممكن تنزل الارض ابدا
ومع هذا الارتباك ما بين حنفي وام حميدة فاحنا كمان مرتبكين، ايه المشكلة في امن الدولة؟ مش انه شرير، كان من يومين مالك مصطفى بيشتكي لي من واحد غبي، مع انه قبل كده حذرني من الاغبيا وسبحان الله النصيب وقعه فيهم، قلت له الشرير له حلول كتير قوي
منها انك تتجنبه ولو ان دي طريقة مش مضمونة، بما انه شرير فهو بيستمتع باذية الناس خصوصا اللي بيتجنبوه
ومنها انك تكسر سمه بسم انقح منه ودي طريقة رغم انها تبدو انتحارية انما اضمن كتير
اللي مالوش حل فعلا هو الغبي، خالص، لانه عامل زي واحد مش بيعرف يسوق ولا عمره ركب عربية ابدا ولا حتى في الكنبة الورانية ومرة واحدة ساق عربية مافيهاش فرامل وداس بنزين على الطريق الزراعي، طبعا العربية ح تتقلب بيه، بس على ما تتقلب بيه ح يكون قتل كام بني ادم وكام جاموسة ورمى كام عربية في الترعة ولما تتقلب العربية بيه يا ترى ح تتقلب في الترعة؟ يا ترى ح تتقلب في غيط وتولع فيه وفي الغيطان اللي حواليه؟ يا ترى ح ياخد كام عربية في سكته وهو بيتقلب؟ وممكن ربنا يستر بس دي تبقى ستر ربنا وبس
وهي دي المشكلة في الغبي عشان كده: عدو عاقل خير من صديق جاهل
حتى مالك سألني باستنكار: طب وايه الفرق ما بين الدسيسة والغبي قلت له الدسيسة احسن واضمن الحقيقة
مشكلة امن الدولة انه زي عم السواق ده، عامل القصة ما بينه وبين الناس عند مش اكتر
والعند يورث الكفر، وكل الحكاية استعراض عضلات والكلام مش موجه لينا الكلام موجه للجناح التاني في الحكومة عشان يقول لهم انا اللي حاكم البلد مش انتوا، واحنا اللي بنتفعص في النص
طب خلينا كده نفكر في سيناريو تاني بعد الاضراب: لو امن الدولة تجاهل الاضراب تماما كأنه لم يحدث بالمرة، وكمان تجاهل المحلة، بل لم يتواجد فيها اصلا، وعدى الاضراب ومشي والامن ما انتشرش في الشارع ولا حذر ولا انذر ولا اعذر ولا دياولو
كام واحد كان ح يقعد في بيته؟
وكان ايه اللي حصل في المحلة؟
وكان ايه اللي ح يحصل بعد الاضراب؟
عايزين الحق وللا ابن عمه؟
ولا حاجة، ولا حاجة خالص مالص فالص بالص طالص
البتة البطة
الدولة بدورها كانت ح تتجاهل الاضراب ومش ح تنزل اسعار السلع، والناس اللي ما نزلتش من الخوف كانت نزلت الشارع، وعمال المحلة كانوا اعتصموا والمصنع ما اشتغلش يوم وكان رجع اشتغل تاني يوم، بلاش تاني يوم، تالت يوم، انشالله بعدها باسبوع، يعني هي الدولة اسم الله فارق معاها الانتاج قوي
ويمكن كمان الاعلام ما كانش غطى بجد بقى لان مافيش حاجة تتغطى ولا تتعرى
ويمكن كان غطى ان الناس نزلت الشارع عاتشي في المعاتشي ولا كأن فيه ام اضراب، نص الناس اللي ما نزلتش ما نزلتش عشان خايفة من الحضور الامني اللي في الشارع مش عشان مضربة
ويا سيدي يضربوا يوم من نفسهم ويعدي اليوم ولا كأن فيه كلاب بتنبح
انما ازاي بقى؟ ازاي؟ وليه ما نتغاباش ونزود في الغباوة؟
الجناح الامني عايز يقول للجناح القانوني انا اللي حاكم البلد والجناح القانوني عايز يقول للجناح الامني .....مناخير امك، مشيها مناخير
اهي كلها اعضاء في الجسم البشري
هو الحقيقة مافيش اي اهتمام بالشعب المصري الشقيق، لا من الجناح ده ولا من الجناح ده كل واحد فيهم بيكلم التاني وبيستخدمنا كقطع شطرنج
طب هل يعني ايه؟ هل هم عارفين ان قطع الشطرنج دي بتاكل وتشرب وتتنفس ولها ارادة؟ مش ممكن يبقوا بالغباوة دي
الكلام عن شعب سلبي وشعب وسخ وشعب ابن وسخة ده كلام ما يقولوش غير حد هو ذات نفسيته ابن وسخة الشعب المصري مش شعب ابن وسخة ده شعب عجوز وعنده سبعتلاف سنة وبيفهم ويحس ومش بيحب الانفجارات بس ح تيجي لحظة ينبه جوز المتصارعين دولم انه موجود، هي مش لحظة قريبة قوي لان المصريين بيحبوا يجربوا كل وسائل الاصلاح قبل ما ينسفوا حمامهم القديم
احنا احسن سباكين في الدنيا نركب جلدة للحنفيات ونعلق حبل في السيفون ونربط الاكرة بسلك قديم ونعدم كل حاجة العافية قبل ما نرميها
بس لما غبي يدخل الحمام ويتعمد انه يكسر كل حاجة عشان يبعت رسالة لغبي تاني انه عتريس وبلوة سودا حتى بصوا
ح يضطر اصحاب الحمام انهم يغيروه، ونخش في تكاليف بقى وهد وبنا ووجع دماغ وعمال داخلة وخارجة ويمكن حاجة تتنشل من البيت عشان الرجل كتيرة وممكن يتنصب علينا في الفلوس وممكن السباك يجيب لنا صيني ويقول عليه الماني وصداع احنا مش عايزينه ومش ح نلجأ له الا لما تكون كل حيل الشعب العجوز ده نفدت خلاص
فياريت الغبي يبطل غباوة، لان الغباوة ينفع تتبطل اسهل من السجاير على فكرة، ربنا خلق كل البني ادمين اذكيا والا ما كانش حاسبهم على تصرفاتهم، بس لو البني ادم يبطل يتغابى
آه
انا طالبة من السادة العلماء الاجتهاد والافتاء بان التغابي من الكبائر
---------
ملحوظة: ياريت تسيبوا اسراء في حالها,...ياريت تسيبوها في حالها...من فضلكوا يعني
احسن ما ربنا يخليكوا تلاقوا نفسكوا مكانها، ربنا مش بيسيب حق حد
اسراء....انا باحبك، وانت في عيني زي ما انت، ومن حقك تختاري اي اختيار في حياتك وانا مسانداكي فيه عمياني ومن غير ما اعرف هو ايه، انا شخصيا يعني، وانت بنت كويسة وح تفضلي كبيرة في عيني، وما تلتفتيش لاي حد بيجرح فيكي، ماحدش يابنتي بيحس بحد غير لما يتحط مكانه
ربنا معاكي