بالنوسبة للاخوان: انا دمي محروق..انتوا دمكوا مش محروق ليه

انا الموضوع عمال يكبر في دماغي من امبارح، اصل انا ردود افعالي بطيئة شوية
ممكن اعرف الاخوان بعد الاحكام دي ما بيرفعوش شكوى للقلل المنتحرة ليه؟
ممكن اعرف ما بيعملوش اضراب عن الطعام ليه؟ ده اجراء قانوني ومشروع، هم مش بيقولوا ان عددهم سبعة مليون؟ متهيالي لو سبعة مليون اضربوا عن الطعام ح يبقى فيه تأثير
ممكن اعرف ما بيسحبوش كل فلوسهم اللي في البورصة ليه مرة واحدة؟ هم مش بيقولوا ان لهم فلوس كتير في البورصة وانهم هم اللي مقومينها؟
ما يشاركوش في اضراب اربعة مايو لان بصراحة كده ماحدش عايزهم فيه
بس فيه في الكون ستميت خطوة قانونية وسلمية ودستورية يعملوها بعد الاحكام الجنونية دي اكتر من انهم يحسبنوا
ممكن افهم مبدأ: تهجرني برضه احبك، تنساني برضه احبك، تلاوعني برضه احبك ده مبني على اي اساس؟
استباقا: بالنوسبة للناس اللي بتكره الاخوان وبتقول عليهم عاملين صفقة، ياريت تجيب لي دليل مادي قبل ما تقول الكلام ده عشان لو دي صفقة يبقى لازم يتم الكشف على قوى كل اعضاء الاخوان العقلية، ماحدش بيعمل صفقة عشان يتسجن وفلوسه تتصادر ويخرج من الانتخابات ويتفشخ تلتمية وستين درجة لحد ما رجليه تسلم على بعضها فوق راسه الا اذا كان مختل عقليا
وكل ده عشان ايه؟ يكسبوا تعاطف، تعاطف ايه ماحدش متعاطف ده انا ام قلب رهيف قرفت منهم
بالنوسبة للاخوان والمتعاطفين معاهم: لو سمحت اتكلم بالاطة وفوقية زي ما انت عايز، وقول لي: الحكاية مش جهجهوني كده يا ديماجوجية يا شعبوية فيه خطة، فيه فكر، فيه منهج، الاخوان جماعة منظمة مش عشوائية زيكوا يا كلاب يا قطط يا فيران يا صراصير، الاخوان هم اللي في الشارع، الاخوان هم المعارضة الحقيقية، والنبي انا عتريس والنبي انا بلوة سودا حتى بصوا اني ح اخد الاتاوة الطاج طاجين...إلخ، بس اديني امارة للفتونة دي
مش عارفة ليه افتكرت فيلم بوحة لما كان المعلم بيضربه بالقلم في القسم وهو عمال يقول له: تسلم ايد يا معلم
بالنوسبة للناس اللي انا باحترمهم: ح نعمل ايه؟ ماهو ح نرجع تاني للحق احق ان يتبع، ما ينفعش ده يحصل في بلدنا ونسكت عليه، انا عارفة والله الناس المبضونة لها حق، بس ايه؟ لازم المطالبة بالغاء تحويل المدنيين لمحاكم عسكرية يبقى مطلب اساسي، ماحدش عارف بكرة فيه ايه، وما ينفعش تبقى اموال البيني ادمين عرضة كده للمصادرة بدون اي وجه حق، ثم ان دي حاجة لوجه الله يعني مش عشان حد، يا اخي لو واحدة جوزها بيضربها ح تحوش عنها حتى لو بعد ما انقذتها قالت لك: وانتش مالك انتش...جوزي وهو حر فيا، وللا ح تطنش؟