مافيش نجوم لاننا مش ممثلين

الحقيقة انا الروح دي مش عاجباني خالص، اه لامؤاخذة اصلي باكمل حوار في دماغي، موضوع النجوم ده، اصل كذا حد فتحه معايا، اعداد مهولة من البشر، كل ما واحد يتقبض عليه، والطبيعي اننا نعمل له هيصة وبوليكة لان ماحيلتناش غير اننا نفتح الشباك ونرقع بالصوت زي البت اللي ابوها بيعذبها في العشوائيات، يطلع لنا كام واحد زي الخازوق المألوظ يقول لنا انتوا ح تعملوا فلان وللا فلانة نجم بقى؟
انا مش باحب احلل نفسيات الناس لان ده مش تخصصي ولان النفس ما يعرفهاش غير اللي خلقها، واللي بيدوا نفسهم حق انهم يحللوا بول لنفسيات الناس ليس لهم مني الا كل احتقار، بصراحة ربنا كده يعني
بس دي روح شريرة في التعامل مع الامور لعدة اسباب
اولا: والله المحبوس ده لو اخد جايزة اوسكار للحبسجية ما ح يخفف عنه نقطة من الالم اللي بيحسه وهو جوه السجن ولما بيطلع براه وربنا ما يكتبها على مخلوق يا رب ويفك اسر كل المظلومين، قولوا امين
ثانيا: انا مش فاهمة الناس اللي بتتكلم كده بيشتغلوا في التدوين ليه اصلا؟ ماهو شغلانة المدون انه يعمل باللو ومالناش سلاح في الدنيا غير كده، والحمد لله شغلانة مجاني وربنا يديمها كده ويكفينا شر القبض والمقبوض بكل ما تحمله الكلمة من معان
هو احنا لما عملنا باللو على فيديو عماد الكبير كنا بنعمل منه نجم؟ وهل بفرض ان الحملة اللي اتعملت لمساندة عماد الكبير عملت منه نجم، هل ده خفف عنه اي الم؟ صحيح ساعد في القضية والحمد لله وده من عند ربنا يعني ولان الناس كانت مخلصة النية ومش عايزة اي مقابل بس لو اسلام نبيه ده اخد اعدام حتى، حد عارف الليل لحد دلوقت بيعدي على عماد ازاي؟
وقال على رأي اللي قال، اللي هو مينو خطيبي المسيحي: يخرج نجم احسن ما يخرج مكسور
ثالثا: قبل ما الناس تتكلم بالطريقة دي على اي حد مش بيحطوا نفسهم مكانه ليه؟ وايه الروح القاسية دي؟
امال حروق لسان ايه وحريات ايه وانسانيات ايه واخلاق ايه اللي بيتكلموا عنها وهم بمنتهى القسوة عايزين يكتموا نفس اي حد يتكلم عن اي حد تاني في السجن بدعوى: ما تعملهوش بطل ما تعملهوش نجم
ومالهم بقى ومال مبارك زعلانين منه ليه؟ هو بيحبس الناس وهم عايزين يطنشوا عليه
المفروض ولله الحمد والمنة اننا ما عندناش ابطال ولا عندنا شخصية كاريزمية ولا عندنا زعماء والحمد لله على كده دي احسن حاجة حصلت لنا في التاريخ وربنا ما يوعدنا ابدا بزعيم ولا بطل عشان نستبدل الطاغية المكروه بطاغية محبوب كأننا بنطلق ونتجوز سيد سيده مش كأننا شعب بيدور على حقوقه
واحسن حاجة حصلت في الهليلة دي ان كلها شباب مافيهاش حد جلده تخين قاعد ينظر على قفا امنا وياكل دماغنا ويقول لنا نعمل ايه وما نعملش ايه
واحسن حاجة في الحدوتة انها عفوية وتلقائية وشعبية لا فيها خلايا ولا انسجة، ويلعن ابو النخبوية
ومع ذلك الناس ما سلمتش والشعب كله بقى قلة مندسة، على الحكومة طبعا، ولما ربنا بيبتلي واحد او واحدة من الشباب العادي جدا، العفوي جدا، اللي مافيش حاجة بتحركه غير انه بيحب ام البلد دي بالسجن وللا ظلم يقع عليه، ولاننا مالناش غير بعض، فالمفروض اننا كلنا نتلم نسانده ونعمل له هيصة وظمبليطة في الصالون عشان ما يندمش انه عبر قرعة البلد دي باي حاجة، وعشان هو مش وراه حزب ولا حركة بركة ولا نيلة تسانده، وعشان هو ما بيقبضش من حد، وعشان كمان احنا نتشجع، احنا نفسنا ما نخافش ونحس ان لو حد فينا لا قدر الله وقع الوقعة دي ح يلاقي ناس حواليه يقوى بيهم، واحنا لما بنساند سين او صاد او لام الف او همزة على نبرة بنساند نفسنا قبل ما نكون بنسانده وبنتلم على بعض، والنجم في القصة كلها هم الناس
ده اذا كان المفروض يبقى فيه نجم اصلا، انا ما اعرفش ان الحكاية تمثيلية وللا فيلم ولو الحكاية كده قولوا لي دلوقت حالا عشان اجيب ضرف ام المدونة دي بلا وجع دماغ، انا اصلي ما كانش ليا طموح في التمثيل انا وانا في تانية ابتدائي كنت عايزة اطلع رقاصة، وبما ان الوقت فات على الانحراف واللي ذاكر ذاكر فعلى الاقل اشوف لي شغلانة تانية غير مهنة التمثيل اللي انا مش موهوبة فيها
اصل فلان لما اتنجم خرج من السجن اتقالط على الناس
كحك بجد، مين قال لك ان فلانة وللا فلان خرجوا اتقالطوا على الناس، مين قال لك انه خارج سليم اصلا وللا عارف هو بيتصرف ازاي؟ بدل ما ترحمه وتحس انه محتاج حضن الناس اللي هو اتنيل اتسجن عشانهم تقول اتقالط على الناس؟
الروح دي تخوف
تخوف اي حد انه يحاول يعمل اي حاجة لام البلد دي، وتخلينا مش متأكدين ان اي حد فينا لو اتعرض لاذية ح يلاقي حد جنبه واحنا مالناش حل تاني احنا ضهرنا للحيط ورجلينا في الهوا وتكالنا على الله، ولما حد بيقع مالوش بعد ربنا غيرنا واحنا مالناش بعد ربنا غير بعض
ويمكن كمان يلاقي ناس بتطعنه في ضهره وتخليه مسخة ويتريقوا عليه وهو في الحبسة ويقولوا ما تعملهوش نجم
امال لو ماكناش معظمنا طافحين مع بعض عيش وخرا
الفاتحة لقلة الاصل
ولا الضااااااااااااااليييييييييين
آمين