مساء الموز

انا لسة صاحية حالا والله نمت زي القتيلة
مش عارفة مين اللي اختار مدخل طنطا، طبعا انا ما اعرفش الفرق ما بين مدخل طنطا ومدخل سرس الليان انا عمري ما رحت خالص، كمان مش عارفة ليه رحنا بالعربيات كان المفروض نروح بالاتوتبيس، وما اعرفش ان ده كشك مرور

ثم افرضوا كشك يعني ناس داخلة المحلة، هو احنا داخلين بيت مشبوه؟ دي بلد كل الناس بتدخلها
عموما انا آسفة على رداءة التصوير لاني كنت باصور من ورا الظابط وما كنتش عايزاه يشوفني وانا باصور لانه اخد شرايط القنوات وقطعها فطبعا الموبايل الجربوع بتاعي كان ممكن يتقتل
بس فيه فيديو لطيف يا رب يكون واضح


اولا دي الفيديوهات والاساتذة بيتجادلوا مع الضابط، بصراحة كانوا بيتخانقوا معاه، حتى فيه دكتور اسمه رشاد ابتدا هادي وبعدين في الاخر اتعصب، الحقيقة انا كنت عايزة ادخل مش اتخانق، قوم يا اخويا رحت اكلم ح الظابط بالادب: يا فندم احنا عارفين انك بتعمل شغلك بس دول اساتذة جامعة وناس كبار ومعلش.... واذ بي افوجأ ان اللي كان واقف زي الفار وهو بيتزعق له بيتنطط عليا عشان باكلمه بادب
نصيحة لوجه الله تعالى: لما تشوف ظابط بوليس هزأه على طول
الظاهر ما علمهمش في البيت موضوع الادب ده، هم علموهم: اللي يشتمك يبقى مسنود واللي يحترمك تبقى عينه مكسورة
فطبعا رحت مدياله الوش التاني، ح اعمل ايه مضطرة، مع اني بطبعي هادية ونسمة زي ما انتوا عارفين
الواد وائل عباس والواد مينا دخلوا ولاد اللذين
واحنا فضلنا محجوزين من الساعة حداشر للساعة تلاتة العصر، الساعة سبعة ونص كان فيه مؤتمر صحفي، بس انا كنت في العالم الاخر ما عرفتش اروحه
بس بصراحة فيه فيديو لطيف قوي لسة باحمله ويارب يكون واضح، الدكتور يحيي قزاز طبعا كان الاعلى صوتا وصال وجال وقعد يزعق للظباط وبعدين فجأتن راح باصص للمخبرين، وهم واقفين عادي مخبرين مع اني اعرف ان المخبر ده المفروض يبقى متخفي، المهم بص للمخبرين وقعد يقول لهم انتوا غلابة زينا، يعني انتو ما بتقفوش في طابور العيش؟ احنا بنعمل كده عشان الغلابة اللي زيكوا، ما تشوفوا انتوا عايشين ازاي والبشاوات عايشين ازاي، ما تشوفوا بيهينوكوا ازاي ما تشوفوا بياخدوا كام وانتوا بتاخدوا كام
بصراحة هي وشوش المخبرين بان عليها التأثر وحاولوا طبعا يخبوه لان ده خراب بيوت ليهم
بس انا افتكرت عادل امام لما كان بيكلم حاجب المحكمة ويقول له: انا لو منك اجيب بتاعة واحطها على صدري واجي اقعد اول واحد الصبح، او ااجر صعايدة وبالشوف في الازاز
:)

بس مش عارفة الفيديوهات بتتحمل بصعوبة ليه مع انها قصيرة
ومرة تانية باعتذر عن رداءة التصوير
فيه مخرج شاب كان ح يتشد لانه اتخانق مع الظابط، وبصراحة الظابط كان بارد وعمال يقول: سيبوه يغلط على الاخر
!!!!
بس هو ماحدش غلط، احنا كنا كل اللي عايزينه المفتاح بتاع الدكتورة منال
اصلهم عشان ما يدخلوناش قاموا اخدوا المفتاح والبطاقة والرخص بتاعة الدكتورة منال وخبوها، عشان لا نمشي ولا ندخل، محبة يعني زي ما تروح عند واحد صاحبك ويخبي جزمتك عشان مش عايزك تمشي
المهم اليوم باظ
حسبنا الله ونعم الوكيل
وفي الآخر عملوا علينا كوردون بعربيات نقل كانت ماشية على الطريق، وسواقين عربيات النقل مش فاهمين فيه ايه ياعيني وواحد قال لنا هو فيه ايه؟ هو كل العربيات دي صحافة، فقلنا له لا دول اطباء كانوا داخلين عشان الجرحى اللي جوة واساتذة جامعة كانوا عايزين يعزوا في اللي ماتوا وفيه صحافة..احنا جايين نعمل واجب

فالراجل هز راسه وقال: آه...فهمت...طب احنا ذنبا ايه؟ احنا بقى ح نتغدى على حسابكوا
شفتوا العربيات؟ ولا كأننا مهربين مخضروات
طبعا الدكتور نادر فرجاني قعد يقول لهم لو كنا اسرائيليين كنتوا دخلتونا وشيلتونا في عينيكوا
المراسل بتاع اوربيت اتاخد منه الكارنيه، واحمد فوزي المخرج قال لي انه سمع المدير بتاعه بيقول له كان حقك تكلمهم امبارح بالليل
!!!!
حد ياخد الشرايط بتاعة اوربيت ويقطعها؟ ده ظابط واضح انه حتى ما بيشوفش تليفزيون، طب ده حتى الاخ عماد اديب بيخدمهم بعنيه
بصراحة انا كنت ح اطق من جنابي
المشوار باظ واللي غايظني انهم حفظوا وشي، طب احاول ادخل تاني ازاي؟
ثم يعني عمالين تقطموني وتقولوا لي مدخل طنطا مش عارف ايه، طب ما انا كاتبة الدعوة من امبارح ما قولتليش ليه على مدخل تاني؟