بجد مش فاهمة حاجة خالص يعني، فيه حاجة غامضة حاصلة بخصوص الملف الطائفي في مصر
طيب يعني أنا ومينا لما عملنا مدونة الحوار وقلنا يا اخوانا نتكلم احنا مع بعضينا ونطلع كل الزبالة اللي جوانا ونحلها احنا بنفسنا احسن ما يجي حد من برة يلعب في صديد الدمل ويعمله خراج ويجيب لنا تسمم وغرغرينا ويمكن نموت قالوا لنا يا عملا يا طائفيين (انا ومينا يعني عملاء....بس مستنيين تحويل العملة وكده) وقعدوا يقولوا لنا الفتنة نائمة لعن الله من ايقظها وانتوا بتوقظوها
قمنا سكتنا....شوية يعني
وتحصل حوادث واعتداءات
وبعدين يطلع لنا شوية ناس تقول كلام غريب
غريب
غريب قوي
كلام مش زي الكلام التاني بتاع عباد الصليب ومحمد بتاع النسوان اللي كان بيقوم ببطولته السلفيين وزكريا بطرس
ده كلام بتاع ناس المفروض انهم مسئولين ومثقفين ومحترمين واهل للثقة
زي كلام واحد يطلع يقول ما هو المسلمين لازم يبطلوا يقولوا سلامو عليكو ده تديين للمجتمع وزرع للفتنة الطائفية
!!!!!!
وواحد تاني يطلع يقول الكنيسة بتنصر ولولا اصحاب الشأن محلفني على المصحف كنت جبت الدليل
!!!!!! (تاني)
من يومين سمعت مصطفى الفقي وهو عضو في المجلس القومي لحقوق الانسان بيقول احنا ابتدينا بخطوات لاصلاح الامر
عشان نعالج امور زي الخط الهمايوني والتمثيل القليل جدا للمسيحيين في مجلس الشعب وعدم وجود محافظ او رئيس جامعة مسيحي وانعزال المسيحيين عن الحياة السياسية
والحقيقة قال كلام من اللي كنت انا ومينا بنقوله وكانوا بيقولوا لنا عليه لعن الله من ايقظها
زي ان الانعزال جزء من مسئوليته تقع على المسيحيين اللي بيخافوا يتقدموا لوظائف في الخارجية مثلا او بيخافوا يدخلوا الانتخابات
بس الطبيعي والمنطقي ان لما يبقى فيه اقلية عددية في المجتمع المفروض ان حماية النسيج الوطني وحماية حقوق الاقلية العددية تبقى مسئولية الاكثرية العددية في المقام الاول ولما يحصل خلل الاكثرية هي المسئولة بشكل اكبر من الاقلية
الحمد لله اخيرا مصطفى الفقي اعترف انها اقلية عددية بدل الكلام الهبل بتاع احنا ما عندناش اقلية...هم يعني من عنصر واحنا من عنصر؟
لا مافيش كذا عنصر بس هي الاقليات والاكثريات بالعنصر بس؟ مش فيه مسلمين بعدد كبير ومسيحيين بعدد قليل؟ وللا احنا بنتبلى؟
مش ده تعداد؟ والتعداد ده بينتج عنه وضع اجتماعي؟ يعني لما اقول عدد المواطنين من سن تلاتين لخمسين اقل من عدد المواطنين من سن خمستاشر لتلاتين ابقى بعمل فتنة؟
عارفين في فيلم المليونير الفقير لما اسماعيل يس دخل مستشفى المجانين لقى راجل شكله طيب وعاقل وقعد يكلمه كلام ناس عاقلة وبعدين فجأة راح زاعق وقال: انا المجريييييييييي تشك تشك تشك تووووووووووووووت؟
اهو مصطفى الفقي عمل كده، بعد ما قال الكلام اللوز ده فجأة راح قايل والرئيس حسني مبارك ضد الطائفية لان كان عنده واحد صاحبه مسيحي بيذاكر معاه وام المسيحي كانت بتعشيه وتنيمه عندهم والدليل على كده انه عمل اجازة سبعة يناير وبقى يذيع صلاة الاحد في الفضائية
المهم على رأي النكتة اياها انا حاسة ان يد خفية تعبث في الشئون الداخلية وفيه استجابة شديدة من المواطنين لهذه اليد الخفية خصوصا لما يبقى احد اصابعها كمال مغيث وزغلول النجار واليد الخفية دي لا امريكا ولا اسرائيل دي الحكومة المصرية عشان نبقى واضحين يعني من الاخر
ولما نيجي نحلها مع بعض يقولوا لنا الفتنة نائمة لعن الله من ايقظها
طيب الفتنة مش نائمة وشاربة لها شوبين قهوة وفايقة ومصهللة وح تتفرج على فيلم السهرة وتشبك فيه الجزيرة هذا الصباح واللي يقول عليها نائمة يبقى هو اللي بيشخر او في غيبوبة واللي يبص بشكل بانورامي شوية على الامور يعرف انها ايادي مش ايد واحدة
ايد شغالة على المستوى الامني متمثلة في الاعتداءات على المسيحيين من اول الصعيد لحدت اسكندرية وراس التين ودي انا عارفة ومتأكدة ان وراها مكرونة فشامنة وكفتة على الاقل في الاول لحد ما الناس تتعود ان المسيحيين دول اللي بينضربوا فيعملوها بشكل تلقائي من غير مكرونة فشامنة
وايد وصلت لحد الرموز الثقافية اللي المفروض ان الناس بتثق فيها - وبلاش افصل في موضوع زغلول النجار ده عشان ما ازعلش حد مني عشان الكل ح يزعل - شوية يضربوا بكلام زي الكنيسة بتنصر وبتتآمر على الاسلام وزي بطلوا تلبسوا حجاب وتقولوا سلامو عليكو عشان المسيحيين ما يزعلوش! وشوية يلاقوهم ويقولوا كلام انا المجري بتاع مصطفى الفقي
وايد وصلت للاطفال في المدارس، على مجموعة الفاجومي واحدة مسيحية بعتت واقعة حصلت لها ان ابن اخوها دخل يعيط وقال لها العيال شتموني وقالوا لي يا مسيحي انت مش ح تلعب معانا، وفي نفس ذات الوقت واحدة صاحبتنا مسيحية بنتها اللي عندها تلات سنين قالت لاختها الكبير: ما تلعبيث مع المثلمين عثان احنا مثيحيين
طبعا امها اخدت الاجراءات المصرية المعتادة: ملخت لها دراعها وسفخت لها وشها وهي بتقول لها مين اللي قال لك الكلام الفارغ ده يا بت
قالت لها: قالوا لنا كده في الملّثة، راحت شداها من دراعها: اقفي عدل وكلميني مين يا بت اللي قالك كده في المدرسة (وهي بتبرق وحاطة مناخيرها في بق البت وبتقول لها متخافيش قولي) البت ابتدت تعيط قالت لها لو عيطتي ح اكلك على بقك قولي يا بت قالت لها العيال والميثات، فضمت السبابة والابهام على بعض وفردت بقية صوابعها التلاتة ووسعت تبريقتها وقالت لها طيب اياك اسمعك بتقولي الكلام الفارغ ده تاني ح قطعك كلنا ولاد ربنا انت عارفة لو قلتي الكلام ده ربنا ح يحرق بالنار اللي في البوتجاز وقررت تطلع البت من الحضانة في نص السنة سألتها جارتها اللي هي صاحبتي ليه فحكت لها راحت البت في نص الكلام قالت لها: لبنا ح يحلقني في النال اللي في البوتجاذ وراحت ضامة صباعينها زي امها وفردت التلاتة التانيين وقالت: اوعي اوعي تقولي مثلم تاني احنا كلنا مثيحيين راحت امها مالخة لها دراعها تاني: يا بت يا غبية باقول لك كلنا ولاد ربنا يا حمارة انت غبية؟ ما تقوليش مسلمين ومسيحيين راحت البت قالت لها ايوة المثلمين والمثيحيين وحشين
ومهما نفهم امها ان الضرب هو اللي خلا البت تفهم غلط كده وانها بتحاول تتقي شرها بالكلام ده مافيش فايدة
طبعا الام مش متآمرة دي ام مصرية عادية جدا وبتتخذ الاجراءات الامنية اللي بتتخذها كل ام مصرية متسببة في العقد النفسية اللي مالية المجتمع وفي الاساس جوزها هو السبب بس ده نبقى نتكلم فيه بعدين
مين اللي ورا ان العيال في المدرسة يقولوا لبعض يا مسلم ويا مسيحي؟ يعني كأننا عمرنا ما كنا عيال مثلا؟ وكأننا عمرنا ما لعبنا على السلم ولا رحنا مدارس
طيب انا عايزة حد يقول لي ان ابوه او المدرسة بتاعته قالت له ما تلعبش مع المسيحيين/المسلمين من فضلكوا عشان يمكن انا مجنونة وبيتهيألي
طيب انا باجدد دعوتي تاني واوضح وجهة نظري اكتر
ومعلش اعذروني في سيطرة فيلم الجزيرة على دماغي بس عشان اعرف اوضح كلامي
فاكرين في فيلم الجزيرة لما الظابط عشان يقاوم فشله في مواجهة الجماعات الاسلامية قام عمل اكبر تجار مخدرات وسلاح واداهم قوة عشان يلعب بيهم ولما ادوا دورهم قرر يخلص منهم؟
اهي الفتنة الطائفية دي كده
الدولة هي اللي عملتها، مش عشان تغازل التيار الديني والاخوان زي ما فيه ناس فاكرة ولكن عشان تواجهه وتواجه غيره كمان وتحكم سيطرتها على البلد يمين وشمال
ونمت الحس الطائفي واحنا شعب طول عمرنا ماشيين ورا فرعونا يقول يمين يمين شمال شمال، المسيحيين والمسلمين يقعوا في بعض يبقى يقعوا في بعض بمنتهى السهولة ازاي؟ ببعض الممارسات التميزية وشوية مكرونة فشامنة وكفتة وافقار الناس احسن وسيلة للسيطرة عليهم لان البني ادم بيبقى ماشي ورا بطنه بيروح ينتخب ببطنه وبيضرب المسيحيين ببطنه ويصالحهم كمان ببطنه
ويستخدموا كل التيارات لخدمة اهدافهم وبعدين يقرروا ان لحد كده كفاية نبتدي نشتغل في سكة تانية
عشان تعرفوا يا شعب مصر الحبيب ان التيار الديني تيار طائفي ح يعمل فتنة والتيار العلماني تيار لا ديني عايز يجردكوا من دينكوا وبيحارب الاسلام عشان ياخد دعم دولي من خلال لعبه في الملف الطائفي بما انه مش عارف ياخد دعم شعبي
والحقيقة التيارين قاموا بالدور المرسوم لهم على اكمل وجه كتر خيرهم الله يخرب بيوتهم كلهم
ما اعرفش ده تعمد وللا غباوة ان الاخوان يكتبوا في برنامجهم مافيش مسيحي ح يبقى رئيس ورموز التيار العلماني ليل نهار طالعين يقولوا للناس بوضوح وش كده احنا مش عايزين لا اسلام ولا مسلمين وبطلوا بقى الافكار الغيبية والخرافية دي لان الاسلام ده دين بايخ وبصراحة تدين المسلمين بيضايق المسيحيين!!!!! مع ملحوظة ان كل اللي بيتكلموا كده مسلمين اصلا يعني هو ايش عرفه باللي بيضايق المسيحيين؟
ومين الخسران في ده كله؟ مين اللي بيتلعب بمصيره ويتهشتك حبة فوق حبة تحت؟
ولاد البطة السودا....لا حد من الحكومة ولا من التيارات المعارضة انضرب ولا اتكسر له محل ولا مصالحه اتفشفشت على دماغه ودماغ اللي خلفوه ولا اتعذب له عيل في امن الدولة ولا اتقتل له ابن في القصب ولا اداس لهم على طرف
احنا اللي اتعمل فينا ده كله، واحنا اللي مصممين ما نحلش ولا نفتح بقنا ولما نفتح بقنا يقولوا لنا الفتنة نائمة لعن الله من ايقظها ما تفتحوش الملف ده دي فتنة مصطنعة وانا كان ليا جاري مسيحي وباحبه وانا طول عمري باكل عند المسلمين والكلام الخرا ده
طيب اهي الدولة قررت تفتح الملف الطائفي ومصطفى الفقي نفسه هو اللي بيقول....ح تعملوا ايه؟
ح تفتحوه طبعا....مش الفرعون ادى الامر؟ بس ح تفتحوه زي ما الفرعون عايز مش زي ما مصلحتنا تقتضي
فاستخف قومه فاطاعوه
No comments:
Post a Comment