عن اول يوم في استنبول

دي حسيبة والصورة اللي جنبها انا وزهراء ماهناز والدكتورة حياة

ودي الدكتورة حياة وزوجها والصورة اللي جنبها انا وحياة

بقى اللي عملوا المؤتمر هم مجموعة جمعيات أهلية
مش جمعية واحدة
كلها اسامي تركي بس اللي فاكرهم
كادين
استانة
واظن كاسبن كمان
والمؤتمر معمول على شرف وزيرة شئون المرأة نعمت شبوكشي
الجمعيات الاهلية هناك بتمول من قبل التبرعات والاشتراكات
عشان كده ما عندهمش فلوس كتير يفسحونا ويقعدونا مدة طويلة
حتى ما عزموش من برة تركيا غير اربعة
الدكتورة حياة المسيمي
عضو البرلمان الاردني
ربى المصري
عضو جمعية اهلية فلسطينية خيرية
زهراء ماهناز
صحفية ورئيسة سابقة لجمعية اهلية ايرانية لشئون المرأة
وخالتكوا نوارة
انا اول واحدة وصلت في المطار وما لقتش حد مستنيني لان الباقي كان جاي متأخر
فضلت ابص على الناس اللي رافعة لافتات
والناس عمالين يبصوا لي ويبتسمو
- ملحوظة: انا ما شفتش اتراك غير مبتسيمن طول الوقت لسبب مجهول-
بس الحقيقة ما حدش تطوع يسألني مالك
غير مين؟
ايون
اتنين عرب طبعا قعدوا يتفلسفوا ومسكوا التليفون بتاعي اللي كنت محولاه تجوال
وقعدوا يطلبوا نفسهم عشان يتأكدوا انه شغال
ويرغوا ويزبدوا وما عملوش حاجة
بس الحقيقة حسسوني بالونس لاني كنت ح اعيط
الحقيقة صحيح احنا كتير بنتدخل من غير ما نحل بشكل عملي
بس فكرة التعاطف والتضامن المعنوي اللي احنا بنعملها دي
فعلا بتفرق
يعني الاتنين العرب دول (اظن واحد شامي وواحد عراقي) ما يعرفوش بعض
وقعدوا يسألوني سؤال الملكين بمنتهى الاهتمام والجدية وحسسوني انهم ح يحلوا المشكلة
وقعدوا يروحوا ويجوا ويلفوا حوالين نفسهم وفي الاخر
قالوا لي: اسألي الاستعلامات!!!!!بس وربنا الشويتين اللي عملوهم فرقوا معايا معنويا
المهم جات واحدة اسمها فاطمة صغيرة كده وشبه شاهيناز صاحبتي
- كل الاتراك شبه شهيناز صاحبتي -
هي صحفية وبتشتغل في الجمعية الاهلية
وصلونا الفندق وقالوا لنا ناموا وبعدين ناخدكوا لفة صغير في استنبول:
انتم ترتاحون ثم تخرجون انظرون استنبول سريعا لانو وقت مافي
وكان يوم جمعة والدنيا زحمة عشان الناس خارجة تتفسح
السكة واقفة ولا كأن جمال مبارك عنده تشريفة في تركيا
شكيت لاول لحظة بس هم قالوا لي: الناس تخرجون تتنزهون
اللي استقبلتنا في الفندق وفسحتنا هي حسيبة توران
كانت عايشة في مصر وانا اعرفها من ايام ما كانت بتتعلم في مصر
شاورت لنا ع المسجد الازرق وقالت: انظرون المسجد ازرق لا تدخلون
قلنا لها يعني ما ينفعش حتى نبص
قالت: اذن ادخلون انظرون سريعا تصلون لا لانو وقت مافي
وكان معانا واحد تركي شكله سعودي برضه شاور لنا على السوق وقال: انظرون
هزا سوق المصريين كان المصريون يأتون يعملون يضلون في تركيا وهزا احفادهم بالداخل
اتراك من اصل مصري
ادخلون معنا انظرون اشترون بعدين
الحمد لله ان كان معايا ربى الفلسطينية
ربى دي بقى جوزها اللي اخدوه منها وهي لسة عروسة
محبوس بقاله ست سنين
ومسخرة
كل حاجة تسخر منها سخرية مرة
لما الايرانية قعدت تقول انهم عندهم فقر وانهم لازم يلتفتوا لمشاكلهم الداخلية اكتر
طبعا انا سمعت فقر فرحت بيني وبينكوا حسيت برضه بالونس وسألتها نسبة الفقر كام
قالت لي:
tventy percent on the borders of poverty
عشرين في المية على خط الفقر
الفلسطينية ضحكت وزغدتني: أنا مش ح اتكلم بقى
قلت لها: ولا انا بلاش فضايح
كركركر
الايرانية طبعا ما بتفهمش عربي بس فهمت احنا بنضحك على ايه وقالت لنا:
ve are a very rich country ve shouldn't have any poverty percentage
ve dont have israelis or......
وراحت مشاورة عليا
يعني احنا اغنيا ومش لازم يبقى عندنا فقرا واحنا ما عندناش اسرائيليين وشاورت على ربى
ولا عندنا...وسكتت وشاورت عليا
ما اعرفش كانت ح تقول ايه بس انا بقى الشوفونية اكلتني وقلت لها واحنا كمان بلد غنية جدا
اوعي تفتكري ان عشان ستين في المية تحت خط الفقر يبقى مصر بلد فقيرة
احنا بس....راحت الاردنية ضاحكة وقالت: احنا بس عندنا حرامية
على فكرة الاردن في طريقها انها تبقى زينا
الدكتورة حياة بتقول كده
من ساعة ما عملت اتفاقية مع اسرائيل سنة اربعة وتسعين
ومعدلات الفقر والبطالة في ازدياد وكل حاجة بتتخصخص
يجي واحد يقول لي ما الاردن طول عمرها بتتعامل مع اسرائيل في السر
اقول له بس ما كانش بموجب اتفاقية
حياة بتقول ان الاتفاقية خربت بيوت ناس كتير
زي ما خربت بيوتنا من زمان
المهم ان اللفة بتاعة انظر ايفت ادخل يوك دي
كانت فرصة كويسة ان احنا الاربعة نتكلم مع بعض
طبعا مش قادرة اقول لكوا الفلسطينية كانت مخنوقة مننا: انا طالعة ع المعابر عشرين ساعة
من شان اجي اسمع ها الحكي مرة تاني
ما بدي اسمع مشاكل ...عندك اغاني فيروز ع الموبايل؟
قلت لها: انا ما عنديش غير فيروز
منيح افتحي البلوتوث تبعك -
فتحت البلوتوث وبادور عليها لقيتها كاتبة اسمها: همي كبير
وريتني صورة جوزها ع الموبايل
وبعدين قالت: بلاها حكي بيوجع وريني شو عندك
زهراء ماهناز بقى الحقيقة في خطبة وبحث ميداني مستمر
يا اما تتكلم عن احوال ايران يا اما تسأل عن احوال البلاد التانية
اخر ما زهقت قلت لها تعالي لي بقى من خلال الشنطة: عندكوا تعذيب؟
قالت لي: طبعا
قلت لها احكي لي بقى
قالت لي الستات الشرطيات بيزعقوا لنا في الشارع عشان لبسنا
وربى الحشاشة تفطس على روحها من الضحك: يا حرااااااااااام شي بيمزع القلب
وياعني التانية تتنرفز وتقول: وعندنا اتنين مليون مواطن تحت خط الفقر
قلت لها : لا بقى ثانية واحدة اتنين مليون مواطن بس...معلش يعني اذا كنتوا مش عارفين
تحلوا مشكلة اتنين مليون مواطن انا اقدر احل لكوا مشكلتهم
استضيفوني تلات ايام وانا احط لكوا خطة في سنة احوالهم تتحسن
ابتسمت انها قدرت تقنعني انهم عندهم مشاكل وقالت لي: شفتي؟ انا كمان اقدر احل مشكلتهم
بس هم عندنا مش عارفين يحلوا المشكلة
وبعدين سكتت شوية وقالت: بس انا ما اقدرش اهاجم حكومتي برة ايران لان دي ح تبقى خيانة
انا باحب احمدي نجاد...بس فيه حاجات انا باخدها عليه لازم يعملها
الاردنية قالت بالعربي: ايه صحيح اذا بتحكي عن بلدها برة بدها قص رقبتها
قلت لها طب ما احنا بنحكي
قالت لي لا نحنا نحكي عن الحكومات هادي مش بلدنا
المهم عشان نهديها ونحسسها اننا حبيب مش عدو قلت لها: على فكرة سعد الدين ابراهيم
عمل بحث ميداني وطلع اكتر تلات شخصيات محبوبة في مصر نصر الله ومشعل ونجاد
والاردنية قالت لها احنا بنحب سياسيته ضد امريكا وراحت شداني ناحيتها: بدنا نقول لها كمان
انو نحنا ما عجبتنا سياسته بالعراق
قلت لها: ما تقولي
قالت: لازم نقول طبعا....وراحت باصة لها وقالت لها بالانجليزي: احنا فرحانين ان حدا منا
بيقول لامريكا لا!!!!وبنحب سياسيته ضد امريكا في الملف النووي
وتاني توشوشني: بس لازم نقول لها انو ما عجبتنا سياسته بالعراق
طيب انا ماليش مزاج انكد ع الست في موضوع العراق ده ما تقولي انت
طيب اكيد بدنا نقول لها
معظم جلسة انظر لا تدخل دي
كل واحد فينا كان بيغني على ليلاه
الايرانية زعلانة ان نجاد مهتم بالسياسة الخارجية اكتر من السياسة الداخلية
والاتراك زعلانين انهم بيتمنعوا من الدراسة لانهم محجبات
والاردنية نفسها تقول للايرانية مالكوا ومال العراق
وانا وربى قاعدين نضحك واقول لربى: مافيش منحوس اكتر من الفلسطيني غير المصري
تقول لي: لا والله نحنا منحوسين اكتر منكوا
اقول لها: لا احنا اكتر
لا نحنا اكتر-
كركركركر
الايرانية قالت انها لابسة شادور بارادتها وانها بتحبه
بس مش بتحب ان حد يغصب على حد في لبس الشادور
ربى كمان مش بتحب الرغي قوي في الاخر قالت: شو ها الرغي يا الله
كل ها الحكي على مين يقيم الحجاب ومين يحطو؟ اففففففف
افصلوا ده التلاجة بتفصل
هاهاهاهاها
مالحقتش اشتري من سوق المصريين اللي اول ما سمعت اسمه جريت عليه وقعدت اعيط
وابص في وشوش الناس واقول للراجل التركي: شكلهم مصري
يقول لي: ايفت...اجدادهم مصريين
والاردنية تضحك وتقول لي: شووووووووو عندكم بمصر حلوين هيك؟
زعلت وقلت لها: المصريين كلهم حلوين
ما تعرفش يا سيدي ايه اللي حصل جات لي شوفونية على كبر
رحت المسجد الازرق ولقيت برة مسلة مصرية
جريت عليها وقعدت اعيط واقول لهم: بتاعتنا بتاعتنا
والاردنية تضحك عليا تقول: المصريين المصريين
وربى تقول لي: ايه انا رحت مصر الصيف الماضي يا الله ما احلاها مصر
حلوة كتير
بصيت لها: حلوة؟
ايه والله حلوة كتير-
طبعا يعني واحدة بتقف على المعابر عشرين ساعة
لازم تشوف مصر حلوة
وبعدين قلت لها: اه مصر حلوة تعالي عيشي عندنا
ياريت مصر حلوة كتير والمصريين كمان-
كل اللي عرفت اشتريه من السوق المصري شوية حلويات
ولما حبيت ادي البياع بقشيش
كلهم زعقوا لي
مافيش غير ربى واخوها اللي ضحكوا وقالوا لهم: بس بالراحة
ما تعرف هي فاكرة حالها بمصر
هون مافيه بقشيش للبياع هههههههههههههههههه
انت اشتريتي منه ليش بدك تعطيه بقشيش تاني
قلت لهم: عشان ده بياع مش صاحب المحل اكيد صاحب المحل مش بيدي له مرتب كويس
هههههههههههه اكيد بيعطيه مرتب منيح نحنا هون باستنبول مش بمصر -
حسيبة قالت لي: هكذا بقشيش يجعل بياع لا يبيع الا اذا اخذ رشفة (يعني رشوة بس هم مش بينطقوا الواو)
طبعا اخدتني الشوفنية تاني وقلت لهم: ده تكافل مش رشوة
بس هم ضحكوا ما اعرفش ليه
وبعدين حسيبة قالت لي: بس شراء حلفيات كفاية خلاص نحن نذهب
ذهبنا وركبنا مركب في البسفور
طبعا قعدت اتشاهد وكنت خايفة وايمن اخو ربى قعد يعمل طرزان ويقف ع السور
وانا اصرخ
واتشاهد وانا باركب
واتشاهد وانا بانزل وحسيبة قالت لنا: نحن نركب سفينة ننظر بسفور ننزل نركب سيارة نمشي
لا شراء انظر فقط
لا صلاة في مسجد انظر فقط
لا تضييع وقت
وقت مافي
طبعا حسيبة اخدتنا على مطعم على البسفور واكلتنا سمك
شفت اتنين شحاتين اطفال لما نزلنا من المركب
عند المسجد عنيهم زرقا
دول الاتراك الوحيدين اللي عنيهم زرقا شفتهم هناك
جيت اديهم فلوس حسيبة زعقت لي: لا تعطيهم وقعدت تكلمهم بالتركي وتفههم ان الشحاتة غلط
ربى زغدتني تاني: شايفة شو لابسين الشحاتين...احسن مني ومنك
هاهاهاهاها
استنين لما حسيبة ادورت ورحت مدياهم فلوس
قوم البت العيلة بصت في الفلوس وزعقت لي
ربى قالت لي : تستاهلي ...في حدا يشحت اتراك؟
المهم انا ما همنيش انها تزعق لي انا كل خوفي ان من زعيقها حسيبة تعرف اني اديتهم فلوس
الحقيقة انا عمري ما شفت شحاتين بالشياكة والنضافة دي الظاهر اني اديتها حاجة قليلة مش مقام الهانم التركية
حسيبة قالت: نذهب لان عندنا غدا المؤتمر من الساعة العاشرة والنصف
اخدنا في السكة ساعتين بالظبط زحمة بطريقة جنونية
قلت لحسيبة: مافيش طريق يخرم منه؟
قالت لي: يخرم ايش
قلت لها: يعني يختصر منه الطريق...ما عندكوش صلاح سالم طيب؟
ضحكت وقالت لي: لاااااااا هذا الطريق هوفا الطريق الفحيد للفندق مافي يخرم ولا صلاح سالم
وصلنا وحسيبة نبهت علينا اننا لازم ننام بعد العشا على طول عشان نصحى بدري
انت تنامين كثيرا؟-
يجب ان تنامون مبكرا وتصحون مبكرا
انت تعبنا كثير لكي نوقظك حتى تخرجين معنا في النزهة
وكنت سأذهب واتركك ولكن قلبي قال لي لا غدا تصحين مبكرا منشان المؤتمر ستتكلمين الاولى
طيب؟
قلت لها: طيب يا حسيبة
حسيبة بقى دي هانم تركي مؤدبة بس بتتكلم بإدارة كده
وطيبة جداااااااااااااااااااااا
الحقيقة كل اللي شفتهم هناك اتراك طيبين جدا
بس يعني مافيش فرق كبير بينا
مش ناس غريبة يعني
عاملين زي الناس المتربيين اللي عندنا في مصر
حسيت اني في فرح حد من قرايب امي يعني
البلد كلها عبارة عن فرح حد من قرايب امي
يقفوا في الطابور وما ياخدوش مكان حد
ويعدوك الاول: تفظل تفظل
ما بيعرفوش عربي ولا انجليزي
يكلموك تركي ولما ما تفهمش يتكلموا بالراحة تركي برضه عشان تفهم
بكرة بقى ح اتكلم عن فاعليات المؤتمر ان شاء الله