أنا مسافرة الليلة دي والاعمار بيد الله

انا مسافرة الليلة دي تركيا ان شاء الله
السفرية جات فجأة وعرفت بيها قبلها بكام يوم عشان كده كنت باخرج صبح وبعد الضهر عشان اخلص الورق بسرعة
ان شاء الله ح احضر مؤتمر عاملاه مؤسسة كاسبن النسائية عنوانه المرأة في مواجهة العولمة
ادعوا لي ربنا يوفقني ويبقى العمل خالص لله
ده اولا
ثانيا : بقى هالله هالله ع الجد والجد هالله هالله عليه
الاعمار بيد الله والرسول امر برد الحقوق والمظالم والوصية عند السفر
انا بقى ان شاء الله مسامحة اي انسان ليا عنده حقوق مادية او معنوية
من اول كلمة قالها في حقي في وشي او من ورايا
لحد اكبر اذية اتئذيتها من اي انسان عايش او ميت (حتى السادات: فيما يخص حقوقي الشخصية عنده بس)
مرورا باي حقوق مادية (ديون – امانة – سرقة)
وطبعا اللي يعرفوني يعرفوا قد ايه انا غلاوية والقرار ده يبقى صعب عليا قوي
بس الحقيقة انا ما بقتش طيبة جدا يعني عشان انا مسافرة والاعمار بيد الله
بس انا باقدم السبت
عشان اي انسان له حقوق عندي
اذا كانت مادية (ديون – امانة – وما افتكرش اني سرقت حاجة من حد)
ياريت ياخدها مني دلوقت او من اهلي (بابا وماما) وانا مسافرة وسواء عايشة او ميتة
واللي له عندي حقوق معنوية ايا كانت من اول الكلمة لحد اللكمة
او اي انسان ظلمته بقصد او من غير قصد
في وشه او من وراه (بما اني نمامة درجة اولى) يسامحني
خصوصا لو مت
ولو مش عايز يسامحني يبقى منه لله بقى
يعني مش معقول ابقى ميتة وما يسامحنيش
مش بااااااااارضه
دي الوصية العامة
الوصية الخاصة موجهة لصحابي
والحمد لله هم كتير
عشان كده مش ح الحق اكلمهم كلهم دلوقت
يا شباب
أنا كاتبة الوصية بتاعتي وحاطاها في الدرج التاني في مكتبي اللي عليه الكمبيوتر في اودتي
من ضمن الوصية ان متبرعة بكل ما يصلح من اعضائي
بس بلاش مخي ولا لساني عشان ربنا ما يحاسبكوش
بشرط ان الطبيب ما ياخدش مقابل على اعضائي خالص
وياريت تنقوا طبيب طيب يتبرع هو كمان باجره
وياريت الاعضاء دي تبقى من نصيب واحد فقير
طبعا كل ما املك من حيطان الدنيا
الا وهو الكمبيوتر والموبايل والهدوم وفقط
يا تتبرعوا بيهم للفقرا يا تبيعوهم وتتبرعوا بتمنهم!!!! مش عايزة تريقة عارفة انهم مش ح يجيبوا حاجة
خلاص اتبرعوا بيهم
طبعا انتوا اللي ح تشرفوا على موضوع التبرعات دي لان ماما وبابا مش ح يبقى فيهم دماغ
العربية عليها اقساط ح تخلص سنة 2009
طبعا الاقربون اولى بالمعروف اذا حد من اخواتي او اهلي عايزها ياخدها
اذا عملوا فيها عواطفجية وقالوا ما نركبش عربية نوارة بعدها
يبقى تدوها لعماد الكبير
يقلبها تاكسي
ويكمل بقية الاقساط هو
اذا كان يقدر ع الاقساط اظنهم 400 جنيه
اصل المرتب بيتحول ع البنك
الباقي من تحويل المرتب برضه لعماد الكبير لو ح ياخد العربية عشان يسدد الاقساط بيهم
او يعمل بيهم اللي هو عايزه
لو عماد قال انه مش محتاجها
شوفوا اي عواطلي يقلبها تاكسي ويشتغل عليها
بس لازم يكون غلبان وضاربه السلك
ملحوظة: لما العربية تعطل منه حذاري ثم حذاري يدعي عليا
ويقول ربنا يجحمك مطرح ما رحتي دي عربية دي؟
تاخدوا بالكوا من بابا وماما واخواتي
ثالثا: محاكمة اسلام نبيه الشهر الجاي
لو ما كنش ليا عمر احضرها لازم حد يحضرها ويسجل كل حاجة بالموبايل بتاعي وبعدين بعد ما ينزلهم
ع اليوتيوب ويبقى يتبرع بالموبايل زي ما هو عايز بعد كده
رابعا: قانون التأمين الصحي
لو مت وعدى من تحت شنبكوا يبقى عيب عليكوا
لو عشت وعدى من تحت شنبنا يبقى عيب علينا
الحملة بتاعة التأمين الصحي أمانة في رقبتكوا
خامسا: لو مت وحد فيكوا متخانق مع التاني تتصالحوا
وكل واحد عارف نفسه
وخيرهما من بدأ بالسلام

لو عشت بقى
يبقى ح نيمك من المغرب يا تركيا

يا خوفي ما متش واعيش واتورط في التسامح ده كله

ملحوظة أخيرة: وصيتكوا وائل عباس يا بتعة

خلوا بالكوا منه عشان شكلهم كده بيدبروا له حاجة حقيرة

على رأي خالد البلشي: الأمر مدبر له بليل

ولو بعد الشر جرا له حاجة

يبقى مافيناش ولا راجل بقى

بما فيهم انا

ولو إني باتنشق على الموت عشان اخلص على الاقل من اشكال معينة

الا اني لو اتمنيت اعيش

يبقى بس عشان اللي يهوب ناحية الناس المحترمة

اللي زي وائل عباس

اكل دراعه

مراقب مصري

شايف ده

وصيتك برضه

لحد ما ارجع ان شاء الله

ولو ما رجعتش

وصيتك برضه

انت فاهم ها

وش بيغمز