إعدام التوربيني وسؤال للمجتمع المدني

هو مافيش استئناف للتوربيني؟
وللا عشان غلبان؟
الواد اول ما سمع الحكم شتم الظابط وقال له: كنت بتأكلني كباب وكفتة عشان تضحك عليا؟
فين الناس يعني؟ وللا عشان الرأي العام ضده يبقى ما حدش يقف له؟
انا مش ح اقول مين اللي قال ان واد اهبل زي رمضان ممكن يكون فعلا عمل كده
ولا ح اقول ان الحكاية من اولها لاخرها شكلها هجص في هجص
ولا ح استغرب من موقف القاضي اللي شاف بعينه العيال وهم بينضربوا بالقفا في قفص الاتهام
واكتفى بانه يقول للظابط: انت فاكر نفسك في القسم؟
انا ح افترض ان عيل مرمي في الشارع متخلف عقليا بشهادة الحكومة
وعيال تانية معاه تربية شوارع بياكلوا من الزبالة واهاليهم والمجتمع رامينهم
وفعلا قتلوا واغتصبوا
مش فيه حاجة اسمها ظروف الجريمة؟
ماحدش يقول لي القاضي مالوش دعوة بان العيال دي تربية شوارع وضحيتنا كلنا
لا له دعوة
اشمعنى لما واحد بيقتل مراته عشان شاكك في سلوكها بيخففوا عليه الحكم؟
اشمعنى ظابط يعذب مواطن وياخد براءة وللا ست شهور يقضيهم في مستشفى الشرطة
ويخرج بعدهم يتكرم في عيد الشرطة ويترقى؟
واشمعنى المحامين اللي واقفين مشكورين بمواقف مشرفة
مطنشين على العيال دي بالذات
يعني هي عشان مش قضية سياسية ماحدش يسأل فيهم؟
وللا عشان الرأي العام ضدهم ماحدش عايز يقلل من رصيده عند الناس؟
افهم من كده ان كل مواقف منظمات المجتمع المدني مبنية على حسابات سياسية؟
ايه؟
ايه؟
ايه؟
عيال ح يتعدموا
ما حدش فكر لو مات وعياله فجأة مالهمش حد ممكن يبقى مصيرهم زي العيال دي؟
ما حدش فكر ازاي فرج سمير اللي لسة عيل ح يواجه حبل المشنقة ازاي؟
ماحدش فكر يحاسب المسئولين الحقيقيين عن الجريمة دي
ده اذا كان التوربيني فعلا هو اللي عملها مع عصابته المزعومة
انا مش فاهمة يعني متخلف عقليا يبقى زعيم عصابة ازاي؟
وازاي واحد عبيط بحكم المحكمة ياخد اعدام
وايه السرعة دي في الحكم على العيال
ده احنا طالعان عينا مع اسلاك نبيه
وكل شوية تتأجل
فيه شوية اسئلة لازم نطرحها
ايه الاهتمام المفاجئ باطفال الشوارع ماتوا وللا عاشوا
كل الضحايا اللي المفروض ان التوربيني قتلهم كانوا من اطفال الشوارع
اللي ماحدش بيسأل عليهم
ايه بقى
مين اللي سأل عليهم دلوقت
وسأل عليهم ليه؟
ما العيال دي بتموت في حوادث
وبتموت من الكلة
وبتموت من الاكل في الزبالة
وبتتفعص وهي نايمة تحت عربية
وبتتعجن وهي نايمة في كومة زبالة
وبتنضرب من الظباط لحد ما تفطس وتموت
وبتتشيل قضايا
وبتتاخد للمساجين المتريشين عشان يمارسوا معاهم الجنس
بعلم الظباط
فجأة التوربيني بقى هو المجرم الاثيم والقاتل اللئيم؟
يا سادة يا متطوعين
محدش دريان بالعيال دي ليه؟
سواء كانوا فعلوا هذه الفعلة او لا
ما يستاهلوش اعدام
حتى لو كان التوربيني مش عبيط ولا متخلف
حتى لو كان اعترف من غير كباب وكفتة وضرب بالقفا
حتى لو فعلا عمل كده
ما يستاهلش اعدام
واهم من ده كله
يستاهل متطوعين يدافعوا عنه ويستئنفوا الحكم
وياريت ما الاقيش واحد طالع لي يقول لي الجملة الغريبة اللي باسمعها دايما من الاخوة
اللي "بيلعبوا سياسة": قضية التوربيني الهدف منها الهاء الرأي العام وتشتيت الانتباه عن
الخطوات الاصلاحية
هئ هئ هئ
على أساس ان الرأي العام دريان اساسا ببتوع اللعب بالسياسة وفي السياسة
دول لو لعبوا في مناخيرهم الناس ح تاخد بالها منهم اكتر من كده
ريهام سألتني سؤال محرج قوي
ريهام صاحبتي اللي هي سونيا
قالت لي: هو ايه المعيار اللي بيحرك الناس
مش الدفاع عن الحق والتصدي للباطل برضه؟
ارد اقول ايه؟