عمر الشقي بقي
للأسف جيت
ايه بقى؟
ينفع ارجع في موضوع التسامح ده وللا ايه؟
انا رجعت النهاردة الفجر ولسة دماغي بتلف لان السفر بقى بيوترني
فين ايام الشباب لما الواحد كان يقعد تمن ساعات صاحي في الطيارة يتفرج على فيلم
امريكاني بايخ اربع مرات
ياللا بقى العمر بيجري ومش عايز يخلص
المهم
المؤتمر كان كويس والله وكان فيه على هامشه شوية حاجات كويسة
مش ح اقدر اعمل له تغطية طبعا دلوقت مافياش دماغ
لما اروق كده ابقى اكتب التغطية
دي شوية صور ولنك لفيديوهات المؤتمر
مؤقتا كده لحد ما اغطيه كله
ان شاء الله
الغريبة يا اخوانا
اني اكتشفت اني دماغي مش مظبوطة
ما غبتش غير يومين ونص عن البلد الوسخة دي
واول ما شفتها من الطيارة قعدت اعيط واسقف زي الهابلة
تقولش شفت كونتا كينتي
وطول ما انا هناك الشوفونية واكلاني
واول ما شفت المسلة المصرية جريت عليها
حتى لما قدموا لنا في المطعم شوربة عدس
قعدت اقول: الله عدس
this is egyptian food
it is mentioned in the quran
ولانهم ما بيفهموش انجليزي
قلت لهم بلغة سبيس تون: هذا طعام مصري
عدس عدس
مصري
مذكور في القرآن
وهم برضه يعني مش بيعرفوا عربي
لا وفخورة قوي ان العدس مصري
وقعدت اكله واقول:الله الله
تقولش كفيار وللا فواجراه
سجلت كلمة الدكتورة حياة الموسمي من الاردن وربى المصري من فلسطين
وحاولت انزلهم ع اليوتيوب قال لي
the video is too long
مش عارفة احلها ازاي
لان الكلمتين مهمتين جدا
ياريت حد يقول لي احلها ازاي
الكلمة بتاعتي اللي سجلها واحد ما عرفش يتصرف في الموبايل
فسجل حبة صغيرة
ممكن تبقى مش واضحة
بس عموما اللنك بتاعها اهو
فيه فيديوهات تانية كوميدية شوية
يعني شوفوا الكناس عامل ازاي؟
وفيه فيديوهات وصور تانية ح ابقى انزلها مع التغطية
20 comments:
حمدلله على سلامتك يانورا ومستنين التغطيه بتاعت المؤتمر انا هتسلى فى الفديوهات ديه دلوقتى ومستنين التغطيه الكبيره
سحمله عالسلامه
يا جي مالسفرررررررررر
واحشانا تادويناتك وشك ولا القمررررررررررررر
سحمله عالسلامه يا جي مالسفر
بعد المقطوعه الغنائيه الترحيبيه
جبتيلنا ييييييييه من هناك :D ??????
------------------------------
لامؤاخذه يعني انا وجب عليا ان اكتب جمله اعتراضيه على العدس
وإن كنا لا نملك إلا هو في الوقت الحالي
و لكني كنت اتمنى ان اكون هذا البرجوازي الرأس مالى آكل الكباب و الكفته ( كان ممكن ربنا يذكر الكفته كانت تبقى اطعم حتى )
هههههه
ألف حمد الله على سلامتك يا أحلى نوارة في كل النواوير... يا بنتي مصر مستنياكي على أحر من الجمر وفيه مواضيع ساخنة كانت منتظرة تناولك التهييسي ليها وعلى رأسها بالطبع موضوع الموظفات والموظفين والرضاع لأجل لأجل التحريم وعضوية مصر في القعدة الدولية لحقوق البني آدمين بأغلبية منئطعة النزير... دا غير بلاوي سودا تانية كتير من العادية اللي بتحصل كل يوم وكنا مستنيين تدويناتك بس الحمد لله أديكي رجعتي بالسلامة ومش هنشيل هم تنفي وصية بقى ولا نيلة... أنا كنت خايف أصلا الواد عماد ما يرضاش ياخد العربية وكنت أتدبس أنا في اقساطها
هههههههههههه
حمد الله ع السلامة
وأتمنى تكوني انبسطتي
أولا حمد الله على السلامة يا ستى
ثانيا، إنتى ملكيش سفر أصلا، أنا قريت البوست اللى فات حسيت غنك مهاجرة، طلعتى فى الآخر مسافرة يومين؟!!!!!
إنت بعد كده يجيبوليك المؤتمرات لغاية عندك، يدل ما كل مؤتمر حتتحفينا ببوست تقشعر له الأبدان بالشكل ده
:)))
على العموم حمدالله على السلامة يا معلمة، بعد السلام و الحاجات دى، انا بضم صوتى لصوت اخويا "يسارى مصرى"و اسأل سؤال رخم، هوه إنتى جبتلنا إيه بقى من هناك؟
aywa sa7 ana m3a believer antee malkeesh safar ante yabntee gabtlnaa azma akta2abaya :D
gabtee le lolo eh man hnak b2a ??
we gabte eh lel wad gaber we beliver we mak we sharkawy we kol el el nas de ....
a7eee shklak asln 7'lsatee el shonat 3lena :D
حمدالله علي السلامه يا نواره
وفي انتظار ابداعك
عدس؟
فضحتينا
انا قلت هتنحرفي وتاكلي كباب اصلي
انت فعلا ما لكيش سفر تانى لان المفترض تعيشي في الاتموسفير بتاع المكان وتنسي ال....اللي جاية منه
حمد لله ع السلامة
الف حمد لله على السلامة وبمناسبة رجوعك انا عملت اهداء للريس حسحس على مدونتى ابقى تعالى شوفيه
حمد لله على السلامة يا نوارتي
الحمد لله إنك رجعتي بالسلامة
عشان نكيد الاعادي
و انا اقول مصر منورة ليه ؟؟
أنا طلبت نوجا وانا الوحيد حضرتك اللى قلت انك راجعه راجعه لإن دى مش خلق ربنا ياخدها كده فى ملحمة سفر صغننه انتى تموتى فى انفجار نووى، هجوم فضائى، نشوب حرب عالمية تالته، حاجه كده من اللى تنذكر فى التاريخ مش سفريايه لحد تركيا البلد
كامون
الحمد لله على سلامتك...و يحيى العدس العربي الأصيل، أنا مشتاق و عندي لوعة و الله للعدس وحشة و لك وحشة (:
الف حمد لله على سلامتك
نورتي مصر وضلمتي تركيا
وحشتينا اليومين دول
في انتظار كلامك الجميل ( اللي بيوري لنا الدنيا
(وردي وردي وردي
ودمك اللي زي العسل
سلام يا قمر
حمد لله على السلامة
بس على فكرة موضوع التسامح خلاص مينفعش ترجعى فيه اتثبت كده
وإن شاء الله نشوف منك زى ما اتعودنا تغطية ممتازة
نورتى بلدك يا قمر
حمدا لله ع السلامة, نورتي من ثان
حقا, لكل من إسمه نصيب
:)
تحياتي
7amdellah 3la elsalamah :)
as for the video too long... u might be able to upload long videos if you open an new account as a director not a normal user
~t
انا بجد مع كل الكلام اللي قالوه الاخوة الباقيين بقولك ايه بلاش تروحي في حتة احسن بدل ما كل ماهتروحي يومين في حتة تشيلينا همومك يا بنتي انا حسيت اني خايفة عليكي مترجعيش بجد و حمد الله على سلامتك masreya-2awy.blogspot.com
اريحة تركيا؟؟؟
علشان تاكلى عدس.
هايل بجد
المهم بلاش اكتب لانى ميت من الضحك واكيد هتريق
فاية
حمد الله على السلامة وبس
حمدلله على سلامتك يا نواررررررررررررررررررررررررررررررة
و الله و كان ليكي واحشة....
يا ستي ارجعي عن موضوع التسامح عادي بس يا وليك لو رجعتي عن موضوع العربية .. أنا أخدت قرض من البنك عشان أسدد الاقساط.. لو مخدتش العربية أنا بهددك أهو هتكوني سبب هروبي من البلد من غير ما أسدد القرض.. و ذنبي في رقبنك.....
حمدلله على سلامتك تاني يا جميــــــــــــــل
حمد لله علي السلامة يا أستاذة
طبعا ممكن تترجعي عن التسامح هي ديه خلق الواحد يتسامح معاها
اما موضوع العدس ده فكرني بأول مرة أكل فيهل كفييار في مؤتمر تبع وزارة الاوقاف وكان طعمه وحش ولقيت حاجة تانية شكلها غريب وكانت حلوة أوي وطلعت في الاخر بابا غنوج
بحري من اسكندرية
السلام عليكم
حمدا لله على سلامتك...قمت من النوم الصبح بافتح التليفزيون لاقيت إنفجار فى أسطنبول...بجد قلقت عليكى جدا وفكرت هاعمل أيه علشان أطمئن عليكى...وأنتى عارفة أنى فى غربة ...بس كويس ربنا هدانى أمر عندك
طبعاأسطنبول جميلة وحلوة وياستى أديكى رجعتىياريت تفضلى متسامحة مع كل الناس اللى سامحتيهم
Post a Comment