يا خير أجناد الأرض: رجالتنا ماتت هنا

رجالتنا ماتت هنا
رجالتنا ماتت هنا
وعيالنا ماتت هنا
واحنا ح نموت هنا
ح نموت هنا

احنا بقالنا الف سنة هنا

ولادنا ماتوا وردمنا عليهم هنا

ح نموت هنا
ده كلام فلاحة من القرصاية، كانت بتصرخ في وش الجيش المصري
الجيش المصري بتاعنا....آه بتاع حرب تلاتة وسبعين
الجيش اللي اتقصقصت ضوافره عشان السيد الرئيس السادات "مش عايز ولادي يموتوا"
"no more war"
حرام عليك يا محمد عبلة انت ومينا وعبده البرماوي...باقول لكوا عندي اكتئاب..دخل عبده البرماوي قال لي روحي عند مينا، رحت عند مينا بحسن نية الاقيه منزل فيلم لمحمد عبلة عن جزيرة القرصاية، والجيش المصري باعت لواء للفلاحين عشان يجرف اراضيهم ويردم النيل ويطردهم برة اراضيهم.

http://www.youtube.com/watch?v=38EXk57sJ6w&eurl=http://egyptwatchman.blogspot.com/

اظن اللي متابع شوية مدونتي يعرف مكانة الجيش المصري عندي شكلها ايه، ده انا لما بامشي في الشارع وبالاقي اي حد من الجيش المصري من اول العسكري للواء باقف واحيي تحية عسكرية وبيفتكروني مجنونة.
كده برضه يا خير اجناد الارض؟ بقى راجعين راجعين شايلين في ايدكوا سلاح ...على الفلاحين؟
شباب القرية حفروا قبورهم بايديهم وناموا فيها وقالوا: مقابر جماعية هنا في مصر...احسن لنا
واحد من الفلاحين قال: ده انتوا لو رايحين تحاربوا اسرائيل ما بتقدموش لواء كده على طول بتضحوا بالعساكر الاول
آه....ما تلاقي اخوه وللا ابوه كان عسكري ونضف ارض الكنال من الالغام بجسمه وراح شهيد

اسرائيل ايه يا عم الحج...احنا عاملين سلام دلوقت وبناخدهم بالحضن وبنبوسهم وبكرة نلاقيهم مع حريمنا في... حمام التلات...انت لسة فاكر ياعم الحاج؟
الاهالي وقفت قصاد جيشها المصري، اللي كنا في يوم من الايام راكنين عليه، وهم بيصوتوا في وشهم: يا كفرة
يا كفرة
يا اسرائيل يا ولاد الكلب
سيبتوا ايه لبلدكوا يا ولاد الكلب
يا كفرة
يا كفرة
---
عبلة بيتساءل من المسئول عن اهانة قواتنا المسلحة والزج بهم لرفح السلاح على الفلاحين العزل
الفلاحين....اهاليكوا يا قواتنا المسلحة
وللا حضرتك من يا دفعة اصولك من النرويج؟ مش الدفعة فلاح برضه؟
بس معلش يا استاذ عبلة ومع احترامي للتساؤل بتاعك انا مافهمش كده خالص
مافهمش يعني ايه مقاتل من الجيش المصري يجيله امر بغزو قرية مصرية وتجريفها وردم نيلها ورفع السلاح على نسوانها وعيالها
وينفذ الامر
تحت اي بند وتحت اي تهديد
مهددينه بايه يعني؟ يترفد من القوات المسلحة؟ ما بالسلامة يعني والقلب داعي لهم
اذا كانت شغلانة الجيش دلوقت انه يخرب بيوت الفلاحين وممنوع عليه يهوب ناحية الحدود مع اسرائيل
يبقى ايه فايدة انه يفضل في الجيش اصلا؟ يروح يزرع وللا...اه سوري انا ناسية ان الزراعة ممنوعة

خلاص يروح يفتح كشك سجاير والا انه يشتغل في الجيش عشان يعمل "فتوحات" للقرى المصرية
اعترض وما تنفذش ابدا يا عسكري
اعترض وما تنفذش يا عسكري
اعترض وما تنفذش يا عسكري
مالكش اي عذر يا عسكري
التاريخ مش ح يسامحك يا عسكري

ولا اهلك ح يسامحوك يا عسكري

ولا انا مسمحاك ابدا يا عسكري

ابدا...ابدا...ابدا

وطي راسك يا عسكري

واكسر عينك يا عسكري
ياللي البيادة بتاعتك وبتاعة ابوك وجدودك كانت في يوم من الايام على راسي وراس اهلي وراس جدودي من فوق