كاتبين النهاردة في الاهرام ان بابا رايح احتفالية جيفارا
اتصلت بيه وقلت له: بابا هو انت نازل النهاردة؟
قال لي: لا ح انزل اروح فين؟ انت عايزة تنزلي في حتة؟
قلت له: لا اصل كاتبين في الجرنال انك رايح احتفالية جيفارا النهاردة
قال لي: يا بنت الكلب ابوكي كتب عن جيفارا ايام ما كان اسمه ممنوعات بتسجن
لكن جيفارا اللي بيكسب فلوس ده انا ما اعرفوش
انا مالي بالكلام ده انا راجل فقري
====
يا بتوع نضال آخر زمن في العوامات جيفارا مات من اربعين سنة وشبع موت
ودلوقت فيه ناس بتموت ودمها سخن لسة ما شرباش التراب
تقدروا تعملوا لهم احتفالية؟ وللا احتفالية باسم المقاتلين دلوقت توديكوا السجن
لكن جيفارا دلوقت بقى حاجة لطيفة وظريفة وسلعة استهلاكية
تعملكوا مناضلين من غير ما تدفعوا تمن؟
والنبي لما عرفت مين اللي رايح النهاردة فطست على روحي من الضحك
من ضمن الاسماء ناس كتبت على حزب الله انه الوجه الاخر للعملة الصهيونية
وناس تانية كانت مساندة تماما لحصار الفلسطينيين عشان تجرأوا وانتخبوا حماس
وناس تالتة بيضان ما وراهمش حاجة غير يلصقوا الارهاب
بكل من استجاب لـ"صرخة جيفارا" يا عبيد
يا عبيد
يا عبيد
وناس رابعة بهلولة وهابلة واي حد يبيع لهم ميدان العتبة يشتروه بشقى عمرهم
عشان كده طظ في جيفارا بتاعكو ا اللي لا يـ...ولا يخلا من النجاسة
لان جيفارا الحقيقي واللي اسمه بيسجن - على رأي بابا - مات من اربعين سنة
ودلوقت فيه اسماء كتيرة بتسجن ولا يقلوا عن جيفارا ويمكن يزيدوا
انا شخصيا ما احبش اتسجن ولا حد في الدنيا يحب يتسجن غير ابويا
واذا كان ذكر اسماء زي فتحي الشقاقي اللي ذكراه عدت
وللا يحيى عياش وللا الشهيد هادي حسن نصر الله وللا عبد العاطي صائد الدبابات
اللي مات في مستشفى منيا القمح بلده لان مراته مش معاها حق كيس الدم
وللا سليمان خاطر اللي انتحروه في السجن الحربي في عز الضهر والشمس طالعة
(ملحوظة ابويا هو اللي ملاني الكلام ده بالتليفون وبيقول لي على الباغي تدور الدوائر)
اذا كان ذكر الاسماء زي دي وغيرها بيسجن بلاش نجيب سيرتها
بس ابسط قواعد احترام كفاح الناس اننا على الاقل ما نتاجرش بيهم
وجيفارا ما ماتش عشان بعد اربعين سنة التجار يكسبوا من وراه
في المطاعم ومحلات الهدوم والاعلانات والاستعلامات
يا انتيكات يا دفيانين ومولعين الدفيات
(ابويا بيقول اكتبي اصفخص عليكوا انا ماليش دعوة)
===
ملحوظة تانية: بابا ما بيقراش نت طبعا وما يعرفش الباللو اللي كنت عاملاه
وبصراحة انا ما اتناقشتش معاه في الموضوع ده لاني كنت فاكرة ان كلامي ح يزعله
وهو لسة كان خارج من ازمة صحية بس لما اتصلت بيه اسأله على احتفالية جيفارا
لقيته متنرفز ومتغاظ واول مرة يتدخل في اختياراتي ويقول لي: اياك تروحي
قلت له انا مش رايحة وما كنتش رايحة من قبل ما انت تقول
وما كنتش اعرف انه متغاظ زيي كده واتفاجئت برأيه
الراجل ده الظاهر ابويا وللا حاجة
No comments:
Post a Comment