عشان بلال بقاله مدة بيشتغل في مسلسل مهم جدا، انا مش في حل اني اقول موضوعه عشان ما حدش يلطش منه الفكرة لانه شقي جدا في المسلسل ده، وصرف على المسلسل كتب ومراجع وابحاث ومصادر كتير قوي
وكان المفروض انه حيتعاقد مع قناة الحياة عشان يعمل المسلسل ده، وبعد موضوع الدستور رفض التعاقد مع القناة وهو لسه رجليه سايبة في الهوا، واديه اهو، حاطط الشغل جنبه وما يعرفش مين حينتجه له، وقال لسيد البدوي انت غير جدير بانك تنتج مسلسل زي ده
اما بخصوص تخاريف سيد البدوي الليلة على الهوا بخصوص بابا فالرد حيكون اقوى مما يتخيل ان شاء الله
هم الاخوة بتوع كاميليا مش حيعملوا مظاهرات عشان قناة الناس؟ ولا احنا اللي حنتدبس فيها لوحدنا كالعادة؟ ولا عشان قناة الناس ما بيشتغلش فيها ستات واعلاناتها كلها كان بيعملها اتنين موظفين ببدل بيعلنوا عن دستة كوبايات وطقم ملايات؟ هههههههه والله حرام، طب على الاقل ده قطع عيش ناس كانت بتسترزق يعني وفاتحة بيوت
الفلاحة ماتت ولازم نسلم نفسنا
كانوا زمان يقولوا: اضرب المربوط يخاف السايب
وده مثل ساذج، النظام المصري عمل بحكمة: لو عرفت تقفش السايب وتخليه عبرة، المربوط حيعمل بيبي على روحه، روح هات له بامبرز
بعد قفل الدستور وعزل ابراهيم عيسى تعسفيا، الا وهو السايب في هذه البلد، بدأت النقنقة في المربوط
1- قانون جديد يحظر على الصحف تغطية الجرائم الماثلة امام القضاء، حفاظا على سمعة مش عارفة مين، وعدم حضور الصحفيين تصوير المتهم البريء حتى تثبت ادانته الخ الخ الخ
وقبل ما واحدة مغيبة ومش دراينة بالدنيا ومش شايفاها غير من ورا ازاز عربيتها المكيفة تقول لي: صحيح، الصحافة زودتها قوي، وبقت تشهر بالناس، والمفروض يحافظوا على خصوصية المتهم، ناس كتير اتظلمت، رجل الاعمال الفلاني ده صاحب بابا وبنته صاحبتي، ومراته صاحبة ماما وكانت حالتهم صعب قوي، وبنته ودوها تتعالج في لندن من الصدمة، عشان شوية صحفيين زبالين عايزين يعملوا سبق، طب ذنبها ايه بنته اللي خطيبها سابها بسبب الفضايح اللي حصلت، وذنبها ايه مراته اللي ما بقتش تعرف تروح للكوافير خالص من نظرات الناس؟
وباقول واحدة عشان عادة هم البنات اللي اعرفهم بيقولوا كده، ربنا ما يكتب عليكم والله
طيب، الكلام ده كله لطيف، ومحترم، وخالص تعاطفنا مع كوافير مرات الراجل والدكتور الانجليزي اللي عالج بنته بعد ما خطوبتها اتفسخت، لكن الكلام ده يمشي لو فيه استقلال قضااااااااااااااء
في اوروبا والدول المتقدمة، القضاء مستقل، ومش محتاج لرقابة شعبية عليه، لكن احنا في مصر قضاءنا مش مستقل، ويحتاج رقابة، وغالبا ابو صاحبة صاحبتي طلع براءة مش لانه بريء، لانه معاه فلوس، فيبقى على الاقل الصحافة لما بتشهر بميتين امه هو وبنته ومراته وخطيب بنته، على الاقل اخدت حق الناس المعنوي بما انه عمره ما حياخد عقوبته اللي يستاهلها بالقانون، يبقى ياخد عقوبته الشعبية بالطريقة المصرية التقليدية الا وهي التجريس
وقبل ماحد يتكلم على تجاوزات اقول له اتوكس، انت عيشتك كلها عبارة عن تجاوز كبير قوي، تجاوز قانوني، وتجاوز اجتماعي، وتجاوز اقتصادي، بدل ما يطلعوا قانون لحظر رقابة السلطة الرابعة، واللي تقريبا هي الوحيدة اللي بتضطر تاخد صف الناس ولو لشوية صغيرين عشان تعرف توزع، ما يطلعوا قانون ضد غلاء الاسعار، الناس حتاكل ايه لما القوطة اللي مافيش حتى طبق كشري يخلو منها توصل لتلتاشر جنيه؟ بيبي؟
خلاص، كل الربط والضبط والاحضار حصل مش باقي الا تجاوزات الصحفيين الوحشين اللي بيشهروا برجال الاعمال ويخلوا بناتهم تتفسخ خطوبتهم؟
2- قانون تاني لمراقبة رسائل الموبايل، اي حد مشترك في خدمة رسائل اخبارية مش حيوصله اخبار الا يكون موافق عليها وزارة الاعلام والمجلس الاعلى للصحافة والا الرسالة ترجع للمرسل وكل ده على حسابك انت، على رأي منى الشاذلي: حندفع فلوس عشان الرسايل ما تجيلناش
3- لسه راجعة من برة عرفت ان قناة الناس اتقفلت!!!!!!!!!!!!!!!!!!!!!!!!!!!!!!! يالهو بالي... دي قفزة جامدة كيك، قفل قنوات كده وش؟ قبل كده شالوا قناة العالم من النايل سات وقفلوا مكتب القناة بس ده بسبب علاقتهم السيئة بايران مع انهم فتحوا خط طيران بينهم وبين ايران مش لتحسين العلاقات لا سمح الله، ولكن لان رجال الاعمال المصريين عايزين يستغلوا الحصار اللي على ايران ويبيعوا البضاعة الكسر ويكسبوا ويتنغنغوا، يعني رجال الاعمال بيتحكموا حتى في العلاقات الدولية المصرية، حتى لما النظام المصري يحب يقاطع ايران عشان شارع خالد الاسلامبولي - وزي ما كلنا عارفين ده سبب وجيه جدا، ازاي يسموا اسم شارع بتاعهم في عاصمتهم على كيفهم من غير ما يسألونا يعني؟ مافيش احترام للعالم - بس حتى ده النظام المصري مش حيعرف يعمله
طب انا املي ان مصر تحسن علاقتها بكل الدول العربية والاسلامية وتسوأ علاقتها بامريكا واسرائيل من منطلق ايديولوجي، بس بصراحة يصعب عليا قوي لما النظام يحب يقاطع ايران وما يعرفش عشان فيه بضاعة في المخازن عند رجال الاعمال عايزين يصدروها لايران وهي في الحصار.. كده كتير
لكن الاكتر والابجح ان القفزة تصل لقفل قناة فضائية، دول عمالين يصعدوا، بيصعدوا في سكك وسخة اخر حاجة، وممكن فجأتن نمشي نلاقي الدبابات في الشارع... انا كنت متوقعة ان ضربة السايب يعقبها تبعات طين
بس ما كنتش متوقعة ابدا ان الامر يوصل لقفل قنوات فضائية
وقبل ما حد يقول لي: قناة الناس دي قناة قذرة، عملت فتنة طائفية
اقول له: ايوة ايوة.. وافق انت من حيث المبدأ على قفل قناة قذرة ومن بكرة اي قناة نضيفة عاجباك حتتقفل
ولا نوافق ولا ما نوافقش... هو حد سائل احنا عايزين ايه؟ ولا حد حتى بيفكر يكدب علينا؟ مش ممكن الشفافية اللي هم فيها دي... لا، شوية مراعاة لمشاعرنا او نحس انهم مكسوفين مننا.. انما مافيش كده خالص؟ مطرح ما نحط راسنا نحط رجلينا؟
قال لك اتقفلوا عشان مخالفات، الناس والحافظ والصحة والجمال
واون تي في جالها انذار هي وقناة الفراعين
يااااااااااا على قناة الفراعين والراجل التحفة اللي بيطلع يتكلم فيها.... طب حيحرمونا من الراجل الاعجوبة ده ليه؟ عشان ماحدش ينافس رضا ادوارد في الهبل؟
انا ما عنديش تعليق غير اننا اتاكلنا على قفانا جامد، اقصد في موضوع شوبير بالتحديد، الواحد ما قدرش يتضامن مع شوبير لانه شوبير بصراحة، مش قادر يا نفيسة مش قادر، وحزب وطني وقرف
المقال ده حلو قوي، مش عشان امي اللي كاتباه والله العظيم، بالعكس انا عادة باضطهد امي وابويا عشان قرايبي وكده، بس عشان هو كده بالظبط والله
وده مقال بلال.. بلال والله اجدع ناس انه كتب المقال ده وبكرة تعرفوا ليه هو اجدع ناس، بس هو عموما بطل يرد عليا هههههههههههه بس برضه هو اجدع ناس
انا مش عايزة رجال اعمال تاني، خالص، ايه الذل ده، ذل بـ.. بـ... احم.. بعهر، اه، اللغة العربية دي بتسعف الواحد، اصل الذل انواع
فيه ذل العسكر، اللي تحس فيه انك خايف وعاملها على روحك، وتضايق قوي لما حتة عسكري يمسك راجل مهيب وعالم ومحترم ويقل ادبه عليه، ده ذل بخوف ورعب، واضح ومباشر، يخلي الانسان واطي
فيه ذل الاحتلال، يخليك اراجوز، وحلانجي ونصاب، وعبثي، تبقى حاسس انه خلاص، كل شيء راح وانقضى، وعايزين بقى نلحق نهبش من هنا ومن هنا خلينا نعيش، ذل يخليك تاكل جيفة اخوك من كتر الجوع
ذل رجال الاعمال والاستعمال يجمع ما بين مظاهر الذلين اللي فاتوا، وفوقهم ذل خاص بيه، الشرمطة، معلش مش جاية غير الكلمة دي، تحس ان البلد كلها نصها شرموط والنص التاني قوادين.... عشان ده ذل اكل العيش، مع الخوف، مع الاحساس بالانهيار، كل حاجة بقى، وفي الحالة دي انت واطي زي اللي مذلول من العسكر، واراجوز زي اللي مذلول من الاحتلال، وداعر كمان
مافيش حاجة اسمها رأسمال وطني.... فضونا من السيرة دي
مافيش حاجة اسمها حرامي بيستثمر فلوسه في البلد
ومافيش حاجة اسمها الاف من البشر يبقوا تحت رحمة مزاج صاحب المحل
وماحدش يجيب لي سيرة طلعت حرب، بلاش سيرة الميتين بقى عشان الواحد ساكت لكوا من زمان على السيرة دي
الله يرحم الجميع، خلينا في اللي احنا فيه... مافيش حاجة اسمها حرامي وطني ومحترم
ومافيش حاجة اسمها ناس موهوبة ونبيهة تبقى تحت رحمة زكيبة فلوس تاني.... ماعادش فيها كسوف ياما اعملي معروف
ومافيش ملياردير في الدنيا دي كلها مش حرامي، على رأسهم بيل الجيتس رجل البر والتقوي اللي بيتبرع بفلوس مش فلوسه اساسا
حفاظا على خط الوحدة الوطنية الشائك قرر السيد رضا قدرة ان عودة ابراهيم عيسى "أمر محتم فيه"، ووصف مطالب محرري الدستور بانها "فرض عانت فظيع"، وقال انه طلع "الجرنال بثلث عدد الصحفيين والجرنال طلع ولاد زي الفل مافيهوش الفاظ نابية ومافيهوش هبوط في المستوى التحريري" مما يؤكد عدم احتياجه انه ياكل حاجة حادقة، ومدام بياخد دوا الضغط من عند سيجما يبقى المستوى التحريري متظبط
يمكنكم تشنيف اذانكم بشكل محتم فيه على الفيتيون الذي انتظره الكماهير طويلا هنا، البورنامج بيبدأ بعد ساعة من الفيتيون يعني مشوا المؤشر لحد الدقيقة
الصحفيين اللي عندهم ظروف وما يقدروش يقعدوا في الشارع كده من غير شغل ماحدش يملك انه يزايد عليهم
والصحفيين اللي برغم ظروفهم مصممين يصمدوا، ما حدش يملك غير انه ينحني لهم اكبارا واحتراما لانهم بيعملوا حاجة نادرة مش كل الناس تقدر عليها
وامثالنا من المتضامنين مش مفروض يسيبوا الموضوع يبرد ولا يهدا لان الناس في احتياج لينا ولهم حق علينا، زي ما خدمونا في الدستور برئاسة ابراهيم عيسى، وصبروا على المرتبات القليلة عشان مخلصين للمهنة، لهم حق علينا
الصحفي اللي راح، راح وهو نفسه مكسورة
والصحفي اللي فضل صامد، صمد وهو ظرفه صعب
يعني سيد البدوي بيكسر مناخيرنا كلنا، وامبارح يقول لهم مش حاقدر ارجع ابراهيم عيسى عشان شتم ادوارد بالفاظ نابية، يعني كل واحد معاه فلوس، لما يتغاظ من حد يرفته من شغله ويخرب بيته ويهدم كيان هو اسسه عشان خناقة، يعني انا على التويتر بدل ما اعمل بلوك، لو معايا فلوس اروح اشتري الشركات اللي بيشتغل فيها الناس اللي انا عاملة لهم بلوك وارفتهم مش اشغالهم واخرب بيوتهم، كده يعني، اصله يا عيني عصبي بس قلبه ابيض، وعشان معاه فلوس فعصبيته وحشة شوية، فيها رفت وخراب بيوت
دي بلد انت تحب تعيش فيها؟ تحب انت لما تتخانق مع واحد تلاقي نفسك بيتك مخروب عشان قلت له امين امك؟
انا عارفة ان مش ده السبب، وعارفة ان السبب صفقة لانتخابات مجلس الشعب والدليل ان سيد البدوي امبارح قال لصحفيين الدستور: انا مش داخل انتخابات الرئاسة!!!!!! الرئاسة؟ يعني انتخابات الشعب محسوم انه داخلها
دلوقت اللي سيد البدوي بيحاول يعمله انه ينقذ سمعته، محاولة يائسة طبعا، بس حتنجح لو سكتنا عنه، ده ما يتسكتش عنه ولا يتساب يوم واحد من غير ما يتفضح، صحيح احنا مش معانا فلوس نشتري بيها شركاته ونرفته زي ما هو بيعمل، بس معانا لسان ونفضحه ونبينه على حقيقته، اذا ما كانش عشان رفت رئيس تحرير كل جريمته انه ما كانش بيحط سقف للصحفيين اللي بيشتغلوا معاه، يبقى عشان الصحفيين اللي خدمونا في الدستور لسنين بمرتبات زهيدة، ودلوقت هم في الشارع، واذا ما كانش عشانهم، يبقى عشان كسرة نفس الصحفيين اللي قبلوا يشتغلوا معاه لان اكل العيش مر، وكاسر مناخيرهم عشان هم مفلسين وهو معاه فلوس
قال لهم ابراهيم عيسى مش حيرجع عشان شتم رضا ادوارد في مكالمة هاتفية بالفاظ نابية وانا مش في حل اني اقول تفاصيلها فشادي عيسى قال له: ورضا ادوارد شتم ابراهيم عيسى بابوه
بصراحة اعصابي ارتاحت لما عرفت انه شتم رضا ادوارد بالفاظ نابية، ده سيد علي كان حيشتمه على الهوا بالفاظ نابية وهو لا له في الطور ولا في الطحين، وهو رضا ادوارد ده مش ملاحظ انه كل ما يكلم حد يستفزه ويخليه يشتمه؟ يعني معقولة كل الناس دي غلط وهو اللي صح؟
سيد البدوي قال لهم: اصل رضا ادوارد شهم وجدع بس لما بيغضب بيتصرف تصرفات غير مسئولة، هو قلبه ابيض بس عصبي!!!
فدعاء سلطان قالت له المواصفات دي لها توصيف واحد اقول هو ايه؟ قال لها لا ارجوك ما تقوليش، انا عارف
(هي كانت عايزة تقول له ده مجنون، والتاني عارف!)
المهم من هنا لهنا بيقول لهم اعملوا اللي انتوا عايزينه بس ابراهيم عيسى ما يرجعش!
دعاء سلطان قالت له: انت راضي عن الدستور اللي نزل؟ انا بطلت ادخل الدستور بيتي، وكنت سمعت اشاعة كده ان رضا ادوارد طالب من كل صحفي في الدستور انه ييجي بكرة معاه ولي امره وزمزمية.. قال؟
قام سيد البدوي قال: لها انت بتزعقي لي ليه؟ انا ما احبش حد يزعق لي!!!! (ايه الناس دي؟ احنا ربنا حدفهم علينا منين؟) وقال لها: انا مش راضي عن عدد الدستور بس انا اسمي لم يحترق فدعاء قالت له: اسمك احترق بمجرد وضعه على عدد جرنال زي ده
الغريبة بقى انه متمسك بايمن شرف اخر حاجة، وبرضه قال لهم اطلبوا اي حاجة غير ان ايمن شرف يمشي
فدعاء برضه قالت له: يعني كنا بنتفاوض على ان ابراهيم يرجع بقينا بنتفاوض على ان ايمن شرف يمشي؟ وبعدين حتعمل ايه مع الصحفيين الموجودين دول وهم مش عايزين ايمن شرف وسطهم؟ ومين حيبقى رئيس تحرير؟ انسى ابراهيم منصور، عشان هو مش حيبقى رئيس تحرير ولو رضي يشتغل معاك انا حاطلب منه الطلاق
قال لها: حيبقى فيه رئيس مجلس ادارة جديد ويبقى شخص محترم جدا بس مش حاقول اسمه
قالت له: مين؟ مفيد فوزي؟ هيهيهيهيهييييييييييييي
الا انا ملاحظة ان دعاء بس اللي بتتكلم وبتزعق له وهو ما يحبش حد يزعق له لان قلبه ضعيف وعيناه بتغرورق على طول ومش حيقضيها مشاوير رايح جاي على اسكندرية بقى عشان يريح احصابه، طب ما كانوا الباقيين يزعقوا له برضه ويغرورقوله عيناه، هو حيعمل فيهم ايه اكتر من اللي عمله فيهم؟
لا وبيقول لهم: حاولوا تحسنوا صورتي بقى وما تخلوش حد يشتمني على النت، ده رضا ادوارد هو اللي عمل كده مش انا
!!!!!!!!!!!!!!!!!!!!!!!!!!!!!!!!!
اييييييييه الناس دي؟ حد يقول لي الاي كيو بتاع الناس دي كام؟ أنا حاسة اني باتعامل مع نيرون وكاليجولا، واحد مجنون وعصبي وقلبه قلب خساية وواحد عمال يزنبق في صاحبه ويعيط، طب احنا ذنبنا ايه في حالة الهبل المعين دي؟
كانت بقى تقعد تغنيها لي وتمثلها، مش فاكرة منها قوي غير الآتي:
كان فيه صحاب، بيحبوا بعضيهم، عايشين في وسط الغاب، ساكنين لوحديهم
ومش عارفة ايه كده، المهم الاصدقاء دول كانوا بيرقصوا ويغنوا وحواليهم زهور واشجار، وفيهم حمام ابيض وعندهم عش زغاليل وبعدين، وهم على دي الحال ربك مفرحهم، جه فيل تخين قوام وراح مفركشهم والفيل كان بيغني:
انا يابني الفيل ابو الزلومة
وانيابه العاج الانتيكا
انا صاحب القوة المفهومة
في اوروبا ومصر وامريكا
انا كنت سامع هنا
اصوات موسيقى وغنا
راحوا فين الملاعين
هربوا مني المجانين
وده ايه ده اللي هناك؟
عش الزغاليل؟
لو ابطط العش
واكسر القش
يبقى منظر جميل
يا اصدقائي الصغار
ويفهم الزغاليل
اني فيل جبار
فيبطلوا التهليل
والرقص والمزمار
اتبطط يا عش
هه هه
واتكسر يا قش
هه هه
هاهاهاع هاهاهاع
انا يابني الفيل ابو زلومة
وانيابه العاج الانتيكا
انا صاحب القوة المفهومة
في اوروبا ومصر وامريكا
وبعدين الاصحاب قعدوا يعيطوا: إهيء إهيء إهيء
- عملنا ايه للفيل لما يعذبنا؟ ونابه ايه الغبي من قتل زغاليلنا؟
قام واحد منهم قال: الفيل ده مجرم قوي.. ولكل مجرم عقاب
انتوا ما تعرفوش رضا ادوارد، اللي حضروا سحور الدستور هم اللي يعرفوه، فاكرين يا عيال؟ فاكرين لما عدى على وشنا؟
في السحور برضه هو بدأ يتكلم كده زي السادات بالظبط: الولاد، وولادي، انا مربي
وبعدين، فيه مجموعة خرجت وهو بيتكلم عن الصحة والادوية، وفيه مجموعة خرجت وهو بيتكلم عن التعليم والدور التربوي، وانا كنت من المجموعة اللي خرجت وهو بيتكلم عن مداخن المصانع والتلوث، دخلت لقيت اسامة غريب بياكل في اخر زاده وبيقول لي: باعوض اللي نزفته من كلمة رضا ادوارد
اصله كان اخدها كلها ومن غير مقاومة يعني
اسمعوه بقى هنا، اتعذبوا زي ما اتعذبنا في سحور رمضان وفي الايام المفترجة، كان ناقص يقول: وانا باقول لابراهيم عيسى.. عيب يا ولد.. عيب.. بلاش قلة حيا
الحوار كله تحفة فنية، لدرجة ان حتى هناء السمري انهارت
بس فيه جمل تخلد للتاريخ:
- الاستاذ إبراهيم عيزى
- اتفضل نم عن شخصيتك يا استاذ ابراهيم
- هم عملوا مجموعة ستة ابريل وكفاية وعملوا الاستاذ ابراهيم عيسى
- لم نتدخل في السياسة التحريرية لكن اول ما اشترينا الجريدة لقينا ان الجرنال متدني الاجور متدنية وافتكرنا ان الاستاذ ابراهيم والشباب حينبسطوا، واجتمعنا بيهم في احد الفنادق، وقلنا حنزود الاجور على شرط نطور الجرنال مش عايزين نتدني (يييييي نتدنييييي) باسلوب الحوار الناس زهقت من الشتيمة انا راجل مدير مدرسة والدكتور السيد ده استاذ فاضل
- اشترينا الدستور لانه جرنال له شعبية، الشعبية دي عايزة.. احنا عندنا مشاكل في مصر غير طبيعية
(ملحوظة، اتكلم عن التلوث البيئي برضه، الموضوع ده شاغله قوي)
- كلها عندنا ليها حلول ودي ماهياش مشكلة مرورية
- تنظيم العمل الاداري التحريري
- احنا لا نتدخل في السياسة التحريرية، لكن نعرض مواضيع مختلفة سقف المعارضة افتحه زي ما انت عايز بدون الفاظ نابية
(يعني معترض على الاسلوب، ومعترض على المواضيع، ولا يتدخل في السياسة التخريرية وبعدين ايه السقف اللي حيتفتح ده؟)
- دخلت واتفقت في هذا الجريدة
- تعهد الاستاذ ابراهيم بهذه المشاكل
-ولاد حلوين جدا وكانوا قاعدين على الديسك وشغالين كويس - فيه رئيس تحريري - احنا ما اقلناهوش احنا قلنا له رئاسة التحرير مالكش علاقة بيها - رئيس التحرير اللي حييجي حيبقى اكثر معارضة من ابراهيم عيسى عشر مرات - أنا لا يضغط عليا من اي جهة... مافيش معلن عايز يعلن طول ما ابراهيم عيسى رئيس تحرير - يا حبيبتي يا ماما يا ماما اسمعيني كل الولاد دول ولادي - الصحفيين اللي تعاطفوا مع ابراهيم عيسى ولو ما عملوش كده يبقوا وحشين، يومين والولاد حيهدوا - ما احنا ما ورناش غير ابراهيم عيسى، ومصر كلها ما ورهاش غير ابراهيم عيسى - ابراهيم سعدة ده راجل باشا، حيدخل مع شوية ولاد صغيرين بيعملوا مشاكل؟ - لما باقول شوية ولاد ان دي شتيمة؟ انا عندي في المدرسة ولادي بيعملوا مشاكل - انا مش حاطلع مرة تاني عند سيادتك
كانوا عايزين يموتوا حمدين صباحي؟ ايه يا جدعان فيه ايه؟ فيه ام ايه في ام البلد دي؟ مين اللي حاكمها يعني؟ كلنا سوزان تميم واللي حاكمنا هشام طلعت؟ يعني ايه؟
يعني احنا كلنا عاملين ناس كبيرة، بما فينا ابراهيم عيسى نفسه، ومش عايزين نشخصن القضية، وعمالين نقول ان التجربة الصحفية هي الاساس واللي يهمنا السياسة التحريرية، وزي ما عبد المنعم محمود قال تعقيبا على بيان النقابة: احنا مش جايين نحل مشكلة شخصية لابراهيم عيسى، احنا هنا عشان تمسكنا بالسياسة التحريرية وهي مرتبطة برئاسة ابراهيم للتحرير بدليل العدد بتاع النهاردة، ومش حنشتغل الا تحت رئاسة تحرير ابراهيم عيسى لتمسكنا بالسياسة التحريرية بتاعته
اه.. شفتوا العدد بتاع النهاردة؟ يا مدندش يا قميص النوم يا مقور يا كومبيليزون، اوعوا تشتروه، خلي حد جابه يوريهولكوا، او حد عنده العدد يعمله سكان وينزله، خصوصا صفحة الحوار مع "جميلة الدراما العربية ندى بسيوني" المهم
في الاول يطلعوا اشاعات للوقيعة بين ابراهيم عيسى وبين ناس في الدستور، وانا حاقول الاسماء لانهم فوق الشبهات، زي ابراهيم منصور اللي صاحب ابراهيم عيسى من ايام ما كانوا بالشورت وعبد المنعم محمود اللي يقول للاخلاق قومي وانا اقعد مطرحك
وناس تانية كتير، وكلام حقير ومنحط وشغل طفولي، وبعدين تشويه في ابراهيم عيسى، ويكلموا كل واحد فرداني وياخدوه لوحده اللي يكلموه يقولوا له احنا عارفين انك مش مثبت وان ابراهيم ما زودكش وحولك للتحقيق مرة قبل كده تعالى واحنا نثبتك ونزودك تلات مرات ويشيعوا في كل حتة ان ابراهيم عيسى بيشتم المسيحيين وبيشتم الكنيسة، ويقولوا ان ابراهيم عيسى شتم البلوي بالاب والام هههههه، طب يارب يكون عمل كده، ويكلموا ناس وتوصل لتسجيلات متفبركة يتصلوا بناس يقولوا لهم ابراهيم بيقول عليكم مش عارفة ايه؟
ايه شغل العيال ده؟ طب انا لو ابراهيم بيقول عليا ما في الخمر مش حازعل، براحته، ويقول اكتر من كده كمان، حد عايز حاجة بقى؟ وعلى فكرة لما حد يحب يعمل تسجيلات تعبيرية يبقى يجيب ام متخصص يظبط له التسجيلات عشان تطلع كويسة ومش مقطعة بالطريقة المضحكة دي، وعلى فكرة كمان، احنا صحفيين، فاهمين يعني ايه؟ يعني اهيف عيل فينا اكيد الاي كيو بتاعه اعلى من زكايب الفلوس الحرامية اللي عاملين فلوسهم بالفساد والسرقة والترامادول والفياجرا، مش كل شوية تاخدوا واحد على جنب ومرة تقولوا له تعالى واحنا نجيب لك عسلية، تعالى نوريك القطر، ده ابراهيم عيسى بيقول عليك مش عارفة ايه... ايه ابراهيم عيسى بيقول عليك دي؟ ايه شغل النسوان الاميات اللي من ورا الجاموسة ده؟
اذن الهدف هو عزل شخص ابراهيم عيسى نفسه، يعني هي المشكلة مع شخصه، ما عرفوش يحبسوه فقالوا نحبسه بطريقة تانية يعني احنا بقى كنا غلطانين لما كنا عاقلين، خلاص، حنوريكوا الجنان بقى، وايه الشغل الواطي ده بقى؟
طب شغل واطي وعرفنا... ايه شغل الطفولة المشردة دي؟ احنا في تانية اعدادي هنا؟
-------------
بيان النقابة طلع زي الزفت، وبرضه ينطوي على وقيعة بين محرري الدستور وابراهيم منصور وبين ابراهيم عيسى: نرجع المحررين وابراهيم منصور، وابراهيم عيسى لو عايز تعويض حنقف معاه ولن يعدم صحيفة تشغله بكفاءاته العالية
احنا رايحين نطلب منهم يشوفوا لابراهيم عيسى شغلانة بدل ما ينحرف ويضرب مخدرات مثلا؟
اللي اشتغل في الدستور، سواء محرر (من اول كتابة الخبر لحد التحقيق)، او سكرتير تحرير، او مدير تحرير، او رئيس تحرير تنفيذي، او كاتب مقال اتعود ان مالوش سقف، وعدم وجود السقف مرتبط بالسياسة التحريرية اللي اسسها ابراهيم عيسى في الدستور اللي هو اسسه اصلا، وده اللي متمسكين بيه، وكنا لحد قبل الحركات القرعة اللي اتعملت مش ناويين نشخصن الموضوع بما في ذلك ابراهيم عيسى نفسه، اللي حتى ما حضرش عشان ما يتفهمش انه محرض، ولاننا عايزين نقول ان ده مطلبنا احنا لتمسكنا بسياسة تحريرية معينة
لكن بما ان الهبل وصل للجبل، والمستوى بقى منحط وطفولي وامني وبقى فيه تصميم على الشخصنة، احنا كلنا ملفوفين حوالين ابراهيم عيسى بشخصة، واحنا مع بعض، لا احنا حنصدق عليه حاجة، ولا هو حيصدق علينا حاجة غير اللي احنا نعرفه عن بعض وبس وكتر خير فبريكانو انتصار وتعبير اسامة سرايا اللي نبهنا للخطط التعبيرية الفاشلة اللي بتستخدم للوقيعة بينا
احنا كدهووو
ايه الغباوة دي؟ امال جاب مجموع في الثانوية العامة ودخل صيدلة ازاي؟
- انا اتعودت كل سنة في ستة اكتوبر اعلق علم مصر واحتفل واشغل اغاني النصر، السنة دي ما احتفلتش، مش قادرة، اول سنة ما اقدرش احتفل، مش قادرة فعلا، واول ما ركبت العربية عشان اروح المعهد فتحت الراديو لقيت اغنية بسم الله الله اكبر بسم الله بسم الله وقعدت اعيط بصوت عالي في الشارع كده: جيييععععاااااااييييييييييااااااااااااا وانا معلية الاغنية على الاخر، تصور؟ كانوا بيقولوا بسم الله.. وكانوا فاكرينها استفتاحة، وكانوا بيقولوا يارب النصرة تكبر.. ما يعرفوش انها كانت ختام، وانها فضلت تكش تكش تكش لحد بقت اميبا
- ماحدش يعيد عليا بمناسبة عيد ميلادي.. عشان حازعل واتضايق فعلا.. قوي يعني
والراجل في البرنامج بيقول لابراهيم: رئيس تحرير الدستور المقال
زي ما بيتقال على حماس الحكومة المقالة
- اسمعوا بقى ابراهيم كويس قوي، بس انا اتضايقت ان واحد قال له الاصوات الشريفة انت وعمرو اديب.. ايه عمرو اديب ده كمان اللي حيتقارن بابراهيم؟ ناقص يقولوا له والمعلق الاهلاوي الشريف الاكاديمي الدكتور علاء صادق الا هو دكتور في ايه؟
- واحد يمني بيكلم ابراهيم عن الاستعمار ههههههههههههه طب والله معاه حق
- انا مبسوطة من تليفونات الناس والحب اللي ادوهوله، اصل هو بيضحك كده بس الهبدة جامدة يعني، اذا كنت انا عمالة اتنفض وبقيت عمالة اصرخ زي المجنونة ما بقاش حد عارف يكلمني، وباكتب دلوقت وانا صدري بينغز عليا ودراعي واقف واول ليلة عرفت فيها الخبر قعدت ارجع.. فيعني ماحدش يتقل ايده علينا يعني، الهبدة مش بسيطة، مش هبدة المنع، هبدة التهزيئة، يعي لو كان رئيس الجمهورية زي المرة اللي فاتت كان يبقى المركز محفوظ برضه، انما اما تيجي من زكيبة فلوس بتاع ترامادول تبقى: معلش احنا بنتبهدل
كان فيه حد معلق بيقول: الله يرحم علي ومصطفى امين، طب علي ومصطفى امين الدولة اممتهم، صحيح جابوا مكانهم عسكري يمسك رئيس تحرير - ههههه البلد دي طول عمرها مسخرة - انما تاجر ترامادول كتييير.. كتييير قوي يعني، التطور الطبيعي للحاجة الساقعة ان بعد خمسين سنة يبقى مسئول التكاتك في القاهرة الكبرى اللي يسرق جرنال من صحفي ويرفده
- انا بقى اي حد رأسمالي مش عايزة اعرفه تاني.. خالص بقى، مافيش اختلاف راي في الموضوع ده، وماحدش يكلمني عن رأس المال الوطني المحترم، عشان ده زي اسطورة الرقاصة الشريفة كده، انا مرة واحدة في حياتي شفت رقاصة شريفة وكانت بتعيط لي انا وام زينب انها مش بتاعة فتح للزباين ولا مسخرة، فام زينب قالت لها ما شاء الله، رقاصة ومش بتقعدي مع الزباين؟ قالت لها: اه.. اصل انا يا اوختي ماليش في الرجالة، ليا في النسوان بس
اه والله.. دي اشرف رقاصة قابلتها، واشرف رأسمالي حتقابله حيبقى زي الرقاصة دي
- السؤال بتاع ان ابراهيم شيعي وله علاقة بايران، انا انبهرت انه عرف يرد، اصل ده سؤال عبثي فعلا وعادة العبث الواحد مش بيلاقي له مدخل يرد بيه، بس انا مبسوطة قوي قوي قوي انه قال دي طريقة سافلة، اصلها سافلة فعلا
ومبسوطة قوي انه قال انا مواقفي مين اللي مع اسرائيل وانا ضده مين اللي ضد اسرائيل انا معاه.. الكلمة دي كانت سكينة فؤاد قالتها لي: معياري الوحيد مين اللي اسرائيل راضية عنه ومين اللي اسرائيل غضبانة عليه
وتصدقوا بقى ان ده بقى كلام يحتاج ان الواحد يقوله؟ اه والله
- فيه رسالة على الموبايل جات على الجزيرة خلتني اعيط: كيف ابدأ يومي بدون من اول السطر؟ ده مين اللي مستقصدني وبينكد عليا كده؟
- انا متكيفة قوي من بتوع الويب كام هههههههههههههههههههه
- الاتصالات من العراق مش معقووووووول هههههههههههه كل شوية يقولوا له وزير الثقافة المصرية هههههههههههههههه وان شاء الله ترجع وزير الثقافة في مصر ايه انهيار الضحك ده؟ وبيكلموه يشجعوه على اساس انه وزير الثقافة المصرية
وبعدين واحد اتصل بيه قال له انا مبسوط قوي انك شيعي بس ايران وحشة وايران مش شيعة ايه رايك انت بقى يا استاذ ابراهيم؟ ايه رأيه في ايه؟ ايه السفر ده؟ يا قلب امهم ده الاحتلال سيح لهم مخهم خالص، ده العراقيين دول عباقرة الامة والله، وزمان قبل القنابل العنقودية كان اقل بياع في العراق مخه ذري، ما كانش يومهم اللي حصل لهم ده
- الحلقة حلوة، بس انا ما بقاش فيه حاجة تبسطني، انا مكتئبة بجد ولا ايه؟ - عشان ماحدش يقرفني كتير... انا حافضل ناصبة المناحة دي شوية لحد ما نعرف كوعنا من بوعنا، مش عارفة استوعب ان الايام السودا بتاعة تمانية وتسعين رجعت تاني
المهم اني اول ما عرفت الخبر من شادي قلت له فورا يا شادي شيل كل مقالاتي، لاني كنت باعتة لهم مقالات مقدما لحد يوم الخميس، وشادي طبعا قال لي ما تخافيش اتشالت
جيت الصبح لقيتهم منزلين مقالي مع العدد اللي طبعوه في العدد الورقي
ايوة كل العدد نزل لان اصلا ده شغل ابراهيم ومش عارفة ازاي شغل ابراهيم ينزل في عدد الاربع ويقرصنوا على شغله بالطريقة دي، بس انا ما كنتش عايزة مقالي ينزل في العدد وقلت لشادي بسرعة الحق شيل مقالاتي عشان انا كنت عارفة انهم حيقرصنوا على الاعداد
المهم صحيت الصبح قلبت الدنيا واتصلت بشادي قال لي والله شيلنا المقال، هم اخدوا البروفات وجمعوها تاني
طيب، انا من مزنقي هذا اعلن اني غير مسئولة عن اي مقال ينشر لي في عدد دستور مش عليه اسم ابراهيم عيسى رئيس تحرير
رئيس تحرير
مش كاتب واهلا بيك في اي وقت في جرنال هو اللي عامله وحنبعت لك عربية بسواق هههههههه الا دي كمان نكتة هو بيشتغل لوا في سلاح البحرية؟ ------------- اه.. نسيت انوه عن حاجة، الا الناس كلها اول ما حصل الموضوع ده بقوا يسألوا اسئلة كده غريبة من مثال: وانت بقى حتعملي ايه؟ في اشارة الى اني احتمال ممكن اكمل في الدستور بعد اللي حصل ده هو صحيح السؤال غاظني، بس الناس معذورة، اصل الوساخة كترت ورطرطت وبقت هي القاعدة والاستثناء بقى ان الواحد يتصرف بشكل طبيعي اول واحدة سألتني السؤال ده طقيت في وشها بصراحة وقلت لها: بصي انا وانا طفلة كان نفسي اطلع رقاصة ومثلي الاعلى كانت نعيمة عاكف، لو كنت لقيت اسرة تشجعني وتنمي موهبتي كان زماني باقدم النمرة بتاعتي كل ليلة وما يهمنيش مين اللي اتغير في ادارة الكباريه، بس للاسف ما طلعتش رقاصة ولا الدستور كباريه وانا لو واطية لدرجة ان مسخرة زي دي تحصل قدامي واتجاهلها طب انا على الاقل مش غبية عشان اتعامل مع ناس بيهينوا البشر وينكلوا بيهم بالطريقة دي انا مين عشان افتكر نفسي احسن من ابراهيم عيسى، دي ناس عملت كده في رئيس تحرير، ومش اي رئيس تحرير، ده - شئت ام ابيت عجبك ولا ما عجبكش رضيت ام حقدت - ده نجم بالنسبة للناس، والناس تعودت انها تتعاطف معاه، عشان حصل له المواقف دي قبل كده واحساس الناس ان يووو بقى انتوا ما وراكوش غير الراجل ده تقرفوه كده؟ ومع ذلك لم يرعو كل من الدكتور وتابعه قفة انهم يعملوا معاه اللي عملوه ده، بالاسلوب المنحط ده، والراجل يسلط عليه رضا ادوارد يبلغه بازالة اسمه من على الترويسة ويسافر هو اسكندرية ويطلع يشهر بيه وعايز يفهمنا ان ابراهيم عيسى ساب الدستور اللي هو اصلا مخلفها في الدنيا عشان تلاتلاف جنيه يعني تنكيل واهانة وكمان تشهير.. ده غير الفصل التعسفي المفاجئ اللي لحد دلوقت مش عارفين اسبابه غير ان العيال اعترضوا على خصم الضرايب من مرتباتهم بعد ما هو رفع لهم مرتباتهم وكان ناقص يقول لهم انتم عبيد احساناتنا بقى العيال اللي كانوا بيشتغلوا بملاليم اللي كانوا بيشتغلوا فيها في الدستور وما فتحوش بقهم حيعملوا اعتصام عشان خصم الضرايب؟ اللهم الا اذا كانوا حاسين انه سارقهم، الواحد يقبض ملاليم ويرضى لما يكون دي الامكانية، بس لما يحس انه اتسرق طبيعي يتضايق طيب البني ادم اللي بيعامل الناس كده، ده ينفع حد يتعامل معاه؟ افرض انا واطية وقلت وانا مالي، انا حاكتب، اي غرور بقى يصور لي اني حاتعامل احسن من ابراهيم عيسى؟ يعني واطية وغبية؟ طب عايشة ليه؟ وانا مش بازايد على اي حد عايز يكمل.. بس ده احساسي الفطري اللي تصورت في لحظة من اللحظات انه رد فعل طبيعي بس الظاهر طلع مش رد فعل طبيعي ولا حاجة
ايه اللي سيد البدوي قاله ده؟ انا قريت اللي مكتوب في موقع الدستور وقلت العيال دي مفترية وبينتقموا منه، مش ممكن الراجل يقول كده، وبعدين سمعته في العاشرة مساء
ايه ده بقى؟
اصل رفعنا اجورهم، فعملوا اعتصام، اصل اخدنا منهم الضرايب، اصل ابراهيم عيسى اخد خمسة وسبعين الف جنيه، وبعدين بقت واحد وسبعين الف جنيه، فالعيال اعتصموا، اصل هم كانوا بيقطعوا منهم الضرايب، بس ابراهيم عيسى لا، جينا قطعنا من ابراهيم الضرايب، فهم اعترضوا على ان اتقطع منهم الضرايب، فأقلنا ابراهيم عيسى، بس ما كتبناش الاقالة، وانا ما كلمتوش، اصل عينيا دمعت وسافرت اسكندرية، اصل انا كلمته، وقلت له ده بيتك، ما تمشيش، بس انت حتمشي، واحنا مش عارفين مين حيبقى رئيس تحرير، بس اقعد في البيت واحنا نبعت لك الفلوس، واحنا مش بنتدخل في السياسة التحريرية، بس انا قلت له ابعت لي المقال اقراه وعلى ما نزلت من العربية وفتحت الميل وقريته، كنا منعناه، بس احنا ما منعناهوش، احنا حنزله بكرة
يا نهار اسود ومنيل.. الواد منصور.. ما بيجمعش
ومين رضا ادوارد ده بقى؟ اخد الاجهزة وحطها في شركة الادوية وبيطلع الجرنال لوحده ونزل عليه اسم ابراهيم منصور، وابراهيم منصور قال لهم لو اسمي نزل على الجرنال حارفع عليكم قضية، فقالوا ده ابراهيم عيسى بيقول لو اسمي نزل على الجرنال حارفع عليكم قضية
انا عايزة جملة مفيدة، وبعدين مين بقى الاخ العقيد الاستاذ احد المساهمين بدون ذكر اسماء اللي كل شوية يكلمه ده؟ مرة يكلمه على مقال العوا ومرة يكلمه على مقال البرادعي، وبدون ذكر اسماء ليه؟ ما هو مساهم في الجرنال، اشمعنى اسمك انت اللي يتذكر يعني؟ وبيكلمك ليه لما هو احد المساهمين؟ ما يكلم ابراهيم، مش هو احد المساهمين؟ مين واحد صاحبي انت ما تعرفوش ده؟ ما كلنا عارفين مين العصفورة اللي بينقل الاخبار وعارفينه بالاسم لولا بس ما نحبش نفضح حد.. هو الواد ده بقى اسمه احد المساهمين بدون ذكر اسماء؟
طب بقى سيد البدوي كلم واحد بدون ذكر اسماء راخر وقال له انتوا فاكريني شيطان وانا مش شيطان ده رضا ادوارد هو اللي شيطان
بس هه.. عايز يلبسها للراجل اللي قاعد في شركة الادويا بتاعته يطلع الجرنال لوحده من غير صحفي معاه
وبعدين قال لك: انا بقى استقلت
ايوة ليه يعني؟ استقلت ليه؟ ويعني ايه اقلناه بس ما كتبناش الاقالة؟ ويعني ايه قلنا له ده بيتك اكتب عامودك سلطاتك بابا غنوجك تكيفك تلفزيونك ماتشك واقعد انبسط؟
طب يعني ايه؟ مين بقى؟ ده وائل خليل مكلمني يقول لي: طب انا دلوقت خلصت شغل، ومروح لمراتي وحتسألني ايه اللي حصل في موضوع ابراهيم عيسى؟ اقولها ايه بقى؟ اواجهها ازاي؟
ينفع كده يعني؟ الرجالة ما بقوش عارفين يحطوا عينهم في عين مراتاتهم؟
احنا ناقصينكم تنقلوا لنا دماغنا؟ مش كفاية بتوع ستة ابريل اللي احتجاجا على فصل ابراهيم لغوا الوقفة الاحتجاجية؟ هو الواحد في المواقف دي لما يبقى قاعد يقف مش وهو واقف يقعد.. بيهددوا النظام يعني مدام فصلت لنا ابراهيم عيسى ورحمة شنبك ما احنا عاملين لك وقفة احتجاجية من هنا ورايح؟ شوف... ولا حتى اعتصام حنعمله، وورينا بقى حتعمل ايه
هو فيه نوع من انواع الهبل في الحياة ولا انا اللي بقيت حساسة شوية؟ اه.. نسيت حاجة: ابراهيم سعدة؟ بببففففففففففففففهاهاهاااااااااااااااااااايييييييييييييييييييييي حسسسسسبي الله ونعم الوكيييييييييييييييييييييل خلاص.. نادية الجنسي ما بقتش اكتر حاجة بتسليني في الحياة، مع اني حملت فيلم مسنة في تل ابيب
وكل زكيبة فلوس في البلد دي نجسة... بس انت انجسهم يا سيء يا بلوي
عارف.. ساويرس انضف منك.. احمد عز انضف منك يا سيء يا بلوي
انت مين عشان تعمل العملة دي؟ ومين دلدولك اللي يروح بقوة البوليس ياخد الاجهزة ويقول للمحررين: انا اطلع الجرنال ده بالجزمة وانت معاه على التليفون بتدي له تعليمات
هي الجزم محتاجة تعليمات يا سيء يا بلوي؟
عشرين مقعد في مجلس الشعب، التمن يساوي عشرين مقعد؟ يا جربعتك يا اخي... ده انت جربوع ومفجوع وعينك فارغة اخر حاجة، طب خد خمسين مقعد، خليهم يدوك التمانية وتمانين مقعد بتوع الاخوان، ده الهبرة اللي انت مديها لهم تساوي المجلسين الشعب والشورى بمقاعدهم كلها
ده الاولاني اتقفل بقوة رئيس جمهورية، قوم يا دني يا شبعة من بعد جوعة تعمل شغل رئيس الجمهورية بعشرين مقعد؟
وايه العملية الانتحارية اللي انت عملتها دي؟ ورحت ملبس الدلدول - بتاع الجزمة - الليلة كلها وخلعت انت، الصبي بتاعك شال القضية، ايه تراث الباطنية ده كله اللي انت جاي لنا بيه؟
ايه يا طبوش العكر ده؟ هو انت رئيس طابونة عشان تخلي البادي جاردز بتوعك يحاوطوا المحررين في الندوة اللي عملتها، وموقف ناضورجية؟ قال تاجر ادوية قال.. مش كنت تقول انك تاجر ترامادول؟
انت مين يا فضة المعداوي الزمان والاوان؟ وانت فين دلوقت بعد ما عملت جريمتك البجحة؟ اكيد قاعد وسط قشر البرتقان المرمي على السجادة الشنواه اللي انت اشتريتها ومش عارف قيمتها بس قالوا لك غالية، والعيال حواليك بيتفرجوا على موجة كوميدي وبيقزقزوا ترمس ويرموا على الارض وينادوا الخدامة وهم بيشتموها بالاب والام عشان تيجي تشيل وساختهم، وتكح من السجاير وتتف على الارض.. الارض الرخام الاصلي، اللي حاطه في اودة الليفنج وفوقيه تمثال غليظ لواحدة عريانة وجنبه زهرية شكل الكوابيس - بس غالية - وفيها ورد صناعي
تحديث: تم فصل هيئة التحرير بالكامل تحديث: على الفيس بوك تحديث: الخبر نزل على موقع الدستور. الاعتصام حيبقى بكرة ان شاء الله الصبح، 3 ش احمد نسيم، مش عارفة ده ايه بس حاسأل ورايحة ان شاء الله الكلام ده مش حلو يا شباب.. مش بس مش حلو على الدستور، ولا ان طريقتهم في قفل الجرايد بقت بالدناءة والحقارة دي مش حلو علينا كلنا كله يغطس يعني زي ما بلال قال وباديين بداية وسخة قوي، ابراهيم ده التخين بتاعنا، يعني ادي التخين بتاعكوا، ورونا حتعملوا ايه انا مش مصدقة..
تحديث: سمعت ان فيه اعتصام مفتوح عند الدستور بس لسه حاتأكد --------- من غير ما يبلغ ابراهيم، واحنا طبعا كلنا مشينا
لسه مش عارفة حنعمل ايه بس فيه حاجة تتعمل
انا مش عارفة اتكلم لاني مش مصدقة، يعني ايه؟ يعني سيد البدوي كان بيشتري الدستور مخصوص عشان يطير ابراهيم؟ هي كانت كده؟
عمر طاهر
عمر طاهر القرار قال لي ان ده احساسه او ما موضوع الشرا ده حصل وقال لي ان الموضوع فيه ان وان سيد البدوي يضمر شرا
الدعاية أو ما كان يسمى قديما بالدعوة هي الوسيلة الوحيدة لنشر فكر أو منهج حياة معين، المنهج الفكري يشكل منهج الدعاية. هناك بعض مناهج الفكر وأساليب الحياة التي تعتمد في آليات دعايتها على تحفيز العقل وهناك من يستعين بتحفيز العاطفة أو الاثنين معا.
تجد ذلك في الاتجاهات الاشتراكية والإسلامية التقليدية بالتحديد، وربما تعتمد الاتجاهات الإسلامية التقليدية، مثل الأخوان المسلمين، أو حزب الله، أو من يشابههم، على إثارة العاطفة الدينية، كما تعتمد الاشتراكية على إثارة العاطفة التضامنية، والاجتماعية لدى الإنسان.
إلا أنه، ولاختلاف الطبيعة الرأسمالية عن الاتجاهين السابق ذكرهما، تعمد المجتمعات الاستهلاكية والقائمين عليها إلى اللعب على الغرائز، ذلك لأن الغرائز أقوى تأثيرا، وأسهل في الإثارة. نجد ذلك في وسائل الدعاية الرأسمالية، مثل عرض أطباق الطعام الشهية، ضرورة إيجاد صورة لفتاة جميلة حتى في الإعلان عن غسالة أو مسكن ألم.. إلخ.
الغرائز تسيطر على العاطفة ومن العاطفة يسهل السيطرة على العقل، هذا بشكل عام لتوضيح الاسلوب المتبع في المجتمعات الاستهلاكية لتحفيز الجمهور.
كذلك تجد أن الحملات السياسية النابعة من نفس المنهج الفكري تتبع نفس الآلية في تحفيز العامة.
لو أخذنا مثالا للأزمة الطائفية الأخيرة. المحفز الرئيسي في هذه الأزمة هو محفز جنسي:
كاميليا زوجة الكاهن، طاهرة مطهرة، يقول عنها الأقباط: مرات أبونا.
حين أشيع بينهم أنها هربت مع مسلم ليحولها للإسلام ثارت ثورتهم. ثورة جنسية محضة، حيث تغيرت صورة كاميليا من امرأة طاهرة مرات أبونا، ربما تمارس الجنس مع زوجها لكن أحدا لا يتخيل والده وهو يمارس الجنس ومن ثم هي بعيدة عن هذا التصور، لكن بعد هروبها مع "رجل مسلم" تحولت إلى أيقونة جنسية، رجل مسلم، تغشاها، وغيرت هي ديانتها بسبب غوايته الجنسية لها، وبذلك تم تحفيز التنافسية الذكرية النابعة من الغريزة الجنسية، الأمر الذي يفسر عدم سماعهم للمنطق والعقل الذي يقول بأن فرضياتهم ليس لها أساس.
مع تحفيز التنافسية الذكرية لدى المسيحيين، تم تحفيز الغرور الجنسي لدى المسلمين الذي نشأ عن اقتناعهم بالرواية المسيحية الأولية، وشعروا أنهم كسبوا أرضا جنسية لدى الطرف الآخر.
بعد عودة كاميليا، ظهر أبو يحيى الذي يدعي إسلام كاميليا، وكان المسلمون في كامل استعدادهم لتصديق هذه الرواية دون سند بسبب إثارة غريزتهم، وبسبب الثورة التي قام بها المسيحيون.
هنا ارتفعت حدة التنافسية الذكرية لدى المسلمين إذ أن ذلك يعني باللغة الدارجة: امرأة مسلمة، ستسلم لرجل "كافر" ليمارس معها الجنس وهو لا يحل لها. وبهذا ثارت ثورتهم غيرة على "عرض" مسلمة تساق إلى فراش كافر.
حين تسيطر الغريزة الجنسية، وهي أقوى الغرائز، على الإنسان لا يمكن بحال من الأحوال أن يستمع إلى خطاب هادئ، كما انه في حالته الراهنة يفتقر بيولوجيا إلى القدرة على التفكير الهادئ أو حتى التعاطف الإنساني، والكل يعلم ان الانسان تحت تأثير ثورة الغريزة الجنسية يأت بأفعال مجنونة وقاسية
لذلك، فلا توسل إليهم بأن يرحموا البلاد سيجدي نفعا لأنك تحاول اثارة عاطفة ابعد ما تكون عن غريزتهم الثائرة
ولا حوار منطقي سيعيدهم الى رشدهم
كما أن خطاب العوا اثار بداخلهم الخوف فاستجابوا بسرعة بسبب اتصال الخوف والتنافسية ببعضهم البعض وجذورهما الضاربة في الغريزة الجنسية التي تعود الى غريزة حب البقاء.
الفتن التي تعتمد على الغرائز مثل فتن الجزائر والفتن الطائفية لن تجتث من جذورها الا مع اجتثاث النظام الاستهلاكي المتحكم في المجتمع المصري حاليا
