ويتوالى الخراء تباعا

بيان الشبكة العربية تعقيبا على القانون اللي وقع عليه وزراء الاعلام العرب واللي على اساسه قناة الناس اتقفلت، البيان قديم

هم الاخوة بتوع كاميليا مش حيعملوا مظاهرات عشان قناة الناس؟ ولا احنا اللي حنتدبس فيها لوحدنا كالعادة؟ ولا عشان قناة الناس ما بيشتغلش فيها ستات واعلاناتها كلها كان بيعملها اتنين موظفين ببدل بيعلنوا عن دستة كوبايات وطقم ملايات؟ هههههههه والله حرام، طب على الاقل ده قطع عيش ناس كانت بتسترزق يعني وفاتحة بيوت

الفلاحة ماتت ولازم نسلم نفسنا

كانوا زمان يقولوا: اضرب المربوط يخاف السايب

وده مثل ساذج، النظام المصري عمل بحكمة: لو عرفت تقفش السايب وتخليه عبرة، المربوط حيعمل بيبي على روحه، روح هات له بامبرز

بعد قفل الدستور وعزل ابراهيم عيسى تعسفيا، الا وهو السايب في هذه البلد، بدأت النقنقة في المربوط

1- قانون جديد يحظر على الصحف تغطية الجرائم الماثلة امام القضاء، حفاظا على سمعة مش عارفة مين، وعدم حضور الصحفيين تصوير المتهم البريء حتى تثبت ادانته الخ الخ الخ

وقبل ما واحدة مغيبة ومش دراينة بالدنيا ومش شايفاها غير من ورا ازاز عربيتها المكيفة تقول لي: صحيح، الصحافة زودتها قوي، وبقت تشهر بالناس، والمفروض يحافظوا على خصوصية المتهم، ناس كتير اتظلمت، رجل الاعمال الفلاني ده صاحب بابا وبنته صاحبتي، ومراته صاحبة ماما وكانت حالتهم صعب قوي، وبنته ودوها تتعالج في لندن من الصدمة، عشان شوية صحفيين زبالين عايزين يعملوا سبق، طب ذنبها ايه بنته اللي خطيبها سابها بسبب الفضايح اللي حصلت، وذنبها ايه مراته اللي ما بقتش تعرف تروح للكوافير خالص من نظرات الناس؟

وباقول واحدة عشان عادة هم البنات اللي اعرفهم بيقولوا كده، ربنا ما يكتب عليكم والله

طيب، الكلام ده كله لطيف، ومحترم، وخالص تعاطفنا مع كوافير مرات الراجل والدكتور الانجليزي اللي عالج بنته بعد ما خطوبتها اتفسخت، لكن الكلام ده يمشي لو فيه استقلال قضااااااااااااااء

في اوروبا والدول المتقدمة، القضاء مستقل، ومش محتاج لرقابة شعبية عليه، لكن احنا في مصر قضاءنا مش مستقل، ويحتاج رقابة، وغالبا ابو صاحبة صاحبتي طلع براءة مش لانه بريء، لانه معاه فلوس، فيبقى على الاقل الصحافة لما بتشهر بميتين امه هو وبنته ومراته وخطيب بنته، على الاقل اخدت حق الناس المعنوي بما انه عمره ما حياخد عقوبته اللي يستاهلها بالقانون، يبقى ياخد عقوبته الشعبية بالطريقة المصرية التقليدية الا وهي التجريس

وقبل ماحد يتكلم على تجاوزات اقول له اتوكس، انت عيشتك كلها عبارة عن تجاوز كبير قوي، تجاوز قانوني، وتجاوز اجتماعي، وتجاوز اقتصادي، بدل ما يطلعوا قانون لحظر رقابة السلطة الرابعة، واللي تقريبا هي الوحيدة اللي بتضطر تاخد صف الناس ولو لشوية صغيرين عشان تعرف توزع، ما يطلعوا قانون ضد غلاء الاسعار، الناس حتاكل ايه لما القوطة اللي مافيش حتى طبق كشري يخلو منها توصل لتلتاشر جنيه؟ بيبي؟

خلاص، كل الربط والضبط والاحضار حصل مش باقي الا تجاوزات الصحفيين الوحشين اللي بيشهروا برجال الاعمال ويخلوا بناتهم تتفسخ خطوبتهم؟

2- قانون تاني لمراقبة رسائل الموبايل، اي حد مشترك في خدمة رسائل اخبارية مش حيوصله اخبار الا يكون موافق عليها وزارة الاعلام والمجلس الاعلى للصحافة والا الرسالة ترجع للمرسل وكل ده على حسابك انت، على رأي منى الشاذلي: حندفع فلوس عشان الرسايل ما تجيلناش

3- لسه راجعة من برة عرفت ان قناة الناس اتقفلت!!!!!!!!!!!!!!!!!!!!!!!!!!!!!!! يالهو بالي... دي قفزة جامدة كيك، قفل قنوات كده وش؟ قبل كده شالوا قناة العالم من النايل سات وقفلوا مكتب القناة بس ده بسبب علاقتهم السيئة بايران مع انهم فتحوا خط طيران بينهم وبين ايران مش لتحسين العلاقات لا سمح الله، ولكن لان رجال الاعمال المصريين عايزين يستغلوا الحصار اللي على ايران ويبيعوا البضاعة الكسر ويكسبوا ويتنغنغوا، يعني رجال الاعمال بيتحكموا حتى في العلاقات الدولية المصرية، حتى لما النظام المصري يحب يقاطع ايران عشان شارع خالد الاسلامبولي - وزي ما كلنا عارفين ده سبب وجيه جدا، ازاي يسموا اسم شارع بتاعهم في عاصمتهم على كيفهم من غير ما يسألونا يعني؟ مافيش احترام للعالم - بس حتى ده النظام المصري مش حيعرف يعمله

طب انا املي ان مصر تحسن علاقتها بكل الدول العربية والاسلامية وتسوأ علاقتها بامريكا واسرائيل من منطلق ايديولوجي، بس بصراحة يصعب عليا قوي لما النظام يحب يقاطع ايران وما يعرفش عشان فيه بضاعة في المخازن عند رجال الاعمال عايزين يصدروها لايران وهي في الحصار.. كده كتير

لكن الاكتر والابجح ان القفزة تصل لقفل قناة فضائية، دول عمالين يصعدوا، بيصعدوا في سكك وسخة اخر حاجة، وممكن فجأتن نمشي نلاقي الدبابات في الشارع... انا كنت متوقعة ان ضربة السايب يعقبها تبعات طين

بس ما كنتش متوقعة ابدا ان الامر يوصل لقفل قنوات فضائية

وقبل ما حد يقول لي: قناة الناس دي قناة قذرة، عملت فتنة طائفية

اقول له: ايوة ايوة.. وافق انت من حيث المبدأ على قفل قناة قذرة ومن بكرة اي قناة نضيفة عاجباك حتتقفل

ولا نوافق ولا ما نوافقش... هو حد سائل احنا عايزين ايه؟ ولا حد حتى بيفكر يكدب علينا؟ مش ممكن الشفافية اللي هم فيها دي... لا، شوية مراعاة لمشاعرنا او نحس انهم مكسوفين مننا.. انما مافيش كده خالص؟ مطرح ما نحط راسنا نحط رجلينا؟

قال لك اتقفلوا عشان مخالفات، الناس والحافظ والصحة والجمال

واون تي في جالها انذار هي وقناة الفراعين

يااااااااااا على قناة الفراعين والراجل التحفة اللي بيطلع يتكلم فيها.... طب حيحرمونا من الراجل الاعجوبة ده ليه؟ عشان ماحدش ينافس رضا ادوارد في الهبل؟

مازلنا في انتظار

4- .....

5- ......

6- ......

7- ......

ده احنا حنشوف ايام لون سنان نادية لطفي