حادثة تاريخية

انا عادة لما باعمل اي حاجة في الدنيا باتضايق بعدها، على طول يعني، عشان كده لا باحب اتفرج على صوري، ولا باشوف نفسي لما باطلع في التلفزيون، ولا لما باكتب حاجة باقراها تاني، والنهاردة في المعهد قرينا حاجة كنت كاتباها من زمان وقعدت ازعق لنفسي في الفصل والناس تضحك عليا

اول مرة في حياتي من ساعة ما اتخلقت اقول حاجة واحس اني مبسوطة اني قلتها، لما قلت في برنامج مانشيت في مداخلة تليفونية مع جابر القرموطي ان صحفيين الدستور مش معتصمين عشان علاوة ولا مرتب، ومع احترامي وتقديري لكل الاعتصامات، الاعتصام ده الوحيد من سنين اللي عشان مبادئ مش عشان لقمة عيش 

وبصراحة بقى حسيت اني زحت هم من على قلبي قد كده، اصل انا بقالي سنين شايلة في قلبي قوي من هتاف: بالروح بالدم رزق عيالنا اهم، وكنت ساكتة وصارة في قلبي، بس فيه اكتر من ميت صحفي منهم اللي عنده عيال وشايف ان المبدأ اهم من رزق عياله، وماهماش مرفهين، ولا محوشين، ولا على قلبهم قد كده، دول صحفيين الدستور، فاهمين يعني ايه صحفيين الدستور؟ يعني خمسميات وسبعميات وسلف بقية الشهر، ومعروض عليهم الافات، ومع ذلك معتصمين عشان متمسكين بمبادئ مهنية واخلاقية

والناس دي افضل منحنية لهم احتراما لحد ما ضهري يتقطم