انا مش مسئولة عن مقال يتنشر في دستور مش عليه اسم ابراهيم عيسى

المهم اني اول ما عرفت الخبر من شادي قلت له فورا يا شادي شيل كل مقالاتي، لاني كنت باعتة لهم مقالات مقدما لحد يوم الخميس، وشادي طبعا قال لي ما تخافيش اتشالت

جيت الصبح لقيتهم منزلين مقالي مع العدد اللي طبعوه في العدد الورقي

ايوة كل العدد نزل لان اصلا ده شغل ابراهيم ومش عارفة ازاي شغل ابراهيم ينزل في عدد الاربع ويقرصنوا على شغله بالطريقة دي، بس انا ما كنتش عايزة مقالي ينزل في العدد وقلت لشادي بسرعة الحق شيل مقالاتي عشان انا كنت عارفة انهم حيقرصنوا على الاعداد

المهم صحيت الصبح قلبت الدنيا واتصلت بشادي قال لي والله شيلنا المقال، هم اخدوا البروفات وجمعوها تاني

طيب، انا من مزنقي هذا اعلن اني غير مسئولة عن اي مقال ينشر لي في عدد دستور مش عليه اسم ابراهيم عيسى رئيس تحرير

رئيس تحرير

مش كاتب واهلا بيك في اي وقت في جرنال هو اللي عامله وحنبعت لك عربية بسواق هههههههه الا دي كمان نكتة هو بيشتغل لوا في سلاح البحرية؟
-------------
اه.. نسيت انوه عن حاجة، الا الناس كلها اول ما حصل الموضوع ده بقوا يسألوا اسئلة كده غريبة من مثال: وانت بقى حتعملي ايه؟
في اشارة الى اني احتمال ممكن اكمل في الدستور بعد اللي حصل ده
هو صحيح السؤال غاظني، بس الناس معذورة، اصل الوساخة كترت ورطرطت وبقت هي القاعدة والاستثناء بقى ان الواحد يتصرف بشكل طبيعي
اول واحدة سألتني السؤال ده طقيت في وشها بصراحة وقلت لها: بصي انا وانا طفلة كان نفسي اطلع رقاصة ومثلي الاعلى كانت نعيمة عاكف، لو كنت لقيت اسرة تشجعني وتنمي موهبتي كان زماني باقدم النمرة بتاعتي كل ليلة وما يهمنيش مين اللي اتغير في ادارة الكباريه، بس للاسف ما طلعتش رقاصة ولا الدستور كباريه
وانا لو واطية لدرجة ان مسخرة زي دي تحصل قدامي واتجاهلها طب انا على الاقل مش غبية عشان اتعامل مع ناس بيهينوا البشر وينكلوا بيهم بالطريقة دي
انا مين عشان افتكر نفسي احسن من ابراهيم عيسى، دي ناس عملت كده في رئيس تحرير، ومش اي رئيس تحرير، ده - شئت ام ابيت عجبك ولا ما عجبكش رضيت ام حقدت - ده نجم بالنسبة للناس، والناس تعودت انها تتعاطف معاه، عشان حصل له المواقف دي قبل كده واحساس الناس ان يووو بقى انتوا ما وراكوش غير الراجل ده تقرفوه كده؟ ومع ذلك لم يرعو كل من الدكتور وتابعه قفة انهم يعملوا معاه اللي عملوه ده، بالاسلوب المنحط ده، والراجل يسلط عليه رضا ادوارد يبلغه بازالة اسمه من على الترويسة ويسافر هو اسكندرية ويطلع يشهر بيه وعايز يفهمنا ان ابراهيم عيسى ساب الدستور اللي هو اصلا مخلفها في الدنيا عشان تلاتلاف جنيه
يعني تنكيل واهانة وكمان تشهير.. ده غير الفصل التعسفي المفاجئ اللي لحد دلوقت مش عارفين اسبابه غير ان العيال اعترضوا على خصم الضرايب من مرتباتهم بعد ما هو رفع لهم مرتباتهم وكان ناقص يقول لهم انتم عبيد احساناتنا
بقى العيال اللي كانوا بيشتغلوا بملاليم اللي كانوا بيشتغلوا فيها في الدستور وما فتحوش بقهم حيعملوا اعتصام عشان خصم الضرايب؟ اللهم الا اذا كانوا حاسين انه سارقهم، الواحد يقبض ملاليم ويرضى لما يكون دي الامكانية، بس لما يحس انه اتسرق طبيعي يتضايق
طيب البني ادم اللي بيعامل الناس كده، ده ينفع حد يتعامل معاه؟ افرض انا واطية وقلت وانا مالي، انا حاكتب، اي غرور بقى يصور لي اني حاتعامل احسن من ابراهيم عيسى؟ يعني واطية وغبية؟ طب عايشة ليه؟
وانا مش بازايد على اي حد عايز يكمل.. بس ده احساسي الفطري اللي تصورت في لحظة من اللحظات انه رد فعل طبيعي
بس الظاهر طلع مش رد فعل طبيعي ولا حاجة