صباح الخير على الورد اللي فتح في جناين مصر

ده فيديو على الفيس بوك
ومحمد توفيق جاب لي فيديو من اليوتيوب

ما عرفتش اكتب حاجة امبارح عشان كنت راجعة تعبانة وبعدين لما رجعت سمعت كلام زي الطين ضايقني فدخلت اتقلبت نمت

الشهادة لله انا ما كنتش متوقعة ابدا ان مظاهرة امبارح تنجح ولا تتم خالص، كنت فاكرة انها حيحصل فيها زي اللي حصل ايام مظاهرة التعديلات الدستورية اللي سببت لي صدمة عصبية مش قادرة انساها، بس قلت حانزل برضه، وطبعا لاني لخمة وموكوسة بطبعي قعدت احاول القح جتتي على اي حد يسحبني في ايده:

مالك تاخدني معاك المظاهرة؟

لا...

حسام تاخدني معاك المظاهرة

انا مش رايح

يا جماعة حد ياخدني معاه المظاهرة

ماحدش رضي يعبرني عشان عارفين اني حالخمهم في المظاهرة وانا اصلا لخماهم في حياتهم كلها، مافيش غير سلمى سعيد حبيبتي اللي بحماس شديد قالت لي تعالي معايا يا نونة، بس ما اعرفش مين ابن ال... اللي وشى بيا عندها وخلاها تتهرب مني في اخر لحظة

جمال عيد قال لي عدي عليا في المكتب وانا اخدك المظاهرة، الوقت اتأخر ما لحقتش اروح له المكتب وقعدت الف في ميدان التحرير

كلمت عايدة سيف الدولة وفهمت منها انهم في قصر النيل قلت لها استنوني قام سبحان الله قالت لي في وشي كده: لا مش حنستناكي!

ايه المعاملة دي؟ المهم محمد واكد اخد منها التليفون وقال لي: لا... حنستناكي... تعالي ياللا

في اخر لحظة المكان اتغير لان جيش عرمرم كان في ميدان التحرير قدام كنتاكي والميدان متقفل خالص كأن اسرائيل حتحاربنا

بصوا بقى انا مش بافهم في الشوارع فحقول لكوا بالشبه كده

احنا مشينا لحد ما وصلنا عند الشارع اللي كان فيه جرنال البديل زمان، واروى مرعي بتكلمني وتقول لي انتوا فين؟ قال بتسألني انا احنا فين على اساس انا اللي حاشرح لها الشوارع، قلت لها: احنا هنا... ماشيين في شارع كده

وطبعا البنت فضلت تعافر عشان تعرف توصل لنا

انا بانصحها نصيحة اخوية لوجه الله... تدور لها على مرشد غيري، هي مش شايفة من كتر وكستي الناس بتتهرب مني ازاي؟

وصلنا عند الشارع ده قام لقينا بتاع تلاتين اربعين واحد متجمعين ورحنا فجأة مشينا في مسيرة الناس تسمع يسقط يسقط حسني مبارك وتنضم في الاول الامن حاول يجري ورانا واحنا في الشارع بس الحمد لله العدد كان بيزيد فلقوا نفسهم مش عارفين يسيطروا، مشينا من شارع لشارع تاني مش عارفة اسمه، بس حتى بالامارة عدينا على قهوة البورصة، ومشينا في شارع تاني، وبعدين قالوا تعالوا ندخل من الشارع ده، كان شارع جانبي، تقريبا قالوا لي ده باب اللوق او حاجة زي كده، بس ناس المجموع مشي في شارع تاني وقالوا لي ان ده شارع شريف، المهم كان غلط نمشي في شارع شريف ده عشان بيوصل على ميدان التحرير حيث الثكنات لو كنا كملنا في الشارع التاني اللي على جنب مش اللي على طول كانت المسيرة بقت اطول واكبر، بس عموما انا كنت مبسوطة قوي

المسيرة ابتدت تلاتين اربعين خلصت وهي حوالي خمسمية ستمية

ما كانش زمان الناس بتنضم كده

الامن قفل علينا شارع شريف ونزل ضرب في العيال وقبض عليهم وسمعنا صوت بنت بتصوت وبعدين مشينا من شارع شريف ده وبقينا نجري لحد ما وصلنا لحتة انا عارفاها دي.. اسمها شارع الشواربي

ضربوا البنات والشباب واتحرشوا بالبنات، بس سلمى سعيد جدعة، شتمت الظابط وراحت طلعت تجري

كل ده واروى مرعي بتحاول توصل لنا وكل ما تمشي في حتة يضربوها

اتضربت كتير قوي ومافيش فايدة عندها اصرار تيجي برضه.. البت دي بميت راجل على فكرة، ومن غير صياح ولا باللو، بهدوء شديد كده واللي يشوفها يفتكرها الكتكوت المفترس ما توحيش ابدا بشدة البأس دي

المهم لما سلمى شتمت الظابط خفنا عليها لان الراجل عرف وشها وبقينا خايفين يحطها في دماغه، قلنا لها يا سلمى ما تمشيش لوحدك

كل ما نمشي دي تعمل زي البطة اللي لسه فاقسة وتروح سارحة بعيد لوحدها، واروح اسحبها من ايدها: يا سلمى ما تمشيش لوحدك لو سمحت

ومالك كل شوية يكلمني.. طب ما كان ييجي معايا، عمري ما حاسامحه ابدا عشان خلا شكلي عار على التويتر وانا باترجاه ياخدني معاه وهو قالبني، بس هو عموما قعد في مركز هشام مبارك يلم اسماء المعتقلين وبعدين جالنا على النقابة بعد كده

الاول قلنا حنروح على مركز هشام مبارك، جينا نروح على هشام مبارك قام واكد واحنا معديين قال فيه حاجة دار القضاء العالي اهي

رحنا ما لقيناش حد، بس المدرعات اوهمتنا ان فيه وقفة هناك

كان عددنا قليل بتاع خمستاشر واحد وللا حاجة، والعيال كانوا حيتخانقوا مع الحرس بتاع دار القضاء عشان عايزين يمشونا

المهم لقينا صعوبة في اننا نعمل وقفة عن القضاء العالي بعددنا القليل ده وبقينا نتصل ببعض عشان نلم بعض على نقابة الصحفيين واحنا ماشيين لنقابة الصحفيين مشي جنبي لزق مخبر طول بعرض لابس ازرق زي الكشافة وعمال يتصنت عليا وانا باتكلم في التليفون وكان ناقص يلزق ودنه في التليفون زي المخبر اللي كان ماشي جنبي انا وعبد الرحمن فارس قبل كده وعايدة بتكلمني في التليفون: انتوا رايحين فين

وده لازق ودنه وبيلمع اكر

طبعا قلت لها انا مروحة حاقول لها انا رايحة النقابة؟ لا ما انا ناصحة يعني، هو صحيح فضل ماشي ورانا لحد ما شافنا رايحين النقابة بس انا حبيت اعمل تمويه، انا دايما باعمل تمويه وبانصح غيري بالتمويه في التليفونات المتراقبة، على التليفون وش كده: ما تبقاش تبين ان معاك تليفون وابقى خبيه عشان تعرف تكلمنا لو اتقبض عليك.. اعمل زي فلان، ماهو بيعمل كده.... لحد ما الناس تقفل السكة في وشي بعد ما يقولوا لي: ده كلام يتقال في التليفون ده؟ طب اعمل ايه طاه؟ ما انا عايزة اوصل لهم معلومة حاوصلها على النت وللا على التليفون وللا وانا ماشية معاهم في الشارع والمخبر جنبي؟ مافيش غير اني ازنقهم واحد واحد في الحمام عشان اقولهم اللي عايزاه.. وللا مراقبين الحمامات كمان؟

رحنا على النقابة لقيناهم مقفلين النقابة فهتفنا برة الكوردون راحوا فاتحين لنا بسرعة عشان يدخلونا

المرة دي العيال ما حدش فيهم كان خايف، الكل كان غضبان خصوصا انهم ضربوا ناس كتير، ضربوهم وهم شايلين صورة خالد سعيد وهو متشوه، الظاهر احساسهم ان دي بجاحة ما بعدها بجاحة خلاهم يقولوا وان شالله يموتونا زي خالد سعيد

لما كنا وصلنا النقابة كان عددنا زاد شوية، بتاع تلاتين واحد، هوب هوب بقينا حوالي تلتمية ربعمية وفضلنا قاعدين معتصمين عشان يفرجوا عن اللي قبضوا عليهم

فيه ناس ما كانتش في المسيرة جات وناس من اللي كانوا في المسيرة اتفرقوا، بس لاول مرة عدد الناس اللي في المسيرة يبقى اكبر من عدد الناس اللي على سلم النقابة

بالرغم من زعلي على الناس اللي انضربت، بس انا فرحانة باليوم بتاع امبارح قوي

طبعا انا جربوعة ولما الدنيا ليلت والعيال ما خرجتش لسه قلت لهم: هيييييه حنباااااات... صح؟ صح؟ حنبات على السلم؟

كل الناس احولوا كده في وشي وامل رمسيس قالت لي: انا كنت فاكراكي مناضلة طلعتي عندك مشاكل في البيت ومش عارفة تطفشي

بس طبعا ماحدش ساندني في فكرة نومة الشارع دي غير محمد واكد مجيبا: طبعا لو ما خرجوش حنبات.. هي دي محتاجة مناقشة؟

العيال بقوا يتصلوا بينا ويقولوا لنا انهم رموهم على الدائري بعد ما اخدوا كل فلوسهم وبطاقات بعضهم بلغت كمال خليل في ساعتها فراح باصص للظباط وقال لهم: عيشوا بشرف جاتكوا القرف هههههههههههههه

الا صحيح ياخدوا فلوسهم ليه يعني؟

لقينا واحد جاي في المظاهرة معاه صورة على الموبايل لواحد اسمه هاني خيري متعذب تعذيب السنين ومصورين ضهره لدرجة ان عايدة سيف اللي ما بتشوفش في حياتها غير التعذيب اتفزعت لما شافت الصورة

بيسان كساب اخدت الصورة واخدت نمرة هاني وان شاء الله بقى ينزلوها في الدستور

للاسف بقى كلهم خرجوا وما عرفناش نبات :)) ياللا الجايات اكتر من الرايحات ان شاء الله

بس على فكرة.. الجايات فعلا اكتر من الرايحات

الغريبة ان التغطيات ما كانتش كويسة قوي

اون تي في بس غطت كويس قوي على حسب ما سمعت ما شفتش، سمعت من الناس اللي جات في الوقفة على سلم النقابة ان الجزيرة غطت وحش، اتصلت بسمير عمر قام اتنرفز عليا وقال لي انا عامل تقرير طويل وطلعت على الهوا

النهاردة اظن الصحف ما لحقتش تنزل كل حاجة، يمكن ينزلوا بكره

يارب يكون حد من العيال صور المسيرة، كانت كبيرة وحلوة وناس كتير عادية من الشارع انضمت وما كانوش خايفين

وعلى فكرة بقى على فكرة، احب اقول لكل الناس اللي تهربت مني زي ما بيتهربوا من الديانة وما رضيوش ياخدوني للمظاهرة خصوصا مالك اللي قعد ينظر لي عشان يتهرب مني: انا مش احسن واحد تروحي معاه المظاهرة.. وحسسني اني خانقاه في حياته، اني صحيح لبخت محمد وكل ما يحاول ينتحر اصوت: يا لهوي انت حتسيبني؟ بس لولا كده كان اتعجن واتقبض عليه زي كل مرة، والمرة دي بقى كانوا بياخدوا الفلوس والبطاقات يعني حرقة قلب... ساعات بيبقى ليا منفعة، هو زهق شوية :) بس عمل الخير قعد له في عينه وعافيته ورجع البيت سليم يعني
عندي ملحوسة رفيعة
الا احنا ما نشبهش المعارصة الايرانية اللي عملوا لنا عليها باللو وحدوتة؟ الا ما شفت السي ان ان ولا البي بي سي ولا اي حد اهتم بينا زي ما كانوا مهتمين بالمعارصة الايرانية اللي كنا كل ما نكلمهم على التويتر يقولوا لنا يا عرب يا جرابيع