Monday 28 December 2009

اظرف والطف واخف دم بلد شفتها في حياتي

لو فيه حد بيحصل عنده في بلده اللي ح احكيه ده ياريت يطمني اهو احس بالونس شوية:
- مجموعة المسيرة الادانب كانوا عايزين يعملوا وقفة احتجاجية بالشموع، يركبوا مركب ويحطوا الشموع في فيل ويسيبوها في النيل :) قام الامن قال لهم لا ما تاخدوش مركب ده تجمع واحنا عندنا قانون طوارئ انتوا مش فاهمين حاجة، على اساس يعني خواجات ومش عارفين قانون الطوارئ ده بيبقى ايه بما انه اصلا معمول بالشطة وهم معدتهم ما تستحملش الحاجات دي، قام راحوا وقفوا بالشموع على الكورنيش، قام جه المخبرين فضلوا يزقوهم وينفخوا في الشمع عشان يطفوه، الظاهر افتكروه عيد ميلاد وهم قايمين بدور نجاتي اللي بينفخ البلالين، خصوصا انهم بيضغطوا على ابو الخيط باعياد الميلاد بتاعتهم دي وابو الغيط سبق ووضح ان مصر بذلت "الغالي والرخيص" من اجل فلسطين، احنا على ايامينا في حصص التعبير كانوا بيعلموها لنا "الغالي والنفيس" ما اعرفش ايه الرخيص ده اللي بنعاير بيه فلسطين؟ شباشب بلاستك ولبان سمارة مثلا؟ هو ادري حيث انه خريج تانية ابتدائي انجليش
- رحت انا بقى على نقابة المحامين بعد ما كلمتني مها وقالت لي انها راحت ولقت الامن مالي الدنيا ومافيش حد، المهم كلمت الشخص اللي كان عامل الدعوة على الفيس بوك وقال لي هم بيمشوا الناس واحنا جوة مش عارفين نطلع حاولي تيجي نقابة المحامين
رحت نقابة المحامين لقيت الامن المركزي عامل وقفة احتجاجية على وجود الشعب في الحياة على سلم نقابة المحامين، وقدام نقابة المحامين، وعلى جنب نقابة المحامين وعلى سلم نقابة الصحفيين وعند دار القضاء العالي، كتائب شهداء الامن المركزي
حابسين بتاع تسع محامين جوة لا عارفين يخرجوا ولا فيه حد عارف يدخلهم، مجرد عديت من قدام الباب الاقي لك الامن بيصرخ في وشي: امشي من هنا، امشي من هنا، كأني عندي جذام. عملت كام تليفون والاقي لك لواء شخصيا بيزعق لي: امشي من هنا.. امشي
طبعا انا زعلت قوي انه بيزعق لي
قلت له: من فضلك ما تزعقليش انا مواطنة ماشية في الشارع مش باشتغل عندك
قام قال لي: امشي من هنا بالذوق احسن لك. اي والله، كانوا متوحشين قوي النهاردة، حتى واحد يعني ماشي في الشارع كده في امان الله مع مراته وسمعته بيقول: عمالين يزعقوا ويشتموا، مع انه ما كانش جاي لوقفة ولا حاجة ده ماشي في الشارع، واخو المدون ماك جاي نقابة المحامين عادي مالوش هو دعوة بالوقفة قالوا له: تعالى بعد بكرة الصبح.

قابلت عبد الرحمن فارس وقال لي ده فيه ناس بتنضرب عند دار القضاء العالي تعالي نروح لهم مشيت انا وهو لدار القضاء العالي قاموا بعتوا مخبر شبه ده



وما كانش ناقص غير جزمته تزيق، فضل ماشي ورانا.. لا الحقيقة هو كان ماشي جنبنا، عشان اكون دقيقة هو كان ماشي في وسطنا انا وعبد الرحمن ولما عبد الرحمن اتكلم في التليفون قرب وحط ودنه ع السماعة عشان يسمع اللي معاه على الخط التاني بيقول ايه. اكيد طبعا شخص ما ح يظن اني انسانة مريضة او بابالغ في حكاية انه حط ودنه على التليفون بتاع عبد الرحمن، لكن عبد الرحمن عندكوا اهو اسألوه، مالناش مصلحة ان احنا الاتنين نكدب ولما بصينا له قام بص في السما

رجعنا تاني عشان نقابل ندى عند نقابة الصحفيين لقينا على ناصية الشارع باقة من امتع المخبرين اللي باينين قوي لدرجة ان الناس اللي ماشية في الشارع ومش عارفين حاجة قعدوا يشاوروا عليهم ويقولوا: المخبرين اهم المخبرين اهم

كأنهم نجوم سينما، وراح عبد الرحمن استنى لما قربنا منهم قوي، وبص لواحد اقرع فيهم وقال: سلومة الاقرع ما يعرفش اخوه

برضه فيه شهود على الكلام اللي باحكيه ده تقدروا تسألوا ندى قصاص وعبد الرحمن لو فاكريني عندي ضلالات

-جم المجموعة من بتوع المسيرة (انا كنت كاتبة انهم من مجموعة جورج جالاواي بس اميرة هويدي صححت لي وقالت لي ان دول من مجموعة المسيرة) ووقفوا مزبهلين، باهزر مع واحدة وباقول لها الشرطة عاملة وقفة احتجاجية ضد الشعب لقيتها ما ضحكتش وقالت لي: فعلا دي حقيقة انا اول مرة اشوف حاجة كده وبان من الاكسنت بتاعتها انها بريطانية

وفضلنا واقفين عند البنك كده احنا نبص للمخبرين اللي كل اللي رايح واللي جاي يشاور عليهم على طول دراعه: بصوا بصوا المخبرين.. وهم يبصوا لنا بالنظرة اللي في عينيهم دي، عارفينها؟ اللي شبه نظرات ابو الغيط شوية لما يا عيني يبقى مش عارف هي الناس متضايقة منه ليه؟

وكل ركنة او جهة عليها كتيبة امن مركزي او اتنين على حسب التساهيل

بس انا حاسة بالاهمية وماحدش ح يعرف يكلمني بعد كده، اولا لان اللي زعق لي لوا، ثانيا لان المخبر اللي كان عايز يصاحبنا ومصمم يتمشى معانا وانا وعبد الرحمن دلقناه وما عزمناهوش على ترمس

بس انا ح اروح وقفة الثلاثاء ان شاء الله، هم لما بينزلوا بالاعداد المهولة دي بيزهقوا ويتضايقوا، خلاص، مدام مضايقينا يبقى يتضايقوا معانا

وباشكر كل اللي اتصلوا واطمنوا عليا وكل اللي تابعوا معانا على التويتر

انا بس عندي سؤال، على ايامينا اول ما فتحت المدونة المظاهرات اللي عشان فلسطين كانت بتتساب وما كانش الامن بيعامل الناس كده ابدا... واخر مرة كان ايام حرب غزة، بداية من الحفر تحت بيت المقدس ومصادرة البيوت ابتدوا يغلسوا على الناس ليه؟ هي فلسطين طلعتنا من كاس العالم؟


27 comments:

وائل صلاح said...

فلسطين مطلعطناش من كاس العالم


لكن إحنا اللى طلع لنا وريث إيده طرشة و مخه ضلم

Fatma said...

والله عمالة اضحك واعيط

حمد الله على سلامتكم وياريت مايكونش حد جراله حاجة لاني عمالة اقرا على تويتر ان الناس اتضربت

انا عديت من هناك الساعة 8 ماشوفتش غير الامن المركزي باعداد مهولة ماشفتش ناس الظاهر كانوا روحوا

لازم نشوف حل في وقفة يوم التلات ماينفعش يبوظوها كدا ماينفعش تبوظ يوم التلات النتن ياهو جاي واعتقد الامن هيبقى اعنف من كدا

ابقى فكريني اجيب شمع نولعه :P

بر و ماء said...

لا فلسطين طلعتهم من الجنه ربنا يستر و مطلعناش احنا كمان

مهندس مصري بيحب مصر said...

طيب شفتي المظاهرة اللي عاملها 300 فرنساوي قدام سفارتهم في شارع مراد و قافلين الشارع و ناصبين خيم دلوقت و الامن حول المرور لشوارع تانية
الكلام على تويتر من ميدو

يساري فلسطيني said...

سالمة ياسلامة

روحنا و اللواء رجعنا بالسلامة
....

نشكر الامن المركزي على وقفته الاحتجاجية و التضامنية مع فلسطين

و الله ان كنت مفكر عندكم ديمقراطية طلعتو ... زي بقية العرب مهسلبية

و بخصوص المخدرات اللي منصدرها من غزة لمصر ... انتو لسة مدفعتوش حسابها و كذلك نود اعلامكم باننا سوف نصدر لكم ... ولا بلاش احسن تقلب دراما


الحمد لله على السلامة و تحياتي

يساري فلسطيني said...

لواء يفض مظاهرة للمدونيين و مخبر يتحرش سياسيا بنوارة .. انا اكتب السيناريو و الميهي يخرجه

وعايزة البريطانيييية ماتفهمش النكتة .. دي مش نكتة دي وكسة ونكبة
...

خلاص كانت تايهة و مالاقينهاش

كل يوم على الفيسبوك اعلان مظاهرة ويتم حشد الالوية للتصدي لكم
وتمتليء الشوارع بالرفاق من الامن المركزززي و الشلطة

فعلا حكومات منخوليا

تحياتي

Unknown said...

ههههههههههههههههههه
احنا عندنا ديمقراطية؟
هم عشان سايبينا نرقع بالصوت تبقى ديمقراطية
دول بيدربونا ع الشرشحة
بس انا ملاحظة انهم شادين حيلهم علينا اليومين دول

يساري فلسطيني said...

لو فيه حد بيحصل عنده في بلده اللي ح احكيه ده ياريت يطمني اهو احس بالونس شوية
.................................
مافشرت ... دي بقية الدول العربية قطعة من الحضارة و الديمقراطية ... ال ايه تحس بالونس ال ... بس احنا يادوب يبعتولنا ملازم بنجمة

و على فكرة برضه حبايبك حماس لما استلموا الحكم في غزة كانوا متحضرين مع المتظاهرين .... مش كده

زعلت لكم نوارة يا جدعان

Anonymous said...

تحياتي لأخي العزيز ggt1230
ونحيطكم علما بإن مصر مبارك، النيل والهرم والحضارة والنضال وسبعة مليون سنة والشقيقة الكبرى واليد العليا والصدر الحنين، مصر ما بتاكلش حق حد، والحساب جاي في السكة مع النسوان الروس اللي بتهربوها لنا، بس نحب نهمس في آذانكم، ابقوا رجعوا لنا النسوان عشان ابو الغيط تعبان قوي

wahat_alshohada said...

انا بعتلك يا نوارة على ال38 اجنبى اللى محتجزينهم فى العريش و ممنوع حد يتحرك من مكانه و الله اعلم افرجوا عن ال8 الاخرانيين و الا لسة؟ تخيلى لو الاجانب دول عملوا دوشة وسفاراتهم اتدخلت دول من كل دول العالم، يخرب بيت الغباء السياسى الامنى المصرى. سؤال لحضرة اللواء وباقى الامن المصرى.. ازاى بتناموا بالليل؟ بتحلموا بايه؟ مابتخافوش من دعاء المظلومين؟ طيب ازاى بتبصوا فى وجوه عيالكم و اهلكم؟؟؟

Unknown said...

انا ما باتكلمش على القمع
القمع ماهو موجود في كل حتة

انا عايزة اعرف، هل حد غيرنا عنده قمع كوميدي؟

يساري فلسطيني said...

انا عايزة اعرف، هل حد غيرنا عنده قمع كوميدي؟
-----------------
طبعا لا
انتم عندكم عادل امام و احنا عندنا الخناس الوسواس محمود عباس

------------------
التويتر عندي مش شغال مش عارف ارد على تعليقاتك ... وال ايه انا خبير في الكمبورر

يساري فلسطيني said...

سؤال لحضرة اللواء وباقى الامن
المصرى.. ازاى بتناموا بالليل؟ بتحلموا بايه؟ مابتخافوش من دعاء المظلومين؟ طيب ازاى بتبصوا فى وجوه عيالكم و اهلكم؟؟؟


wahat_alshohada said...


!!!!!! الاخ من الدول العربية

wahat_alshohada said...

بالنسبة للقمع
اة
مرة الامن الامريكى رش فلفل اسود على المتظاهرين ايام العراق

يساري فلسطيني said...

فلفل اسود ينفع لليوم الابيض

مش قادر ابطل ضحك على موضوع تصدير المخدرات .... شر الهبلية ما يضحك

lastcrazyboys said...

معلش بقى مع كامل احترامي للوقفة ..والاعتصام

السادة بتوع الإمـن هم أكتر ناس شايفين شغلهم في أم البلد دي ..هم وبتوع الحزب

وده تاكد لي منذ اللحظات الأولى التي وطأت فيها قدماي الاتوبيس المتجه الى الاسماعيلية في آخــر موقعة مع الدروايش منذ اسبوعين

لدرجة اني في التفتيش اللي كان في الطريق " بعد ما اتنفضت تلات مرات بحكم تغليسي على الامن اثناء اداء واجبه الوطني ..ومصمم احسسهم ان في نيتي اعمل عملة " اتجهت للعميد المسؤول عن المهمة ..وقلت له بصراحة انا كل يوم بتأكد ان الداخلية هي الجهة الوحيدة اللي شايفة شغلها بالمضبوط في البلد دي
إلا بالحق سيادتك..هو انتوا خلصتوا طبعا على العيال المسجلين ..وطهرتوا البلد من الشضلية والحرامية وارباب السوابق..ولما مالقيتوش حاجة تعملوها قلتوا نيجي نتسلى عالعيال الصيع اللي مش لاقية حد يربيها "
الغريييب ان سيادة العميد كان مؤدب جدا..وعمل نفسه مش المعني بالكلام ده - على أساس انه تبع وزارة الصحة - ..ونده على محسن عشان مش شايف شغله وسابنا ومشي

ومن يوميها ..وانا مقدرش سوى اني ارفع القبعة لكل من ينتمي للداخلية ..أو للحزب
هتقوليلي طب ومال الحزب ومال الكلام ده
هقولك اني سمعت معلومة من مصدر موثوق
حصلت أثناء انتخابات اوباما اللي فاتت
بيقولك أوباما قبل الانتخابات اتصل بمبارك و قاله عاوزك تبعتلي شوية ناس
من عندك عشان يسيحولي في الانتخابات و اكسبها في الآخر

راح باعتله شوية من الامن على شوية من أعضاء الحزب الوطني

و بعديها بكام يوم لقى اوباما قام متصل بيه
و قالّه :الله يخرب بيتك و قام قافل السكة في وشه

لقي هيلاري كلينتون بتتصل بيه و بتقوله :الله يخرب بيتك و قفلت السكة في وشه

و بعديها بيل كلينتون اتصل و قاله :الله يخرب بيتك و قفل السكة في وشه برضه
الراجل هيتجنن و بيقول :هوا فيه إيه..؟

شوية كمان لقى بتوع الحزب الوطني بيتصلوا بيه من أمريكا

و بيقولوا: مبروك
يا ريس، انت كسبت الانتخابات الأمريكية !

Anonymous said...

لن ازيد عن ما قاله عبدالباري عطوان
ابناء قطاع غزة لا يمكن ان يهددوا أمن مصر. لانه امنهم. وشعبها هو عمقهم الاستراتيجي. وسندهم الاساسي الذي قدّم آلاف الشهداء انتصارا لقضيتهم، ولا يريد اهل غزة ان يعيشوا على الانفاق التي اضطرهم الحصار لحفرها. بل يريدون فتحا منظما وطبيعيا للمعبر. تطبق عليه قوانين مصرية. كما يحدث في اي منفذ حدودي اخر.

بتنفس حريه said...

يعنى الناس المحترمه الى بتولع شمع مش ماشى معاهم والتغجير و السفاله هم الى بيمشوا
كويس انهم اتحججوا بقانون الطوارىء ماالقولهمش خايفيين على تلوث النيل ههههههههه

وبعدين انا قريت انهم كانوا عايزيين يقفلوا جروبى علشان كانوا بيجتمعوا هناك وبنفس حجه قانون الطوارىء

خيرالدين said...

نوارة صباح الخير
حبيت أقول لك ان فيه عدد كبير من المواطنين الفرنسيين وصلوا القاهره فى طريقهم لغزة لكن السفاره بتاعتهم قالت لهم ان السلطات المصري رفضت السماح لهم بالسفر وان مفيش اتوبيسات هتيجى تنقلهم فقرروا الاعتصام والنوم فى الشارع لحد ما يتحل الموضوع
حاليا الناس دى محاطه بجحافل الامن المركزى ومن غير لا أكل ولا شرب ولا حتى اى اهتمام اعلامى

NadimX said...

that was the stupidest thing ever..
i heard about the event thru ur blog Nawara..cancelled my plans..then u told us it was cancelled .. I reestablished my plans..then u told us it was back on again ..I recancelled my plans again ..

i finished my college and by 5 pm i was inside the syndicate..and there were no one but two officers and a couple of those " Mukhbereen " but only outside ..i asked the security on the door if the event was taking place today and he told me yes..been there till 6 pm alone withe a friend whom i convencied to come " he was really scared " i was worried also since this was my first big political thing i did since the"Day of Judges " my only 2nd event since i've come to egypt..

but i saw there was no one ..me and my friend start making all these jokes and laughing hysterically inside the syndicate building ..till 6 there was no one..our laughing prompted one of the security to ask us to leave if we weren't lawyers..we did ..went away for half an hour to break our fastening By the cournich

nothing really seemed to be really serious untill we came back..the main door was like a black bee hive from all this riot police soldires .. they were onto eachother ..and not a damn word or a cheer coming from inside the walls .. every body comming in was directed to the back door and u couldn't really reach there.. i stood there for about 20 minutes trying to figure out away in ...i was the first one there and i missed the whole thing .. i was so pissed off..

put it was sort of a disapointment about the orginizing of the whole thing by the lawyers synd' ..

i've been following ur blogs for a while and really wanted to meet u ..

best of luck..and please tell us if it's going to be any differient on tuesday

(P.S : forgive my english but i am only half egyptian and my arabic isn't that good)

Greatings

Nadim

Unknown said...

xxx

انا ما قلتش انه اتلغى انا قلت انه نقابة الصحفيين بقت يوم الثلاثاء ونقابة المحامين يوم الاحد

doudou said...

أنا بقى مش عارفه أبطل عياط
الدنيا برد الناس فس غزه هتعمل ايه
ومين بقى العثل اللي هيقاطعوا منتجاتنا طيب و الله الصيت ولا الغنى
الوقفة دي وقفة من اللي هي كده؟؟؟؟؟
أنا مش عارفه أعمل ايه
حتى الخواجات اللي بكرههم قرفانين مننا
بالنوسبة للي بيقولوا لو الغزاويين دخلوا سينا هيتحدوا مع البدو ضدنا؟ايه رأيك يا دكتورة في الرأي العبقري ده؟خاصة ان الناس دي كتير و كمان بيقولوا ردوا علينا بالحجة وقولوا مصادركم

يساري فلسطيني said...

last crazy boy


مش معقول نكتة الموسم فعلا

اذا قديمة فهي فعلا كلاسيكية


تحياتي

يساري فلسطيني said...

اسمحيلي يا نوارةارد على

xxx

...............

وبعدين يا حبيبي حصل ايه في مناسبتك الوطنية الثانية ... خصوصا لما لاقيت الامن الصعيدي بالشوم مستنين

.....

معلش يا نوارة ... شكله البانجو المضروب اللي باعته لي البنت الروسية المصدرينها لكم من الانفاق ... اشتغل و عمل لي دماغ كيتكات خالص
.........
هما دول ياسيادة اللواء اللي حاشد لهم الكتائب المسلحة الميدانية المجوقلة

كان فيه بيت شعر لوالدك العزيز بيقول جاتنا 1600 خيبة

و مع ذلك يا نديم انت احسن مني بالف مرة ... زكرتني بشبابي في الثمانينات

تحياتي

يساري فلسطيني said...

اقرائي و انفجري يا نوارة
bbc ... من موقع

ونقلت وكالة فرانس برس عن زاهر البيراوي المتحدث الرسمي باسم القافلة قوله "نحن ما زلنا في العقبة بانتظار حل وسط من الجانب المصري لهذه المشكلة التي اوجدتها مصر للاسف الشديد لاننا مررنا بعشر دول بسلام ودون مشاكل".



وقال "تركيا تدخلت الجمعة عبر وسيط رسمي من رئاسة الوزراء التقى بالقنصل المصري وجاءنا بعروض اولية فيها اشتراطات اثارت حفيظة اعضاء القافلة اهمها هو انه لا بد من التنسيق مع الاسرائيليين لدخولنا وهو ما نرفضه رفضا تاما".

شرفاء فرنسا و اوروبا يرفضون التطبيع و اخذ اذن اسرائيل

الله اكبر ... احيكم يا ابطال

يساري فلسطيني said...

شوفي يا نوارة

انا اعتذر الف مليون مرة على اعتقادي انك مزوديها حبتين في انتقاداتك للحكومة , انا غلطان سامحيني

مشاهدة المقارنة بين ماحصل في القاهرة و بقية الدول الاوروبية جعلتني انفجر

انا مستمر في موقفي الايدلوجي السلبي من حماس و من ايران ... و مع ذلك اقول ان الجريمة هي ضد شعب اعزل مسكين و ليس ضد التطرف الاصولي ... يامجرمين

تحياتي

هرطقة said...

أيوة.. كل ده حصل فعلا
وزيادة عن كده.. أول ما الخواجات مشيوا.. الإمن اتحرك
وكان سيادة اللواز بيقول مش عايز يشوف حد هنا خالص
بس كانت فرصة سعيدة نشوفك والله