Thursday 24 December 2009

يحدث في المدينة الباسلة

 تحديث:
احيه احيه احيه يا بو سوس احيه بنتك ح ترقص وانت ح تفتح للزباين
منظمات امريكية عاملة حملة ضد مصر، فين برامج الفضائيات المصرية تسأل السؤال التاريخي: لماذا ماحدش طايق ريحتنا؟ 
يا ترى ليه؟ عالم ظلمة بعيد عنكوا
------------------

يا مصر بعض التسامح يبقى عار وبأجر/ افتكري "لا تحسبن" مكتوبة فوق كام قبر/ والتار يبات يصحى تاني لو يشيب الدهر
(تميم البرغوثي - قالوا لي بتحب مصر)

وفي بورسعيد (المدينة الباسلة) لا تحسبن مكتوبة تقريبا فوق تسعين في المية من شواهد القبور، وفي بورسعيد المدينة الباسلة، الدولة باعت مصنع مصري بورسعيدي عمله المصريين بعرقهم ومالهم وكبروه بضرايبهم لشركة باجير الاسرائيلي، ده من سنين، وانا مواطنة مصرية صالحة، باسمع الكلام وبادفع الضرايب وبنقدم ورق بالشقة اللي قاعدين فيها للضرايب العقارية، اول مرة اسمع الخبر ده النهاردة
والاكادة، ان صاحب العمل الاسرائيلي فصل مدير مصري عشان "يجيب للعمال حقوقهم" لا.. انا ما اتجننتش ولا باخرف
انا بقى الدموع نازلة كده.. سبحان الله، مش باعيط يعني ولا حاجة، هي نازلة كده لوحدها، حاسة ان حد شد كوبس الكهربا وسابني لوحدي في ليلة مافيهاش قمر، واحنا اصلا ما عندناش نجوم في القاهرة بسبب التلوث، ومش عارفة ليه افتكرت حاجة غريبة قوي، افتكرت جومانة مراد في فيلم كباريه وهي ماشية تقول: طرحة سودا استر بيها نفسي.. اي حاجة استر بيها نفسي... ادوني حاجة استر بيها نفسي

فيه ايه؟ ايه التلطيش اللي من كل ناحية ده؟ مين بيعمل كده فينا؟ ايه اللي فجأة كركب الدنيا على دماغنا من كل ناحية؟ بتعمل ايه يا عوكل؟ بتعمل ايه بالظبط؟
ما تفهمنا يا عم نبوس ايدك، احنا بقالنا قد ايه مضحوك علينا الله يخليك؟ ما خلاص، الطوبة وقعت في المعطوبة ومش عارفين نعمل لك حاجة، صارحنا بقى، يعني ايه اسرائيل تحتفل بثورة اتنين وخمسين مع السفارة المصري ونتانياهو يقطع علم مصر اللي مرسوم على تورتة؟ يعني ايه اسرائيل تحتفل بعيد ميلاد انور السادات وتعمل له ميدان باسمه وكل الاسرائيليين حتى الاكثرهم تطرفا وعنصرية يقبلوا بكده؟ شوف؟ شوف وصلنا ان احنا عادي قابلين، بس هم قابلين ازاي؟ الا اذا كانوا عارفين انه خدمهم خدمة تستحق ان واحد عربي مسلم واسمر (وهم عندهم عنصرية ضد اللون) يتحط اسمه على ميدان في "ارض الموعد" المخصصة لشعب الله المختار. هي دي حاجة بالساهل يعملوها يا ناس؟ يعني ايه تبني سد يأجوج ومأجوج عشان "تحمي" مصر من الغزاوية وانت بلسانك اللي طلعت مرة وقلت لصحفية اسرائيلية: ما انتوا ياما دخلتوا لنا من الحدود جواسيس وتجار مخدرات ودعارة ورجعناهم لكوا في الكتم!  وبايع كام حاجة في البلد لشركات اسرائيلية؟ يعني انا دلوقت الكرسي اللي انا قاعدة عليه ده بتاعي وللا ايه؟ ما تكلمنا يا سيدي ربنا ما يحير لك ولايا، احنا كنا عملنا لك ايه؟ من امتى بتضحكوا علينا؟ من امتى؟ من سبعة وسبعين؟ وللا من تلاتة وسبعين؟ وللا من سبعة وستين وللا من اتنين وخمسين؟ وللا من تمانية واربعين؟ نعرف بس

اه.. انا نسيت انك مش عايز حد يكلمك في الموضوع ده دلوقت: لالالالالالالا ارجوك ارجوك ارجوك
معلش.. انت عارف الستات رغايين بقى، ما تاخدش في بالك
طب اعمل ايه دلوقت؟ انا لسة باحبها


8 comments:

Ahmed said...

أنا خلاص مبقتش بحبها

مصر مش أمى ولا حتى مرات أبويا

مصر بقت امنا الغولة

شمس العصارى said...

تنازل عن مصر
سيدى الرئيس
بعد معايشة الوضع الحالى فى مصر و فهم عميق للواقع المنظور و غير المنظور و المستخبى و المدبر و المقروء و الغير مقروء و بعد فحص و تمحيص
اقرار /
أقر و انا فى كامل قواى العقلية و لكن مدمر القوى النفسية و المعنوية الشعورية و اللاشعورية :
أنى أتنازل عن حقى فى وطنى مصر
و لسيادتكم الموقرة كل الشكر
التوقيع /مواطن مصرى لم تشعر به مصر فقرر أن يبادلها نفس الشعور
ـــــــــــــــــ
قرار رئيس الجمهورية :
بعد الاطلاع على الدستور و القانون قررنا الاتى :
مادة واحد : تسقط الجنسية المصرية عن المواطن المذكور اعلاه و يحرم من كوبونات الماء و الهواء المدعمين
مادة 2 : ينشر هذا القرار فى الجريدة الرسمية ................
............ غيره
طبعا الريس مستعجل

على ما يبدوا " لا مفر من تعميد الحاكم بالدموع ............ و الدم معا " باين كده

العلم نور said...

يعني إيه لما كل العالم العربي يبوس جزمة إسرائيل ويخليها تفعصه وهو واقف يضحك يعني إيه ويعني إيه!!! كلنا بواسل

Abu ShoSho said...

غرضك نرد على سعالاتك
أني حدايا كلمة واحدة
حب الدنيا و كراهية الموت

تحياتي
أبو شوشو

حامد متولى said...

ابنتى نواره
لاتبكى ياابنتى ان ماحدث الاربعين سنه الماضيه لم يحدث لامه فى العالم على مر العصور لقد ذقنا الهزيمه فى 1948 وارجعنا السبب للملك الفاسد واسلحته الفاسده وخيانة امير شرق الاردن وقامت الثوره واستبشرنا خيرا وتصورنا ان الحال تغير واننا سنعيد فلسطين ..واعتدى علينا فى 1956 ووقفت هذه الممدينه الباسله يد واحده ضد العدوان وانهزمنا فى 1967 ولكن لم ننكسر وحاولنا فى 1973 ومن لحظتها حولوا نصرنا لفشل ومبادرات واستسلام وعملوا المعاهده وسوقوها للغلابه وشغلوا الشعب بالدعم والامن الغذائى وكله كوم والثلاثين الاخيره اللتى شهدت استسلام كامل وبيع كامل لانجازات الثوره وخرجت مصر من الحلبه واصبحت حارسة معبر ..ومحاصره لقطاع ..ولكن يا عزيزتى لاتبكى فالقادم افضل ومن لايعرف هذا الشعب لايعرف شيئا..و
لاتبكى..ابدالن نبكى

سامي said...

ارحمى نفسك

Anonymous said...

يا نوارةانا اتصدمت زيك كدة من كام يوم لما قرأت مقال في هآرتس عن صفقة ميدور اللى عملها حسين سالم (أنتيخ عوكل) مع الاسرائيليين .

http://www.haaretz.com/hasen/spages/1135884.html

مع ان الموضوع قديم بس انا بردو كنت اول مرة اسمع عنه وحسيت بجد اننا شعب واخد على قفاه جامد اوي وأكيد كل البلاد التانية بيضحكوا عليناوعرفت ليه الجزائريين كانوا بيقولولنا يا يهود وعرفت بردو ليه هيثم شاكر كان مزبهل .. لأننا ببساطة واخدين شلوت جامد اوي في نفسناوفاكرين ان مصر ام الدنيا وست العرب

صوت الحق said...

شكرا يا نوارة انك ألقيتي الضوء عالبوست بتاعي عشان الناس تعرف احنا وصلنا لحد فين