Friday 3 October 2008

دوخيني يا لمونة شغلانة المتثيقفين

احنا اتهرينا على فكرة، الا الواحد من دولم ليه بيعوز يعني يبقى مثقف؟ انا عارفة ازاي بيعوز يبقى مثقف:
يشفط دماغك ويروح حاططها في العصارة
عايز يقول لك على فكرة انا متعصب ودماغي جزمة قديمة وهو كده بقى ليك شوق في حاجة؟ او عايز يقول لك يا سيدي انا مرمطون ونفسي بقى اقب على وش الدنيا انت ح تخنقني ليه؟ او يقول لك يا سيدي انا بانصر اخي ظالم ومظلوم واللي معايا يبقى على طول صح وعدوي يبقى على طول غلط وما تقعدش تقول لي بقى مبدأ...ده عند خالتك يا امور. او عايز يقول لك اتساق ايه وزفت ايه اللي واكل دماغنا بيه المهم مصلحتي.
على فكرة كل اللي فات ده مع انه يبان فج لكنها وجهات نظر وجيهة يعني وتحترم حتى لو ما عجبتكش.
طيب ما يقول كده على طول، لا لو قال كده على طول ما يبقاش مثقف لازم يقعد يلف ويدور ويدور ويلف ويقول لك المقدمات المنطقية بتقول...هابا هابا هابا هوبا هابا هي
والاطار والسياق ونظريا وعمليا وهناك فرق ما بين الفكر العقلاني والولاء العاطفي حيث ان التوجه السمبتاوي للانسان الانوي النادر قلما يسمح بوجود مسلمات ثابتة دون التعمق في الخلافات التاريخية للمناهج البنيوية بين مختلف الانتماءات العقدية والحلقية والغويشية، إذ أن العقد فرط ذلك لان الخيط بلاستيك وانت وقفت في الحر فساح، وعليه فانه من الواجب التبطين للبنية القاعدية خصوصا لما تبقى رفيع وما تقدرش تقعد على كرسي خشب كتير، وعلى كل الاحوال حط رجل على رجل لحد ما نجيب لك شلتة
يا عم انت وهو...هات من الاخر عشان الواحد يحترمك حتى لما يختلف معاك
انما تمسك دماغنا وتلفها لحد ما نرجع من كتر الرغي
يبقى ح تروح النار
قبل ماحد يسألني مالك يا نوارة...اصلي فتحت الريدر النهاردة

No comments: