كاسترو مشي

وماك بيغيظني وبيقول لي ح نشوف ح تعملوا ايه؟ ح اعمل ايه يعني؟ الحق احق ان يتبع، الراجل كان بيحب العرب صحيح، وكان مدوخ امريكا تمام، بس ديكتاتور، فيه حد في الدنيا يقعد كابس على نفس الناس بالطريقة دي؟ ثم ان كوبا الاحوال الاقتصادية فيها تقطع القلب، مش زي مصر يعني ماحدش زي مصر احنا مالناش زي، بس ام الثورة اللي قعد اكل دماغ الناس بيها كان مفروض تشبع الناس مش تسيبهم جعانين، الجوع وصل لان بعض الكوبيين يروحوا اوربا ويلبسوا ستات عشان ياكلوا

الحاجة بقى الاهم انه هطل كوبا، خلاها زي البت اللي ابوها قافل عليها طول عمرها واول ما تخرج للشارع كل الرجالة ح يضحكوا عليها طبعا لانها ما تعرفش اي حاجة في الدنيا وما شافتش اي راجل في الدنيا غير ابوها، واول ما كاسترو يموت كوبا ح تتقلب فوضى
وانا باقول يموت مش يسيب الحكم لاني مش داخل عليا سيبان الحكم ده، هو تلاقيه بس غير قعدته بدل ما كان قاعد جنب الشباك راح قعد في البلكونة
ملحوظة بس: مافيش داعي للمتأمركين يفرحوا لان انتقادي لكاسترو يختلف عن اغراضهم الدنيئة
وياريت اللي بيحبوا كاسترو يفكروا ده لو كان رئيسهم كانت ح تبقى مشاعرهم ايه..ح تقول لي ياريت؟ طيب بس انت اول واحد ح تترمي في السجن