هيييييييه مصر وحماس حلوا المشكلة: قفلوا الحدود

اخيرا الحكومة المصرية اتفقت مع حماس على تنظيم الحدود واول خطوة في تنظيم الحدود انهم يقفلوها
!!!!!!!
عموما بيقولوا ح يفتحوها تاني بس بشكل منظم
وعلى الله وصلة الردح والمعايرة والشرشحة بقى تنتهي ده احنا ناس ربنا ما يحكمنا على ولايا ولا يحوج حد لينا
قبل بس ما نتكلم فيه كام نقطة عايزة اوضحها
اولا: فتح معبر رفح بشكل منظم ودائم ولا يتغير بتغير اي ظرف ده ضروري وواجب ومافيش اي حلول تانية واللي يقول غير كده اغزج عينيه
ثانيا: حماس ما كانش المفروض تدخل انتخابات هي بالاساس وليدة اتفاقية هي مش معترفة بيها المفروض انها فصيل مقاوم والمفروض انها عارفة ان اتفاقية اوسلو عملت السلطة دي عشان تحفظ امن اسرائيل في المقام الاول يبقى بتدخل الانتخابات بتاعة السلطة دي ليه؟ واللي يقول غير كده اخزج عينيه
ثالثا: بس اللي حصل ان حماس دخلت الانتخابات ونجحت باكتساح وبنزاهة وعليه فحماس سلطة شرعية مائة بالمائة وفقا لبنود اتفاقية اوسلو وهي مش حكومة مقالة لانها ما استقالتش وواقع الامر ان عباس هو اللي عمل انقلاب على سلطة شرعية مستمدة شرعيتها من انتخابات حرة ومن والقوانين الدولية واللي يقول غير كده اخزج عينيه
رابعا: قفل المعبر وحصار اهل غزة مسئولية الاطراف الاتية بالترتيب: 1- عباس 2- حماس 3- اسرائيل 4- الحكومة المصرية
ليه الحكومة المصرية وهي ذنبها ايه؟ ذنبها اننا طلبنا منها الف مرة قبل كده انها تفتح من جانب واحد وتعمل احتياطات امنية عشان ما يتسربش اي سلاح ولا غيره داخل مصر لو خايفة او على الاقل تدخل المرضى والاطفال والنساء
ده غير ان مصر استهبلت وحشرت نفسها في خناقة حماس وفتح...هي مالها هي تقفل من جانبها عشان عباس قفل؟ وهي مالها حماس اخوان وللا ولاد خالة دي حكومة منتخبة
خامسا: منظر تفجير الحدود بالطريقة دي كان منظر مزعج ويدعو الى الرثاء والتقزز والاحتقار والغضب
مزعج: للمصريين طبعا ده منظر اي حد يحبه؟
يدعو الى الرثاء: لحال الناس الغلابة اللي متحاصرين زي فار في المصيدة ومالهمش غير ربنا
والتقزز: من مجموعة صيع خونة كان المفروض من اول الصراع يحصلوا ياسر عرفات بنفس الطريقة اللي قتلوه بيها والله ده واحد قتل الرئيس الفلسطيني والكل عارف كده واسرائيلي اكتر من الاسرائيليين قاعد في قصر الرئاسة بيهبب ايه؟ وسايبينه ليه؟
والاحتقار: من حماقة وغباء حماس اللي عملت الناس الغلابة دروع بشرية واستخبت ورا النسوان والعيال ولما اطمنت طلعت من تحت الترابيزة قال ملثمة قال وعاملين اشاوس
والغضب: من الحكومة المصرية اللي لو كانت فتحت من الاول من جانب واحد ما كانش الامور وصلت لكده
سادسا: التمثيل غير المشرف على حدودنا مش مسئولية الفلسطينيين...دي مسئولية الرئيس الراحل اللي مضى على اتفاقية ما تسمحلناش غير اننا نحط على حدودنا كام عسكري غلبان بشوية عصي

خلصنا خلاص؟
طيب ده بالنوسبة للحكومات: كلهم مسئول كلهم ولاد ستين في سبعين ما بين خاين وغبي وندل وكلهم رغم كده والله يصعبوا على الكافر
عباس بموجب اتفاقية اوسلو اللي اتعملت من الاساس عشان تحفظ امن اسرائيل ومش عشان حاجة تانية هو بيعمل شغله الراجل...بس دي شغلانة وسخة
يعني الراجل اللي واقف ورا الرقاصة وماسك الصاجات دي شغلانة وسخة
بس في النهاية دي شغلته ما يقدرش فجأة يروح رامي الصاجات وقاري قرآن في الميكرفون
لكن برضه المفروض يتوب ويشوف له شغلانة شريفة
حماس من ساعة ام الرئاسة بقت في ايد عباس وهم مش عارفين يلاقوا لنفسهم الية يقاوموا بيها راحوا قلوا عقلهم وافتكروا انهم لما يمسكوا السلطة ح يعرفوا يشتغلوا قامت الحكومة بتاعتهم كلها اتقبض عليها مش يعقلوا بقى لا ارتبكوا وقعدوا يلوشوا يمين وشمال وعاملين زي اللي وقعت في بركة مطينة كل ما تيجي تخرج تغرز اكتر
بس برضه لما يبقوا مش عارفين يشتغلوا بسلاحهم ضد الاحتلال بسبب الرئاسة يبقى على الاقل ما يوجهوش سلاحهم ناحية فلسطينيين حتى لو خونة يعني هو السلاح ده له مدة صلاحية ولازم يستخدم باي طريقة يعني؟
بياكلهم السلاح ده؟ ثم ايه الغباء ده؟ ازاي يحاصروا نفسهم في غزة ويزنقوا الناس معاهم وبعدين يرجعوا يعيطوا؟
مصر عاملة زي الكلب الحيران ما بين دول ودول وكل ما تيجي تلعب بديلها تتعك اكتر
بس مصر ما تقدرش تخلي مسئوليتها لانها مسئولة عن كل اللي بيحصل في فلسطين من الاول خالص...من ايام تمانية واربعين
مش جايين دلوقت بعد ما عكينا حياة الناس من اول لحظة نقول لهم دلوقت زي ما الحاجة لميس جارب بتقول: واحنا مالنا ماحدش ح يحرر بلدكوا غيركوا هو احنا ملطشة؟
والنبي اييييييييييييييييييه؟ كان فين بقى الكلام ده واحنا هزيمة ورا هزيمة ورا ندالة ورا ندالة عمالين نورط الناس في مصايب وهم ماشيين ورانا ما كان من الاول الكلام ده
ايه شغل المنايفة ده؟
(ماهم راخرين كان ايه اللي بيمشيهم ورانا بعبطهم ده؟)
والنبي يا ست لميس انت تقعدي لنا على جنب...انت مش دكتورة؟ ما تشوفي لك عيادة وللا اي مستشفى بيطري تشتغلي فيها وترحمينا من فتيك في كل حاجة تاريخ وسياسة واقتصاد وعلم اجتماع وبتتكلمي في كل حاجة الا شغلتك وتستظرفي بدمك اللي زي البق ده وخنقتينا
ده يحيى الفخراني الله يكون في عونه على اللي هو عمله في نفسه...بس هو يستحملك احنا نستحملك ليه؟
واحد ييجي يقول لي: جرا ايه يا انسة (طبعا لانه لو قال لي يا مدام مش ح ارد عليه) هو انت تقولي كلام عكس بعضه وعايزة بس تخزقي عنين الناس؟

اقول له الكلام شكله عكس بعضه بس هو الوضع على الارض كده..عكس بعضه مش ذنبي اني باوصف واقع والواقع عبارة عن لحمة بوفتيك بالمهلابية مرشوش عليها شوية صنادل
وعشان كده باقول ربنا ما يحكمنا على ولايا ولا يحوج حد لينا
بجد يعني لما الحكومات مسئولة وكلنا مجمعين على كراهية الحكومات العربية وعلى انها يا اما غبية يا اما وسخة
كان ايه لزوم وصلات الردح المتبادلة ما بين بعض المصريين وبعض الفلسطينيين
ودول يقولوا جيتوا غليتوا لنا السجاير (اه الال ام غليت) وضربتوا لنا الامن ما تحلوا عن سمانا بقى
(قال يعني زعلانين قوي على الامن بتاعنا)
ودوكهمة يقولوا احنا جينا صرفنا فلوسنا عليكوا وانتوا غليتوا علينا البضاعة ده انتوا ناس واطية
ليه قلة الادب دي؟
ليه كده؟
دي اسمها قلة ادب وغباوة
وايه المعايرة دي كلها؟ دول اشتروا كل حاجة...امال لو كنا اديناهم مساعدة مادية كنا عملنا فيهم ايه؟ ده احنا فضحناهم...وبنقبل مساعدات ليه من الناس التانية ليه بقى واحنا لما بنصبح على حد بنذل اهله بحق كل حرف في كلمة صباح الخير
وليه ناس منهم بيقولوا جايين نصرف فلوسنا عليكوا؟ فلوس ايه اللي ح تتصرف علينا؟ عريان الطيز ويتأمز تأميز ويقول باب الخمارة فين
هي الحكاية من اولها لاخرها عكة في عكة وكل الحكومات ايدها في العكة دي
والشعوب هي اللي بتدفع التمن طيب هلبت بقى الشعوب ليه قليلة الادب؟
وليه دول بيقولوا معاهم فلوس ودوكمة بيقولوا عندهم بلد؟ ما الاتنين موكوسين
هو احنا مش ح نبطل نفش غلنا في بعض ونسيب المتسبب في كوارثنا؟
هو مش واضح ان عباس خاين؟
مش واضح ان حماس ينطبق عليها مثل عدو عاقل خير من صديق جاهل؟
مش واضح ان الحكومة المصرية حكومة منايفة؟
مش واضح ان الفلوس اللي مع الشعب الفلسطيني واللي المصريين باصين لهم فيها يبلوها ويشربوا ميتها طول ما هم تحت الحصار؟ والله قعدت اضحك...فيه حد يحسد ناس تحت الاحتلال عشان معاهم فلوس؟ ايه الجوع الكافر اللي احنا فيه ده؟
مش واضح ان المصريين بيعانوا من قمع من الامن المصري وبينضربوا منه ضرب ما اخدهوش حرامي في مولد وعشان كده دمهم اتحرق لما شافوا وش تاني للامن كله ادب واخلاق واتغاظوا انهم فوق البيعة كمان انضربو؟
غاروا يعني...غيرانين ودي مشاعر انسانية ومن حقهم زي اللي ابوها بيضربها وبيدلع بنت خالتها
مش واضح كل ده؟
طيب اذا كان مش واضح يبقى كل واحد يمسك في شعر اللي جنبه
والله تستاهلوا بعض
----
ملحوظة انا قاعدة دلوقت قدام الجزيرة وشايفة صورة عيل صغير اسمه حمزة بن لادن عنده ستاشر سنة وبيقولوا عليه ان ده اللي خطط لقتل بي نظير هئ هئ هئ
هو تنظيم القاعدة عمل فرع رياض الاطفال؟