الشيء زاد عن حده وانقلب في المعدة

هو احنا ليه بنحب نمؤ في الحاجة ونعيد ونزيد فيها زي نكت حمادة سلطانة لحد ما الناس ترجعها؟
المنتخب المصري فلح بسبب شطارة اللاعبين والمدرب وحسن التنظيم وبسبب ان الدولة سايباهم في حالهم ومش حاطة مناخيرها الفاسدة فيها وعشان كده نجحوا وخلصنا نقطة ومن اول السطر...ايه بقى؟ ايه؟ نعم؟
بياخدوهم مجلس الشورى ليه؟ ومش عارفين يعملوا ايه لابو تريكة قاموا حطوا عياله على بطاقة التموين...وناقص يدوا حسن شحاتة دكتوراه فخرية في الذرة ويرقوا احمد حسن لواء اركان حرب ويفتحوا للحضري عيادة باطنة
ما خلصنا بقى
حتى هناء السمري اللي هي هناء السمري واللي واحد بيقول عليها هناء السمري قالت لجمال مبارك ما معناه يعني المصريين اهم حيوية وعزم وهمة ولما بيحبوا يعملوا حاجة بيعرفوا يعملوها طب ايه؟ يعني التنظيم وحسن الادارة ده ح يفضل في الكورة بس مش ح نستلهم منه حاجة في بقية المجالات؟
وطبعا جمال مبارك اتهرب من الاجابة وقعد يقول لها ان شاء الله والكورة اجوان وربنا يجعل في وشك القبول وحاجات كده
يعني الميزة في فوز المنتخب مرتين على التوالي بكاس افريقيا هو ان اللعيبة دول فلاحين وصعايدة وغلابة ومصريين مما يثبت عدم صحة نظرية وزير العمل اللي قالت ان العيب في الشعب المصري مش في الحكومة والشعب هو اللي لازم يتغير مش الحكومة
وبما ان لعيبة الكورة من الشعب...من الشعب قوي، من الشعب خالص لدرجة ان فيه واحد علق في موقع العربية وقال ما معناه ايه اللعيبة البيئة دول؟ دول بيتكلموا بطريقة غريبة...طبعا هو مش مصري يعني وما يعرفش ان اكتر من تلات اربع البلد بتتكلم كده
يا سيدي بيئة بيئة الله يكرم اصلك احنا شعب بيئة
بس اهو العيب طلع مش فينا ولا في اننا بيئة الحمد لله ومش محتاجين نتغير ولا حاجة
المفروض بقى نطالب الحكومة انها زي ما بتهتم بالكورة او على الاقل بتسيبها في حالها تسيبنا احنا في حالنا يمكن نعرف نعمل حاجة في مجالات تانية
ويا نحلة لا تقرصيني ولا عايز عسل منك
ياريت ما يتدخلوش في مجال البحث العلمي ويكفروا سيئات العلماء المصريين لحد ما تسقط عنهم فريضة الحج شرعا من كتر ما ذنوبهم اتخلصت
يا ريت ما يقرفوش كل بني ادم ناجح في اي مجال من مجالات الانتاج في البلد لحد ما يقول حقي برقبتي انا ح اتكل على الله واشتغل رقاصة
يا ريت ما يحطوش مناخيرهم في كل حاجة وياخدوا اتاوة من كل عيل عايز يعمل مشروع يفيد البلد وللا يستصلح ارض وللا يعمل بحث ينفع الناس
عشان نعرف نعمل حاجة زي ما الفريق القومي عرف يعمل حاجة في مجاله
بس خلاص ده الغرض يعني ما نقصدش حاجة تانية والله
انما الاحتفال الهيستيري ده ح يكرهنا في الفريق القومي وفي حسن شحاتة وفي بطاقة التموين
تموين ايه اللي ياخده ولاد ابو تريكة؟ ايه الحكومة الجعانة دي؟ حد يكافئ حد يديله بطاقة تموين؟
ثم ان العيال نفسهم مخضوضين ومش فاهمين ايه اللي بيحصل...دول لعيبة كوووووووورة مش مستوعبين استراحة الرئاسة ومجلس الشورى ومش ناقص غير يعملوا لهم اصنام ويلفوا حواليها نحن غرابة عت عت..هم مالهم بالهم ده كله؟