المتسلل السوداني المجرم الاثيم والمقتول اللئيم

رجال الحدود النشامى الاشاوس، اللي قبل كده مات منهم تلاتة على ايد القناصة الاسرائيليين وما فتحوش بقهم، اللي ما عرفوش يدافعوا عن تلات مواطنين من سيناء من ضمنهم طفلة ولا يحموهم من حرس الحدود الاسرائيلي، قتلوا المتسلل السوداني المجرم.
قتلوه عشان دفع 500 دولار، وتقريبا دول اللي حيلته، للمهربين عشان يهربوه لاسرائيل مع اتنين صحابه عشان يلاقي ملجأ وشغل.
والسلطات المصرية، اللي قتلت السودانيين في شارع جامعة الدول العربية، بلغت السفارة السوداني، ما اعرفش بلغتهم عشان يعملوا ايه؟ ما لو عارفين يعملوا حاجة ما كانش التلاتة دول هربوا لاسرائيل.
طبعا احنا عارفين السلطات المصرية قتلت السودانيين ليه؟ قتلتهم عشان قلالات الادب وبيشربوا خمرة، وطبعا سكان جامعة الدول العربية، اللي بيعدوا كل يوم على الستات الشريفات الواقفات تحت العامود في انتظار اي سيارة فارهة يستقلها اخ خليجي شقيق، عشان تقول له تسمح تولع لي حيث ان الكبيرت بتاعها خلص، وبالمرة يوصلها لان مش معاها فلوس المواصلات وابوها ح يزعقلها عشان اتأخرت، طبعا السكان دول، الشرفاء دول، المحترمين دول، اللي بيشوفوا المنظر ده كل يوم من غير ما يفتحوا بقهم، اتضايقوا من السودانيين، لان شارع جامعة الدول العربية طاهر، وح يفضل طول عمره طاهر، يام المطاهر رشي الملح سبع مرات...تمن مرات....تسع مرات...
يا اخي اما السودانيين دول ناس وحشة وحشة وحشة، بيشربوا خممممممرة، وبيهاجروا اسرائييييييل، حاجة عيب عيب عيب...ناس كيك فعلا
هو صحيح الخمرة مش محرمة في مصر وبتتباع في المحلات عاتشي في المعاتشي، وصحيح احنا عاملين سلام مع اسرائيل وبنشتغل لهم سفرجية وخدامين في المشتى السنوى الخصوصي بتاعهم، اللي هو سينا رجعت كاملة لينا ومصر اليوم في عيد، وصحيح السوداني اللي بيخطي مصر بيتعامل معاملة الهنود الحمر، ولا قادرين يعيشوا في السودان، ولا مصر عايزاهم، ولا اي دولة عربية بترحمهم، ويوم ما بيرضوا يشغلوهم بينادوهم: يا عبد يا اسود في الرايحة والجاية، على اساس يعني اننا كلنا شق اللفت وعنينا زرقا وهم دول بقى اللي سود.
انما لازم تعرفوا ان الحكومات العربية في العموم، والحكومة المصرية بالخصوص، عاملة ده كله عشان تختبر اخلاقنا والتزامنا عشان ندخل الجنة من اوسع ابوابها، حيث ان الدولة لو بتعامل البني ادمين على انهم بني ادمين عاتشي، ممكن ربنا يحاسبهم حساب شديد، لكن لما تكفر سيئاتهم اللي عملوها واللي خطرت في بالهم واللي حتى ما يعرفوهاش ولا حتى فكروا يعملوها ربنا يدخلهم الجنة من غير حساب
ثم انت لو دنيتك حلوة ح تحب الاخرة ازاي؟ لازم تبقى حياتك مستحيلة عشان تشتاق للاخرة، اي اخرة انشالله جهنم
فهمتوا يا كفرة؟
عشان كده المواطن السوداني عبد الحميد عبد القادر لما سقط في الاختبار، قامت قوات الحدود لحقته بسرعة وموتته عشان يبقى شهيد ويدخل الجنة
وكله من اجل خير الانسانية

في اضراب الصحفيين: الخامس

الخامس اللي وقع من الصحفيين كانت ايمان عوف وهي في المستشفى دلوقت، انا رحت وقالوا لي ان بابا كان لسة ماشي، وبعد شوية جه الاستاذ احمد سيف الاسلام ابانا الذي في حقوق الانسان ومعاه الدكتورة ليلى سويف وكان هناك محمد عبد العزيز وكانت اول مرة اشوفه برة القفص ومن غير بدلة، الا ازاي المحامي يبقى ببدلة جوة قفص الاتهام؟ :) محمد عبد العزيز عملها بقى، محامي بالبدلة جوة قفص الاتهام مع موكليه، والله البلد دي عبثية
المهم الصحفيين تعبانين قوي، هم دلوقت حداشر، خالد البلشي معاهم على طول لما رحت شفته وقالوا لي انه معاهم كل يوم. (ملحوظة: خالد البلشي دلوقت هو رئيس التحرير عشان الدكتور محمد سيد سعيد في رحلة علاج ربنا يشفيه ويرجعه بالسلامة) وكمان تغطية البديل كانت حلوة قوي للاعتصام المهم دي الصور يعني اللي اخدتها
عرفت ان فيه طلب باجتماع عاجل لمجلس النقابة، يارب يتوافق عليه، وعرفنا كمان ان الدكتور احمد كمال ابو المجد بيحاول يتدخل

القبض على المدون محمد خيري فجرا من منزله

تحديث:
هو احنا اتجننا؟ اتجننا وللا ايه؟ اتجننا صح؟ محمد بيتعرض مع خمسة تانيين بتهمة المشاركة في قافلة لغزة
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
هو النهاردة يوم علامات التعجب؟
احنا اتجننا؟ يعني سعد الحريري ما استعناش ييجي بنفسه مصر وباعت الوكلا بتوعه يقابلوا الرئيس بتاعنا، لا وهو يقابلهم، بنفسه يقابلهم يعني كأن ده محل خردوات مش بلد، يادي الكسفة ياربي، يا مشرفنا، يا رافع رايتنا في الداخل والخارج طب اهو..الراجل بيقول لك اهو لو فرنسا وامريكا معبرينهم ما كانوش عبروك
هي بقت كده؟ الله يخرب بيت اللي كان السبب....الله يخرب بيته مطرح ما راح

زوار الفجر وكدهون يعني...محمد صاحب مدونة جر شكل..التفاصيل عند ميت
وبعدين يا شباب شوية تعاون....ماحدش لقى البت؟ البت المسيحية الشيعية الاخوانية الصعيدية المحلاوية الايرانية الافغانية اللي من الدويقة؟ دي خيطير على الإيمن...الجايزة شارة الحزب الوثني شدوا حيلكوا
هم مش المفروض كانوا قالوا لنا انهم بطلوا زيارات الفجر دي وبدل كده بقوا ياخدوا الناس من الشارع او يوم الجمعة بعد الصلاة؟ رجعوا تاني للعمايل دي؟

يا لهوتي!!!!!

المقال ده منشور في الاهرام النهاردة:

تأملات سياسية
بقلم : جمــال زايــدة

بقدر ما يسعدني كصحفي أن أري صحيفة جديدة تصدر في مصر بقدر ما يسعدني أكثر أن تعلن الصحيفة بشفافية ونزاهة عن مصدر تمويلها في العدد الأول‏.‏

صدور صحيفة جديدة يعني بالدرجة الأولي إضافة جديدة لحرية الرأي والتعبير‏,‏ في الوقت نفسه الذي نرجو فيه ألا تكون حرية الرأي تلك مقصورة علي أصحاب المليارات الجدد الذين يصدرون الصحف اليوم في مصر‏.‏

صدرت صحيفة اليوم السابع‏..‏ مبروك‏..‏ ولكن أليس من حق الرأي العام أن يعلم من أصدرها؟ هذه هي أولي بديهيات الشفافية والنزاهة في العمل العام‏.‏

وقبل أن يسلط الصحفيون أقلامهم علي قضايا الفساد‏,‏ وعلي ما يفعله الوزراء في مصر ألا يستحق المصريون أن نقول لهم من وراء هذه الصحف؟

وأنا هنا لا أتحدث عن الشكل القانوني الظاهر للعيان‏,‏ اسم الشركة وأسماء المساهمين‏,‏ وإنما أتحدث عن أصحاب المصالح الحقيقيين‏,‏ فهل يجيب الأخ خالد صلاح رئيس تحرير صحيفة اليوم السابع عن السؤال الشائع في الوسط الصحفي وهو‏:‏ هل تقف أموال الملياردير الهارب ممدوح إسماعيل ـ صاحب الشركة التي أودت إحدي عباراتها بحياة أكثر من ألف من المصريين ماتوا غرقا نتيجة الإهمال في البحر الأحمر ـ خلف الصحيفة الجديدة؟ هل تختلط رائحة الموت برائحة حبر الكتابة؟

لقد تحدث معي رئيس تحرير اليوم السابع حول هذا الموضوع‏,‏ لكنه لم يقدم الإجابة الشافية ليس لي‏,‏ ولكن للقراء الذين يتطلعون إلي الصحفيين المصريين باعتبارهم ضمير الأمة‏!‏

!!!!!!!!!!!!!!!!!!!!!!!!!!!!!
!!!!!!!!!!!!!!!!!!!!!!!!!!!!
!!!!!!!!!!!!!!!!!!!!!!!!!!!!

لقد انطلقت صحف جديدة يقف وراءها أصحاب مصالح‏,‏ وأوشكنا أن نشهد لبننة الصحافة المصرية علي غرار صحف لبنان التي تكتب لمن يدفع‏,‏ سواء نظاما عربيا نفطيا أو جهاز مخابرات‏,‏ الغريب أن بعض الصحفيين نصبوا أنفسهم مدافعين عن الحق العام في حين تحوم الشبهات حول الأموال الهائلة التي يتلقونها من بعض رجال الأعمال وجهات أخري‏!‏ من إذن يدافع عن المصريين؟ من يدافع عن الموظفين؟ من يدافع عن الكادحين؟‏..‏ من يدافع عن الغلابة؟ ولماذا تمارس بعض الصحف الجديدة ـ التي لانعرف من يمولهاـ معاولها في الصحف القومية؟

وهل اكتشفنا مؤخرا أهمية صحف قومية ليس لها مالك قطاع خاص مثل الأهرام والأخبار والجمهورية ؟‏.‏

نحن في حاجة إلي أن نطالب أنفسنا بالمزيد من الشفافية والعلانية في المجال الصحفي قبل أن نطالب الدولة ومؤسساتها بتلك الشفافية‏..‏

نحن في حاجة إلي لحظة صدق ونزاهة وشرف إزاء قرائنا‏.

ولا هو عايز يشوف خلقكوا

من جمالكوا يعني؟ ده حتى لو جه يبقى فيه خطر عليه..اذا كنا احنا صحاب البلد وعشان عايشين معاكوا فيه خطر علينا، ثم انتوا مين يا جرابيع عشان تنولوا الشرف ده والله لو عملتوها ولبى دعوتكوا ازعل منه
جتكوا القرف خليكوا انتوا مع السفاح والاراجوز خليهم ينفعوكوا

يعني صحفيين الدستور والبديل ح يفضلوا يقعوا كده؟

د

تحديث:
لاااااااااا مش ح ينفع كده، دول بقوا اربعة
هل من مجيب؟ تالت يوم في الاضراب عن الطعام والشباب عمال يقع واحد ورا التاني، لحد دلوقت تلاتة راحوا المستشفى...مافيش حد يسأل فيهم؟
تابعوا على موقع مركز هشام مبارك

نهى رشدي اجدع ناس

واللي تحرش بيها اخد تلات سنين جدعة يا نهى وانت اجدع ناس
واللي عمل كده مش راجل لو كان راجل كان اتحرش بالحكومة مش بيكي وانت ست الناس

تحديث:
وده الحوار اللي عملته اليوم السابع مع نهى رشدي
يا نونة يا نونة انت شاطرة
احنا بقى يا بنات عايزين حاجة اجمد من كده، اه والله، يعني اي واحدة المدير بتاعها يتحرش تجيب له الامن وتحبسه، يا سلاااااااااااااااااااام لو حاجة زي دي حصلت
انا نفسي في مدير يتحبس حد يحبس لي مدير
:)
كتير قوي بيشتكوا من تحرش المديرين بيهم، مرة واحدة صاحبتي حكت لي انها كل ما تيجي تمضي المدير يخبط ايده..احم..المهم قعدت اقول لها يا بنتي هاتي له الامن ويعملوا له محضر بس للاسف هي خافت خصوصا ان مافيش شهود، بس ان شاء الله المرة الجاية يبقى فيه شهود، المشكلة اني مش باشتغل مع المدير ده، ادعوا ربنا ينقله عندنا عشان يتحبس

كارثة التأمين الصحي: اللي ماعهوش ما يعيشوش

ليه؟ ليه؟ ايه اللي صحاني بدري؟ ما كنت مخمودة، ايه اللي بيصحيني اصلا؟
اتفضلوا الخبر ده بتاع التأمين الصحي
يعني واحد مرة دخل لي وقال لي انت متشائمة ليه انت مش شايفة حاجة حلوة في البلد؟ انت بتيأسي الناس
طب الناس اللي عشرة تدوين معايا مش عارفين ان لما بيبقى فيه خبر حلو باقوله؟ مش مفروض ان قضية التأمين الصحي دي كسبناها؟ وقلت لكوا وفرحنا؟
طب اتفضلوا بقى
ده قانوني؟ ينفع يعني كده؟ امال القضية كانت مرفوعة ليه؟ وكسبوها ليه؟
طب انا اعمل لكوا ايه؟ هي دي بلدكوا اعمل ايه انا اخترع لكوا بلد من دماغي؟ حاضر حاضر
احنا يا اولاد بلدنا جميلة ومليانة عدل وخير، تقدر تروح تتعالج بالمجان في اي مستشفى استثماري
اول ما بتتخرج بتلاقي شغل بتلاتلاف جنيه في الشهر اول مرتب، والحكومة بتساعدك في اسكان الشباب وتجيب لك شقة، لاحظ ان مافيش وسايط ابدا عندنا الحمد لله، احنا زي ايام سيدنا عمر كده اول ما تتولد يتصرف لك فلوس، وتتحوش لك لحد ما تكبر، وطبعا ده بسبب اننا بلد زراعي وصناعي وبنستثمر مواردنا احسن استثمار فالخير عم وفاض وزاد، ولما تتجوز بنت الحلال في الشقة الجميلة اللي مدياهالك الحكومة بتخلف عيال حلوة، بيتعالجوا على حساب الدولة، ويتعلموا على حساب الدولة من الضرايب اللي انت بتدفعها
بس فيه مشكلة صغيرة، للاسف من كتر الفلوس المصريين بيفطرو ا لحمة ويتغدوا لحمة ويتعشوا لحمة فانتشر مرض النقرص ما بينهم
يا ريت يا شباب تخلوا بالكوا من نفسكوا

انسانية الاحتلال الامريكي في العراق

تحذير: هذه التدوينة غير صالحة للاستعمال الادمي خاصة من مرضى السكر وضغط الدم...يرجى حفظها بعيدا عن ايدي الاطفال
لا ينصح باستعمالها للحوامل الا اذا كنتي زهقانة من جوزك وعايزة تخلصي منه ومن ابنه

الانسة جوين بيبرج ظابطة ولا ظابط ما اعرفش يبقى اسمها ايه في الجيش الامريكي اللي راح ينشر الديمقراطية على الحبال العراقية عشان الشمس كويسة للغسيل، المهم يا سيدي لما انت، كان يا ما كان يا سادة يا كرام السنيورة ماشية في دورية وبيمارسوا هوايتهم في حرق البلد قووووم راتشيت اتزنقت في حريقة من الحرايق، وراتشيت دي يا سيد كلبة لا مؤاخذة، هي صحيح عراقية استغفر الله العظيم، بس كلبة مهما كان، يعني احسن مني ومنك ومن العراقيين طبعا ده شيء اساسي. قوم فريق الانقاذ انقذ راتشيت، اللي اكيد كان اسمها ما كانش راتشيت، اكيد كان لها اسم عراقي، ما اعرفش بقى اسمها صدامة وللا قسية وللا عدية وللا تلاقيهم ما كانوش مسمينها ابدا حيث انهم ناس متخلفين ما يعرفوش قيمة الكلاب يا كلاب يا جزم
انقذتها الانسة جوين وتبنتها، بيقول لك بقى ان جوين كانت يا قلب امها بتعاني نفسيا من الاقامة في العراق حيث ان الاقامة هناك شقا...البت يا قلب امها تطلع من قتل عيال تدخل في تعذيب معتقلين تطلع من ضرب نسوان في الشارع تدخل على اقتحام بيت وكله من اجل الانسانية وغسيل الديمقراطية اللي لابد من كل بد يتنشر في العراق، طبعا المهمة الانسانية العظيمة اللي هي فيها مهمة شاقة جدا، واصابتها بالاكتئاب وهي شابة وظوظة والحياة قدامها وفي نفس ذات الوقت ورا العراقيين، قامت جات راتشيت غيرت حياتها كليتن، فجأتن كده سذاجة راتشيت حببت جوين في العراق ونقلت حالتها النفسية من السيء الى السعادة الغامرة وانقذتها بعد ما كانت على شفا الجنون، وبعدين طبعا الجيش له قوانين زي ما انتوا عارفين قالوا لها وانت رايحة تقتلي وللا رايحة تربي كلاب؟ احنا ح نصادر منك الكلب ده، قوم جوين انهارت ع الكرسي يا مرسي وعملت حملة وجمعت توقيعات وطبعا اخوانها في الامركة والدين والانسانية عملوا لها حملة تخلي الدمعة تفر من عينك ويقشعر لها الابدان، حتى الابدان العراقية المتفحمة من القنابل العنقودية اقشعرت، اهو شافوها، ودي معجزة سبحان الله يا اخي، وبعد حملة كبيرة، تأثر قلب القيادة العسكرية الامريكة وحن ورن ورق وزق وبق واغرورقت عيناه بالديموع وقرر انه يسعد قلب الام ويستجيب لطلب جوين في انهم يرحلوا الكلب على امريكا عشان تستلمه ام جوين، وزي ما انتوا عارفين اعز من الكلب كلب الكلب، وده ح يتم وفقا لبرنامج خاص لرعاية الحيوانات يا حيوانات انت وهو وهي وانا معاكوا، قول انشالله ربنا يسخطك حيوان يمكن تنول الرضا والرحمة والشفئة يا انسان يا عديم الحيوانية يا مفتقر الى الكلبية انت البعيد انسان ومش مكسوف من نفسك؟ اخص عليك وعلى شكلك..جتكوا القرف مليتوا البلد.
محروقة:
المدونة غير مسئولة عن حالات ارتفاع ضغط الدم والازمات القلبية والبواسير وانفجارات الشريان التاجي والمصران الغليظ التي تصيب القراء

نقل عمر سعيد الصحفي بالبديل الى المستشفى

الصحفي بالبديل عمر سعيد اتنقل للمستشفى اظن تعب من الاضراب عن الطعام
الاخبار دي جات لي من عزة مغازي ومالك من الجايكو
للتذكير فيه مجموعة من صحفيين البديل والدستور مضربين عن الطعام في نقابة الصحفيين احتجاجا على شطب اساميهم من النقابة

ترحيل 9 مشجعين زملكاوية للسجن الحربى بعد أحداث مباراة الجيش

جيمي بعت لي الميل ده:

منذ بداية الدورى العام المصرى أبدى الجميع تخوفهم من وجود فرق الشرطة و الجيش فى جدول الدورى نظرا لحساسية المؤسسات التابع لها تلك الفرق و تخوف الجميع من الصدام بين جماهير كرة القدم العادية التى تتعامل مع الامور على إنها فقط لعبة كرة قدم و ليست جهات سيادية و نظامية .
مباراة الزمالك و طلائع الجيش التى اقيمت على استاد الكلية الحريبة بتاريخ 17 – 10 و التى انتهت بفوز طلائع الجيش بهدف نظيف ، و التى أفسدها حكم المباراة بعد قراراته الظالمة و عدم احتساب العديد من ضربات الجزاء لصالح فريق الزمالك الامر الذى أدى الى احتجاج الجماهير على تلك الممارسات الظالمة التى مارسها فهيم عمر حكم اللقاء معترضين على فوز طلائع الجيش بتحيز حكم اللقاء لثاني مرة على التوالى بعد اهداهم الفوز ضد الزمالك ايضا فى الموسم الماضى.
الامر الذى ادى لتعالى الهتافات من الجماهير البيضاء ضد حكم اللقاء و ضد اتحاد كرة القدم منظم البطولة و الذى قابله الامن بالقمع و تفريق الجماهير الغاضبة لخارج الاستاد بعد ان أطلقوا الكلاب البوليسية على الجماهير ، كل هذا وارد حدوثه فى مباريات كرة القدم فى جميع استادات مصر و العالم .
تبع ذلك القاء القبض عشوائيا على 11 فرد من جماهير نادى الزمالك و الذى أجمع الكل على وجودهم خارج أبواب الاستاد أثناء القبض عليهم بعد أن صدرت الاوامر بوجوب إلقاء القبض على بعض من المشجعين و تم ترحيلهم للسجن الحربى بزى السجن بعد حلق شعرهم و تقييد أيديهم و أرجلهم و تم توجيه التهم التالية اليهم
- سب وزير
- إتلاف ممتلكات حربية عن عمد
- التعدى على عساكر حربية أثناء تأدية عملهم

المشجعين التسعة ( بعد ان تم الافراج عن إثنين منهم لأسباب السن ) ينتظرون الان العرض على النيابة العسكرية يوم الثلاثاء القادم ، و تناشد أهالى المشجعين المسئولين بالافراج عن أبنائهم لإرتباطهم بدراسة خاصة و ان جميعهم طلبة جامعيين .

--

انا ماليش في الكورة، بس المدونة دي نصيرة المضطهدين بما فيهم الزمالكاوية، الا الواحد لما يبقى زملكاوي يترحل للسجن الحربي ليه؟ تخيل بقى لو فيهم زمالكاوية ست ومسيحية وعضوة في الاخوان المسلمين....وعندها جرب

وقفة احتجاجية لمرضى السرطان

احد اهداف الوقفة هو محاكمة المسئول عن انتشار مرض السرطان
اللي سرطن لنا الاكل
ايوة كده بقى....ايوة كده، انا مستعدة نعمل حملة كلنا ونشارك فيها هو ده الكلام
بدل ما نقعد نشحت على مرضى السرطان ونهينهم ونطلعهم في التلفزيون نتسول بيهم والمرض له حرمة، المرض له حرمة ما ينفعش استغل حاجة المريض للعلاج عشان اشحت بيه، هو ده الكلام
مين اللي جاب لنا السرطان؟
لازم يتحاكم وياخد اعدام كمان
اقروا التفاصيل عند رامز عباس

كمان الصحفيين معتصمين في نقابة الصحفيين، صحفيين من الدستور والبديل اتشطبوا ومحتجين ومضربين عن الطعام
الكلام ده وصلني من مالك وهو هناك معاهم بس انا مش عارفة تفاصيل يمكن اعدي عليهم قبل الشغل ان شاء الله

استراحة التناكر

ده مدون كويتي...لسة مكتشفة مدونته من وقت قريب
بس انا باحب مدونته قوي قلت اشرككوا معايا

لا كده بقينا ام العربي ام العربي يعني

جنبلاط جه بعد جعجع
ورشيد امبارح راح يشحت من الخليج بالفوطة الصفرا
كل سنة وانت طيب يا باشا
بس لا...كله الا السيادة المصرية
اصيلة يا ام العربي

طيب يا ليلى ارحمي نفسك عشان غيرك يرحمك

كلنا ليلى فتحت تالت سنة
امممممممممم
طيب يا ليلى انا عمري ما شفت حد بيقرف ليلى غير ليلى نفسها
:(
كلنا بنقول كلام حلو، بس ساعة الجد اللي اتزرع في..استني، امسي راسك من ورا كده، ايوة فوق القفا على طول، اللي مزروع هنا مش بيتغير بسهولة
ساعة الجد بتقبلي على نفسك حاجات مش لازم تقبليها، وبتحكمي على الليلات غيرك احكام ظالمة وبتنحازي مع المجتمع ضدها ومش بتفكري لو كان اللي في الموقف ده عويس مش ليلى كنت قلتي نفس الكلام وحكمت نفس الاحكام وللا لا؟
بجد يا ليلى انت فخورة انك ليلى وللا لا؟ طيب عارفة ليلى دي يعني ايه وللا لا؟
عارفة ان لك مخ ومشاعر زيك زي اي انسان ولك كرامة وللا لا؟
قبل ما تنامي وانت لسة بتروحي في النوم افضلي قولي عشر مرات: انا انسان ليا كرامة..انا انسان ليا كرامة..انا انسان ليا كرامة
لحد ما عينك تروح في النوم
عشان تعاملي نفسك كإنسان له كرامة يقوم المجمتع كله يعاملك على انك انسان وعنده كرامة
كنت اتكلمت مع لست أدري بخصوص ليلى، بس قلت لها اني ما عنديش حكاوي ليلى انا عندي حكاوي الست ام ليلى، وبعدين بصراحة طنشت لان كلامي مش ح يعجب حد، خصوصا ان حكاوي الست ام ليلى حكاوي تحزن ومقرفة
كمان ليلى نفسها ما عندهاش استعداد تسمع الكلام اللي ح اقوله
ملحوقة: انا مش مبسوطة من نغمة التريقة اللي عند بعض الاخوة الرجالة من المدونين اللي مش ناقص غير يقولوا: الحق الحق الحق الفرخة اتكلمت
بس اللي مضايقني اكتر رد الفعل للناس اللي بتدافع عن ليلى...مالكوا فيه ايه هم مش ماسكين ذلة عليكوا يعني دي ناس متخلفة اصلا
---------
تحديث:

ده استطلاع رأي للاناث
وده استطلاع راي للذكور
ياريت تجاوبوا عليه انا جاوبت...على استطلاع الاناث طبعا :)

أيوة غضب من ربنا

أنا بجد مش عارفة ايه الحساسية اللي بقت عند الناس من سيرة ربنا دي؟ لو كانت عند ملحدين كنت قلت اوك..شغال، حقهم يعني، حتى لو انا ما عنديش حساسية من الالحاد زي حساسية الالحاد من الايمان، فده طبيعي ان الملحد يحس انه في موقف ضعيف وبيدافع بشراسة عن نفسه، انا مش بازعل منهم خصوصا ان معظم الملحدين اللي عرفتهم بيبقى عنده اسباب ما بيبقاش ملحد غلاسة كده، فيه ملحدين غلاسة بس مش كتير، ما علينا ده مش بوست عن الالحاد
الغريب بقى ان كتير من المؤمنين بربنا اتريقوا على بعض الناس اللي قالت ان الانهيار الاقتصادي غضب من ربنا! وعوجوا ضبتهم وقالوا: بطلوا التفسيرات الغيبية فيه تفسير علمي للظاهرة. اه ماكل حاجة ينفع تتأصل علميا حتى ربنا نفسه. وانا مش شايفة اي تناقض ما بين التفسير العلمي واننا نقول ده غضب من ربنا. دي حاجة تانية غير تفسير ان الفقرا بيموتوا في الدويقة عشان ربنا غضبان عليهم، لانه كلام مش منطقي، كل الناس بتموت، ودول ماتوا شهداء ان شاء الله، كمان التفسير ده مالوش اصل علمي ولا فقهي
لكن ان فيه ناس بتقول ربنا غضبان على النظام الاقتصادي وعشان كده انهار ده لا يتناقض مع التفسير العلمي للانهيار الاقتصادي بالعكس ده مرتبط بيه ارتباط وثيق.
الناس المؤمنة بربنا، لا مؤاخذة يعني احنا اسفين والله مش عارفين نعتذر عن الخطأ الجسيم ده ازاي؟ بس نصيبنا بقى معلش، الناس الوحشين العيانين اللي زينا كده مؤمنين ان ربنا حاطط نظام للانسان وللكون، وانه ادانا ارشادات عشان النظام ده يمشي بشكل صحي وسليم. وان المحرمات دي مش عشان ربنا عايز يضايقنا بس عشان دي حاجات بتخل بالنظام وبالتالي تصيبه بالامراض وتودي به الى المهالك.
يعني مثلا في التراث بتاعنا، الديني والشعبي، نعرف الامثال اللي بتقول: لكل ظالم يوم، وفيه مثل تاني مش عارفة ليه انقرض بس المفروض انه مثل صعيدي قديم: قاتل النفس ما يموتش بخير، ومثل تاني: قاتل النفس فاضح نفسه.
وده كله مستمد من العقائد الايمانية ان ربنا ما يسيبش الظالم ولا قاتل النفس ابدا.
طيب فيه تفسير علمي لكل ده، الانسان بتكوينه السوي المفروض انه مش من الطبيعي انه يظلم، ولا من الطبيعي انه يقتل، وفعلا في علم النفس، القتل بالذات بيشكل عبء نفسي على البني ادم كبير قوي، وبيأثر على أحلامه وسلوكياته وتصرفاته في كل حاجة. البني ادم لما بيضغط على طبيعته الانسانية وبيحملها ظلم او قتل، هو بيحملها فوق طاقتها، وهي لازم بتعمل رد فعل للحمل ده، باي حاجة، ممكن بانه يفضح نفسه زي المثل ما بيقول، بمعنى انه يسيب دليل يدل عليه، اللا وعي بيخليه يرشد عن نفسه وهو مش حاسس ومش قاصد وعقله الواعي اكيد مش عايزه يرشد عن نفسه، وممكن بانه لو فلت يعيش طول حياته بيحاول يتخطى فكرة انه قاتل او ظالم، وعليه بيتصرف تصرفات هيستيريه قد تودي به الى المهالك لانه بيبقى عامل زي اللي بيهرب من عفريت، يمعن في السكر مثلا، يمعن في الظلم، المهم انه في رحلة هروبه بيبقى فيه صراع ما بين اللا وعي الرافض لفكرة القتل او الظلم والوعي اللي بيحاول يخنق الذكرى وتأنيب الضمير، الخناقة دي لازم بيبقى فيها خسائر نفسية وجسمانية غصب عنه، وعشان كده مش بيموت بخير. مهما عقله الواعي حاول يمنطق الظلم بيفضل عقله اللا واعي يطلع له زي العفريت. طبعا الكلام ده مش تحليلي يعني انا ايش فهمني في الكلام ده انا بنت الشيعب :) ده من الكتب.
وكل حاجة في الدنيا كده، كل حاجة تخل بالنظام الكوني اللي في اساسه مبني على انه يبقى خير وكويس بتدمر نفسها بنفسها. طيب النظام المصرفي قائم في اساسه على النصب. احنا منصوب علينا.
احنا في ايدينا ورق مالوش غطاء دهب وبنتصارع عليه وبنموت بعض عليه وهو ورق...ورق مالوش قيمة، ولع فيه يا عم ده ورق. والنظام المصرفي ده القائم على النصب، قائم كمان على الظلم، فكرته في الاساس قائمة على ان اللي معاه كتير يزداد كترة، واللي مش معاه يزداد فقر، وده بالظبط فكرة الجلا جلا اللي موجودة في الرابط اللي انا حاطاه. بتاع الكوتشينة اللي بيقول لك فين السنيورة بيعمل ايه؟ بيخليك تحط رهان، هي فلوسك اصلا، وبيقول لك فين السنيورة، لو ما عرفتش هو اخد الفلوس، ولو عرفت انت ما اخدتش حاجة لان دي فلوسك اساسا، وانت تضحك وتنبسط ويتهيالك انك كسبت، انت يا حمار ما كسبتش حاجة الفلوس دي كانت في جيبك اصلا.
طيب بتاع الكوتشينة ده اسمه ايه؟ اسمه حرامي، اسمه نصاب، اسمه ظالم. اسمه فلوسه الحرام ربنا مش ح يبارك له فيها، ازاي؟ فيه تفسير علمي، نفسي واقتصادي، يخليه برضه يطلع من اللعبة في الاخر خالص خسران. بس كون ان فيه تفسير علمي نفسي واقتصادي لانهيار حياة بتاع الكوتشينة ده ما ينفيش الايمان بالغضب الالهي بالعكس ده يؤكده، يؤكد ان ربنا، واضع النظام، لما قال اعملوا كذا كذا عشان النظام يمشي صح، ولو عملتوا كذا كذا النظام ح ينهار، كان معاه حق. (معلش اللي ح يزعلوا من كلمة كان معاه حق دي خلوها عليا انا مش باكلمكوا انتوا انا باكلم ناس تانية)
وعليه فاختصار التحليل الاقتصادي الطويل في انه غضب ربنا هو مجرد تلخيص للتحليل العلمي مش تناقض معاه.
آه، انا سامعة جملة غبية اهي....جاية من هناك اهي: ايوة، يعني الناس بقى تسيب الاقتصاد ينهار ويولع بجاز وتبطل تفكر في حلول وتروح تصلي نقوم نصحى الصبح نلاقي الاقتصاد اتصلح.
....
على فكرة للحظة وانا باكتب البوست فكرت في اني اقول: طب انا مش باحب ارد على الغباوة حد يرد مكاني.
وبعدين رجعت في كلامي انا ورايا ايه؟
اولا غضب ربنا على الظلم يستوجب العقوبة، العقوبة عمرها ما تترفع بمليون ركعة يصليها مليار بني ادم، عقوبة الظلم لا ترفع الا برفع الظلم.
اذا كان النظام الاقتصادي - الرأسمالي الوسخ - قايم على الظلم والنصب، على تتخين الكروش اللي هي اصلا تخينة وتجويع البطون اللي اصلا جعانة والتجارة في كل حاجة، كل حاجة حتى المية والمعلومات اللي من حق الانسان، وتصنيع ورق والضحك بيه على الناس وهو مالوش غطاء. يبقى ولا مليون صلاة، ولا مليار دولار يطلعوا زكاة للفقرا ح يجبروا الظلم ده، ولا النظام الاقتصادي ح يتصلح، لان اصلا المليار دولار دول نصب نصب، ده ورق....انت تضحك على الناس بس مش ح تضحك على ربنا. اول حاجة نعملها اننا نبطل نصب من اساسه، وبعدين نوجد حلول انسانية تخف الدهون من الكروش وتملا البطون الخاوية
عموما انا شخصيا شايفة ان فات الوقت على الحلول، ولو لقوا حلول ح تبقى مجرد حلول لتأجل الكارثة لكن هي واقعة واقعة، وان شاء الله اكون مت شهيدة قبل ما العالم يرجع لنظام المقايضة تاني، بس هو راجع يعني. ان ما كانش في العشر سنين اللي جاية تبقى كمان عشرين تلاتين خمسين ميت سنة
ايه ميت سنة في عمر الانسانية؟ بس راجع...عشان الانسان افترا قوي، احنا مفروض موجودين مع بعض عشان نساعد بعض على العيشة مش عشان نتاجر في بعض ونعيش على جثث بعض.
كلنا ايدنا في النظام ده، كلنا بناكل لحم بعض، انا بعربيتي ام قسط 400 جنيه والكام ورقة اللي في شنطتي مشاركة في النصباية دي، انا باكل لان غيري جعان، انا عايشة لان غيري ميت.
انا عارفة الكلام الغبي ح يكتر: يعني الغلابة اللي بيوتهم اتخربت بالانهيار الاقتصادي، الغلبان اللي راح اتذل في الخليج ورجع فلوسه راحت في البورصة ومات من الحسرة ربنا غضبان عليه؟
لا ربنا ما بيغضبش على غلابة، انا قلت فوق اهو: ربنا غضبان على السيستم لانه غير انساني، لانه سيستم خلا الغلبان ده يقبل الذل على نفسه في الخليج، ولو كان سيستم رحيم ما كانش اضطره للغربة والبهدلة والذل، هو مات من الحسرة، ما كلنا ح نموت، من لم يمت بالبورصة مات بغيرها. العمارة المبنية باسمنت مغشوش بتقع فوق الغلابة، الغلابة مش هم المذنبين، واهم ماتوا وارتاحوا، المقاول هو المذنب وح ياخد جزاءه.
ثم احنا من حقنا نجيب سيرة ربنا يعني، وللا هو ممنوع؟
اه...هو غالبا ممنوع، عشان الناس كده شكلها زعلانة من ربنا. طيب ربنا مش هو اللي قال للمشايخ تحلل البنوك والبورصة بدل ما تقول ده نظام ظالم، مش ربنا اللي قال للمشايخ تلوي عنق الدين وتبرر للظلم ولتجويع الناس او حتى انهم يفتوا في اللي ما يعرفوش فيه. مش ربنا اللي قال للدعاة خليكوا مع الاغنيا وريحوا ضميرهم كمان. ثم اخيرا مش هو اللي قال لنا ننصب على بعض، ولا هو اللي قال لنا كل ما تتزنق وعايز تبرر لنفسك حاجة انت عارف من جواك انها حرام تروح تسأل شيخ عشان يريحك ويشيل الوزر عنك، انت عارف انها غلط امال بتسأل فيها ليه يا روح خالتك؟ لو عارف انها صح ما كنتش سألت
نعمل البلاوي ونرميها على ربنا وفي الاخر نزعل منه، واللقمة اساسا نازلة لنا بالسم الهاري وحوالينا الجوع ده كله، وانا اولكم، طب مش كتر خيره انها مش بتنزل بسم حقيقي؟
سيدنا الامام علي قال: اينما ذهب الفقر قال له الكفر خذني معك
وكلام كتير على لسان الامام علي: لو كان الفقر رجلا لقتلته
بس بقى ماحدش فاكر ابدا ان سيدنا محمد صلى الله عليه وسلم تعوذ من الغنى
سيدنا محمد تعوذ من الغنى قبل ما يتعوذ من الفقر
عشان الغنى اوحش من الفقر
-----------
استدراك:
للتوضيح بس، بالنسبة للرابط بتاع اسلام اون لاين ده
انا مش حاطة الرابط عشان موافقة على تحليل كاتب المقال، وانما حاطة الرابط عشان المقتطفات اللي محطوطة في المقال من بعض الكتاب اللي بيوجهوا اللوم للمؤسسات الدينية اللي سابتهم يتعاملوا في الربا من غير ما تعلن موقفها الواضح من لا اخلاقية النظام الاقتصادي
لكن انا مختلفة تماما مع النتيجة اللي وصلها كاتب المقال من ان البنوك الاسلامية هي الحل، لان واقع الامر ان كل البنوك الاسلامية الموجودة هي داخل نفس المنظومة وماشية بنفس السيستم ونفس المعاملات، نفس النقد، نفس الفايدة: ياللا يا شاطر، مش انت مش عايز الفايدة؟ طب هاتها احنا ح ناخدها، خد انت الفلوس الحلال احنا عاجبنا الحرام. يعني البنوك الاسلامية بشكلها الحالي مشاركة في السيستم الظالم زي اي بنك تاني
وعليه فهي مش مشكلة بنك اسلامي وبنك مش اسلامي، هي مشكلة نظام اقتصادي كامل كله مبني على النصب، مافيش نصب اسلامي ونصب لا اسلامي
ده زي الراجل بتاع للاخوة العرب الزواج من مصريات على سنة الله ورسوله

ملحوظة تانية:
الله هو العدل وربنا بينتصر لمقيم العدل ايا كان دينه...ولو حتى مالوش دين
وبينتقم من الظالم حتى لو ما بيفارقش سجادة الصلاة
وربنا موجود، ومن حقي مدام مؤمنة بربنا اني اجيب سيرته، ورضا ربنا وغضبه شغلي الشاغل بوصفي مؤمنة بيه، والمفروض يبقى شغل اي مؤمن الشاغل
والمفروض المؤمن يبقى مؤمن ان ايمانه يتسق مع المنطق ما ينقاضوش
ولو هو مؤمن ان الايمان حاجة والمنطق حاجة تانية يبقى هو مؤمن ليه؟ غاوي جنان وتخريف يعني؟ اه..ماهي الحاجة اللي مالهاش علاقة بالمنطق تبقى جنان وتخريف
والمفروض المؤمن يبقى عارف ان رضا ربنا في العدل لانه هو العدل وغضبه في الظلم، والمكان اللي فيه ظلم ربنا لا ينظر اليه، والعالم بقى كله ظلم

نادال اتهزم يا مينز

أيها الإخوة المهيسون، إنه ليوم حزين في تاريخ التهييس حيث ان الضربة جاءت إلى التهييس مزدوجة واتوكس وكل من نادال وفيدرير في يوم واحد
وانا وراجي منهارين على الكرسي يا مرسي، إذ ان راجي بيكره موري، وانا باكره سيمون لانه شبه اكتر واحد باكرهه في حياتي وفرنساوي ودمه تقيل وعينيه كلها شر...بينما نادال فيه اصل عربي على حسب ما راجي بيقول لي، كمان الواد فيدرير ده ابن ناس ومتربي وذوق والعيبة ما تطلعش منه
لكنني اؤكد لكم ان ولا سيمون ولا موري اخدوها بالساهل...لااااااااااا ده احنا جامدين قوي، دول تقريبا على اخر الماتشين كانوا بيطلعوا في الروح
ومعنى كده ان موري وسيمون ح يتقابلوا...اذن...آه يا سفلة...انا مش عارفة ازاي ح اتفرج؟ خصوصا ان الماتش ممكن يتذاع وانا في الشغل وكل ما احاول ازوغ شوية من الشغل واتابع الماتش الساعي ييجي يقعد جنبي ويبص قوي على البنات اللي واقفين وبعدين يقول لي: هي السنيورة دي شغلتها تلم الكيور؟
طب اعمل ايه انا دلوقت؟ يارب موري وسيمون هم الاتنين يتغلبوا
والسنيورة اللي بتلم الكيور هي اللي تكسب عشان محمود ما يزعلش

نموذج طلبان في غزة

انا عايزة افهم مال العرب ومال اللي بيحصل في غزة؟ وايه حكاية طلبان في غزة طلبان في غزة وطلبان لازم تخرج من غزة والغازية لازم تنزل؟
يعني طلبان في غزة واسرائيل في فلسطين كلها، وهم قابلين، قابلين كيان صهيوني عنصري يبقى موجود
طاااااااااااب ماشي
طلبان في غزة...والتيتة في الننة
نعم؟ فيه حاجة؟ ايه اللي فكرهم بغزة دلوقت؟
لا ومصر تقول ايه: لاااااااااااا كله الا ان مصر تقبل طلبان على حدودها
يا سلاااااااااااااااااام
اصيلة يا ام العربي

من مصدر موثوق بيه

يعني يا اتش تصرف شقا الناس اللي اشتروا اسهمك في البورصة على الولية وفي الاخر تطلع الصراحة راحة يا روحي؟ طب كنت اصرفهم على العلاج
هئ هئ هئ هئ

العنصرية والطائفية مرض القهر والاضطهاد

سبقنا اليها اليهود اللي فضلوا قرون يضطهدوا ويساء الى سمعتهم ويتقال لهم يا بخلا يا مرابين ياللي بتقطعوا لحم الناس يا شايلوك
النتيجة: الصهيونية
والافرو امريكان اللي مات منهم 150 مليون في البحر وهم في الاغلال مساقين الى العبودية
النتيجة: بقوا يقولوا ربنا اسود والشيطان ابيض
اليهود والافارقة في امريكا عانوا من الفتن بينهم وبين بعض بس عرفوا يتجاوزوها مؤخرا
الافرو امريكان بقوا
integrated
وبقى بعض...بعض منهم يزاول امراض القهر والاضطهاد على ناس تانية: زي العنصرية ضد العرب مثلا!!!!!
على اساس انهم بقى من العالم المتحضر
واليهود بقوا اسرائيل، مش محتاجة شرح
احنا لسة في طور الطائفية والفتن الى جانب العنصرية اللي ابتدت تتنامى
ربنا يوفقنا كده وشوية وح نبقى زي الصهاينة، ان شاء الله نتجاوز الفتن، بس بقى ح نعمل ايه؟ ح ننزل قتل في مخاليق ربنا عشان احنا احسن من كل الناس وكل اللي غيرنا حيوانات غير عاقلة؟
المقهور والمضطهد لمدد طويلة قوي، قرون مثلا، بيكتسب صفة جديدة وهي الوضاعة، مش بيبقى عنده الشجاعة انه يواجه اللي بيقهره ويضطهده، ما تقدرش تلومه لانه فعلا عيان،
وفي نفس الوقت فوق طاقته انه يتحمل التحقير والتنكيل وهدر الكرامة طول الوقت لان ربنا خلق الانسان كريم
الانسان اللي طول الوقت بيتقال له يا حقير يا زبالة بيبقى عايز يصرخ ويقول انا مش حقير انا مش زبالة انا انسان، وبعد شوية لما الموضوع بيطول ويزيد بيبقى عايز يقول: انا احسن منكوا كلكوا انا احسن واحد في الدنيا
من حقه يصرخ في وش اللي ظلمه وقهره ويقول له كده لانه هو احسن منه فعلا
بس هو مش بيقدر، بيخاف، مش بس بيخاف، هو بيقتنع فعلا انه اقل من اللي بيقهره
فبيمارس القهر والظلم والعنصرية اللي بتمارس عليه ضد نفسه وضد اللي اضعف منه، وكل اللي اتعمل معاه بيعمله في غيره
بس له علاج قبل ما الحالة تتفاقم، انه يفهم ان اللي بيقهره ده مش هيركليز ولا حاجة، وانه مش احسن منه، لو ما لحقناهوش يبقى خلاص تحول
وهكذا كانت اسرائيل، في الاول كان اليهود بيضطهدوا بعض وطائفيين ضد بعض بجنون، عاملين زي العرب كده دلوقت، وبعدين ربنا وفقهم وانتقلوا من مرحلة الطائفية الى مرحلة العنصرية
واحنا ماشيين على نفس الطريق بوصفنا اجدد في مجال الاضطهاد منهم يعني هم مضطهدين من ايام الاستاذ خشبة، احنا اول مرة نتهزأ كده الحقيقة في القرنين اللي فاتوا دول بس، ووصلنا دلوقت لمرحلة عظيمة، ودي حاجة جديدة الحقيقة احنا طول عمرنا مدلعين، اقصد مدلعين في الاطار ده ماحدش كان بيضطهدنا بشكل عنصري، والحقيقة ولا احنا كان خاطر في بالنا موضوع العنصرية دي، بس على رأي اطاطا مافيش حاجة بتفضل على حالها، وادي في ماشيين في السكة
لحد ما ربنا يوفقنا ونبقى كيان عنصري دموي حقير زي اسرائيل
حاجة من الاتنين: يا اما نعذرهم ونتفهم الحالة المرضية اللي هم وصلوا لها
يا اما نفوق لنفسنا ونتعلم من غيرنا ونفهم اننا لو ما شربناش اللبن ح نبقى زي عمو الجرسون
المظلوم مسكين، المضطهد يستحق التعاطف
لحد ما يتحول زي مصاص الدماء ويبقى هو الظالم وهو العنصري، مهما كانت اعذاره
العنصري مالوش علاج غير انه يفضل يتعامل كحشرة لحد ما يبطل يتعامل مع الناس كأنهم حشرات ويعرف ان الله حق وان كل البشر سواسية
لا ينفع يتعمل معاه سلام ولا وئام ولا ينفع يبقى استخبارات صديقة
الطائفي اللي فاكر نفسه هو الوحيد اللي ربنا بيحبه وبيكره كل الناس، مالوش حل غير انه يحس انه مكروه من كل الناس لحد ما يتأدب ويعرف ان ربنا خلق الناس زي ما خلقه وانه بيحبهم زي ما بيحبه
لا ينفع حد يقرب معاه ولا يتكلم معاه اصلا