حدوتة ملتوتة4

وبعدييييييييييين

شخصت ابصار النساء متوجهة ناحية ابن ليمسار وليمسار بتتأمل ابنها بزهو وحب وقلبها بيحدثها انه بقى اقوى ومظهره اجمل والفخر ملا قلبها. وقف ابن ليمسار وانبعث صوته حكيما وهو بيقول: يا اخواتي يا امهاتي تفتكروا اجتمع شملنا ازاي؟ الغول بعد ما بدر منه ما بدر جاله هاتف في المنام بيؤمره انه يوفي بعهده لناسنا والتوبة من سمات الصالحين لذا وجب علينا نوفي كما وفى الغول ولم شملنا بعد فراق

صرخت هنساد فزعة: ايه يا لاتبيك اللي بتقوله ده؟ عايزنا نقيم مع قاتل ابوك وخاطف امك

ابتسم ابن هنساد وهو بيربت على كتف امه: يا امي اللي فات مات وما تنسيش اننا سرقنا الغول وعشنا من كنزه سنين وايام وهو اقتص منا والحال في الحال اننا متساويين احنا اجرمنا وهو اجرم ثم عاد ووفى بعهده مع ابونا نصشاع صابها الذهول ولفت الارض بهنساد اما بقية النسا بانت عليهم الحيرة ليمسار هتفت وهي مازالت بتتأمل جمال ابنها: يا اخواتي ح نروح المدينة دلوقت بعد ما صارت خراب؟ واذا كان الغول مستعد لضيافتنا يبقى واجب علينا شكره، صرخت نصشاع وقالت: بزياداكي يا ليمسار لولاكي ما كانت المدينة بقت خراب وواجب علينا نعمرها في نفس اللحظة اللي وقعت فيها هنساد مغشيا عليها

وقفت ليمسار بجوار ابنها وقالت انا مع ابني حيث يكون واللي معايا من النساء ييجي جنبي قال ابن ليمسار: واللي معايا من اخواتي ييجي جنبي

ترددت النساء بينما نشصاع مشغولة بهنساد واندفع الشباب يقفوا جنب اخوهم، بعض النسا وقفن حايرات والبعض التاني اول ما شافوا ولادهم راحوا بجوار ليمسار وابنها اندفعوا وراهم فضلت النسا المترددات ما

بين اولادهم يمشوا تجاه فريق ليمسار وعينهم على نشصاع وهنساد قالت جدناه وهي راكعة عند اقدام ليمسار وليمسار تمسح على شعرها: يا هنساد انت ونشصاع..اذا ما كنتوش معانا تبقوا علينا ولا يمكن نترككوا لحالكوا

قالت هنساد وهي بتفوق من اغمائتها: سيبونا نرحل همست نشصاع: نرحل فين لا اهل ولا خلان والمدينة خراب دمعت عينا هنساد وقالت: نموت في ارضنا..اتركونا نرحل

قال ابن سحكيك: المدينة مسكونة بالشياطين ولو رحتوها يا اما ح يقتلوكوا يا اما ح نقتلكوا احنا

قالت نشصاع: وتقتلونا ليه اذا الشياطين رحمتنا

قالت ابن سحكيك: لان ده معناه انكوا تحالفتوا مع الشيطان

بدا التأثر على ابن هنساد وابن نشصاع وقالوا: احبسوهما ليالي وايام ويمكن نقدر نقعنهما

بدا القلق على ابن ليمسار ثم امر الخدم بحبس هنساد، جم الخدم، ذكور لكن مافيش اعجب منهم كل خادم فيهم ماشي على تلات رجلين وعنده عين واحدة بارزة على تفاحة ادم في رقبته وست ايادي في اخر كل ايد صباع واحد اخدوا هنساد ونشصاع وحطوهم في القبو وقفلوا عليهم في ظلام دامس

دخل الاولاد بصحبة امهاتهم عدا ابن هنساد ونشصاع على الغول اذ كان قاعد على عرشه، كان كرسيه مصنوع من اجساد تعابين حية مختلفة الالوان وملفوفة على بعضها في انسجام، على راس المسند حية بين عينيها جوهرة حمرا من بعيد منظر الكرسي آسر الجمال لكن بمجرد ما تقترب منه ينتابك الفزع والخوف كان الغول جالس بيضحك ويشرب المدام في كاس معمول من جمجمة ضبع دخل الشباب ومن وراهم الامهات اللي بان عليهن الانبهار حتى اقتربت سحكيك من الكرسي لتنحني للغول في تحية فشافت الحيات وصرخت من جوفها فلحقها ابنها: يا امي دول حيات اليفات هرعت سحكيك على النسا وقالت لجدناه شفتي الحيات؟ قالت لها: ما قال لك يا ولية اليفات اهمدي بقى وقعدوا جميعا في جلسة سمر وضحكات بينما بدا على ابني هنساد ونشصاع الهم حتى ناداهم ابن ليمسار وتنحى بيهم وكانت سحكيك بتراقبهم من بعيد وهم واقفين قدام ابن ليمسار مطاطين وبدا عليه انه بيعنفهم مالت سحكيك على جدناه وقالت لها هو ايه ابدت جدناه الضجر وهي بتزعق فيها: انت مالك ما تسكتي انتبه الغول والتفت اليهما وهو بيسال عن سرهما بدا عليهما الارتباك ومن فرط خوفها قالت جدناه للغول كل ما اسرت بيه سحكيك

تطايرت النار من عينين الغول وحرقت كاس المدام وهو بيقول: اللي يقيم عندي ما يسألش وده شرطي

تداركت ليمسار: امرك مطاع يا مولاي

هنساد ونشصاع في القبو المظلم وهنساد بتبكي وتندب حظها بينما نشصاع بتبحث في القبو عن شيء تشعل بيه نور من نار، وجدت حجرين وهمست لهنساد عشان تشاركها في اشعال النار ابدت هنساد خوفها من ان يلاحظهم الخدم والحرس، فضلت نشصاع تذكر هنساد بايامها وشجاعتها وتقول لها من امتى الخوف اتمكن من قلبك؟ مدي لي ايدك نشعل النار بدا على هنساد التوجس والخوف حتى وجدت نشصاع الطريقة اللي تبدد بيها خوف هنساد

وكوكوكوكووووووووووووو

الديك صاح

مولااااااااااااي

نكمل في الحلقة القادمة

:)

مطالب الاضراب

كل شوية حد يبعت لي يقول لي هو الاضراب ده عشان ايه؟ :) عثل والله
عموما انا كتبت مطالب الاضراب في البانر ده
انا اصلي دوست بقى في البانرات وما حدش ح يعرف يحوشني بعد كده اوعى وشك عشان انهش ملابس مصر الداخلية على رأي جريدة الاهرام الغراق، قصدي الغراء
الغريبة ان كل المعلقين على الموضوع الاهرام ده اجمعوا على كلمة واحدة: ايه الغباء ده؟ واحلى تعليق جالي من مدون بيقول لي انا متضايق اني قريت حاسس اني اخدت جرعة غباء
المهم ياريت تنزلوا البانر ده بمطالب الاضراب عشان ننهش الملابس الداخلية سوا
انما ايه القرف ده؟ بجد تشبيه مقرف جدا الله يعني ما نجيش غير على الملابس الداخلية للقرد وننهشها، ياللا بقى نبقى نلبس جوانتي ونحرقه بعد كده

ويحك يابن حزين..اذن فهي الحرب

تحقيقات

44342 ‏السنة 132-العدد 2008 مايو 2 ‏26 من ربيع الآخر 1429 هـ الجمعة

عندما يتحول الفيس بوك إلي تشويه للوطن مصــــر‏..‏ التي لايعــــرفونها تحقيق‏:‏عـاطف حـزين د. رفعت السعيد ــ عبير سليمان حين لايدرك بعضنا أن للحرية قوانين حتي وإن كانت متسامحة‏,‏ وحدودا حتي وإن كانت غير مرسومة‏,‏ وسقفا حتي وإن كان شاهق الارتفاع‏,‏ تصبح تلك الحرية نصالا سامة مغروسة في خاصرة الوطن‏.‏ (وزي ما انتوا عارفين خاصرة الوطن مهمة قوي عشان أكل العيش: يا كريمة في هز الوسط يا مشرفة الارتيست يا مصلية الصبح والضهر والعصر والمغرب، والعشا لا العشا لا العشا عندك شغل) بالحرية إذن نقتل أنفسنا ولا نواري سوءاتنا‏,‏تماما كما فعل قابيل بأخيه‏,‏ لكن قابيل ارتكب جريمته بحجر‏,‏ أما نحن فنرتكبها بنقرة خفيفة علي زر الكمبيوتر‏,‏ لكنها ــ من سوء الحظ ـ أشد قسوة وظلما من صخرة قابيل‏.‏ (سوءات ايه؟ انتو ايا عيال سرقتوا السليب بتاعه؟) لن نخفي رؤوسنا في الرمال ونزعم أن مصر جنة الله علي الأرض‏.‏ لن ندعي أننا قطعنا مشوار الديمقراطية حتي أن محطته الأخيرة أصبحت علي مرمي البصر‏.‏ ولن نكابر ونقول إن المواطن المصري يرفل في حياة رغيدة دون معاناة أو طوابير يساعده في ذلك راتب محترم يقيه شر السؤال‏.‏ أبدا لن نقول ذلك ولايستطيع أي مزايد أن يقول بعكسه (يعني مش ح يقول الكلام ده ولا عكسه...عروستي: الناموسية)‏,‏ لكننا يجب أن نقول شيئا آخر ربما لايود البعض أن يسمعه لا لشئ إلالأنه يكشف زيفه وتحريضه وضربه لهذا الوطن في مقتل‏.‏ نقول لعصابات تشويه الوطن عبر الفيس بوك إن مصر ـ التي خاضت من الحروب ما لم تخضه دول أكبر ـ شهدت حركة بناء طوال ربع القرن الأخير علي مستوي البنية الأساسية‏,‏ وعلي مستوي الاستثمارات المتعددة بما لم تشهده طوال مائتي عام‏ (اخدتوا بالكوا من مصر اللي خاضت حروب؟ مصر اللي خاضت اول طلعة جوية فتحت باب الشعرية، ورجعنا تاني للايام بتاعة: اللي يشتم الرئيس يبقى بيشتم مصر).‏ لكن ماذا نفعل لأناس نعلم أنهم يبصرون ولكنهم مصرون علي وضع أكفهم علي أعينهم وعلي إطلاق ألسنة الأفاعي السامة لتلطخ مصر باللون الأسود القاتم حتي أحالوا الوطن إلي خرابة تنعق فيها البوم والغربان‏.‏ (احنا اللي حولناه خرابة برضه؟ ثم خرابة ايه راجل انت مش بتقول ان التنمية اللي حصلت في اخر ربع قرن ما حصلتش في ميتين سنة؟) لقد شاء حظي الأسود أن أتجول ذات ليلة عبر الانترنت وهفت نفسي إلي الدخول في جروبات الفيس بوك من باب الفضول ومن باب قتل الوقت (طب انت واحد فاضي احنا ذنبنا ايه؟)‏.‏ رأيتهم لايكتفون بتعرية الوطن مع الاحتفاظ بما يغطي عوراته‏,‏ بل يمزقون ملابسه حتي تخرج أظافرهم مخضبة بدمائه (يا استاذ قبل ما تتهم الناس دور تحت الكنبة يمكن تكون الدكة فكت وللا حاجة...يا عيال اللي اخد اللباس يرجعه ما يصحش كده مش تهريج ده)‏.‏ فكل من في هذا البلد كبيرا أوصغيرا أوحتي خفيرا نظاميا في أصغر عزبة في مصر لصوص وقتلة وسفاحون يستحقون الابادة‏.‏ كان كل ولد من أولاد الفيس بوك يمسك في يده شومة ليحطم بها كل المصابيح المضيئة في شوارعنا لا لكي يسير الناس في الظلام‏,‏ بل لاقناع الناس بأن الحكومة هي التي أحالت حياتهم إلي ظلام‏.‏ (يا ولاد اللذين، انتوا اللي بتضربوا كرسي في الكلوب وتلبسوها في الحكومة؟ طلعتوا انتوا؟ طلعتوا انتوا المتسببين في ازمة العيش وازمة الجواز وازمة البطالة واطفال الشوارع وطلعتوا انتوا اللي سرقتوا خط الفقر وحطتوه فوق خمسين في المية من المواطنين؟ لو سمحتوا رجعوه ده عليه رهن، واكيد اكيد انتوا اللي بتعذبوا الناس في اقسام الشرطة، كل ده يطلع منكوا وتلبسوه في الحكومة البريئة الغريقة الحريقة اللي قفزت بمصر قفزة ما حصلتش على مدى ميتين سنة؟ ايه؟ واحنا بنقفز شنكل الشماعة شبك في الياقة عشان كده متعلقين، وهو ده سر تعليق المواطن في اقسام الشرطة) لم يصل عددهم إلي خمسة آلاف عابث لم ينزل أحدهم إلي الشارع في مظاهرة أو في إضراب أو حتي في وقفة صامتة‏..‏ فقط يحرضون‏..‏ فقط يكذبون‏..‏ فقط يتطاولون‏..‏ فقط يدعون إلي الاضراب ووقف الحال‏.‏ (افهم من كده ان الاستاذ عاطف بيحرضنا اننا ننزل نتظاهر في الشارع؟ حاضر...اهو الدعوة للتظاهر جاية من جرنال الاهرام الحكومي) ظننت للحظة أنهم يحبون مصرولكن علي طريقتهم الخاطئة‏,‏ وقلت لنفسي لابد أنهم سيتراجعون بعد خطاب الرئيس في عيد العمال لكن هيهات‏ (ما انتعظتوش ولا ارتجعتوا يا كلاب حتى بعد الاكرامية اللي دفعها الريس، عالم ما بيطمرش فيهم خير),‏ ففي ظل فرحة الناس باستجابة مبارك لرفض الدمايطة بناء مصنع بتروكيماويات في أرضهم مع ما ستتحمله الحكومة من دفع تعويضات باهظة للجانب الكندي‏ (وهي الحكومة بتدفع منين؟ مش من فلوسنا؟ هي الحكومة يعني اتفاجئت ان فيه بني ادمين وما عرفتش الحقيقة دي غير لما مضت العقد مع الجانب الكندي),‏ وفي ظل فرحة كل أسرة مصرية بقرار الرئيس برفع العلاوة الاجتماعية‏30%,‏ وكنا نحلم بـ‏25%‏ فقط‏ (ايه التسول ده؟),‏ كانت ألسنة الأفاعي تواصل أداء دورها وتدعو إلي تلطيخ مصر بالسواد في يوم‏4‏ مايو‏!.‏ ومع أن البسطاء من شعبنا لايعرفون الفيس بوك ولايتجولون في مواقع الانترنت‏,‏ ومع أن تأثير شراذم الفيس بوك لايتخطي بضع مئات‏,‏ لم نجعل ذلك مسوغا لتجاهل جريمة تحدث بين ظهرانينا‏,‏ وقد تصبح قريبا كرة جليد متهاوية‏ (انا مش قلت لكوا بطلوا كلمة كرة التلج دي؟ اهي طلعت متهاوية).‏ أردنا أن نفتش في صدورهم فاخترنا أكثرهم احتراما (نفتش في صدورهم! نفتش في صدورهم! نفتش في صدورهم! طب عايزين نضم اليسا للفيس بوك عشان الاخ عاطف يفتش بذمة)‏.‏ أردنا أن نريهم مصيرهم فوضعناهم أمام كلمات أحد العلماء المعروفين بمواقفهم الحادة من الدولة‏.‏ أردنا أن يتعرف الناس علي من يخربون وطنهم في الوقت الذي يزعمون فيه أنهم مغرمون صبابة بمصر هي أمي نيلها هو دمي‏.‏ د‏.‏ رفعت السعيد يضعهم في الإطار الصحيح‏:‏ صدقوني‏..‏ دول شوية عيال لاسعة (طب ما قلتش ايه اللي خلانا نلسع ليه؟ ومين اللي طير الربع اللي كان فاضل لنا والربع اللي سالفينه من الجيران كمان) لا يميل الدكتور رفعت السعيد رئيس حزب التجمع إلي وضع الملح علي الجرح‏,‏ بل يسعي دائما إلي تنظيف الجرح أولا قبل أن يتعامل معه علاجيا‏.‏ يقول‏:‏ يوجد في مصر نحو‏35‏ مليون شاب لا يدخلون جميعا علي الفيس بوك والإنترنت‏.‏ إنهم بضعة آلاف (هو احنا مش كنا بضع مئات من شوية ومالناش قيمة؟ تكاثرنا كده على مسافة كام سطر؟) فقط الذين يفعلون ذلك ولا يستطيع أحد أن يمنعهم من ممارسة أبسط حقوقهم الأولية‏,‏ إنهم بنقرة واحدة يخاطبون العالم‏,‏ شيء سهل ورخيص‏.‏ وقبل أن نتهمهم بالمبالغة والتحريض وكتابة أشياء غير صحيحة تعالوا نضعهم أولا في إطارهم الصحيح‏.‏ لقد تابعت أحدا منهم يعيش في النرويج ويطلق علي نفسه لقب نسر الشمال‏.‏ شخص لا يعرف شيئا عن الواقع المصري ويطرح أشياء قريبة من الهيستريا السياسية‏.‏ إنه مثلا يقول في خطته للسيطرة علي البلد‏:‏ علي الشعب ألا يعلن عن أماكن تجمعه لكي لا يعرفها الأمن‏.‏ تصور الراجل يتعامل علي أن الشعب مجرد شخص وينسي أن الأمن نفسه جزء من المجموع‏ (هههههه بصراحة له حق في دي، اينما تكونوا يدرككم الامن).‏ لكنه يري في خطته للسيطرة إلي تشتيت الأمن حتي يتمكن الشعب من السيطرة علي أقسام الشرطة‏.‏ ثم ينادي نسر الشمال بتجميع‏500‏ سيارة‏(‏ إزاي موش عارف‏)‏ بحيث تضم كل سيارة خمسة أشخاص لاقتحام مطار القاهرة لمنع تهريب الأموال‏.‏ البيه متصور أن الأموال يتم تهريبها في أشولة‏,‏ رغم أنه عايش في النرويج والمفروض يكون فاهم‏.‏ ثم يضع خطة جهنمية للاستيلاء علي الإذاعة والتليفزيون‏.‏ وهكذا كلام غير منطقي من واحد إيده في الميه الساقعة جدا‏,‏ والأهم من ذلك أن هذا الكلام لا يمكن أن يستجيب له أحد‏ (اغلب الظن ان الدكتور رفعت عايز ينقذنا من المواجهة مع الامن بانه يقول علينا مجانين...وماله، مجانين مجانين بس نعيش).‏ هذا هو الإطار الصحيح للمسألة‏,‏ ثانيا‏:‏ يجب أن نعلم أن المواطن لا يستجيب عادة إلي دعوات من مجهولين لا يكتبون أسماءهم ولا عناوينهم ولا أرقام هواتفهم‏.‏ خايفين علي أنفسهم وغير خائفين علي الناس‏,‏ لكن المواطن أكثر ذكاء من أن يستجيب لهؤلاء القادة المستخبيين‏.‏ ثالثا‏:‏ أنا أعتقد أن ما يحدث علي الفيس بوك غير منظم‏,‏ بل إن كل واحد يكتب ما يخطر علي باله‏,‏ ففي‏6‏ أبريل كان هناك شباب يدعون الناس بدعوة خليك في البيت وآخرون يدعون النساء إلي ارتداء السواد‏,‏ وآخرون يدعون إلي الخروج لميدان الجيزة‏,‏ وآخرون إلي ميدان التحرير‏,‏ وهناك من يدعو إلي العصيان المدني‏.‏ أي حاجة تطق في دماغهم يكتبوها‏.‏ إذن هذه القوي غير منظمة وغير منطقية وغير ظاهرة بحيث يمكن أن يحاسبها أحد‏.‏ وأؤكد لك أنني أعرف أسماء بعينها كانت تدعو للتجمع يوم‏6‏ أبريل فظلوا في بيوتهم‏.‏ ويضيف الدكتور رفعت السعيد‏:‏ لا يستطيع أحد مهما امتلك من وسائل أن يفرض علي الجماهير واجبات هي غير مستعدة لها‏,‏ أو غير قابلة لتحمل نتائجها (صحيح، كلام مظبوط، بس الناس استجابت للاضراب، يعني الناس مستعدة)‏.‏ نحن نعطي للجماهير الوعي أولا‏,‏ فإذا تحركت يجب أن نسبقها بنصف خطوة غير مكتفين بالتحريض‏..‏ لا يمكن أن يصدر أحد تعليمات إلي الشعب من خلال هذه الدعوات التي أصفها بأنها تحركات مجهضة من بدايتها ولا يمكن لأحد أن يتجاوب معها لأنها ستؤدي إلي حالة إحباط بين الجماهير‏.‏ صدقني المواطن العاقل يصف هؤلاء المحرضين بأنهم عيال لاسعة (طيب بقالوا ستين سنة بتدوا الجماهير الوعي والجماهير مش معاها حاجة تاخد فيها، ثم هم بضعة الالاف دول مش جماهير برضه؟ هو حد ادعى انه زعيم؟)‏.‏ ويري رئيس حزب التجمع أن علينا أن نتعامل مع الفيس بوك وما يحدث فيه بعقلانية وإيجابية بحيث نطرح في المقابل الرأي المتمتع بالعقلانية والوعي السياسي وتعبئة الجماهير وإقناعها وبث الوعي فيها‏,‏ وأظن أن هذا يقع علي كاهل الإعلام والصحافة القومية (الصحافة القومية بتدور على اللباس وتهمانا اننا احنا اللي سرقناه مع اني متأكدة ان الدكة فكت)‏.‏ أتمني ألا نرد عيهم بالشتيمة لأن ذلك لن يحل المشكلة بل سيشعر هؤلاء الأولاد بحالة زائفة من البطولة‏.‏ تعالوا نبحث عن حل واقعي اقتصادي اجتماعي سياسي‏.‏ حل يقضي علي حالة الاحتقان المجتمعي الناتجة عن الفوارق المخيفة بين أغني الأغنياء وأفقر الفقراء‏.‏ حل لمشكلات توزيع الدخل وتوفير ما هو ضروري لرفع مستوي معيشة المواطنين وذلك بفرض ضرائب تصاعدية علي الأغنياء واتخاذ إجراءات حاسمة ضد الاحتكار وإجراءات لضبط الأسعار‏.‏ حل لا يجعل الغلاء يلتهم الزيادة التي قررها الرئيس في خطابه الأخير لو اتبعنا كل ذلك‏,‏ أعتقد أننا سنكون قد اخترنا الطريقة الصحيحة لمواجهة الفيس بوك‏ (هههههه طيب ماهي دي مطالبنا اللي عشانها ناويين ننهش ملابس مصر الداخلية يوم اربعة مايو هو احنا غاويين اضراب بارتي يعني؟)). عبير نجمة نجوم الفيس بوك تعترف‏:‏ إحنا موش بتوع سياسة‏!‏ (وربنا عمري ما سمعت عنها، بس هي ايه اللي خلاها تتكلم مع الاهرام؟) عبير سليمان من نجوم الفيس بوك بدأت علاقتها بالكمبيوتر سنة‏97,‏ تكتب يوميات عانس فتتفاعل معها كل الفتيات الخائفات من هذا المصير‏,‏ تكتب عن البنات والتاكسي فتستقطب كل سائقي وراكبات التاكسي‏ (هم سائقي التاكسي بيدخلوا على الفيس بوك؟ امال ايه حكاية مالهمش تأثير على الشعب دي؟),‏ أسلوبها في الكتابة شيق وساخر لكنها لم تسقط في مستنقع السخرية من الحاكم والحكومة (هههههههههه، ههههههه، مستنقع؟ يعني اللي يعارض الحكومة يبقى سقط في مستنقع؟ امال جاب رفعت السعيد ليه؟ هو مش مفروض انه محسوب على مستنقع المعارضة وللا ايه؟)‏,‏ كل ما تفعله عبير بنت العشرينات هو الصراخ ولكن علي طريقتها‏..‏ أو بالأحري علي طريقة جيل يمتلك كل أدوات التعبير‏.‏ تقول عبير إن الفيس بوك تطور اجتماعي وطبيعي وتكنولوجي انتشر في العالم وعندما وصل الينا استخدمناه‏,‏ ستقول لي اننا أسأنا استخدامه وسوف أرد عليك بأن بعضنا أساء استخدامه مثلما يحدث مع كل مفردات حياتنا هناك من يستثمرها في الصح‏,‏ وهناك من يستغلها في الغلط‏.‏ ولو ركزنا علي الغلط سأقول لك ان هناك حالة فساد عامة في استخدام المرافق المتاحة لنا‏,‏ الناس بتسوق غلط وبتكسر كراسي الاتوبيسات‏,‏ اشمعني هيستخدموا الانترنت صح؟‏!.‏ (!!!!!!!!!!!!!: كلمة من تلات حروف اولها زي اخرها: كيك) سألت عبير‏:‏ حكاية الفيس بوك بدأت ازاي وليه؟ ـ فقالت‏:‏ انها رد فعل طبيعي لتعدد وسائل الإعلام‏,‏ كان هناك زمان فيه‏3‏ جرايد وقناتان تليفزيونيتان فكان الجيل المواكب لذلك محروما من الاختيارات الكثيرة‏,‏ الان هناك دش بمليون قناة وعشرات الصحف وزاد علي ذلك الانترنت‏,‏ كل هذه وسائل ليست للتلقي والتلقين‏,‏ كما كان يحدث مع جيل سيادتك والاجيال التي سبقته‏,‏ بل وسيلة للحوار وتبادل الأفكار‏..‏ والفرق ـ كما تري ـ عظيم‏.‏ وعلي فكرة كان هناك كذا سيستم قبل أن يسمع الناس بالفيس بوك لكنها لم تنجح مثله في عمل تجمعات اجتماعية بهذا الشكل‏.‏ سألتها‏:‏ كيف تطور الحوار في الفيس بوك من النواحي الاجتماعية الي السياسة؟‏.‏ ـ فقالت‏:‏ في البداية كان هدفنا معرفة أخبار بعضنا‏,‏ خاصة أن الفيس بوك جمع الزملاء والزميلات من أيام الدراسة والتي انقطعت أخبارنا عن بعضنا ثم تطورت المسألة الي قيام أحدنا بقص خبر من الجرائد ونشره لتلقي الردود الساخرة عليه‏,‏ وأحيانا يكون الخبر لصورة غريبة نكتب تحتها يبقي انت أكيد في مصر ووصلت الي مرحلة الفيديو من خلال سايت تاني حوار تليفزيوني مثلا يود مرسله أن نراه جميعا لأنه أعجبه‏.‏ هل أعماركم قريبة من بعضها البعض؟ ـ بالعكس هناك كل الأعمار بداية من‏17‏ سنة طيب انتي شخصيا بتعاني من ايه علشان تدعي الي الاضراب؟ ـ أنا شخصيا مرتاحة ماديا‏,‏ ولكن هل الدنيا أنا بس؟ أنا باشوف عامل جمع القمامة كل صباح وهو يتسول لان مرتبه‏40‏ جنيها‏.‏ كل يوم اسأل نفسي اذا كان دخلي كويس وموش عارفة أعيش‏..‏ أمال الراجل ده عايش ازاي؟ أنا موجوعة لانني أري أوضاعا غير آدمية تحيط حولي‏,‏ ياسيدي الفاضل احنا ازمتنا وصلت الي رغيف العيش‏..‏ ايه اللي ناقص بعد كدة‏,‏ والغلاء يحيط بنا من كل جانب ولأننا جيل غيركم‏,‏ كما قلت لك‏,‏ كان لابد من استخدام الأدوات المتاحة لنا لكي نصرخ ونعترض ونتوجع وندعو الي الاضراب كوسيلة صامتة وبسيطة‏.‏ ولماذا لم تمارسوا ذلك في الاحزاب السياسية؟ ـ لاننا موش بتوع سياسة‏.‏ احنا المواطن اللي في الشارع‏,‏ انا لست ناشطة سياسية ولا أحب أن أكون فهل هذا يعني ان حال البلد مايوجعنيش‏.‏ أنت موافقة علي أن مصر هي اللي موجودة في الفيس بوك خراب وسواد ويأس؟ ـ اتكلم بصراحة‏..‏ أيوه كل المشاكل اللي موجودة في الفيس بوك حقيقية‏.‏ معاك ان هناك بعض المناطق المضيئة‏,‏ لكن واحد بيصرخ وبيتألم عايزه يشاور عليها ازاي؟ أنا شايف مثلا أن استجابة الرئيس لمطالب شعب دمياط الرافضين لمصنع اجريوم شيء ايجابي جدا‏..‏ وشايف رفع المرتبات بنسبة‏30%‏ شيء في غاية الاحترام لكن ليه انتم شايفين حاجة تانية؟ ـ موش كلنا‏..‏ أنا زيك شايفة أن استجابة السيد الرئيس شيء يستحق التقدير‏,‏ لكن لماذا لم يحدث قبل احداث المحلة وقبل مظاهرة أهل دمياط‏,‏ صدقني كان رد فعله هيكون أفضل‏.‏ وليه ماتقوليش انه بمجرد وصول صوت الناس للريس يستجيب علي الفور؟ ـ لا تخاطبني علي انني ضد الريس والنظام بالعكس انا مصرية وعاشقة لتراب بلدي وأقسم لك أنني أتلقي عشرات العروض للسفر الي دبي وأوروبا بمقابل مادي لن تصدقه ولكنني لا أترك لنفسي حتي فرصة للتفكير‏,‏ هاعيش هنا وهاموت هنا لكن هل يجب ان تكون الحياة في مصر مصحوبة بالألم؟ هذا فقط الذي أرفضه‏.‏ لكن هناك في الفيس بوك من يتناولون مصر بطريقة مخجلة وغير حقيقية لدرجة أن بعضهم يحتفل مع اليهود بعيد الفصح ويزعم أن مصر تهمه وتؤلمه؟ ـ تقول عبير‏:‏ ألم أقل لك ان الفيس بوك مثل كل شيء‏,‏ نعم هناك نماذج غير مشرفة لكنهم والحمد لله قليلون‏,‏ أما الأكثرية فهم مصريون يحبون مصر بطريقتهم‏.‏ لكن ألا تلاحظين معي ان عددا كبيرا من المشاركين في الفيس بوك بنات؟ ـ فقالت‏:‏ أيوه ملاحظة سألتها‏:‏ تفتكري ليه؟ ـ فقالت‏:‏ لأننا أشجع‏.‏ ----- ده اللي نزل على النت، في الاهرام اللي هو الصحيفة فيه مربع لواحد اسمه هشام الطوخي كاتب بيهني اليهود العرب بعيد الفصح وحاطين صور لاطفال فلسطينيين مقتولين وكاتبين جنبها: دعاية مجانية لقتلة الاطفال وكاتبين: هذا مجرد نموذج واحد من عشرات الناشطين الذين يدعون الى الاضراب مع الاخوان ومع كافة الذين يريدون وقف حال البلد بدلا من ان ينشغل بحال مصر بعث ببرقية تهنئة الى الاسرائيليين بمناسبة عيد الفصح في الوقت الذي يقتلون ويذبحون نساء واطفال فلسطين فهل هذا هو الاضراب الذي يدعون اليه ويسانده الاخوان هاهاهاهاهاهاهاااااااااااااايييييييييييييييييييييييي اذن فهي الحرب، لو الحرب ح تبقى مع ناس بالغباوة دي ح تبقى مسلية قويييييييييييييييي كمان مربع تاني: الشيخ يوسف البدري: الداعون الى الاضراب مفسدون ومخربون ومن ضمن كلام يوسف البدري معلقا على اضراب اربعة مايو: هذا يسمى في الاسلام بالخروج السلمي عن الحاكم ومن ثم لا يقره الشرع بل يقف ضده خخخخخخخخخخخخخخخخخخخخ خخخخخخخخخخخخخخخخخخخخ خخخخخخخخخخخخخخخخخخخخ خخخخخخخخخخخخخخخخخخخخ حد في الدنيا سمع في الشرع عن تعبير فقهي اسمه: الخروج السلمي عن الحاكم؟ طيب وماذا عن، لامؤاخذة، الدخول السلمي عليه؟ لا وبصوا بيقول ايه كمان عن الداعين للاضراب: لماذا يزكون انفسهم ويرون انهم اصحاب الراي الحق والمنطق السليم وغيرهم لا يفهمون ولا يعقلون شوفوا مين اللي بيقول الكلام ده؟ اللي قاعد يرازي في مخاليق ربنا عمال على بطال بسبب ومن غير سبب لمجرد ان اي يختلف معاه وبخصوص غلاء الاسعار احنا السبب فيه: لانه اذا صلحت الرعية صلح الحال وبيقول ان توبة اسراء تعتبر عودة الى صحيح الدين وزغرتي ياللي مانتيش غرماااااااااااااااااااااااااانة فاكرين مسرحية وجهة نظر لما لبسوا عرفة وسنية فضيحة اخلاقية والشيخ عبد الباري وهو اعمى زيه زيهم قال: استغفر الله العظيم مش قااااااااادر ابصصصصصصصصصصصصصص؟ مش عارفة ليييييه كل الصفحة دي حسيت انها تلخيص لمسرحية وجهة نظر ومش ناقص غير يعملوا مع واحد فينا حوار ويكتبوا على لسانه: لو لم اكن جعانا لوددت ان اكون جعانا

ربنا موجود

يارب تكونوا اتفرجتوا على الجزيرة وشفتوا سامي الحاج وهو بيتكلم وبيناشد كل الحكومات اللي لها عيال في جوانتانامو انها تعمل على استعادتهم جميعا: سواء من فقد عقله او من احتفظ به
وجد وقفي بتقول ان امريكا مش عايزة تقفل جوانتانامو عشان خايفة عليهم لبعدين ترجعهم بلادهم ويتعرضوا للتعذيب
حتى البت ضحكت وهي بتقول كده
احد شروط الافراج عن سامي ان قناة الجزيرة ما تستقبلهوش، بجد يعني انا عمري ما شفت قوة عظمى بالهيافة دي وبتتعامل مع قناة فضائية على اساس انها ضرتها
سامي الحاج كان خاسس حوالي تلاتين كيلو وراجع عبارة عن هيكل عظمي ومش قادر يتحرك ومع ذلك مكبلينه بالاغلال
واحد من زمايل سامي الحاج (زمل في السجن يعني) قال ان فيه ناس كتير اتجننت جوة، وانهم كانوا بيمنعوهم من الصلاة وبيحطوهم في اقفاص زي الحيوانات ويفتحوا عليهم التلاجة لساعات طويلة
سامي اصله كان عامل اضراب عن الطعام وهم كانوا مشترطين انه يوقف الاضراب عشان يفرجوا عنه وهو مصمم انه ما يكسرش الاضراب غير لما يفرج عنه والظاهر مخه صعيدي وتربست معاه بقى ومش هامه يموت المهم ما حدش يكسر مناخيره
ممكن اعرف هم بيعملوا في الناس ايه عشان يتجننوا؟ معلش يعني هم مش واخدين عيال فرافير دول خريجين دول عربية واسلامية يعني مبتكري التعذيب اللي على اصله، وطول عمرنا الناس ولله الحمد والمنة بتدخل السجن وتتعذب وتنتهك وتتبهدل وماحدش فيهم بيتجنن ولا حاجة وماحدش كمان من اللي برة بيبقى متوقع انه يتجنن ولا حتى بيرحموه لو عيط له شوية، لان عادشي يعني، ايه يا اخي اتعذبت لك شوية وخلاص، كنت تعيط ساعتها وخلصنا ح نقعد في الموال ده على طول؟ واظن يعني سجون الدول العربية والاسلامية ما يتوصوش، بيعذبوهم عشان يربوا رجالة صح، البني ادم يخرج من تحت ايدهم وحش
دي حتى سجون اسرائيل مش بتجنن حد يعني، انا بس عايزة افهم ايه اللي ممكن يكون عملوه اكتر من الامن بتاعنا ومن اسرائيل عشان هم بيجننوا الناس وبتوعنا لا؟ يعني هم اوسخ من الامن بتاعنا ومن اسرائيل؟ ازاي؟
انا مش عارفة هم سابوه ليه؟ يا ترى لقوا حالته الصحية ساءت وخافوا لا قدر الله يموت عندهم فبعتوه لينا
انا جات لي نوة عياط واللي نزل عليا عمالة اكلم نفسي واقول: هم فاكرين نفسهم مين عشان يعملوا في الناس كده؟ ربنا موجود
واكرر الكلمتين دول واعيط
الهي يارب نصحى من النوم نلاقي امريكا غرقت في المحيط باللي فيها بقى كلهم يلعن ميتين اشكالهم الوسخة من اول اوباما لحد ماكين ربنا يحرقهم بجاز وسخ كلهم ربنا يدوقهم العذاب اللي بيعذبوه للناس ولاد الكلب قاعدين ياكلوا في قتة محلولة ويدفعوا ضرايب عشان حكومتهم تعذب البني ادمين بفلوسهم لحد ما يتجننوا، وانا اقول ياربي بينتحروا ليه؟ احنا من امتى عندنا حد بيتنيل ينتحر هو احنا عندنا دم؟

الحق الموارد قبل ما تجري

الريس قال اوجدوا موارد من تحت قطاقيط الارض
طب امسك الموارد بقى قبل ما تجري
ده قبل ذكرى النكبة باسبوعين....نختشي على دمنا بقى ونعمل حاجة يوم النكبة ان شاء الله بس يعدي اربعة مايو على خير يا رب
انا اتضايقت انهم منعوا منعم من السفر، حركات قرعة مش لطيفة دي

عااااااااجل سامي الحاج خرججججج يا رجالة

تحديث: انا مش مطمنة، بيقولوا سامي الحاج اوضاعه الصحية متدهورة، هي الحداية بتحدف كتاكيت؟
ليكون الامريكان حسوا انه قرب يموت وباعتينه يموت عندنا عشان ما يشيلوش المصيبة عندهم
ربنا يستر
------------
تحديث: تابعوا الجزيرة دلوقت بينقلوا لحظة بلحظة ملابسات خروج مراسل الجزيرة سامي الحاج اللي كان محبوس في جوانتانامو
طب هو اتحبس الحبسة دي كلها وخرج بريء، طب ايه؟ مش ح يرفع قضية؟
دلوقت حمد الله على سلامته اهم حاجة، ياكل ويستحمى ويتعالج هو دلوقت مراته رايحة تستقبله في المطار هو جاي من امريكا على السودان
وعقبال ما جوانتانامو يتقفل، ولاد الكلب الدلاديل ما اتجرأوش علينا كل الجرأة دي غير بعد فتح جوانتانامو ولما مسئول الهيومان رايتس ووتش في الشرق الاوسخ قال لاحمد نظيف انتوا بتعذبوا الناس رد عليه احمد نظيف بمنتهى الثقة: اذا كانت امريكا بتعذب احنا ما نعذبش ليه؟
امريكا يا وسخة امريكا يا وسخة، يارب تتقفلي كلك من بابه
المهم ان كل الناس فرحانة ماعدا امريكا ما طلعوش ولا بيان ولا اي حاجة، انا عايزة اعرف الراجل ده اتحبس كل السنين دي واتحطمت حياته وخلاص كده؟ خلاص ح يفلتوا بعملتهم؟
بلد وسخة الله يجحمك مطرح ما رحت يا كريستوفر كولومبوس على اكتشافاتك الوسخة
المهم انا متفائلة خير وده خبر حلو قبل الاضراب فال حلو
-------
لسة جاية على الجزيرة سامي الحاج خرج حالا
الف مبرووووووووووووك حضروا له مصحة بقى عشان يتعالج
فال خير ان شاء الله

عاجل: دعوة للصلاة يوم اربعة مايو

معلش فاصل تاني بس فاصل هام جدا
فيه خبر دعوة للصلاة والدعاء لمصر بدون تظاهر ولا اي احتكاك باي حد، سامعيني؟ مش عايزين حد يمسك علينا غلطة
اللي ح يحصل كالآتي:
تقعد في البيت من الصبح لو مسلم ح تصلي الضهر والعصر في المساجد دي
أماكن الصلاة للمسلمين:

الجامع الأزهر
مسجد السيدة زينب
مسجد عمرو بن العاص- مصر القديمة
مسجد عمر مكرم - ميدان التحرير
مسجد الفتح - رمسيس
مسجد مصطفى محمود – المهندسين
مسجد رابعة العدوية- مدينة نصر
مسجد الاستقامة - ميدان الجيزة
مسجد النور - العباسية
مسجد الحصري – 6 أكتوبر

فى اسكندرية:
مسجد القائد ابراهيم
مسجد ابو العباس
مسجد البيطاش

لو مسيحي ح تحضر قداس الاحد في الاماكن دي

أماكن الصلاة للمسيحيين:

الكاتدرائية المرقسية – العباسية
كنيسة السيدة العذراء- الزيتون
الكنيسة المعلقة – مصر القديمة
كنيسة مارجرجس – مصر الجديدة
كنيسة القديس سمعان الخراز – المقطم
كنيسة الأقباط الكاثوليك – مصر الجديدة
كنيسة قصر الدوبارة – ميدان التحرير

وندعي لمصر، ونرجع البيت على الطول ونفضل في البيت
اقتراحي انك تروح اماكن الصلاة مشي عشان ما تركبش مواصلات ولا تاكسيات وما تشتريش حاجة في السكة وما تعملش اي مشاكل ولا دوشة مع حد اي حد يكلمك انت مخاصمه ما تردش عليه زي حدوتة الشاطر حسن
الخبر ده انا اخدته من عند مراقب مصري
عارفين الشاطر حسن لما كان رايح ياخد الكنز وامنا الغولة قالت له تحط لبابتين عيش في ودانك وما تردش على حد طول ما انت ماشي في السكة والا ح تتحول لتمثال حجر
خلاص خلاص اخر مرة بقى ان شاء الله البوست الجاي بقية الحدوتة بتاعتي
:)

واحنا معاه لمشاء الله

معلش دي الاعلانات قبل ما نكمل الحدوتة

منع منعم من السفر

وصلتني الرسالة دي من منعم ووائل عباس:
احتجاز عبد المنعم محمود بمطار القاهرة ومنعه من السفر للمغرب لحضور مؤتمر عن حرية الصحافة في شمال إفريقيا
----
ملحوظة: البوست الجاي كمالة الحدوتة ان شاء الله
اوعوا تكونوا نسيتوها
----
اسكتو صحيح، مش امي لقيتها جاية بتقول لي: هو انت كاتبة حاجة تضحك في التهييس النهاردة؟ اصل فيه ناس بتتصل بيا بتقول لي كده..(انا مش باوري امي الجبهة خالص عامدة متعمدة) طب انا عايزة اشوفها ممكن؟
- ها؟ آه..ممكن مش ممكن ليه يا ماما؟
المهم قعدت اسوف وهي تقول لي: فين بقى؟
لحدت ما اضطريت اني اوريها البوست بصت فيه: هو ده اللي اصحابي شافوه؟
- ايوة يا ماما
قعدت تقرا شوية وبعدين قالت لي: يعني ايه برايز؟
- يعني خنقة...يعني حياتهم ضيقة زي البريزة مش نص جنيه كده وللا اتنين جنيه
تقرا شوية: هو ايه ده اللي اتنفخ واتفقع؟
- المرارة يا ماما
- طب اتنفخت ازاي؟
- ماهي المرارة قبل ما تفرقع بتتنفخ
- والله؟
- طبيعي يعني، اي حاجة قبل ما تفرقع بتتنفخ
المهم خلصت وبعدين صلت المغرب، وما اعرفش كلمت مين ابن اللذين، آمل انه ما يكونش ابويا، وقعدت تتوشوش وبعدين جات تبص لي بجنب عينها: على فكرة كلمة برايز دي طلعت قلة ادب
-ها؟ ياه...والله؟
- ايوة طلعت كلمة عيب..مين اللي علمها لك؟
- ها...با...سا..هن..هو..هف..دي كلمة شايعة يا ماما
- لا دي قلة ادب، وبعدين يا حبيبتي ما تقوليش كلام انت مش عارفة معناه قبل ما تسألي، لو اتكسفتي تسأليني اسألي مالك
!!!!
مش ممكن تكون كلمت مالك، اولا لانها مش معاها نمرته ثانيا لان مالك مايبعنيش كده، ح اشوف النمرة في الريدايل واعرف كلمت مين
ثم هي فاكرة ان عشان مالك صلح لي الكمبيوتر والعربية خلاص بقى هو الحكومة وعارف كل الكلام؟
احم
امي...معلش
---
استنوا بقية القصة في البوست الجاي ان شاء الله

اول طلعة جوية فتحت باب الشعرية

احنا قاعدين في البيت
يا مستتنا
لولولولويييييييي

في عيد ميلادك: علي زير زير يو يو

علي زير زير يو يو، علي زير زير ريسنا، علي زير زير يو يو
كل سنة وانت طيب يا ريس، عقبال ميت سنة، عقبال مية وخمسين سنة، ويديك الصحة وطولة العمر يا رب وما يحرمناش منك ابدا
آه وربنا
وربنا كمان مرة
على فكرة انا مش باكرهك، اه وربنا، مش ح اضحك عليك واقول لك بحبك، انا لا باحبك ولا باكرهك انا ما اعرفكش اصلا يعني، انت صحيح عشرة عمري ورئيسي من ايام ما كنت في اولى ابتدائي، بس مافيش معرفة قريبة قوي بينا، وقال على رأي المثل تعرف فلان ايوة عاشرته لا يبقى ما تعرفوش
واحقاقا للحق يا ريس انا مش مهتمة قوي اني اعرفك، بس انا عندي استعداد كبير اني احبك، آه وربنا
وربنا كمان مرة
بس اذا اردت ان تطاع فامر بالمستطاع، ومش معقولة ابدا امشي في الشارع الاقي اطفال بدل ما يبقوا رايحين او راجعين من المدرسة يبقوا واقفين في الاشارات بيقولوا لي: جنيه اكل بيه يا ابلة
والناس تموت بعض على العيش
والضكاطرة اللي بيعالجوا المرضى شغلتهم في المستشفيات العامة دلوقت حانوتية، اذ مافيش اجهزة ولا ادوية ومافيش في ايدهم غير انهم يكتبوا شهادات وفاة
وبسبب قانون الطوارئ اي جربوع يقدر يوقفني ويوقف اي مواطن محترم وهو بيقول له: بطاقتك يا حيوان، شمر ووريني دراعاتك، انت بتبجح؟ طب قدامي ع القسم وحياة امك ما انت خارج منه الا على النيابة شايل قضية مخدرات
وملايين ساكنين في العشوائيات بياكلوا من الزبالة
واساتذة جامعة لازم يدوا دروس خصوصية يا كده يا يعيشوا بالظبط زي اللي فوق دول اللي بياكلوا من الزبالة
وضرايب قاسمة وسطنا مش عارفين بتروح فين
ومدنيين بيتحولوا للقضاء العسكري
وشباب كل تهمتهم انهم بيقعدوا على النت وبيتعمل لهم امر اعتقال بعد ما حنفي يخلي سبيلهم
وفلاحين بينطردوا من اراضيهم بعد ما عشمتوهم بالحلق ودلوقت بتقولوا الارض بترجع لصحابها
وعمال بيشتغلوا بالسخرة زي ايام محمد علي وياريتهم بيشتغلوا
وكل حتة في البلد اتباعت حتى ميدان التحرير وسواحلنا في سينا
ورجال الاعمال اغبى من دود الغيطان بعد مص الغصن الاخضر ينحتوا عضم العيدان
ورغيف العيش بقى بيضة الديك ولما اتحلت المشكلة بقت الناس بتاكله بايت بمساميره
وشباب مش لاقي يتجوز لحد ما بقى كله برايز، واحنا في انتظار حركة شبابية جديدة يبقى اسمها
شباب من اجل البرايز
واخر ما بيزهق من البرايز بيرمي نفسه في البحر يا يقب ويشتغل في ايتها داهية يا يموت ويستريح
والامن فارد قلوعه علينا وطايح في البلد كأننا عبيده وكأنهم مماليك العصر، على الاقل المماليك كانوا عاملين هيبة خارجية للدولة، مش مهم يعني بيعملوا ايه فينا جوة، مدام اتقفل علينا باب واحد يبقى اللي بينا وبينهم زي القبر
والشعب كله متهم حتى تثبت ادانته، اوبشن البراءة ده مش مطروح اساسا
والناس نفسها تشتغل ومش لاقية، الا شفت حكومات كتير وقليل يشتكوا ان الشعب مش عايز يشتغل
عمري ما شفت شعب عايز يشتغل والحكومة هي اللي مكسلة تشغله غير عندنا
وكل ما نحاول نلم الموضوع ونعبر عن نفسيتنا بمنتهى السلمية تسلط علينا اخواتنا في العروبة والدين والانسانية عشان يضربونا ويقولوا علينا دسة منقلة
مش معقول منظر المحلاوية وهم مصابين ومربوطين في السراير والله لو ريا وسكينة
وكلام ابو الغيط عن قطع رجل الفلسطينيين بينما مصري يموت في المياه الاقليمية وطفلة تموت وهي بتلعب في بلدها واحنا ولا الهوا ولا الدموع
وما بقاش لينا اي منظر ولا جوهر لا جوة ولا برة
وحنفي ابو دقة وغير ابو دقة وغيره وغيره
كل ده وتطلب مني احبك
انا مستعدة احبك، بس خف تعوم حضرتك
امممممممممم طبعا انا عارفة انك مش طالب مني ولا من غيري اننا نحبك، احنا اصلا مش فارقين معاك سعادتك
طب ليه احنا مش فارقين معاك يعني ياريت توضح لنا؟ يعني لو فينا حاجة غلط مخلياك ضارب علينا طناش احنا ممكن نغيرها
تحب ننفخ شفايفنا؟ ننفخ شنبنا؟ نفخ اي حاجة تانية؟
بص حضرتك، بالنوسبة للذكور هو فيه حاجات عندهم اتنفخت واتفقعت فدولم في السليم يعني اذا كان ده اللي مضايقك مننا
بالنوسبة للاناث احنا حضرتك مستعدين ننفخ اي حاجة تعجبك بس فهمنا ايه اللي مضايقك مننا؟
يعني نعمل ايه عشان نلفت انتباهك كده وتاخد بالك ان البلد دي فيها شعب
بس انا مبسوطة منك، آه وربنا مبسوطة منك، وربنا كمان مرة مبسوطة منك، قول لي ليه؟ ما قلتش طبعا مش مهم انا ح اقول لك ليه: حضرتك طلعت من المصريين ابداعات عبقرية في التهييس، حيث ان المصريين دلوقت اهو ماشيين في الشارع في حالة هيستيرية من الكوميديا السوداء، آه وربنا، لو نزلت الشارع، لا سوري، قصدي لو بعت السواق بتاع السواق بتاعك ينزل الشارع ويحكي لك الناس عاملة ازاي ح تنباساط قوي، الناس كلها ماشية تهرج على الفاضية والمليان وبشكل هيستيري، ده غير..شوف، شوف حضرتك احنا عاملين ازاي، الناس بقت تكتب لك شعر وتألف فيك اغاني وتبتكر عشان تعبر عن انها طلعان ميتين ابوها وكل ده عشان يلفتوا نظرك
بس انا احب التقل، آه والله، ما احبش الراجل الخفيف ده اسم الله عليك تقيل تقيل يعني
عارف بتفكرني بواحد بلدينا كان بينصح اخوه: اول ما تتجاوز تشكم مرتك، بمبكت معاك في الكلام لا تضربها ولا تشتمها ولا تصالحها ولا تراضيها، جال له امال اعمل ايه يا اخوي جال له: تطنشها خالص، تجاهل تاااااام، عارف؟ الوالية مرتي زودت في الكلام ليلة الدخلة من يوم ما اتجوزتها لدلوكيت لساني ما بيخاطبش لسانها راخرة متأدبة
جال له: واصل؟ جال له: واااااصل، جال له: امال الاربع عيال دولم جم منين جال له: ولاااااااا سألتها
انت عارف؟
وربنا انا متفائلة خير، اصل دي تصاريف ربنا، انت ربنا يديك الصحة وطولة العمر ح تتم تمانين، واحنا وصلنا تمانين مليون
الصدف دي بيقول لك بتبقى فال خير ان شاء الله
يعني مسيرك تحس بينا حضرتك ان شاء الله يعني
هو بالنوسبة لرأيك فينا احنا وصلنا شوية كلام كده كنت قلته لليلى الاحمد الصحفية الكويتية في ساعة صفا، قلت لها : الشعب المصري همه على بطنه وشعب تافه وانا ح اكله منين؟
يعني ممكن تكون قلت الكلام ده في ساعة غضب البيوت ياما مقفولة على بلاوي ومصارين البطن بتتعارك وفي الاخر احنا مالناش الا بعض مش كده؟
بس فيه كام نقطة احب اوضحها لحضرتك
اولا حضرتك احنا مش عايزينك تأكلنا والعياذ بالله، احنا الناس عايزين يشتغلوا ويأكلوا نفسهم لو تسمح يعني
يعني رجال الاعمال اللي طايحين في دين ام البلد دي مش بيعملوا مشاريع عدلة وتنموية تشغل الشباب، بس ياريت تشغل الشباب الجربان اللي هو معظم شباب مصر لامؤاخذة
اصل مش عارفة بلغك وللا لا، رجال الاعمال بيشترطوا خريجين جامعة امريكية، وانه يبقى لائق اجتماعيا
فاكر غير لائق اجتماعيا دي؟ فاكرها؟ اللي اتسببت في انتحار شاب من انبغ واذكى شباب مصر؟
معلش بقى الله يرحمه كان حساس زيادة
ثانيا: هو حضرتك بتسأل تأكلنا منين؟ من المكان اللي بتاكل منه، ماهو واضح ان حضرتك بتاكل كويس ما شاء الله يعني بالهنا والشفا
بس سيادتك تاكل وتعمل الوزن ده كله والناس تجوع؟
ثالثا: ماهو حضرتك عمرك ما ح تأكلنا لان اللي انت مش واخد بالك منه ان احنا، لامؤاخذة، من ضرايبنا اللي بنأكلك، وبنأكل معاك الاسرة الكريمة، وكل طقم الوزراء والوزارات اللي بتتناوب علينا
بالهنا والشفا
طعم الاكل المصري حلو مش كده؟ وللا انتوا مش بتاكلوا من مصر؟
آآآآه صحيح ده الاكل متسرطن، واحنا احرص ما نكون على صحة سعادتك، مش معقولة تاكل من الاكل المتسرطن اللي امثالنا من الجرابيع بياكلوه ده اذا لقوه اصلا
طبعا حضرتك كتر خيرك ويخليك لينا امرت بانهم يوجدوا موارد عشان العلاوة
من تحت قطاقيط الارض، بس حضرتك احنا كان ياما كان عندنا غاز طبيعي بس طار في الهوا شاشي وانت ما تدراشي
يا جدععععععععععععععععع
هلبت اسرائيل دي لو كانت ماسكة علينا صور مخلة بالاداب ما كانتش عملت فينا ده كله، طب حضرتك يعني الوضع ايه دوقت حاليا؟
ده مجرد سؤال بريء يعني
طب حضرتك كمان الناس المحبوسة بقالها خماشر تمناشر سنة على ذمة التحقيق وكل شوية حنفي يخلي سبيلهم ويتعمل لهم امر اعتقال، هلبت دي ناس لها اهل، والاهل دوكهمة قبل ما يناموا وهم حاطين راسهم على المخدة بيقولوا: حسبي الله ونعم الوكيل ربنا ع الظالم والمفتري
هلبت ايه بقى؟ ها؟ ايه؟
على فكرة، طبعا انا مش محتاجة اقول لحضرتك ان ربنا موجود يعني
وللا محتاجة؟
ان شاء الله ما احتاجش ولا حاجة
على فكرة، انت واخد عننا فكرة وحشة والله، احنا مش وحشين زي ما انت فاكر يعني، ده احنا امرا وطيبين
واذا كان جمال بيه بيتضايق من ريحتنا فهلبت حضرتك لزمن وحتمن تفهمه ان تسعين في المية من سكان العشوائيات مش بيوصلهم مية وسكان العشوائيات دولت يبقوا خمسين في المية من سكان مصر، وبما ان جركن المية باربعة جنيه فالناس يادوبك بتشرب ومافيش رفاهية انها تستحمى
هو ده يعني السبب في الريحة اللي مضايقة جمال بيه، هو باين عليه انه متضايق منها قوي، كل ما يكلمنا يكرمش مناخيره كده ويقلب شفته الظاهر الريحة واصلاه وللا حاجة
انما احنا في العموم ناس كويسة وربنا، صحيح انت بتحب بلد الاكصلانصات، بس الاكصلانصات دول وجع دماغ
ح يقعدوا يتكلموا عن الفساد الاداري، ويتكلموا عن تداول السلطة، والانتخاب النزيه، والحرية، والديمقراطية وكلام قبيح كتير من دهوت اللي انت عارفه انما احنا ناس كويسة
احنا كلنا، كلنا، مسلمين ومسيحيين مؤمنين جدا بحديث الرسول صلى الله عليه وسلم: من بات آمنا في سربه، معافا في بدنه، يجد قوت يومه فقد حيزت له الدنيا بحذافيرها
بس ده اللي عايزينه، هي مطالب صعبة شوية؟
عشان موضوع آمنا في سربه ده ح يخلي حضرة البشوات الظباط والبهوات امناء الشوربة اسم الله ما يوقفوش الناس في الشارع
وما ينصبوش اللجان في الطريق عمال على بطال وما يطلبوش الرخص والبطاقات وطبعا الايد البطالة نجسة
وموضوع معافا في بدنه ده مستحيل مع الهرمونات اللي في الفراخ والخضار المتسرطن ومستشفيات الدولة اللي مافيهاش غير الريفو وقانون التأمين الصحي الجديد
ويجد قوت يومه ده تهريج ده اللي احنا بنطلبه، قوت ايه؟ الرغيفين ونص اللي الضاكتور نظيف امر لنا بيهم مش ممكن حد يلاقيهم
بس مش لازم عيش، ممكن ياكلوا بقسماط، ياكلوا حلاوة يا كلوا جاتوه ياكلوا كل اللي يحبوه
وطبعا القوت لازم له مية، والمية عند مصلحة المياه، والمصلحة عايزة نجار والنجار عايز بيضا والبيضا عند الفرخة
اممممممممممم طب دي طلبات الدنيا بحذافيرها
واحنا عايزين ايه من الدنيا؟ الدنيا فانية، وما دايم الا وجه الله
على رأيك كفاية علينا الآخرة
بس والنبي، والنبي، ومن نبى النبي نبي، اصرف للسادة الوزراء طيارات هالوكوبطر
اصل العلاوة اللي حضرتك اديتها لنا ح تتشفط في التأخيرات اللي ح تتحسب علينا واحنا واقفين على الكوبري مستنيين معاليه وسعادته وفخامته وكمالته وحلاوته وطعامته لما يعدوا كلهم
كل سنة وانت طيب كمان مرة

ودايما البنات اجدع من الصبيان

رانيا راشد بعتت لي البانرات دي ودايما كده البنات بتنجز اسرع واجدع من الصبيان والرجالة دايما بيقوموا بدور عبد السلام النابلسي في فيلم شارع الحب: انا ح اشرف عليكوا
ياريت تنجزوا كده وتورونا الفن التشكيكي اللي على اصله لو سمحتوا
ملحوظة بس عشان ما ابقاش ظلمت كل الرجالة البانرين اللي على الجنب دول عبده البرماوي اللي صممهم
ياريت اللي يدخل لي هنا ما يدخلش بايده فاضية، يعني التوقيعات اغلبها بنات، والبانرات البنات اللي بتعملها
اهي بانت لبتها يا تسكتوا بقى خالص ايها الصياديون يا تعملوا لكوا همة شوية

البانرات يا عم الكوتكوت انت وهو

ولا الحوجة، ومش عايزة تريقة وقلة ادب دي اول بانرات اعملها في حياتي
تاخدوها زي الشاطرين كده من غير الاطة وتعلقوها عندشيكوا في المدودات
لحد ماحد يعمل بانرات تانية

اسماء المحامين المتطوعين للدفاع عن البشريات

استوحياطا ليوم اربعة مايو ماحدش ضامن عمره
محمد اسماعيل 0108294435
أحمد رضا طلبة 0105702704
محمد صلاح نصاري 0161444874
سيد فتحي 0122308443
أحمد صابر احمد ابو عيش 0124951656
احمد الزيني 0123818827
عصام سعيد محمد 0121955760
مجموعة المساعدة القانونية لحقوق الانسان
مكتب: 25778688
فاكس: 25778722
اشرف الدعدع : 0125107410
احمد عزت محمد : 0103978913
محمد اللق : 0101934456
0126182618
علي سليمان : 0122473016
وليد خيري: 0107078482
طارق رمضان: 0187060341
سيدة عبد الفتاح: 0106812203
وفاء المصري: 0106708404
الى جانب المحامين اللي كانوا متطوعين المرة اللي فاتت وارقامهم على البوست ده

ما باعرفش اعمل بانرات

بس الجيش بيقول لك اتصرف
اللي يقدر يعمل تعديلات على البانر يعمله
انا خ ادوس بقى في بقية الاسماء

فين ام البانرات؟؟؟

اسماء المحتجزين على البوست ده

عايزين بانرات باسمائهم
والتوقيعات كمان عشان البلاغ على نفس البوست
يا تعملوا لينك يا تبعتوا البانرات على الميل ده

nawaranegm@yahoo.com
اخلصوا انا نازلة هشام مبارك دلوقت

ربنا يعدي اربعة مايو على خير ان شاء الله

باذن الله، وينجح فيه واحد دخل لي وقال لي سواء نجح وللا ما نجحش نعمل اضراب ورا التاني ع السخن كده
انا موافقة
ايه رأيكوا في خمستاشر مايو ذكرى النكبة؟
عموما ده كلام سابق لاوانة ان شاء الله ح يبان يوم اربعة مايو
ما تنسوش توقعوا في البوست اللي فات بالاسم ورقم البطاقة وانا مش بانزل التوقيعات على المدونة انا عاملة مودريشن وح اوديها هشام مبارك
عشان نكمل الحدوتة
:)
مافيش حواديت لو ما مضيتوش

اسماء المحتجزين عايزين بانرات

تحديث:
عملت مودريشن عشان اللي عايز يكتب اسمه ورقم بطاقته ما يضطرش ان كل البشريات يشوفوا اسمه ورقم بطاقته وان شاء الله على بكرة العصر ح اخد الاسماء واروح بيها هشام مبارك

انا جبت اسماء المحتجزين من على الحيطة بتاعة هشام مبارك لان الاسماء موجودة مفرطة على الموقع متهيالي الاسماء واضحة انا شايفاها بس لو مش واضحة اضغط على الصورة تقوم الاسماء توضح اكتر
عايزين يتعمل بانرات باسماء المحتجزين النهاردة اعتقل حسام شحاتة ومدحت شاكر ح تلاقوا التفاصيل على موقع هشام مبارك
----
بالنسبة للبلاغ للنائب العام خالد علي ما رضيش اننا نقدمه يوم اربعة مايو، بصراحة لهم حق هم اللي بيلبسوا، قال لي قدموها قبلها بيوم اللي هو يوم السبت عشان ح يبقوا بيتعرضوا على النيابة
طبعا هم في هشام مبارك اللي بيكتبوا البيان واحنا نمضي عليه وملخص البلاغ اننا طالبين الافراج عن كلهم
اللي عايز يوقع يكتب في التعليقات اسمه ورقم بطاقته وانا ح اخدها بكرة لهشام مبارك واديها لهم
وممكن لو هم ح يقدموها يوم تلاتة مايو يبقى نروح معاهم
-----
الاخوان مشاركين معانا في الاضراب
الحمد لله انتصرت الاصوات الشابة النضيفة
على فكرة منعم واحمد عبد الفتاح اجدع ناس
وطبعا محمد عبد القدوس والميكروفون
---
شدوا حيلكوا يا شباب عايزين بانرات بسرعة وتنزلوها على المدونات وتبعتولي اللنك انزل انا كمان البانرات وتوزعوها على الفيس بوك
اسكتوا اسكتوا مش روز اليوسف بتقول على بتوع الفيس بوك كل دماغهم في قلة الادب والجنس
يا حلاوة يا ولااااااد عشنا وبقينا منحرفين اللهم لك الحمد ولك الشكر يا رب
----
مش معنى كده ان الحدوتة انتهت
ده بس فاصل ونعود
------
اه ودي اسماء المحتجزين في برج العرب
كمال محمد السيد الفيومي - عامل
عبد الكريم علي البحيري عبد الكريم - عامل
اللي هو كريم البحيري
طارق عبد الحميد امين - عامل
اللي هو طارق السنوسي
ابراهيم الزغبي - اهالي
احمد محمد احمد - حارس امن
ابراهيم اليمني - طبيب
عبد الحليم احمد - عامل
وكلهم من غزل المحلة
شدوا حيلكوا انا لسة مش شايفة بنرات ولا حاجة

حدوتة ملتوتة3

قبل ما نكمل الحكاية، ارجو من الاخوة الاعضاء الوضع في الاعتبار اني واحدة تافهة وسطحية وعندي ارتداد للطفولة فياريت ما يحملوش الحدوتة بتاعتي اكتر مما تحتمل، نكمل بقى
وبعدييييييييييييييييييييييييين
يا سيدي لما انت، فوجئ اولاد ناسنا بيه وهو شايل الكنز وبيتقدم للساحة وبيحط الكنز ما بين ايدين الغول، الغول ضحك ضحكته وقال له انت فاكر بعد كل اللي حصل ح ترجع لي الكنز وارجع لك مراتك وخلاص؟ ناسنا قال له لا، انا عارف انك عايزني انا، انا باترجاك تديني عهد انك تسيب ولادي وتطلق سراح مراتي وتاخد روحي بدالهم
الغول بص باندهاش وكل جيشه بقى يبص لبعضه اما اولاده فزعقوا بتقول ايه يا ابونا، التفت لهم ناسنا وقال لهم انا كبرت ومافيش حاجة تخليني اتمسك بالحياة خصوصا اني ربيتكوا احسن تربية وانا عارف الغول عايز ايه، وراح حاطط راسه على صندوق الكنز وقال للغول تقدر تقطع رقبتي على شرط تديني العهد، بص له الغول بابتسامة صفرا وقال له: لك العهد. والغول بيرفع السيف صرخ اسطلبان ابن ناسنا وجري عليه وقال له يا ابويا تعالى نحارب وننتصر لكن ناسنا بص على اولاد الغول وقال لاسطلبان يابني احنا بننتصر في ارض محايدة اما ارضهم الملعونة فبتعوقنا من النصر وانا كنت عارف ان اليوم ده جاي بسبب الكنز الملعون وخفض راسه وراح الغول مطير راسه والدم طرطش على وش اسطلبان اللي بكى وصرخ وجري معاه لاسيوش وهو بيبكي على ابوه ومن وراهم كل ولاد ناسنا
وهم بيبكوا ابوهم وقائدهم فوجئوا باولاد الغول وهم بيقبضوا عليهم صرخ لاسيوش: العهد يا غول، ضحك الغول ضحكة مدوية وقال: ابوك مخلول، حد يعمل عهد مع غول؟
اتسلسل اولاد ناسنا قدام الغول وقال لهم ح تعيشوا اسرى وعبيد وعمركم ما ح تشوفوا النور واخدوهم اولاد الغول في قبو وهم متسلسلين وحطوهم في قبو مظلم وفي الليل ياخدوهم يشغلوهم عبيد يشيلوا حجر يبنوا بيه قلعة للمولود الجديد اللي الغول مستنيه
تمثل الغول في صورة عابر سبيل وجري على المدينة ونقل للامهات الاخبار ونصحهم بان كل واحدة عايزة ابنها تروح تترجى الغول وتناشده بالعهد اللي بينه وبين ناسنا
راحت تينفاش اول واحدة للغول وركعت بين ايديه وبكت وقالت له ابني، قال لها لو عايزة ابنك لازم تباتي معايا الليلة دي وتوهبيني نفسك
تينفاش فزعت وبعدين فكرت وقالت، لا زوج ولا ابن، اعمل ايه؟ وبعدين قبلت انها تقضي الليلة مع الغول، في الصباح الغول ضحك ضحكته وقال لتينفاش انها حامل وانه مش ح يديها ابنها الا لما تولد جنينه وابنه قصاد ابنها واخدها ولاده وحبسوها في الجب مع ليمسار اول ما اتقابلت ليمسار وتينفاش كان بينهم دموع واستسماح وكل واحدة بكت على كتف التانية وطلبت الصفح من اختها
بقية نساء القرية قلقوا على تينفاش اللي اتأخرت كتير، فراحت وراها نصشاع، وحصل معاها نفس اللي حصل مع تينفاش، وست ورا ست، لحد ما بقي مجموعة صغيرة من النساء، فقالوا هو ليه كل واحدة بتروح مش بترجع، تطوعت واحدة انها تروح فقالت واحدة تانية عاقلة مش ممكن اي واحدة تروح فرداني ابدا، لازم نروح مجموع عشان نحمي بعض، الستات استحلوا الفكرة وراحوا بالدروع والسيوف ووقفوا برة الكهف وطلبوا الغول، كانت هسناد شجاعة وقوية قالت للنساء نقتل الغول، لو واخد اولادنا ونساءنا ح يخرجوا لما هو يموت ولو كان قتلهم يبقى انتقمنا منه، لكن نعسروك قالت لهم العقل يا نساء، لو قتلناه وهو حاجز نساءنا واولادنا عمرنا ما ح نعرف هو فين والسر ح يموت معاه ويمكن نعرض نفسنا لانتقام اولاده، هسناد قالت اولاده مالهمش قوة غير بيه، المهم حصلت ما بينهم خلاف وصوتهم علي، وكل واحدة فيهم بقت تعاير التانية وحصل الانقسام لحد ما سمعهم الغول وخرج لهم وهم بيتخانقوا مع بعض فسكتوا وبصوا له ضحك الغول وقال لهم انا كنت مستنيكوا من زمان، اتفضلوا، لكن هسناد قالت لا مش ح نخش طلع لنا نساءنا واولادنا والا دبحناك زي البعير واشهرت سيفها لكن بقية النساء ما اشهروش سيفهم فضحك الغول وقال كلهم ضدك يا هنساد، مش تعقلي كده؟ وهجم عليها اولاده وهي شاهرة السيف وحدها صرخت وصرخ النساء وابتدوا يحاولوا يشهروا السيوف لكن كان بقية اولاده بيقبضوا عليهم واحدة واحدة والغول يضحك ويقول: الجيش ما يعدش عتاده قدام العدو يا نساء جهلة
وقام اولاد الغول وكتفوهم ومكنوا الغول منهم يغتصب كل واحدة فيهم وهم يصرخوا، وبعدين رموهم في الجب مع بقية النساء ومعاهم الخادمة اللي وشها ممسوح، شعرها على قمة راسها، وقفاها ووشها ممسوحين مافيش فرق بينهم، ووشها شبه ضهرها، تشوفها ما تعرفش جاية وللا رايحة، تترجاها النساء وهي لا تجيب، تحط قدامهم الطعام والشراب، وكل ما واحدة فيهم تبان عليها مصيبتها وتحاول تتخلص من الجنين تكتفها وتقيدها لحد ما حان معاد الميلاد
وقفت مجموعة من الخادمات اللي شبه الخادمة ام وش ممسوح وفتحوا في الجدار باب ودخلوا اول واحدة ليسمار عشان تولد، ويوم ورا يوم كل واحدة يحين معاد ميلادها، تولد جنينها ويخدروها الخادمات ويعطوا الطفل للغول، الغول يحمل ابنه ويضحك يضحك ويرفعه لفوق، ويسقيه من عين الشر، يقوم فجأة الطفل الرضيع يكبر ويبقى راجل كبير، كل واحد من المولودين الجدد يشبه اخوه لامه في الشكل لكن في الجوهر هو ابن الغول وزي الغول، واحب اولاد الغول اليه كان ابن ليسمار: تملوع، لما فاقت الامهات كل واحدة فيهم بحثت عن مولودها فجالهم صوت من تحت الارض شبه الفحيح بيقول: ابكين بالدم يا مكلومات كل مولود ليكم مات
صرخن الامهات، لكن هنساد قالت بدل ما تحمدوا خالق الاكوان اننا تخلصنا من الاجنة الحرام؟ احنا لازم نبحث عن اولادنا فين اولادنا الحقيقيين
ليسمار قالت: بس ده جنيني اللي حملته في احشائي، هنساد قالت لها: ده مش ابنك، ده نبتة شيطان اتزرعت غصب عنك
بعد البكا والنواح فتحت الخادمات الابواب والشمس شعاعها تسرب الى القبو، النساء وقفن مبهوتات، هنساد قالت: مستنيين ايه ياللا نخرج
لكن النساء كانوا خايفين من طول مدة الحبس، خايفين يخرجوا وخايفين يستنوا، هنساد كمان رغم شجاعتها الا انها كانت خايفة تخرج لوحدها كانت بتستحث النساء انهن يخرجن معاها قربت من طاقة النور لقت اقدام شبان رفعت بصرها لقت ابنها واولاد النساء صرخت من الفرحة: اولادنا اولادنا وخرجت من القبو تجري واترمت في حضن ابنها اسطلبان بصت وراها امرأة في شجاعتها وهي نصشاع ام لاسيوش وجريت حضنت ابنها وخرج النساء كلهن وحضنوا اولادهم ما بين الفرح والدموع
وهتفت نصشاع ياللا نهرب ونرجع مديتنا
لكن ابن ليسمار وقف على تبة الجبل وقال كلام....ادهش الجميع
وخلا عقول النساء في حيرة
يتبع
الللللللللللللللل لسة فاضل حلقة واحدة بس
على فكرة وانا باقراها تاني لقيت اسم اسطلبان، طبعا مش محتاجة اوضح ان مافيش اي رمزية لها علاقة بطلبان وافغانستان يعني
:))
الاسم زي ما بيطلع معايا بالخبط شوية حروف ويطلع زي ما يطلع

حدوتة ملتوتة2

وبعدين

بقى يا سادة يا كرام ولاد ناسنا دول كانوا شباب يفرح القلب كل واحد فيهم زي التانيين وفي نفس الوقت فيه حاجة مخصوص تميزه عن الباقيين وما تقدرش تقول مين فيهم احسن من التاني، ولانهم اولاد ضراير كانت كل ام تتباهى بابنها على بقية الستات وكان بيحصل بينهم كتير صراعات، لكن ناسنا كان دايما يهدي الخلافات اللي بينهم ويقول لهم انهم مالهمش غير بعض والحقيقة هم كانوا بيبقوا يد واحدة في المعارك

صحيو الصبح وكل شاب فيهم طالع يتباهى بجماله وقوته وام كل واحد فيهم ماشية وراه وفجأة خرج عليهم لاتيبك ابن ليسمار وهو بيصرخ وبيقول امي اتخطفت مش لاقي امي، فزع ناسنا وبان عليه الرعب وجري في كل المدينة يدور ومعاه ولاده لحد ما صرخت تنفاش وهي بتبكي وتقول سامحوني سامحوني انا السبب انا اديتها للغول نزل عليهم الخبر زي السهم ما ينفذ في القلب كملت تنفاش وهي بتبكي وتقول الغيرة اكلت قلبي ودلوقت انا ملعونة

ناسنا بص لولاده وقال لهم لازم نروح لحد كهف الغول ونحاربه عشان نخلص ليسمار منه

كانوا بيحشدوا الجيوش في لحظة ما الغول كان بيتأمل جمال ليسمار وهي لسة نايمة واول ما فتحت عينيها صرخت من الرعب وبكت واترجته يرجعها لجوزها وابنها ومدينتها لكن الغول بكى على اقدامها واترجاها تفضل معاه لانه حبها ووعدها انه يخليها اسعد نساء العالم لكن ليسمار اصرت وقالت له انها ح تهرب وبالفعل حاولت تجري وكان بيطاردها اولاد الغول لحد ما واحد فيهم مسكها وكان ح يقتلها لكن الغول صرخ فيه وقال له ما تقتلهاش ليسمار دلوقت حامل مني صرخت ليسمار لكن الغول قال لها ان ده ح يبقى احب اولاده لانه ثمرة حبه ليها وانه كان يتمنى انها تحبه زي ما هو بيحبها وامر اولاده انهم ياخدوها بمنتهى الادب والرفق ويحبسوها في قلعة الظلام لحد ما تولد ابنه اللي ح يسميه تملوع

حمل اولاده ليسمار وهي بتقاوم وتبكي وتندب حظها وتلوم نفسها على طمعها وطلعوا بيها فوق الجبل وحبسوها في قلعة الظلام وهم فوق شافوا جيش ناسنا وهو قادم عشان ينقذ ليسمار، حبسوا ليسمار في القلعة جوة جب وقفلوا عليها مع خادمة وشها ممسوح مافيهوش ولا ملمح ومش بتقدر تتكلم بس تقدم لها الاكل والشرب وترعاها لحد ما تولد ونزلوا بسرعة لابوهم الغول وقالوا له على خبر جيش ناسنا

الغول زعق زعقته ولبس درعه وصرخ في اولاده وهو بيضحك ضحكة شريرة: جه اليوم اللي ح نقدر نخلص فيه من ناسنا

وقال لاولاده في المعركة اوعوا حد يقرب من ناسنا...ناسنا ده انا الوحيد اللي ابارزه، ويا اما اقتله يا اما يقتلني

خرج الغول بجيشه ووقفوا يستنوا جيش ناسنا لحد ما وصل الجيش ووقف في مواجهة جيش الغول

بص ناسنا لقى الغيلان معاهم اسلحة فتاكة وبص لولاده وخاف عليهم من القتل ففكر في فكرة

يتبع......

لسة فيه كمالة