بخصوص رئاسة تحرير ابراهيم عيسى للكرامة مكان الاستاذ عزازي

 تحديث:
ده بيان حزب الكرامة عن الموضوع اللي حصل
اللي هو مش موضوع اساسا.. 
-------------

التعليق الوحيد للي حصل من اول امبارح بداية من برنامج القرموطي، مرورا ببيان الاستاذ عزازي - وهو شخص كلنا بنحبه وبنحترمه واولنا ابراهيم عيسى - وانتهاء بتقديم الاستاذ عزازي لاستقالته.... كل ده وماحدش لحد دلوقت من الصحافة فكر يتصل بابراهيم عيسى، ولا ابراهيم منصور، ولا اي حد من المغامرين الخمسة، بالرغم من ان المغامرين الخمسة مصدر معلومات اول واي حاجة جديدة بتحصل ابراهيم عيسى بيوافيهم بيها، التعليق الوحيد المناسب هو الآتي:

واحد ماشي الساعة تلاتة الصبح على الطريق الصحراوي قام العجلة نامت، نزل، بص حواليه لقى فيلا بعيدة، مشي ناحية الفيلا وهو عمال يفكر في نفسه: دلوقت اروح اخبط على الفيلا دي، حيفتح لي راجل بالبيجامة، والنوم في عينيه، وحيقول لي: عايز ايه، حاقول له مساء الخير حيقول لي قول صباح الخير، اقول له انا اسف على الازعاج، يقول لي لو كنت اسف ما كنتش خبطت على الناس في ساعة زي دي، حاقول له اصل العجلة بتاعتي نامت، حيقول لي نعم يا روح امك؟ حاقول له اصل مافيش حواليا... حيروح مزعق ويقول لي: اما انك حيوان صحيح، دي فيلا يا افندي، بيت، مش محل بتاع كاوتش، انا مال امي عجلتك نامت؟ حاعمل لك ايه؟ ده وقت تخبط فيه على الناس؟ مش عارف حتى تشيل معاك استبن مدام مسافر متأخر كده؟ وتخبط على الناس في وقت متأخر زي ده؟ ايش عرفني انك مش حرامي؟ قتال قتلا؟ نصاب؟

وهو بيفكر كده راح حاطط ايده على الجرس راح فاتح له راجل بالبيجامة والنوم في عينيه وبيقول له: عايز ايه؟

راح صاحبنا قال له: مش عايز من وش امك حاجة.. ينعل ابو شكلك

--------------------

ويالا بقى.. كل واحد عمل باي باي من بعيد لابراهيم عيسى بقى متربي معاه، وكل واحد نشروا له رسالة في بريد القراء بقى: كنت باشتغل في الدستور زمان وعارف الجو هناك من جوة شكله ايه، وكل واحد عمال يفتي ويألف

لو فيه حاجة، حتتنشر في موقع الدستور

وقبل ما تتنشر في موقع الدستور حيعرفها اصحاب الشأن على الاقل، ولا حتى حيبقوا سامعين بيها

هو جابر القرموطي ده مش عارف يتصل باي حد من الدستور؟ اي عيل صغير كان حيدله

ده ايه القرف ده ياربي، هو فيه كده في الدنيا يعني؟ يعني الناس مطعونة في كرامتها، ومرفوتة من شغلها، وفيهم اللي نايم في الشارع، وكل يوم والتاني شغلتهم في الحياة انهم ينفوا: والله ما اخدنا فلوس، والله ما سعينا للبيع، والله ما عملنا صفقة سرية، والله دفعت الحساب بتاع العشا اللي كان فيه رضا ادوارد، والله ما تهربنا من الضرايب، والله ما اشتغلت في الحياة، والله ما حاكتب في الوفد، والله والله والله

طب والله ماهو معلق بقى على الموضوع ده