اشمعنى طلعت السادات اتحبس؟

ماحدش متغاظ من بيان المية وخمسين نائب بتوع الحزب الوطني غيري، هم مش متغاظين لانه عارفين انه كلام فض مجالس ومالوش اي قيمة، لان التلويح الجاد بالحرب او اعلان الحرب ده اختصاص القائد الاعلى للقوات المسلحة او ينوب عنه وزير الدفاع، اي حد يقول اي كلام تاني يبقى بيخرف. وانا بقى متغاظة لنفس السبب اللي هم مش متغاظين عشانه

انا باحترم الجيش المصري وباحبه ومش ح تصدقوا اني لما باشوف ظابط جيش مصري في الشارع باقف عشان اعديه، سواق ماشية على رجليا او سايقة عربية ولولا الملامة كنت وقفت اديت التحية العسكرية، بس باخاف الناس تقول عليا مجنونة، طيب ده مش تطاول على الجيش المصري؟ مين احمد عز والكام نائب دول عشان يتطاولوا على المؤسسة العسكرية ويتكلموا نيابة عنها في حاجة مش اختصاصهم؟ طلعت السادات كان نائب وله حصانة ولما اتكلم عن المؤسسة العسكرية اتحبس، وانا بصراحة ما كنتش متعاطفة معاه، لاني مؤمنة فعلا انه لا يجوز التطاول على المؤسسة العسكرية، مش كل الدول بتعمل كده، بس احنا في مصر لنا تقليد وهو احترام المؤسسة دي وعدم المساس بها

طيب كمان المية وخمسين نائب دول هددوا بضربات عسكرية وماحدش فيهم عسكري اساسا ناهيك عن انهم تجاوزوا القائد الاعلى للقوات المسلحة ووزير الدفاع، ازاي يتجرأوا يعملوا كده؟ ده تطاول، مافيش حاجة اسمها فض مجالس فيما يخص الجيش، الجيش المصري له احترامه وقدسيته، يفضوا مجالس في اي حاجة لكن فيه خطوط حمرا، هي ما سابتش للدرجة دي يعني

اذا كان الكلام جاد، وده مستحيل طبعا لان الجيش مش ممكن ح يسيبنا نعرف حاجة زي من ناس مالهمش صفة، يبقى المسئولين العسكريين بس هم اللي يبلغونا بحاجة زي دي، واذا كان هلس وتهديد وفض مجالس، ودي الحقيقة، يبقى عيب عيب عيب، وغلط، وخطر، وتجاوز، وتطاول، الجيش المصري مش لعبة عشان يهرجوا فيه، انا متعلمة كده في كتاب التربية القومية اللي كنا بناخده، ايه؟ دي كمان علموها لنا غلط؟ 

علمونا في المدرسة ان اسرائيل عدوة وكانوا بيدونا في دروس القراءة حاجات عن ابطال حرب اكتوبر، وطلع غلط، علمونا ان فلسطين دي بتاعة مصر ومصر بتاعة فلسطين وماحدش لفلسطين غير مصر، وطلعت دي غلط، علمونا ان كلنا مصريين ومافيش فرق بين مسلم ومسيحي، وطلعت دي غلط، علمونا ان مصر دولة عربية، وطلعت دي غلط، بس لا، كله الا الجيش، لا، لا، لا، انا متمسكة بقدسية المؤسسة العسكرية اللي بتحمينا وبتنقذنا في السيول وبتأكلنا العيش لما نقص كمان من السوق، ماحدش يهوب ناحية الجيش

والمية خمسين نائب دول لازم يتعاقبوا على جرأتهم على الجيش