عدنا

لسه راجعة من مجلس الدولة، فيه بنات كتير حضرت، وفرحت لما عرفت ان فيهم ناس جات من المدونة، وفيه اجانب كتير حضروا، ووقعوا بارقام جوازات سفرهم

مالك عادلي قال لي ممكن يوكلوا في القضية دي لان ده قانون دولي مختصة بيه كل محاكم العالم

بس انا حسيت احساس واحدة جاي لها عريس وصاحبتها اللي احلى منها بكتير فرحانة لها قوي وجاية بنفسها وجايبة تايير وح تساعدها في المكياج.. وطبعا ح تقعد معاهم هي والعريس، امال ح يحبسوها في المطبخ؟ وامها تقول لها:"برضه احسن خليها تقعد معاكوا اصلها متكلمة وانت لخمة وبتتكسفي" وما تقدرش بقى تطرد صاحبتها اللي فرحانة وعمالة تبوس فيها ولا تقول لها ان الود ودها ترميها من الشباك

وباكرر، البنات كانوا كتير قوي، وفيه رجالة، بس من القدام بقى، اه، وشفت اتنين شباب الشهادة لله عشان ما ابقاش باظلم اللي في العشرينات والتلاتينات يعني، واجانب كتيييييييييييييييييير

وايفون ريدلي الصحفية اللي طالبان خطفتها وقعدت تدلع فيها لحد ما اسلمت من كتر ما بيعاملوها كويس، لسه بتحب طالبان، قالت ان طالبان احسن من الامن المصري اللي ضرب زميلتها وكسر مناخيرها ووقعها لها سنتين، وقالت ان الامن المصري كان عايز يمشيها من مصر، وقالت ان السفارة الامريكية قفلت ابوابها وقالت للمواطنين بتوعها انتوا ح تفقدوا كل حقوقكم كمواطنين امريكان لو ما بطلتوش اللي بتعملوه ده

وقالت ان مافيش سفارة طلعت جدعة غير السفارة الفرنسية بس، والباقيين باعوهم، طب الحمد لله، ده احنا طلعنا دولة متقدمة وبتتصرف زي السفارات المتقدمة بالظبط

حتى ايفون ريدلي بتقول طالبان احسن من الامن المصري

هيييييييييييييييه كتر خيرهم الجزائريين اللي ح يشجعونا في ماتش نيجريا، اهم جبروا بخاطرنا شوية وسط ما كل الناس عمالة تدينا بالقفا حتى صاحبتنا اللي جاية تقف جنبنا ح تقعد مع العريس، والله الجزائريين دول عندهم اصل مع اننا عملنا معاهم زي ما اطاطا عملت مع طلعت زكريا بالظبط لما عوكل رجع لها مغلوب

عشان تعرفوا اني كان عندي بعد نظر لما سميته عوكل...اااه يا عوكل، ياللي نصفتني في الحارة، يا مسيطني