Saturday 14 November 2009

ح يدوا للعيبة شقق

يعني بدل ما عبد المنعم يدوخ السبع دوخات على المحافظة بقاله سنتين اخده من ايده كده واشغله لعيب كورة
ياخد له شقة نضيفة بدل رميته في الشارع وياخد اتنين مليون زي اللي ح ياخدهم كل لاعب، وح يفتح بيهم ييجي عشر اكشاك سجاير بقى في الزمالك وللا حاجة ويهيص
طب مش كنتوا تقولوا؟
مرة شوبير طلع في التلفزيون وقال: يعني انا لما احب اطلع ابني، اطلعه ايه؟ دكتور؟ مهندس؟ طبعا لا، اطلعه لعيب كورة عشان اضمن مستقبله
على رأيك، ماهو رجال الاعمال بيسرقوا الشعب، وياخدوا الفلوس اللي سرقوها من الشعب يدفعوا منها شوية للعيبة الكورة عشان يلهوا الشعب عن انه اتسرق اصلا، والشعب مبسوط، والله ما شفت ذرة حقد على الملايين اللي نازلة ترف على اللعيبة، طيب انا مزعلة نفسي ليه دلوقت؟ ابوها راضي وانا راضي، مالي انا بقى يا رخمة
فلوسهم وراضيين تتسرق وتتدفع للعيبة الكورة، شققهم وراضيين يناموا في الشارع ويسكن فيها لعيبة الكورة
اما انا بني ادمة غلسة صحيح، هو انا كان حد اشتكى لي؟
اه.. اشتكوا لي كتير، اشتكوا وبكلام يلين الحجر ويمشيني اكلم نفسي في الشارع.. بس على الله اسمع حد فيهم بيشتكي تاني، بعد ما شفت واحد مرتبه ربعميت جنيه بيستلف ميتين جنيه عشان يحضر الماتش ويقول لي عشان مصر، على الله اسمع حسه بيفتح بقه، ح اديله عليه بمضرب الدبان، يروح ياخد حقه من لعيبة الكورة ويحل عني ويبطل يوجع قلبي انا واقعد طول الليل اتقلب وافكر ح يعمل ايه؟ ما انشالله عنه ما عمل حاجة، عمله اسود
-----
ملحوظة: نجيب عبد الفتاح اسماعيل خرج الحمد لله من السجن بعد حبس ستاشر سنة على ذمة التحقيق
وبهاذوها المناسبة اهديكوا الاغنية دي


14 comments:

محمد خيري said...

القدس تصرخ والمحارم دُنست*بطش اليهود على القطاع شنيعُ.
لا يرقبون بمؤمن إلا لهم*في كل قطر مركب ومطيعُ.
وحماتنا مستيقظون سلاحهم *شجب وغصن شوكه التشنيعُ.
وحمامة ترمي السلام قذيفة*وتعود يرفع رأسها التطبيعُ.
وإذاعة كالبرق في إرسالها*تحكي لنا وعلى الهواء تذيعُ.
وتبشر الأطفال ألا تحزنوا*سيغيثكم بث به التقريعُ.
ومفاوضون معاندون كلامه*مفوق الموائد مؤلم وفظيعُ.
ومناضل قص الشريط بقوةٍ*فإذا البوار على يديه بقيعُ .
وحماسة بالليل تلهب عزمنا*حتى إذا طلع النهار تميعُ.
والفارس الوضاء في ساح الهوى*بطل همام مقبل وشجيعُ.
يغزو القلوب برمش عين ساحرٍ*ويسير هونا والأسير تبيعُ.
وفريقنا المغوار عند هجومه*هز الشباك فهزه التشجيعُ.
واسترجع الأبطال أمجاد الألى*وأتوا بكأس زانه الترصيعُ.
من للثكالى في ميادين الوغى؟*إن الجهاد فريضة فأطيعوا

للشاعر حسام خليل

the magnificent ninja said...

اقرأوا دي يا جماعة
___________________________________

حبيب قلبى تهامى باشا .. عمي و عم الانتاج السينمائي في مصر

تعال يا وديع

جايب لك فيلم يا باشا هايكسر الدنيا ..

فريق رايح يلعب مع الجزائر فى عنابه ولازم يكسب عشان يروح كاس العالم وفى نفس الوقت السنغال بتلاعب ناميبيا فى ويندهوك ولازم ماتكسبش

اسمه ايه الفريق ده يا وديع

الفراعنه يا باشا ..

وده هايلعب فيه مين يا وديع (حورس ولا توت عنخ امون) ؟

لا يا باشا ده لقب ..

يعنى انا على كده يبقى لقبى ايه يا وديع .. هازم الحيثييين ولا مكتسح الهكسوس .. اخلص يا وديع وقول انك بتتكلم عن مصر

استنى بس يا باشا شوف المشهد ده ..

(الماتش فى اخر دقيقه تعادل والسنغال خلصت ماتشها واخنا مزنوقين فى جون واحد عشان نكسب
وهوووب ييجى عبد الستار صبرى يشوط واحده زى بتاعت رضا عبد العال فى جمهورية شبين ونكسب ونروح كاس العا ....

ودييييييييييييييع ..

الفراعنه مايروحوش كاس العالم يا وديع .. الفراعنه اخرهم يكسبوا كاس العالم العسكريه يا وديع

خد .. اكسب ده

......

فى السنه اللى خرجنا فيها من كاس العالم 2002 خدنا كاس العالم العسكريه

كاس العالم العسكريه ... بطوله هدافها عبدالحميد بسيونى .. واحسن لاعب فيها محمد القط ..

كاس العالم العسكريه .... البطوله الوحيده اللى بنعرف نروحها ونكسبها كمان

كاس العالم العسكريه ( ماتشات عربى ........... أم الاجنبى)

Anonymous said...

هههههههههه

ما هو دي موش بلد عبد المنعم ولا دي ايامه خاااااااااالص

تحياتي

أبو عمر - الصارم الحاسم said...

مهزلة فعلا

ان بطولة كاس العالم لكرة القدم اللي ناخدها هي كاس العالم العسكرية

لان جيوش العالم مشغولة بأشياء اهم من لعب الكرة...كل جيش مشغول بوظيفته

او تقدر تقول في عهد مبارك هو ده اللي فلح فيه جيشنا

بهيج الشرير said...

سولوفيكيا ا
أمريكا ٠
وأمريكا ناوية تحتلها لو الماتش خلص بالنتيجة دي علشان الجون جه من بلنتي، ربنا يستر إحنا لسه في الهاف تايم

AmmAr said...

واحد جزائري :
غزة تمثلها الجزائر نهدي فوزنا على مصر لفلسطين واباء غزة المحاصرة ، فوز الجزائر على مصر هو كسر الحصارعلى غزة

mido said...

the magnificent ninja

رائع


سيناريو اعلان لميلودى افلام ميخرش المية

بهيج الشرير said...

الماتش خلص وسولوفيكيا كسبت أمريكا ا - ٠، وناس بتقول إن ده علشان الأمريكان أكلوا كسكسي سولوفيكي قبل الماتش

بهيج الشرير said...

الفريق السولوفيكي يهدي الفوز لعوكل ملك الفياجرا وقاهر الهكسوس، وشادية دلوقتي بتغني ياحبيبتي ياسولوفيكيا

doudou said...

الواد منعم ده عميل
وبلاش تزرعي الحقد
ودي مكيدة ايرانيه
يعني كل الكلام اللي بيتقال كذب*كذب
يعني مفيش خالص خالص
مفيش حد بياكل من المزابل
ولا يعيشون في المقابر
ولااكواخ الصفيح
ولا الواد أحمد مات من البرد
يا ناس المهم نفوز على الجزائر
مفهوم
يا امة ضحكت من جهلها الامم

lily said...

الحمدلله مخسرناش
و ان شاء الله نكسب المباراة الجاية
:P
:P
:P

Anonymous said...

الحمد لله فزنا

بس الموقعه كده اتنقلت السودان

خايفه السودان تدخل طرف تالت في الحرب

لو شجعت الجزاير هنزل ابوهم

ولو شجعوا مصر الجزايرين هيفضحوهم

والله صعبانين عليا .... ما لهومش فيها واتورطوا

تحياتي

Empress appy said...

كنت مستنيه هتقولى ايه

Unknown said...

أه شفتى دى
شقه لكل لاعب يجيب جول
وفيه شركة عربيات كمان تقريبا"
عربيه لكل لاعب


الصراحه..... عندى أحساس فظيع ومكبوت بأنى عايز أقل أدبى على الكل كليله
ينفع ؟