Monday 23 February 2009

ولا يهمكوا يا شباب...احنا الشعب

:)
ولا يهمكوا يا شباب، احنا الشعب، احنا من بلد الكنبلة، بلد الميت مليون شاب، احنا مش رياض البنطلوني
ومدام هو عامل استفتاء لازم يشوف رأي الناس الحقيقي، الجمنهور يعني
بس ليه يا شباب عايزين تطردوا اليهود
:)
ليه كده؟ ماهو اللي ما ترضاهوش على نفسك ما ترضاهوش على غيرك صح؟
وفيه زميل كتب يقول اليهودي اللي اصله جه مع الصهيونية يمشي واللي اصلا يهودي من اهل البلد يقعد
:))
دي محاكم تفتيش بقى؟
طب نمسكها واحدة واحدة كده
من وجهة النظر الدينية ربنا بيقول ايه؟
ربنا بيقول:
ولولا دفع الله الناس بعضهم ببعض لهدمت صوامع وبيع وصلوات ومساجد يذكر فيها اسم الله كثيرا، ولينصرن الله من ينصره، ان الله لقوي عزيز
نتأمل الآية كده
المساجد جاية في الآخر، يعني ايه؟ يعني الناس اللي مؤمنة بالقرآن المفروض ان شغلتها تحمي الصوامع والبيع والصلوات والمساجد
يعني تحمي حرية العقيدة
وحماية حرية العقيدة - اي عقيدة كانت سواء عبادة مسيحية او يهودية او اسلامية وفقا لما هو مذكور في الاية - ربنا مسميه نصر لله
يعني انت لما تحمي حرية عقيدة لواحد يهودي او مسيحي يبقى انت بتنصر ربنا زي ما بتحمي المسجد بالظبط
والمبدأ اللي مفروض تتحرك منه هو العفو عند المقدرة
لما ربنا نصر الرسول على قريش اللي عملوا فيه زي ما الصهاينة بيعملوا في الفلسطينيين قال لهم ايه؟ قال لهم: اذهبو فأنتم الطلقاء
صح؟
وصلاح الدين الايوبي افتكر الواقعة دي وهو داخل بيت المقدس وعمل زي الرسول بالظبط
صح؟
طيب يعني اذا كنت مسلم متدين ونيتك سودا كده للناس تتوقع ربنا ينصرك ازاي؟ المفروض تخلص نيتك لله وتنوي خير عشان ربنا ينصرك
صح؟
من وجهة النظر الانسانية والاخلاقية
واحد اتولد في بلد، وانت ربنا غلبك عليه، تطرده؟ ايه الحكمة من انك تطرده ماهو انت منصور خلاص
فين العدالة وانت بتدين عدوك بأنه عنصري وبيطرد الناس من بيوتها وبيخليها عشان يعمل جناين وانت لو كنت مكانه وانت اللي في موقف القوي وهو اللي في موقف الضعيف ح تعمل فيه بالظبط اللي عمله فيك؟
امال انت ضد الصهيونية ليه؟
طب ما الصهيونية دي رد فعل للنازية
انت عايز بقى تبقى رد فعل للصهيونية ونفضل نلف في الحلقة المفرغة دي؟
من وجهة النظر السياسية
مافيش حاجة تقضي على الفكر الصهيوني تماما وتقطع شأفته من جذورها غير ان فلسطين تبقى دولة ديمقراطية تستوعب كل المعتقدات
لان اقتراح طرد اليهود من فلسطين بيؤكد على الفكر الصهيوني وبيخدمه مش بيقضي عليه ولا بيضره
الفكر الصهيوني في اساسه مبني على فكرة ان اليهود مضطهدين دونا عن كل البني ادمين، وبما انهم مضطهدين دونا عن كل الناس، وكل الناس مش عايزاهم، وكل الناس يا اما عايزة تقصيهم يا اما عايزة تموتهم فمن حقهم بقى انهم يبقى لهم وطن قومي خاص بيهم
اهم لو وحشين ما حدش ح يستحملهم غيرهم ولو كويسين يبقى يقعدوا مع بعض
المهم انهم يبعدوا عن الناس اللي مش عايزاهم
وبناء على ان الناس كلها مش عايزاهم، فهم لاقيين مبرر يموتوا بيه كل الناس، ماهم بيكرهونا بقى ولو قدروا علينا ح يموتونا
حتى اطفالهم ورضعهم لما يكبروا ح يموتونا عشان احنا مضطهدين بالسليقة
والحقيقة ان دي مش حقيقة
الناس كلها بتضطهد بعض، مش اليهود بس هم اللي ضحية الاضطهاد، يعني احنا مثلا ما طالبناش الامبراطورية الرومانية بتعويضنا عن كم الشهداء اللي هي قتلتهم في مصر قبل ما الامبراطورية تدخل المسيحية وبعدها
ما قلناش للكنيسة الكاثوليكية تعتذر لنا عن المذابح اللي عملوها للعرب في الاندلس
البروتستانت والكاتوليك قطعوا بعض وكل واحد فيهم قدر على التاني ما رحموش وهكذا
يعني الانسان حيوان مضطهد بطبيعته
والمفروض اننا ناس بندور على العدالة مش بنحلم باليوم اللي ربنا يقدرنا فيه على اللي قادرين علينا عشان ما نرحمهمش
هههههههه
ما ينفعش كده يا شباب دي نية سودا دي
ربنا ح يسترها مع اتنين قتالين قتلا ازاي؟

75 comments:

اقصوصه said...

هههههههههههههه

يمكن لان احنا مستضعفين

طالبنا بكامل حقنا

ولو بالاحلام يعني

اللي ما قدرنا ناخده بالواقع

طلبناه بكل شراسه بالاستفتاء

الله يرحمنا برحمته

مهندس مصري بيحب مصر said...

بصي يا نوارة دي نسخة من تعليقي التاني عند عمرو

أنا كان قصدي على الحديث اللي ما معناه
لا تقوم الساعة حتى يقاتل المسلمون اليهود فيختبئ اليهود خلف الشجر و الحجر فينطق الحجر و الشجر و يقول يا مسلم يا عبد الله هذا يهودي خلفي تعال فإقتله إلا الغرقد فإنه من شجر اليهود
بص يا باشا انا عايزها ترجع زي ما كانت قبل قيام اسرائيل و الوكالة اليهودية و حركة الهجرة اليهودية المنظمة ليها
عايزها ترجع لأصلها و لوضعها الطبيعي اللي كان موجود قبل الإحتلال الإنجليزي لفلسطين سنة 1917
و اي حل يرجع التركيبة السكانية كده تاني انا موافق عليه
أما اللي جم من الشتات و من كل اركان الارض فالمفروض يرجعوا مطرح ما جم خصوصاً ان فيه كتير منهم مزدوجي الجنسية
و لو عاشوا في فلسطين و خدوا الجنسية الفلسطينية بموافقة الشعب الفلسطيني فالمفروض يرجعوا كل اللي إغتصبوه من اهل فلسطين من ساعة ما شردوهم سنة 1948
و ياريت تبص في مدونتي و تشوف الكتاب اللي كنت بأنشره في البوستات الأخيرة عندي و لو ما كنتش قريته قبل كده ياريت تقراه و انت تعرف معلومات كتير قوي عن اصل الصراع

Unknown said...

بس فيه ناس ماجوش من حتة يا مهندس
فيه ناس اتولدوا في فلسطين

وبعدين ايه الجديد في اليهود يهاجروا عندنا؟

ما طول عمرهم بيهاجروا للعالم العربي والاسلامي هربا من الاضطهاد

وبعدين اللي اتولد ومالوش حتة يروحها
يعمل ايه؟

بلاش

اللي اتولد اسرائيلي
ابوه وللا جده هم اللي هاجروا
وهو دلوقت ضد الصهيونية
ذنبه ايه؟
مالوش حتة جه منها عشان يرجعها

رحلتنا في الحياة said...

بصى يانوراة الرسول عليه الصلاة والسلام كان لما جه بالاسلام كان اليهود موجودين اصلا فى الجزيرة العربية ولما قال اذهبوا فانتم الطلقاء للقريش مش لليهود
امال اللى بيحصل دلوقتى دول ناس احتلت ارض مش بتعتها من الاصل بتحارب اهلها الاصلية وكل همها تقتل وتشرد وتمثل بجثث ولا بتراعى حرمة ولا دين ولا اى ملة
الفكر اننا نطرد اليهود ده بسبب افعالهم واعمالهم السوداء هما اللى بدوا يبئا يستحملوا كل نتيجة تحصل بعد كده لو كانوا عايزين سلام والله اهلا وسهلا بيهم مواطنين درجة تالتة مش تانية كمان معلش يعنى لكن دول صهاينة ولاد تيت فعلا عايزين الحرق زى ايام هتلر ومش هتكلم على كل اليهود اكيد فيهم ناس كويسة وبتحترم غيرها احنا فى الاخر بشر
بس على فكرة الحديث واضح وصريح ومن علامات قيام الساعة محاربة اليهود دول م بيحاربوا شعب وبس دول بيحاربوا عقيدة بيحاربوا الدين الاسلامى بكل الطرق

رحلتنا في الحياة said...

اللى ضدد الصيونية وان معتدل الفكر ده على عنيا وراسنا يعيش اهلا بيه بس يكون الاصل عارف انهم كرم من اهل فلسطين انه عايش على ارضهم يحترم غير يحترم

مهندس مصري بيحب مصر said...

تفرق لما يهاجروا لينا و نستقبلهم بمزاجنا و موافقة حكوماتنا و شعوبنا و بين لما ييجوا يحتلونا غصب عننا

اما اللي ضد الصهيونية فممكن يآخدوا الجنسية الفلسطينية حسب القانون اللي حيشرعه و قتها البرلمان الفلسطيني
بس ساعتها لازم كل واحد يآخد حقه
يعني ما يكونش واحد من اللاجئين الفلسطينين معاه عقد ملكية الارض و البيت بتوعه و ده قاعد فيهم
لا
لازم الموضوع يتحل
يا يدفع تمنهم لللاجئ و ياخد مخالصة
يا يتطرد منهم و ساعتها يبقى يسكن في اي مكان فاضي بقى
لإن اللاجئين الفلسطينين هم اصحاب الحقوق الأصليين و كل المهاجرين اليهود و اولادهم و احفادهم و نسلهم كله هما محتلين وافدين
و لو طلبوا يروحوا أمريكا فهيا حترحب بيهم جداً
و خليكي فاكرة ان عدد اليهود في امريكا ضعف عدد اليهود في إسرائيل

و عموماً يمكن الإسترشاد بما تم في الجزائر عند إستقلالها بعد أكثر من 130 عام من الإحتلال الفرنسي حيث تم إعطاء الجنسية الجزائرية لعدد من المستوطنين الفرنسيين مع تنازلهم عن الجنسية الفرنسية

Unknown said...

لا لا لا لا لا

ثانية واحدة
انت راجل صاحب عقيدة وللا كده على ما تفرج؟

صاحب العقيدة تصرفاتها ما بتبقاش ردود افعال لتصرفات اللي قدامه وانما بتبقى نابعة من عقيدته

الصهاينة ولا تيت
وقريش ولاد تيت
والصلبيين ولاد تيت

ومافيش فيهم حد يفرق عن التاني في جرائمه

بس انت شايف دلوقت الصهاينة ووقع افعالهم عليك واجعك

بس افتكر ان كان فيه بني ادمين زيك اتوجعوا وبيحسوا زيهم زيك بس بيحكموا اخلاقهم وعقيدتهم مش رغبتهم في الانتقام

وصلاح الدين الايوبي طرد الحكومة الصليبية لكن ما طردش المواطنين المهاجرين اللي كانوا جايين مع الحملات الصليبية

امال انت فاكر الفلسطينيين والسوريين واللبنانيين جايبين الحلاوة دي منين؟

واللي عملته قريش في سيدنا محمد ما يقلش عن اللي عمله الصهاينة في الفلسطينيين
الحصار والطرد والقتل والتعذيب
كله كله

يعني انت بتحس وسيدنا محمد عليه الصلاة والسلام لا؟
ماهو بني ادم وبيحس وبيتوجع زيك بالظبط
بس ما بيحكمش بنوازعه البدائية بيحكم بالعقيدة اللي ربنا علمها له

Unknown said...

بس انا مبسوطة من اليقين بالانتصار ده

بس مش مبسوطة من النوايا السودا دي

الناس تنوي نية خير عشان ربنا يوفقها

رحلتنا في الحياة said...

ايوة موجعين منهم وشايفين الويل بس لما اختارت انهم يتطردوا اللى هما اس الفساد فى الصهاينة يعنى فى بعض اليهود اكيد كويسين ومتفاهمين ومش عندهم التعصب اكيد كلامنا ده سبب اللى حصل منهم بس ساعة الجد مش هنقتل ونشرد والكلام ده طبعا الحمد الله الرسول عليه الصلاة والسلام لينا قدوة فى كل حاجة طبعا وهنعمل زى ما عمل ان شاء الله مش مع الناس اللى تستاهل ده لكن دلو عندهم اعتقاد تاااااااااام انها ارضهم ومن النيل للفرات ولازم ولابد يحققوا ده يكونوا شعب الله المختار ناس بفتكر بالشكل ده هتلاقى نسبة المعتدلين فيهم قليلة جدا

رحلتنا في الحياة said...

فى الحقيقة احنا بتوع كلام مش اكتر والله احنا بنقول كده بس ساعة النصر طبعا مش هيهمنا اننا نسيبهم ولا نعمل فيهم ايه لانهم خلاص انتهوا واتكسرت شوكتهم بس ربنا يحقق ده قريب يارب

مهندس مصري بيحب مصر said...

فين التعليق بتاعي ؟
انتي بتردي على التعليق اللي ما نشرتيهوش؟
و لا ده رد على تعليقي الاولاني ؟
و يا ستي صلاح الدين ما طردش السكان الصليبين
بس أغلبهم إختار الهجرة للشريط الساحلي اللي كان باقي تحت الحكم الصليبي وقتها
و بعد ما الناصر بن قلاوون قضى على حكمهم نهائياً من جميع مدن الشام فيه منهم اللي رجع اوربا
و اللي بقى منهم في الشام اما اعتنق الإسلام و إندثر كصليبي و إما بقى كأقلية مسيحية مرعية و محترمة و لكنهم كانوا من غير المقاتلين
اما اغلب المقاتلين و هم مولودون هنا فقد عادوا الى اوربا

Unknown said...

ما احنا قلنا ان فكرة الدولة الواحدة ح تلغي فكرة الصهيونية وساعتها مش ح ينفع يبقى اسمها اسرائيل من اساسه
اكيد ترجع يبقى اسمها فلسطين
لان من اول الاسم كده ده اسم فيه اضطهاد للديانات التانية
يعني تخيل دولة اسمها محمد
يبقى فيها ازاي مسيحيين ويهود؟

اما بخصوص هم بيفكروا انهم شعب الله المختار وهم بيفكروا ان الارض دي بتاعتهم

هم يفكروا زي ما يفكروا

سيدنا محمد عليه الصلاة والسلام كان تحت ولايته ناس بتقول عليه مش نبي وكذاب وكان شايلهم على راسه وحاططهم في عينيه
مش ح يمشي يقول لهم: ايه رأيكوا فيا
ماهو عارف رأيهم فيه
وبررررضه حاططهم في عينيه
عشان المفروض ان دي الاخلاق اللي ربنا علمها له
امال هي اسرائيل مش عايزة حل الدولة الواحدة ليه
عشان ده ح ينسفها من اساسه
امال هم كلفوا نفسهم فلوس وهجرة وحرب وكل ده عشان ايه؟
امال هم بيقولوا لما نعمل دولتين ح نطرد كل العرب اللي مش يهود ليه؟
فكرة تعايش اكتر من دين على ارض فلسطين بتنزع فتيل الصهيونية من اساسه
وبتبين اهو: لا مضطهدين ولا حد اكلكوا ولا عض دراعكوا ولا حاجة
امال ايه الفيلم اللي انتوا عاملينه ده؟

Unknown said...

يابني ما نزلت التعليق بتاعك اهو

هو كان فيه تعليق تاني
انا كل التعليقات نزلتها لان مافيش غير تعليقك انت وايوشة

ايوشة

لا ان شاء الله مش بتوع كلام ولا حاجة

بالعكس انا مبسوطة من اليقين ده
دي حاجة ايجابية وكويسة
مافيش حلم بيتحقق الا لما صاحبه بيصدقه

مهندس مصري بيحب مصر said...

و لما اتفتحت مكة مش كل واحد من المهاجرين استرد ارضه و داره
و لا هيا كانت سبهللة
كل واحد رجع له حقه
و راجعي السيرة يا نوارة
ايه اللي انا قلته ضد العقيدة ؟
انا بأطالب بإن حقوق المشردين ترجع لهم
ايه ضد العقيدة في كده؟

مهندس مصري بيحب مصر said...

آه اصلك كنتي نزلتي ردك قبل ما تنزلي التعليق بتاعي فكان الوضع غريب
كده مضبوط دلوقت

رحلتنا في الحياة said...

طيب يانوراة انتى بتقولى ايام الرسول صلى الله عليه وسلم كان الاسلام عزيز ومنتصر واليهود اقلية لكن موضوع دولة واحدة والفلسطنيين فى قمة الضعف تفتكرى ده هيكون عدل هتلاقى اليهود مسيطرين على الدولة دى بشكل كبير جداااااااا وكمان هتشجع اكتر على هجرة اليهود كمان وكمان لفلسطين وهيكونوا هما الاغلبية والعرب هيكونوا قلة وحتى العرب اللى مهاجرين مش هيرجعوا لفلسطين مين اللى هيسمح بده اصلا

Anonymous said...

من الناحية العقائديه
يخرج الصهاينه من كامل أرض فلسطين ومن يبقى يصبح من أهل الذمة
أيه الغلط في كده يا نواره
هو الراجل قال يطردو ولا يهجرو
الراجل حاطط أختيارين للغير يختار منهم
أما يخرج وأما يبقى خرج خير وبركة
فضل يبقى يعامل كما عامل رسول الله وصلاح الدين أهل الملل الأخرى سواء بقى كان يهودي ولا كان بيعبد صوابع رجليه
أنما ميخرجش ويقعد ويبقى عادي كده قدر محصلش وان حصل ما يتكررش ونقول لأ عشان نبقى أنسانيين
يبقى أحنا عالم لا مؤخذه يعني مش ولا بد

مصطفى شوشه

مواطن مصري said...

انا اخترت الاختيار التالت دولة ديموقراطية

مواطن مصري said...

انا يمكن ضد انو يكون الصراع ديني عشان لو بقى صراع ديني يبقى عمرنا ما هنوصل ل السلام العادل

مواطن مصري said...

@مصطفى شوشة


طيب خروج الصهاينة من الارض هي هي فكرة الصهيون طرد العرب

يبقى انت عملت اية ؟؟؟؟؟


شيلت متطرفين حطيت متطرفين

Unknown said...

يا مهندس

شفت عمرو رد عليك وقال لك ايه؟

Anonymous said...

السلام عليكم


كلام حلو جدا لو كان اليهود عايشين في


أرض لهم ودخل الاسلام وفتحها لتصبح دولة مسلمة



ولكن حينما يكونوا محتلين لارض اسلامية

فإنه يجب قتل كل رجالاتهم وسبي نسائهم

ذلك لانهم كلهم قتلة , كلهم جنود وليس بينهم مدنيون


وأعتقد أن هذا اليوم قريب وقريب جدا

حيث سنقتل من قتل ابناءنا ورمل نساءنا ويتم أطفالنا


سنقضي على من اغتصب ارضنا ودنس مقدساتنا


يرونه بعيدا ونراه قريبا

Unknown said...

امال صلاح الدين الايوبي لا قتل كل رجالهم ولا سبا كل نسائهم ولا حاجة
انت بس تلاقي النسوان الاسرائيليات عاجبينك عشان مزز
:)

مهندس مصري بيحب مصر said...

شفت رده
بس اصل اهل الذمة دي مش عيب و لا شتيمة و لا كلمة وحشة
ما اليهود ايام النبي كانوا اهل ذمة
يعني لهم ذمة الله و رسوله و المسلمين بأن يصانوا و يحافظ عليهم من كل إعتداء

مهندس مصري بيحب مصر said...

شفت رده
بس اصل اهل الذمة دي مش عيب و لا شتيمة و لا كلمة وحشة
ما اليهود ايام النبي كانوا اهل ذمة
يعني لهم ذمة الله و رسوله و المسلمين بأن يصانوا و يحافظ عليهم من كل إعتداء

حـنــّا السكران said...

أنا كنت بدّي أقول هالكلام في تعليقي على البوست السابق و بعد ما كتبت شوية محيته لأني شايف انه مافي فايدة بعد ما شفت نتائج الإستفتاء حتى ذلك الحين .

ما يخيفني الان بعد كل كا أقرأه و أسمعه و أراه هو نتيجة وصلت إليها و لا أدري مدى صحتها لكنها تؤرقني .. و هي أننا كلنا ( كبشر ) صهاينة حين يتاح لنا ذلك ,, و كلنا نازيون حين يتاح لنا ذلك .خصوصاً في هذا العصر الذي أبرز سماته غياب القيم الإنسانية و المعاني الإنسانية حتى عن العقائد الإيمانية التي تؤمن بها البشر , بمعنى أن الناس أصبحت تـُـجـيـّر الدين و الإيمان و العقائد لما هو أسوأ و لا تأخذ من الدين ما يجعلنا ( إنسانيون ) ..و أعتقد أن الله لو أعاد إرسال أحد أنبيائه الان .. سيقتله المؤمنون قبل أن يصل إليه الكافرين .


ـ تهيّألي انه عمرو حاطط فخّ في بعض الخيارات خصوصا الاول و التاني .. عشان يشوف الناس وصلت لوين بتقكيرها .. لأنه الخيارات غير واقعية مطلقا .

ـ تعليق على مقدمة صديقي و أخي مهندس مصري في تعليقه هنا :

ما يؤمن به المسلم و يراه صحيحاً تماما ( من الناحية الدينية كما ذكرت أنت ) و يرى وجوب تحقيقه و يؤمن بذلك .. اليهوي لديه إيمان و نصوص معاكسة يؤمن فيها و بصحتها و بوجوب تحقيقها بنفس القدر الذي يؤمن فيه المسلم بنصوصه العقائدية .. المسيحي أيضا بديه نصوص و لديه نفس قوة الإيمان ورغبة التحقيق .

يجب على الجميع التفكير بمنطق الواقعية . الذي يأخذ كل الأفكار بالحسبان و محاولة الوصول إلى حلول وسط ترضي الجميع .. و الله سبحانه ( الذي يختلف عليه و به الجميع ) سيشاء ما يشاء في النهاية .

Unknown said...

بصي احنا مش بنقول انهم يتطردوا بره البلد
لكن مايبقاش في دوله اسمها اسرائيل
هي فلسطين وحكمها للعرب والمسلمين
ويعيش فيها الديانات كلها زي كل دول العالم عادي يعني
لكن دولتين والكلام الفارغ ده لأ
هي دوله واحده فلسطين وبس

Unknown said...

يا جدعان ما احنا بنقول يرجع الوضع على ما كان عليه قبل ستين سنة

ماقبل ستين سنة كان اليهود عايشين عادي وحتى الخواجات اللي بيضطهدوا منهم كانوا بيهربوا عندنا عادي

اللي عمل الازمة مع اليهود هو وجود اسرائيل
ومافيش حاجة تفكك اسرائيل غير ان الوضع يرجع على ما كان عليه

اللي هو الخيار التالت
وبعدين الراجل كاتب تمييز ايجابي لصالح العرب بسبب الظلم والاضطهاد اللي تعرضوا له

حـنــّا السكران said...

أنا اخترت الخيار التالت طبعا

و سقط سهوا في تعليقي .. كنت عايز أقول أنه بعض الخيارات غير واقعية و ليس الخيارات غير واقعية .

طبعا أنا فاهم التمييز لصالحنا و من أين منبعه ..و مبرر وضعه .. لكن حين نطرح مثل هذه الأسئلة يجب أن نأخذ في الحسبان أن هناك اّخرين يمكنهم الإجابة عنها .. و سجيبون لصالحهم .و هذه هي الدوامة التي ندور فيها منذ سنين و سنين .

BmBm said...

طيب بما ان أنا هو الزميل اللى قال نطرد اليهود اللى جابتهم الصهيونية و نخلى اللى كانوا هناك من قبل الصهيونية ، فاسمحولى أعلق

يا أستاذة نوارة ، لما ييجى واحد غريب ياخد بيتى بالعافية ، و يموت وولاده يورثى بيتى منه، ده مش معناه ان البيت بقى من حقهم لأنهم اتولدوا فيه.

الفرق بين اللى انا عايزه و اللى إسرائيل عايزاه هو ان الإسرائيلى بيطرد الفلسطينى من أرضه، لكن أنا عايز نطرد الإسرائيلى من أرض جدوده أخدوها فردة و اقتدار.

يروحوا فين؟ مش مشكلتى، يرجعوا مطرح ما أجدادهم جم.

حماية معتقدات؟ مين جاب سيرة المعتقدات؟ اليهودى يفضل يهودى، بس يرجع بلدهم، فيها حاجة دى؟

أنا ضد الصهيونية لأنها بتزعم ان أرض فلسطين بتاعتهم، و هى ليست كذلك على الإطلاق.

و على فكرة، بناء على كلامك، فحل الدولة الواحدة اللى حضرتك اخترتيه مش هايحل أزمة الفكر الصهيونى برضه، لأنه مش هينفع اليهود يعيشوا مع الفلسطينيين، لأنهم هيخافوا يضطهدوهم.
ثم ان اليهود عندهم دولة من 61 سنة، لكن لسة ماعنهومش احساس بالأمان، و خايفين الناس تهاجم دولتهم، و بيحاولوا يأمنوها ، و ليهم أطماع توسعية، و لسة دولتهم مالهاش حدود لحد النهاردة.
الصهاينة هاتفضل مسيطرة عليهم عقدة الماسادا دايما، و هيفضلوا دايما عايشين فى حصار.
كان فيه تدوينة لجو غام بتتكلم عن ان إسرائيل مهما عملت مدابح مش هاتقتنع بانتصارها، هادور على اللينك بتاعها.

لكن طبعا يوم ما ربنا يكرمنا و نقدر عليهم، مش هانقتل الأطفال ولا هانهد المعابد بتاعتهم زى ما بيعملوا معانا (على فكرة النقطة شبه الوحيدة اللى باعترض فيها على حركات المقاومة هى استهدافها فى بعض الأحيان للأطفال)

BmBm said...

آه صح
بمناسبة صلاح الدين
صلاح الدين طرد جيش الصليبيين
لاحظى ان كل إسرائيلى حتى سن الأربعين هو مجند

احمد سعيد said...

نوارة
يعنى ينفع مثلا
نقول كل اللى مناخيرهم طويله فى مصر
ييجوا يسكنو فى شبرا
ونطرد كل اهالى شبرا علشان دول يقعدو مكانهم؟؟؟؟؟؟؟
وبعدين لما ييجى اهالى شبرا ياخدو ارضهم تانى
نقولهم لا بلاش تطردوهم وظبطو مع بعض؟؟
ولا نقول للمحتلين غوروا فى داهيه من مطرح ماجيتم؟؟؟؟
دا اقل واجب يعنى

مواطن مصري said...

نوارة انتي مفكرتيش ان العملية دي جت بعد تأجيل الحوار الفلسطيني الفلسطيني في القاهرة؟

Anonymous said...

مواطن مصري في فرق بين الطرد
وبين أني أخيرك أنك تمش أو تبقى وتكون من اهل الذمة

وبعيدا عن الأراء الجميلة واللذيذة الي من ناس شخصيا بحترمهم وبحترم تفكيرهم جدا جدا سواء نوارة أو حنا السكران أو مهندس مصري أو حتا عمر غريبه
فالواقع على الأرض بيقول أن الي بتطرحوه مستحيل بنسبة 100000000000000000000%
والأسباب عديدة
أبسطها أنك عشان تنفذ الأفكار دي محتاج تنتصر عسكريا على الصهيونيه عشان تكون الأقوى وتفرض حلك السلمي عليهم
وده طبعا مستحيل تحقيقه نهائيا حاليا أو في القريب العاجل
وبفرض أن ده تحقق هيكون عليك أنك تحارب كل أصحاب التوجه الأسلامي وتنتصر عليهم بحيث أنهم يسلمو بالحلول المستأنسه المطروحة
وده لا أراه سيتحقق في القريب العاجل أو الي مش عاجل
أو حتى في المشمش

مصطفى شوشه

Che_wildwing said...

كلامك جميل يانوارة
بس بلاش والنبي حكاية الصهيونية رد فعل للنازية

Anonymous said...

إنتي متخلفة ..أرضي و يحتلوها و يبهدلوني و لما آجي أخرجهم تقوليلي خليك انت الكبير ..أحه و شخرة اسكندراني كمان ..
لا يا اختي .. يخرجو ولاد الكلب دول من مطرح ما جم و لو حد منهم من أهل البلد ممكن يقعد في بلدنا بشروطنا .. و ده لن يمنع محاكمته على أي جرايم ارتكبها قبل كده ..
دمنا رخيص يا نوارة علشان في ناس متخلفين زيك و مش فاهمين قوانين الحياة.

Anonymous said...

اليهود والمسلمين والمسحين بيعبدوا الاة واحد منذ 60 سنة وربنا منحاذ لليهود وبينصرهم على المسلمين اللى فى رائىمظلومين ودة مش عدل يبقى نخرج ربنا من الموضوع ومنقلشى ربنا قال الموضوع خلاف بشرى استعمار استيطانى
وينجل بالمقاومة المسلحة وغيرها وبعد فترة طويلة من الصراع ىمكن اقامة دولة علمانية من قوميتن
احمد

BmBm said...

آه صح
بلاش حكاية الصهيونية رد فعل للنازية
المؤتمر الصهيونى الأول انعقد سنة 1897 ، ساعتها هتلر كان لسة عيل بشورت.

ده لو افترضنا ان الصهيونية ابتدت بس على إيد هرتزل .

Unknown said...

اهو

شايفين كلامكوا وصل الناس لفين

شايفين احمد بيقول لكوا ايه؟

كلام جو صح

كلنا صهاينة اذا جات لنا الفرصة

معلش يا شباب

زي ما احمد بيقول كده

ربنا ناصر الصهاينة علينا بالقوة والعتاد

واحنا ما عندناش حاجة مختلفة عنهم الا اذا كان عندنا اخلاق مختلفة

لكن اذا كنا ح نتساوى في الاخلاق

يبقى النصر حليف الاقوى اكيد

BmBm said...

يا نوارة منين احنا بقينا صهاينة زى بعض
الصهاينة أخدوا حاجة مش بتاعتهم
احنا عايزين الحق يرجع بالكامل لأصحابة
منين نبقى احنا و هما واحد.
ردى عليا لو سمحتى.

جو رأيه هو حر فيه، لكن دى أول مرة أختلف معاه، و هذا لن ينقص من احترامى له شيئا.

Anonymous said...

مراقبون يتحدثون عن ضلوع جيل جديد من الإرهابيين بتفجير القاهرة

انفجار القاهرة: 16 مصاباً وقتيلة فرنسية

نبيل شرف الدين من القاهرة: كمن يبحث عن إبرة وسط كوم هائل من القش، هكذا يبدو مشهد الجهود الأمنية المتواصلة التي تجري في القاهرة سعيًا للإمساك بأي خيط قد يقود إلى الجناة، الذين تورطوا في تنفيذ حادث التفجير الذي هز سكينة ميدان الحسين وسط القاهرة يوم الأحد الماضي، وأسفر عن مقتل فتاة فرنسية وإصابة نحو 22 آخرين معظمهم من السياح الأجانب .

ووفقًا لمصدر مطلع فإن المؤشرات التي تجمعت لدى أجهزة الأمن تؤكد أن مدبري الجريمة لا ينتمون إلى أي من التنظيمات المتطرفة المعروفة التي انخرط قادتها وعناصرها في ما عرف بمبادرة وقف العنف، وبالتالي فإن هذه العملية فردية يرجح الخبراء أن تكون مجموعة تتألف من ثلاثة أو أربعة أشخاص ممن يعتنقون أفكارًا متطرفة قد تورطوا في الإعداد وتنفيذ هذا الحادث .

وعلمت (إيلاف) أن أجهزة الأمن المصرية تستجوب عددًا كبيرًا من المشتبه بهم، خاصة في صفوف التيار السلفي، وترجح المؤشرات الأولية أن يكون منفذو الحادث قد استخدموا عبوة موقوتة جرى تفجيرها بواسطة جهاز ميقاتي، وتم زرع هذه العبوة الناسفة بوضعها أسفل المقعد الرخامي بينما وضعت العبوة المماثلة الثانية على مسافة نحو ‏30‏ مترًا والتي أمكن إبطال مفعولها قبل أن تنفجر، وهي تحتوي على البارود والمسامير .

وأرسلت دوائر رسمية تطمينات عبر تصريحات منسوبة لمصادر أمنية مفادها أن أجهزة الأمن باتت على مسافة قريبة من تحديد هوية المتهمين في حادث التفجير، وفحص ما أثير من معلومات وشهادات ترددت عن أن المتورط به هما سيدتان منتقبتان وشخص آخر نفذها وهو ما تسعى التحقيقات لتدقيقه .

العبوة الناسفة


ويسعى تقرير الأدلة الجنائية إلى إزاحة الغموض حول التكهنات حول طبيعة العبوة الناسفة، وأوضحت أنها وضعت أسفل المقعد ولم تلقَ من طابق علوي، كما يقول بعض شهود العيان الذين تحدثوا عن عن رؤية ملثمين وهم يهربون من موقع الحادث بعد أن ألقوا القنبلة من غرفة في الطابق الرابع بفندق "الحسين"، الموجود في البناية ذاتها المطلة على ساحة المسجد، كما تحدث شهود آخرون عن أن سيدتين منتقبتين ألقيتا قنبلتين بمساعدة رجل آخر، ويقول شهود من السياح إن القنبلة انفجرت في لحظة وصول فوج فرنسي إلى ميدان المشهد الحسيني .

وحسب تقارير الأدلة الجنائية فإن العبوة الناسفة يتراوح وزنها بين كيلو غرام وكيلو ونصف، وتحتوي على مواد مماثلة لتلك الخاصة بالألعاب النارية وجرت تعبئتها في إناء من الفخار وزودت بأسلاك والتوصيلات بدائرة كهربائية وسببت الموجة الارتجاجية في اتجاه واحد وأحدثت حفرة قطرها نحو‏30‏ سنتيمترًا أسفل المقعد . ووفق التقرير فقد تبين أنها قنبلة يدوية محلية الصنع تحتوي على كميات من البارود والمسامير والتي تستخدم في تصنيع الالعاب النارية، وقام خبراء المعمل الجنائي بعد رفع بقايا القنبلة بفحصها لتحديد محتوياتها بدقة ومعرفة ما إذا كانت ملقاة من كافيتريا فندق الحسين كما ردد بعض شهود العيان، أم أن مجهولاً وضعها أسفل مقعد حجري بجوار حديقة المشهد الحسيني كما تردد من شهود آخرين، وهو ما يستطيع خبراء الأدلة الجنائية تحديده وحسم الخلاف بشأنه على نحو قاطع .

جهود البحث

وقال مصدر مطلع‏ إن أجهزة الأمن تعمل على عدة محاور في البحث عن المتهمين الذين نفذوا الجريمة، مشيرًا إلى ما أسماه المصدر تطور الأسباب والتداعيات التي تؤدي إلى مثل هذا العمل، لهذا فقد ضربت الشرطة طوقًا أمنيًا حول مكان الحادث ومنعت الدخول خوفًا من وجود متفجرات اخرى في موقع الحادث القريب من منطقة الازهر في قلب القاهرة الفاطمية .

وهناك ما يشبه الإجماع على أن العملية كما بدت في لحظاتها الاولى وثيقة الصلة بتفجيرات سابقة آخرها انفجار الذي وقع في نيسان (أبريل) من العام 2005 في منطقة خان الخليلي (على بعد خطوات من موقع التفجير)، والذي تم بطريقة تبدو غير محترفة ومنفذوها اقرب إلى الهواة، وتقول مصادر امنية إن النظرة الاولى تشير إلى ان قنبلة المشهد الحسيني تتشابه مع تركيبة متفجرات في حوادث شبيهة.

الانفجار أثار الرعب في الشارع المصري وسط مخاوف من أن يكون هذا الحادث بداية موجة جديدة من العنف والإرهاب، وهو ما يتحسب له ايضاً خبراء الامن في مصر، ولا سيما أنه أعاد إلى الذاكرة سلسلة من تفجيرات تستهدف السياح في قلب القاهرة وشرم الشيخ والأقصر . واكتفى مصدر أمني بالقول إن فرق البحث الجنائي تواصل عملها ليل نهار على عدة محاور وهي إعادة فحص منطقة الحادث ونزلاء الفنادق المجاورة والعاملين والمترددين علي مقاهي المنطقة للتوصل إلى أي شهود والتقاط خيط لحل لغز الجريمة التي وقعت بدون سابق إنذار وبعد سنوات طويلة من القضاء علي تلك العمليات الارهابية التي ترتكب للتأثير على النشاط السياحي وزعزعة الأمن والاستقرار في البلاد .

Unknown said...

بمبم

واضح ان فيه فوق تساهم يابني

او انتوا مش واصلكوا الفكرة

دلوقت انت عايز الوضع يرجع على ما كان عليه قبل ستين سنة وللا عندك تصور تاني؟

قبل ستين سنة دي كانت منطقة عربية فيها كل الاديان بغالبية مسلمة

صح؟

طيب الحل التالت اللي حاطه عمرو هو بالظبط كده

لكن الاقتراح اللي انت وغيرك صوتوا عليه بيستلزم مدبحة في حال ما يرجع الوضع على ما هو عليه

فيه ناس بقى عطشانة للمقتلة والمدبحة
انا مقدرة ده جدا
بس دي مش اخلاق يعني
دي رغبات انسانية
لكنها بدائية

Anonymous said...

لا يانوارة .. لا ياجو .. مش صحيح المساواة بين اليهود المحتلين والعرب اصحاب الارض المطرودين من ستين سنه.. اللى اتقتلوا واتمثل بيهم واتنهبت بيوتهم واراضيهم وحقوقهم
لما تتحل يبقى تتحل صح ومايتساواش بين صاحب الحق والحرامى ولما آجى اطلب حقى مايصحش ابدا يتقال عنى صهيونى او نازى ..ولما ارجع استرد بيتى وزرعى ووطنى بالكامل واى محتل ابن محتل حفيد محتل يخرج من ارضى.. من بيتى .. ويقعد بقى فى المكان اللى ييجى على باله .. يعيش فى بلدى مواطن عادى او يروح للناس اصحاب المشاعر المرهفة فى اوروبا والدول المتقدمة هو حر بس انا مش لاجئ انا صاحب حق انطرد جدودى واهلى واتبهدلوا ولما احلم آخد حقى احلم بأنى آخد حقى بالكامل .. احلم بكامل حقى لانه حقى مش باطلبه شفقة ولا احسان من حد

Unknown said...

مين اللي قال ان فيه مساواة؟
ومين اللي قال ان في حال ما ان شاء الله تتحل المشكلة مجرمين الحرب ح يهربوا من العقاب

اقتراح الدولة الموحدة لا يشمل ليفني وشامير وبيريز
ولا اي حد من مجرمين الحرب اللي مفروض يتقدموا للمحاكمة

اما بخصوص الناس اللي اتقتلت واتظلمت
فعمرو كاتب بيقول دولة موحدة بتمييز ايجابي لصالح العرب

والتمييز الايجابي ده يشمل ان لما يبقى فيه ارض متنازع عليها
ولنقل ارض بيت مثلا ما بين يهودي وعربي
الارض ح تروح للعربي لانه صاحبها الاصلي

امال هي اسرائيل رافضة الدولة الموحدة ليه؟

امال هو اوباما قال: على العرب ان ينسوا فكرة عودة اللاجئين لان عودتهم بمثابة تقويض للدولة العبرية ليه؟

والحقيقة الكلام اللي بتقولوه ده ما بيعملش حاجة غير انه يؤكد اساطير الصهيونية اننا بنحب ناكل اليهود ونشرب دمهم

والحقيقة ان معلش يعني

مع احترامي لكلام سيادتكم وليكن ما يكون

انتوا عالم بق بس

عشان على كل الفتونة البقيقي دي
مش شايفين حاجة من حد يعني تدل على انه فتوة قوي للدرجة دي

BeLiEvEr said...

ازايك يا نوارة؟
عاش من شافك بقالى سنين مدخلتش عندك، ولا عند أى حد
الدنيا خدتنا بقى

أنا حبيت أمسى،
و على فكرة أسلوبك اتطور قوى، برافو عليكى، مانتى أكيد مش جايباها من برة

حبقى أقرا بقى التعليقات بعدين و اعلق انا علشان واضح ان الموضوع سخن قوى هنا
:-))))

BeLiEvEr said...

ازايك يا نوارة
عاش من شافك، انا بقالى سنين مدخلتش عندك، ولا دخلت عند اى حد أصلا
الدنيا خدت الواحد من كل حاجة

انا حبيت امسى بس، و على فكرة، أسلوبك اتطور قوى، برافو عليكى، بس انتى اكيد مش جايباها من برة يعنى
:-)

أنا حبقى أقرا التعليقات بقى ، و ارد عليها بعدين لان الموضوع واضح انه سخن قوى هنا
:-)

BmBm said...

من الواضح ان فيه فعلا فوق تساهم
أنا أولا ماعجبنيش ولا خيار من خيارات الأخ عمرو غريبة (هى غريبة بتشديد الياء، بتاعة العيد يعنى؟ ولا غريبة يعنى سترينجر؟)
أنا كتبت رأيي، و رأيي مكانش فيه ولا دبح ولا إبادة جماعية.
فيه ان اللى جده جه من روسيا يرجع روسيا
و اللى جده جه من أثيوبيا يرجع أثيوبيا
و اللى جده جه من تنجنيقا يرجع تنجنيقا

لكن مش معنى ان كان فيه نسبة ضئيلة من اليهود زمان، ان أى يهودى ييجى يتحامى فى شوية بلطجية كان اسمهم هاجاناه و ديقى اسمهم جيش الدفاع، و بعد كده لو حصل ان شاء الله يعنى و قدرنا عليهم، يعيط و يقوللى "و أنا ذنبى إيه يا بيه؟"
هاتقوليلى ده مش هوه دول أحفاده، هاقولك أنا مش عايز أعاقبهم، أنا بس عايزهم يحلوا من هنا.
و بعد كده هل وجود مسيحيين فى مصر دلوقت، أصلهم من عشرميت ألف سنة من البلد دى، انه ييجى واحد مسيحى انجليزى مثلا يحتلها، نيجى نطلعه، يقوللى "ليه؟ ماه من زمان فيها كل الأديان."
ولا حد عراقى برضه ييجى يحتل البلد بحجة ان فيها مسلمين (عشان ماحدش يتلكك)
لو حضرتك مقتنعة قوى بالمبدأ ده، يبقى أى حد بيجيب شوية بلطجية ياخدوا حتة أرض بتاعت واحد، و فى الآخر يقنعوا الراجل انهم يقسموا مع بعض، ناس عال العال و ماعليهمش غلطة.

فتونة بقيقى، معاكى.
بس لما أكون باقدم تنازلات و أنا باتكلم، تخيلى لما نيجى ننفذ بجد، التنازلات هاتزيد ازاى.

BmBm said...

آه نسيت اقول حاجة (معلش استحملينى)

الخيار التالت بتاع عمرو مش كده خالص
المسألة مش ان ترجع فلسطين فيها مسلمين و مسيحيين و يهود و دروز و بهائيين و بس.
نسب الناس دى كام.
و الناس دى كلها اللى كانت هناك من ييجى ميت سنة كانت عرب (عرب يعنى بيتكلموا عربى، أهل المنطقة دى يعنى) اقصد ان أصلهم من هناك، و اللى جه من حتة تانية جه برضا أهل البلد، مش فردة و اقتدار.
لكن الصهاينة فرضوا نفسهم هناك، و مالهمش حق لا همه ولا ولادهم يقعدوا هناك.

BmBm said...

و الأخ أنونيمس مايتهيئليش يقصد المساواة بين العرب و اليهود فى ملكية البيوت.
يقصد المساواة بين طر الصهاينة للعرب، و بين الطرد المأمول للصهاينة.
لا سواء.
لما حد ياخد بيتى، المحكمة بتدينى بيتى و تدخله السجن.
لو هوه مات، المحكمة مش هتدخل ولاده السجن، لكن برضه هتدينى بيتى كاملا من مجاميعه.
هوه ده الوضع الأخلاقى الوحيد.
جو مافيش أخلاق فى السياسة، و السياسة فن الممكن ، و مرجعيتها الوحيدة هى البراجماتية ده حوار مايخشش دماغى.
جاهل بقى، متخلف ، مؤمن بالخرافات، قولوا اللى تقولوه، لأن ده هيدخلنا فى مناقشة تانى خالص.

كلمة أخيرة (عارف هافتح على نفسى النار، بس يالله) أتمنى ان الناس اللى مشاركة فى المناقشة دى (و أنا أولهم) يكون عندها استعداد و لو صغير قد كده، انها ممكن تغير رأيها، مش بتدافع عن رأيها بشتى الوسائل المقنعة و غير المقنعة بس عشان يبقى اسمه رد، و يقول الناس كلام ماقالتهوش.

حـنــّا السكران said...

Anonymous

لا لا يا أخي قال مساواة ؟؟..

هالأفكار و لا عمرها وردت في دماغي

في حد جاء من بولندا أو روسيا أو أمريكا أو اوروبا و عمل فيها صاحب بيت و صاحب أرض و صار وزير و جندي و قائد جيش .. ده ياخد بالجزمة و يرجع هو و عائلته لبلاده الأصلية .

المقصود انه ترجع الأرض و الحالة كلها لحقيقتها .. عرب ..و أقلية يهودية عايشة هنا طول عمرها زيهم زي أي أقلية في أي بلاد عربية .. لهم نفس الحقوق و عليهم نفس الواجبات .. ده المقصود .

أما الأمر اللي أشرت له أنا لما قلت كلنا ممكن نبقى صهاينة و نازيين .. هو التفكير بطريقة غلط تحت الوضع المذكور أعلاه .. يعني التفكير مثلاً ..انك تطرد القبطي المصري من مصر ..لأنه قبطي .. ده تفكير عنصري .. و ده بينطبق عاينا احنا .. لو عاد الوضع إلى ما كان عليه و طردنا اليهودي اللي عايش معانا بالأرض دي من ألف سنة .. دي مش أخلاق دياناتنا و لا مبادئنا .. ده قصدي .. هم الصهاينة عملوا كده .. لأنهم قذرين و عنصريين .. يبقى ايه الفرق بيننا و بينهم لو عملنا نفس الشيء ؟ لا عمر بن الخطاب عمل كده و لا صلاح الدين ..ده الفرق بيننا و بينهم .و ده قصدي .. أنا مش ممكن أتجرّأ بيني و بين نفسي و أقتنع انه اليهودي اللي جاي من اخر الدنيا و سرق أرض الناس و بيوتها . له حق يبقى .. الحق انه لو ما رجع بلده الأصلية . يبقى عدو .. و العدو انت عارف طريقة التعامل معاه كيف بتكون .

و هم دول أعدائنا الان و أعداء البشر و الحجر كمان .
تحياتي .

حـنــّا السكران said...

BmBm

انتم فهمتوني غلط تماما ..

أصلاً الفكرة اللي وصلت بالخطأ من كلامي .. انت بالذات عارف انها لا يمكن تصدر عني .. انت عارف أنا كيف بفكـّر .

Anonymous said...

حقيقي الموضوع ده بضني منك يا نواره

ليه حامله هم اراء الناس التانيه فينا
ليه كل همنا نرضي الغير
طيب ما تحاولي تشوفي ايه الي يرضي ربنا وتختاريه
عمر ما كان في تمييز لصالح المسلمين على أساس انهم مسلمين وأهل الذمة دول درجة تانيه
طول عمر المسلمين بيعيشو ومعاهم اهل الذمة في وطن واحد
وأهل الذمة بيكون أمنهم وسلامتهم في ذمة المسلمين والدولة الأسلامية
عموما واضح وجلي أننا مش هنتفق في الحوار ده خصوصا أنك بدأتي سكة الغلط في المعترضين على أختيارك ووصفتيهم بالبق ومحدش منهم بيعمل حاجة

عموما أختارو وفكرو وقدرو
وفي الأخر
مش هيكون الا ما يشاء الله
مصطفى شوشه

Unknown said...

ما انا برضه مش فاهمة يا جو هم فهموا كده ازاي؟

اذا كان اليهود دلوقت حالا اقلية وسط العرب وعشان كده بيعملوا جدار فصل عنصري

وبعدين لما يرجع اللاجئين لاراضيهم وكل واحد يرجع بالظبط للبيت اللي هو انطرد منه وللارض اللي كان متملكها

مع تمييز ايجابي للعرب
والتمييز الايجابي ده نابع من حاجتين
اولا انهم اتظلموا وانطردوا من اراضيهم
وثانيا انهم الاغلبية
والتمييز الايجابي واضح ان مافيش تصور عند الشباب واضح ليه
التمييز الايجابي ده يشمل عدد الاحزاب والتمثيل السياسي والدستور واللغة والمادة اللي بتدرس في المدارس والحقوق المدنية والسياسية والاقتصادية والاجتماعية والثقافية
الى جانب تقدم مجرمي الحرب للمحاكمة
يبقى ايه بقى؟

لا

لازم نقتل كل رجالهم ونسبي كل نسائهم

والنبي اللي دخل يقول نسبي كل نسائهم ده
يوريني فارة سباها قبل كده
ده لو ابن اخته فرقع صاروخ جنبه في العيد ح يعملها على روحه

Unknown said...

بم بم

لا معلش
انا لما يبقى عندي منظومة اخلاقية ملتزمة بيها ضد العنصرية ما يبقاش اسمي باتنازل

دلوقت الف باء الحرب لما يبقى عدوك متفوق عليك في سلاح ما وانت مش باين لك انك تحصل على نفس السلاح
لازم تتفوق عليه في سلاح تاني

احنا ما عندناش حاجة
الحق معانا بس العالم كله مش عايز يعترف لنا بالحق ده
وغصب عن بوزه لازم نجبره انه يعترف لنا بالحق ده
مافيش حاجة اسمها وطن قومي لليهود يعني مافيش حاجة اسمها وطن قومي لليهود
مافيش دولة اسمها اسماعيل ولا بولس عشان يبقى فيه دولة اسمها اسرائيل
الناس ترجع اراضيها وتعيش في بلدها زي اي مواطن له حقوق وترجع لهم كل حاجة
يعني ترجع لهم كل حاجة

بس انا ما عنديش حاجة
لا عندي سلاح نووي ولا اسلحة محرمة دوليا ولا عندي دعم عالمي ولا عندي اعلام
هم عندهم كل ده
حاجة واحدة بس اللي مش عندهم ابدا

الاخلاق

لو انا ح اساوي نفسي بيهم في الاخلاق يبقى انا خسرانة خسرانة

لو انا وانا لسة باتكلم حلمي كله منصب على اني ازاي ح اعمل مدبحة ومقتلة وترحيل وسبي نساء وقتل رجال

يبقى انا اخلاقي زي اخلاقهم
وهم متفوقين عليا في كل حاجة

كان زمان فيه فيلم قديم واحدة ست عميا حرامي هجم عليها في البيت
اول حاجة عملتها انها قطعت سلك النور عشان تجره على ارضيتها
بما انها عمرها ما ح تفتح يبقى تعميه زيها وهي في الحالة دي ح تبقى متفوقة عليه عشان هي حافظة البيت وهي مش شايفة وهو مش حافظ البيت

بدل ما انجر ورا انحطاط اخلاقهم

اجرهم لاخلاقي وساعتها ح ينهزموا لانهم ما عندهمش الف باء الاخلاق

Unknown said...

بليييييفرررررر

انت فين يا رااااجل

Unknown said...

ابو شوشة

طب اقعد لنا على جنب

عشان انت ولا مجمع خالص

انا حاملة هم الامراض اللي صابتنا ومش ح نخلص من الحلقة المفرغة دي

المفروض ان عندنا اخلاق

وللا ما عندناش؟

مهندس مصري بيحب مصر said...

و هو لما الناس تطالب بإن احفاد البولنديين يرجعوا بولندا و الروس يرجعوا روسيا و احفاد كل يهودي صهيوني اجنبي يرجعوا بلد جدهم يبقى كده انحطوا اخلاقياً
هأو أو أو

سلامات يا أخلاق

انتي مفهومك للأخلاق بقى غريب على فكرة

انا بقى شايف انهم بيطلبوا الحق و هو جلاء المستعمرين الأجانب و أحفادهم


يعني بنقول جلاؤهم مش قتلهم و لا سبيهم
لا بنقول الجلاء
و الإستقلال التام او الموت الزؤام
و سعد سعد يحيا سعد
و الهلال مع الصليب قشطة و مربى و حليب
:))

Unknown said...

انا زهقت

واللي اصله عربي يرجع للجزيرة العربية؟

BmBm said...

نوارة
والمصحف الشريف (لا إله إلا الله) ماحد اتكلم عن مدبحة ولا سبى
أنا باتكلم عن ان الصهاينة يرجعوا مطرح ما جم
لو سمحتى ناقشينى على أساس ان أنا مش عايز مدابح خالص
ساعتها هتلاقى ان الحل اللى أنا عايزه حل أخلاقى بشكل مستفز
حاجة كده زى أشعار المدرسة الرومانسية

مهندس مصري بيحب مصر said...

اللي اصله عربي هو اللي يفضل في البلد
لإنها بلد عربية أصلاً لو لسه فاكرة

انتي لو ليكي شات كنا اتكلمنا عليه بدل التعليقات المتبادلة دي

BmBm said...

اللى أصله عربى (آرابيان يعنى) و كان جه غصب عن أهل البلد الأصليين و طردهم من بيوتهم و أرضهم يرجع الجزيرة العربية

لا فضل لعلابى على أعجمى إلا بالتقوى
لكن لو كان جه و قعد و أهل البلد قبلوه، يبقى حقه انه يفضل قاعد

و عشان كده قلت ان اليهود اللى جم قبل وعد بلفور يقعدوا، اللى جم بعده يمشوا

BmBm said...

على فكرة يا نوارة
إذا كان الصهاينة من حقهم يقعدوا فى فلسطين، يبقى حماس و فصائل المقاومة اللى انت كنتى بتدافعى عنهم فعلا إرهابيين، بيقتلوا مدنيين قاعدين فى أرض من حقهم، زيهم زى بن لادن لما عمل تفجيرات لندن و مدريد.
كنتى بتدافعى عن حماس ليه بقه؟

Unknown said...

انا زهقت فعلا

بالنسبة للكلام عن القتل والسبي

ارجع لواحد انونيمس معلق وقايل كده

اما بقى الشرح في المشروح فانا فعلا زهقت

BmBm said...

فين هوه المشروح ده؟
أنا لحد دلوقت ماسمعتش رد على الكلام اللى أنا قلته (على فكرة أنا محمد اللى كتب عند عمرو ان اليهود اللى جم قبل الصهيونية .....)
معلش استحملينى
بس أنا بجد عايز افهم وجهة نظرك
لأنى متأكد من مواقفك ساعة الحرب الأخيرة انك لسه مازهقتيش من القضية الفلسطينية ، و انك مع المقاومة.

Unknown said...

انا حطيت صوابعي في الشق خلاص
هو انا باقرا في سورة عبس؟

حـنــّا السكران said...

BmBm

انت بتتكلم عن ان الصهاينة يرجعوا مطرح ما جم ؟؟

طيب بالله عليك احنا بنتكلم عن إيه ؟؟ بنتكلم عن ان الصهاينة اللي جوا من برا يبقوا بفلسطين ؟؟ مين اللي اتكلم بالمنطق ده ؟

احنا بنقول انه الصهاينة كلهم ..كل اللي جوا من برا .. يرجعوا مطرح ما جم أو ياخدوا بالجزمة ..ينقبض عليهم و يترحلوا يعني .. و يتعاملوا معاملة العدو ..و العدو تتم معاملته بالبندقية و المدفع ..

ـ صلاح الدين لم يطرد المسيحيين .. طرد الصليبيين .. و ده نفس الشيء تماما .. الصليبيين وضعهم زي وضع الصهاينة الان تماما .. بس الصهاينة أقذر من كل مجرمي التاريخ .

الموضوع واضح يا جماعة .. و انا بسّطت وجهة نظري و قلت .. افرض على مثال انك شفت واحد مصري الان عايز يطرد مصري اخر لأنه قبطي .. شو بيكون موقفك ؟ مش تصرف صهيوني و نازي و عنصري و فاشي ده ؟
طب أنا أعرف واحد في الشام يهودي .. و شامي أبا عن جد عن جد عن جد ..و عنده محلّ و بيتعامل مع الناس بمنتهى الذوق و اللطف .. طب اطرده أنا يعني لأنه يهودي ؟ ده اللي بنتكلم عليه ..مش بنتكلم عن الصهاينة و المهاجرين المغتصبين لفلسطين .. هؤلاء نظرتنا لهم واحدة .. يرجعوا مطرح ما جم .. أو انشالله تنقطع رقابهم ..حلال فيهم طبعا . لأنهم مجرمين و سارقين و ولاد قحبة كلهم

مهندس مصري بيحب مصر said...

حنا السكران
=============
خلاص يا جو
أنا و انت و بمبم رأينا واحد

مفيش غير نوارة هي اللي رأيها غريب و عجيب و ما شفتلوش مثيل أبداً
:)

BmBm said...

جو
إذن فأنا متفق معك تماما
هذا ما كنت أقوله من البداية

Anonymous said...

يا جدعان
يهود ايه اللي هنطردهم و النبي مضحكوني و بعدين ألطم على وشي
طبعا الإسلام ضد الظلم حتى ظلم الصهاينة مينفعش بس ايه الأحلام البعيدة دي مين ده اللي هنعرف نطلعهم من فلسطين
احنا مسلمو بني اسرائيل (أحفاد اللي قالوا لسيدنا موسى روح انت وربك حاربوا احنا قاعدين هنا)المسلمين دول دعوتنهم في المساجد اللهم اهلك الظلمين بالظالمين و اخرجنا سالمين فياريت نتوكس

احمد سعيد said...

هى بقت كدة يعنى؟؟
طييييييييب

Anonymous said...

باقول ايه بلاش نبقى زي كحيت وهو حاطط رجل على رجل و عايز يخت ياخده من روض الفرج لموناكو
ونقول لي نطرد اليهود طيب لما نبقى عندنا كرامة أساسا في بلادنا اللي بيحكمونا فيعا عرب و مسلمين زينا
خنقتوني

Unknown said...

مين الصخص اللي داخل يحطم لي نفسية العيال ده؟

احنا لازم نحلم ونصدق حلمنا عشان ناخد خطوات لتحقيقه

اذا كانت اسرائيل حلم بيها هرتزل وحققوها مع انها كيان غير شرعي ولا له اي منطق ولا راس ولا رجلين

يبقى الاسهل اننا نرجع الوضع على شكله الطبيعي

انتش يا بتش داخلة تعقدي لي العيال؟

BeLiEvEr said...

انا معجب برد أنونيمس قوى
انت/انتى جبت من الآخر بصراحة
:-)))

معلش يا نوارة، بس دى الحقيقة
بلا وكسة

Unknown said...

بص يا بليفر

هو احنا طول ما بنتكلم كما هو سالف في التعليقات

يبقى ح نتوكس زي ما انت والانونيمس بتقول
ليه؟ لاننا فنجرية بق

مش عيب ان الانسان يتعلم من عدوه مدام عدوه فالح وهو خايب

لو قريت الدولة اليهودية لهرتزل ح تلاقي ان الراجل كاتب كلام تقول عليه ايه؟ ملاك ينقصه الجناحين؟
بيصوصو يا اخواتي
وبيتكلم عن السلام والمحبة ووووو
بس جبت كام كتاب تأليف اسرائيليين ح تعرف ان هرتزل كان بيتكلم بالشفرة
وان فيه جمل مسقطة في النص خارج السياق ومش مفهومة للناس العادية لكن المتعود على قراية النصوص الاسرائيلية ح يفهمها

انا ارجو من الجميع انه يجيب كتاب هرتزل اللي اسمه الدولة اليهودية
يقراه مرة عادي
وبعدين يرجع يقراه تاني وهو بيدور على الجمل اللي بتتحط في كل برجراف من غير معنى ومالهاش علاقة باللي قبلها ولا اللي بعدها
ويطلعها ويجعمهم كلهم مع بعض ح يلاقي فكرة دولة اسرائيل على ماهي عليه دلوقت حالا من انها قوة باطشة عسكرية استيطانية ترفض اي حد غير يهودي وتستحل دمه

بس هو مش قايل كده
جمع الجمل اللي مالهاش لازم في السياقات وانت تلاقي الكلام ده

بروتوكلات حكماء صهيون اللي لحد النهاردة ناس مننا عمالين يقولوا ما تقولوش عليها يهودية دي عنصرية اللي الفها النازي عشان يبرر قتل اليهود

طيب
واقع الامر ان البروتوكولات بتتنفذ بالحرف في الكيان الصهيوني صح؟

سواء اللي الفها يهود صهاينة
او اللي الفها نازيين
في الحالتين دولة اسرائيل مرتبطة ارتباط وثيق بالبروتوكولات وبتطبقها بالحرف
اذا كان النازيين هم اللي كاتبينها
يبقى تحليل الست المجنونة ام شعر صح
وتبقى اسرائيل مشروع نازي لعزل اليهود
في كل الاحوال
اسرئيل = بروتوكولات حكماء صهيون

طيب
لحد هذه اللحظة اسرائيل بتقول مالناش دعوة بالبروتوكولات دي وما نعرفش عنها حاجة

يقتلوا العيال ويقولوا
we don't want to see anybody be killed

يبنوا جدار فصل عنصري ويقولوا

we want peace and coexistance

يعملوا مفاعل نووي ويمتلكوا اسلحة محرمة دوليا ويقولوا احنا خايفين احنا مضطهدين احنا مساكين احنا متهددين

يدوا اوامر لعيال عندهم 19 سنة انهم يضربوا الرضع في راسهم ويقولوا: عايزين يمحونا من على الخريطة
بيهددونا
لو العرب تخلوا عن سلاحهم (اللي هو بمب العيد بتاع حماس) ح يبقى فيه سلام
لكن لو اسرائيل تخلت عن سلاحها (اللي هو نووي) مش ح يبقى فيه اسرائيل
احنا مهددين
كل الناس عدويني
نافع هو اللي بيحبني
نافع هو خطيبي

احنا بقى

بنرغي ليه؟
قاعدين على المؤخرة ويوم ما ربنا يكرمنا نعمل اسلحة هوم ميد ونقول: ح نمحي اسرائيل من الخريطة
ح نموتهم
ح نقتلهم
ح نفطسهم
ح نرميهم في البحر


ليه؟
ليه؟
ما نتكتم بقى
ما نخرس خالص
ايه الجياص اللي عمالين نجيصه ده؟

ليه ما نستغلش سلاح حماس بوسيلة مربحة اكتر من كده

ضعف سلاح حماس ممكن يبقى نقطة قوة ننطلق منها لو شغلنا مخنا شوية

ليه حماس تكتب في منشورها حديث الشجر والحجر؟ يعني هوالحديث ده سر؟ فيه حد فينا مش عارفه؟
ما اللي يهمهم يعرفوه عارفينه

لك لك لك لك لك لك لك لك

هس بقى

ليه اللي بيدافع عن المقاومة ما يقولش الحقيقة بدل ما ينفجر بق؟

الواقع والحقيقة ان حماس مش عايزة تموت من غير كرامة
وانها بتغزل برجل حمار وقدراتها ضعيفة جدا ومع ذلك بتدافع عن نفسها بالقدرات الضعيفة دي

الصورة دي فوق انها هي الحقيقة مؤثرة جدا لاي انسان
don't go down without a fight

صورة المستضعف المغبون المظلوم اللي رافض يركع بدون مقاومة ولو ضعيفة
هي الحقيقة
وهي المؤثرة لان ده وضع انساني

طيب ليه التهجيص بقى؟
الواحد ينفع يهجص لو ده ح يخدمه في قضيته

لكن يهجص ويضر نفسه؟

ما تقدااااااااارش

يا ولد ده انا لولا صوتك ما كنتش شفتك
ما نحترم نفسنا بقى ونبطل فنجرة بق

انا مش باطلب من اي حد انه يكدب زي ما اسرائيل بتكدب

انا كل اللي طالباه توصيف حقيقي للوضع بدل الفتونة اللي مالهاش لازمة وبتضر مش بتنفع

احمد شوقي في وصف الشعوب قال:

ياله من ببغاء عقله في اذنيه

لما نمشي نقول ح نموت ونكسر وندبح ونعض وننطح
ونمحي ونرمي في البحر

واحنا حقيقي مش بنعمل كده ولا في امكانا نعمل كده

الناس كلها بتصدق اللي بنقوله مش اللي بنعمله

مافيش غير قلة قليلة زي ناعوم تشومسكي او فيليب سلاتر هم اللي بيصدقوا اللي بيشوفوه مش اللي بيسمعوه

ودي ناس نادرة بدليل ان تشومسكي من كبار المفكرين في العالم
لو انسان عادي مش ح يشوف اللي تشومسكي شايفه
ح يصدق اللي بيتقال له وخلاص

حان الوقت اننا نغير خطابنا خالص

مش بالكدب
مش بادعاء المسكنة
لان حقيقي وانا اسفة اني اقول كده

احنا مساكين فعلا ونصعب على الكلب الاعور الحزين

نقول الحقيقة بس

BmBm said...

يا عم بيليفر
احنا مش بنتكلم على اللى فى إيدينا
احنا بنتكلم على الهدف اللى المفروض الناس تشتغل عشانه
لو على الوضع الحالى، يبقى الاختيار الأخير هو الأكثر واقعية ، و هو أن يهجر العرب من فلسطين.
على فكرة فيه ناس فينا بتتكلم على الموضوع ده بجد، واحد صاحبى مرة قال "الفلسطينيين دول يعنى يحصلهم إيه لو سابوا فلسطين دى و قعدوا فى أى حتة ياكلوا و يخلفوا و خلاص، بلا دولة بلا صداع"
طبعا أنا قلتله ان ده تفكير حيوانات، و اتخانقنا مع بعض، بس مش ده موضوعنا.
الموضوع ان فيه ناس كتير شايفة ان الصراع هو المشكلة اللى عايزه حل، و ده يبان قوى فى عنوان الاسفتاء بتاع عمرو.
لكن أنا شايف ان المشكلة مش فى الصراع، المشكلة فى احتلال أرض فلسطين من قبل الصهاينة، هو ده اللى المفروض ندورله على حل.
نقطة تانية بالنسبة للأخ عمرو غريبة، ان انا حاسس ان اختياراته اللى حاططها خبيثة، محطوطة بطريقة بتقول "يا ترى انت إسلامى متخلف من بتوع الذمة و السبى، ولا انت قومجى عروبى حنجورى ذاهب لا محالة إلى مزبلة التاريخ، ولا انت ليبرالى ديمقراطى متفتح جميل (لاحظى وضع كلمة "ديمقراطية " من غير داعى فى الخيار، مع ان كان كفاية يقول "دولة ثنائية القومية" مثلا، و لاحظى ان كلمة ديمقراطية بقت زى الحق و الخير و الجمال كده، ما دخلت فى شىء إلا زانته، و ما انتزعت من شىء إلا شانته) و باقى الخيارات محطوطة برو عتب كده.
حاجة تالتة، انه وصف المخالفين له فى الرأى بأنهم "جحافل العنصرية المضادة" ، معلش يعنى، اللهجة دى مش محترمة، انت عنصرى ، انت انهزامى، انت متخلف، انت عميل، انت رجعى ، انت دارونى

الاتهامات مافيش أسهل منها.

شكرا عل سعة صدرك.
المشكلة ان انا بدأت موجه كلامى لبيليفر و نهيته مخاطبا نوارة، مش مهم ، شكلى سرحت، لكن هنمشيها أسلوب بلاغى ، كان اسمه إيه؟......
آه الالتفات.