تحديث:
عزيزي الجيش... ده الجواب الرابع من بعد الاشواق والمحبة.. اليكم ما هو آت
أنا واخدة بالي إن فيه شوية فوء تساهم، والخيوط اتكعبلت على بعضها... ولابد من كل بد نفك الخيوط من بعضيها
أولا:
فيه فرق بين إني أتعامل مع عدو زي مبارك اللي كان عامل خطة لهدم مصر وكسر نفس الشعب المصري، وأمن الدولة اللي كان بيتجسس على الجيش لصالح السي آي إيه، وبين إني أتعامل مع حبيب زي المجلس العسكري ووزارة عصام شرف، منكن اللي احنا نختلف، وصوتنا يعلا بس يبقى زي نرفزة الملاعب.. انا وينج شمال وعمالة اباصي لك الكورة وانت كل شوية تجيبها في العارضة، بس في النهاية انت فرود الفريق، مش حالعب من غير فرود، لكن ينفع اقولك: ايه يا اخي؟ ده انا مديها لك لوزة مقشرة.. ببطن رجلك في الجون على طول، بتشوط عالي ليه؟ انت نايم؟
فأرجو إن ده يكون واضح بالنوسبة للمشير والمجلس العسكري وحكومة عصام شرف... مدام بقى حطيتوا نفسكم فراودة يبقى تتقبلوا نرفزة الملاعب وما تزعلوش
وأرجو إن ده كمان يكون واضح لبعض النشطاء اللي عاملين زي المعزة اللي انطلقت على غيط برسيم... كلي على قد بطنك عشان ما ترجعيش، هو مش استخسار.. البرسيم موجود حيروح فين؟ لما تجوعي تاكلي تاني
ثانيا:
انا شخصيا واخدة بالي من الملف الخارجي اللي فيه ناس كتير مش شايفاه.. ومبسوطة منه جدا، وشاكرة جدا جدا جدا، ومنتشية جدا جدا جدا ان المشير بنفسه عامل لنا كرامة في العلاقات الدولية اخيرا بعد ما كنا ملطشة الكون
بس لزمن ولابد كل واحد يحط نفسه مكان التاني عشان يفهم هو بيعمل كده ليه؟ لإن فيه فوء تساهم آخر حاجة
لما المعزة تحط نفسها مكان الفرود حتشوف الآتي:
أنا بقالي تلاتين سنة مهمش، ملف الأمن القومي مسحوب مني وعوكل وأطاطا وكركر وكتكوت نازلين عك لحد ما قسموا لنا السودان، وبوظوا لنا علاقتنا مع دول منابع النيل، وخربوا لنا الدنيا مع المغرب العربي، وخلونا دلاديل امريكا واسرائيل، ودخلونا في خناقات مع قوى اقليمية من غير مبرر واضح وخلونا عبرة لكل من يعتبر.. وبقالي تلاتين سنة قاعد الطم على وشي من المصايب اللي بتتحصل أو عشان نكون واضحين من سنة 86 وانا بالطم على وشي من العك اللي بيحصل، وليا معاركي اللي عمال اخوضها، والضغوط اللي عمال اقاومها، وعمال اسايس حصاني عشان على الاقل احافظ على كيان القوات المسلحة ككيان وطني مهمته حماية الوطن والشعب وما اورطش نفسي في مصايب سودا تخلي مؤسستي تخترق واتحول لمرتزق زي ما حصل مع جيوش عربية حواليا كتير ولولا إني عمال اريح ده في الكلام، واخد ده على قد عقله، واصهين على ده، وافوت لده كان زماني دلوقت اتفكيت من بعضي وتحولت لميليشيات او على احسن تقدير كنت بقيت فيلق في جيش امريكا تقول لي ادبح يا زكي قدرة يدبح زكي قدرة.. جات الحمد لله الثورة قامت وانا في دماغي كلام وخطط وحاجات ومحتاجات، وما صدقت بقى احقق كل احلامي، ايوة بقى يا جدع، خلاص بقى، اخدت وضعي تاني بقى وحاعمل اللي في بالي وارجع لمصر كرامتها الخارجية واظبط اموري واشم نفسي وكدهون بقى، واول رسالة ابعتها اني اعدي سفينتين ايرانيتين عشان اقول لامريكا: خلاص بقى.. الثورة قامت يا قطة. واركن دبابتها واركب الدبابة الروسي، وتيجي تزورني احرق لها دمها وتخرج تسب وتلعن، وما اشاركهاش غير في الحاجات اللي تخدم مصالحي وبس زي مساعدة الثوار الليبيين، والحق ملف النيل ده اللي حيخرب الدنيا على دماغنا، واقابل الرئيس التركي، واعمل كرامة بقى لبلدي
من وجهة نظر المعزة:
والله كتر خيرك، وعلى عيني وراسي، بس حضرتك عمال تدهن العمارة من برة وتحط قصاري زرع وتصلح مواسير المية وكابلات الكهربا والبيت من جوة لسه حاوي تعابين وعقارب وسحالي وصراصير.. طب بالنسبة لي انا كمعزة يعني قاعدة مقيمة مع تعابين هنا، مافيش مجال للتأجيل يعني، طب على الاقل اجل التعامل مع التعابين الصغيرة واضرب لي التعابين الكوبرا الاساسية يا حترجع تلاقيني اتقتلت وانت مشغول تصلح السباكة والكهربا وتبيض العمارة من برة.. والله انا موافقة جدا ان السباكة والكهربا مهمين، والتعابين اساسا كبرت وسمنت في بيئة المجاري الطافحة والنور المقطوع.. بس حافضل عايشة مع تعابين؟ ده انا معزة غلبانة يعني، فأنا مش باقولك ما تصلحش السباكة، انما الموضوع مش محتاج كل التأجيل ده، شاكوش وتخش بيه على التعابين الكبار الاساسية ودب دب دب على دماغهم، ويا سيدي التعابين الصغيرة انا ابقى اخد بالي منهم... عداني العيب؟
جيت بقى انا لما لقيت المعزة خايفة من التعابين رحت حابسها في الاودة: بصي، بما ان البيت مليان تعابين، فخلاص بقى، خليكي انت هنا وما تنزليش مظاهرات تاني بقى احسن التعابين تسرح عليكي تعضك
يوه...
بالذمة ده كلام يا ناس؟
يا جدعان هي كيميا، صفوت الشريف وفتحي سرور وزكريا عزمي يلبسوا البدلة الزرقا، وعمر سليمان مش عايزين تلبسوه البدلة الزرقا - لأنه الشهادة لله ملفه لو اتفتح حيلبس البدلة الحمرا مش الزرقا - يبقى على الاقل هو اللي يتحبس في الاودة مش المعزة، المعزة عملت ايه بس؟ دي غلبانة، وبتحبك، وزعلانة وواخدة على خاطرها من العشم.
فيه ناس بتقول انها مش فاهمة تصرفات المجلس العسكري وانا مش فاهمة هم مش فاهمين ليه؟ مافيش اوضح من تصرفاتهم
المجلس العسكري زي اي عسكري في الدنيا بيتعامل مع مصر كخريطة وحدود وموارد
اولولياته الأمن القومي، والاستقرار الاقتصادي. ليه؟ عشان هو كده، اي بلد في الدنيا قايمة على كده، أمن قومي يعني ايه؟ يعني لازم يغير كل سياسات مبارك اللي فاتت تماما، ما ينفعش يبقى ولاية امريكية، ولا ينفع يتخانق مع امريكا، لأن لنا مصالح، ومش من مصالحنا اننا تابعين لها، ولا من مصالحنا اننا ندب معاها خناقة، ما هي بتساعدنا في ملف الحدود الغربية اهي، ما ينفعش يسيب منابع النيل، ما ينفعش يسيب القذافي يبرطع، جنبي وحش كاسر على الشرق مش عايز احاربه ومش عايز اسيبه يخترق البلد كمان، وده عدو.
كمان الاجهزة فرطت من بعض، فلول النظام البائد، ومراكز القوى اللي هو كان معتمد عليها، وبعض الاجهزة زي امن الدولة، متعاملين مع اجهزة استخبارات اجنبية، ودلوقت مصر دخل فيها كل الناس من كل ناحية، مش ناقص غير اندونسيا تبعت لنا جواسيس وتجند ناس
فطبيعي هو مش عايز مظاهرات فئوية عشان عايز البلد تشتغل يقوم يلاقي ركيزة اقتصادية يرتكن عليها والدولة ما تتهدش، وطبيعي مش عايز ياخد خطوات واسعة في المحاكمات، بمعنى إنه مش عايز يهجم على الكوبرا مرة واحدة، عايز يتسلل لها ويجي لها من اليمين والشمال عشان يعرف يمسكها المسكة الصح لإنه لو خضها وهجم عليها حتهيج وتموت كل اللي في البيت
ده مفهوم
يمكن انا شخصيا مش موافقة على التكتيك ده، ويمكن ناس كتير مش موافقة على التكتيك ده، أغلبية الناس مش موافقين الحقيقة، والا ما كانتش حتبقى مليونية امبارح، لإن احنا وينج شمال ويمين عمالين نباصي نباصي نباصي ومش شايفين اي سبب ان الفرود يقعد يرقص... ما تشوط يا اخي، وبعدين كوبرا كوبرا، ما جنبك اسد اهو، وادي نمر، وادي فيل، وادي فهد... واحنا واخدين بالنا من القرود بس طنشهم دلوقت، اساسا تنطيطهم مش حيبقى له معنى لو نفذت الخطة اللي احنا طالبينها
الشعب اهو اسد ونمر وفيل وفهد وماموث كمان، واي حاجة الكوبرا تهدد بيها احنا رقبينا سدادة، بس نخلص والنبي
فمن ناحية ان تصرفات المجلس العسكري وتأخره مفهومين، فهم مفهومين، لكن مش لازم نكون موافقين على إن ترقيص الكورة كده صح، احنا نقدر نشوط ببطن رجلنا ونجيب الجون الاولاني على الاقل وربنا يحلها في الاربع اجوان الجايين طيب
من ناحية ان الجيش كل لما يشوف مجموعة صغيرة معتصمة ياخدها يحقق معاها لإن عنده معلومات مؤكدة إن استخبارات اجنبية تسللت لداخل مصر وبتجند عناصر صغيرة.. مفهوم ده
ومفهوم إنه بما إنه جيش فدي طريقة تعامله مع البشريات
مفهوم آه.. بس مش مقبول
غلط اللعبة دي.. اللعبة دي حتتسب في إن الفريق التاني ياخد بلم على حسابنا، ما تكعبلش حد وتاخد انذار عشان موقفك ما يضعفش في الملعب
مش مقبول ابدا ان اي مصري يتعذب.. حتى لو جاسوس اسرائيلي ومش حاقول بلطجي. يا سيدي ابسط حاجة، عشان لو هو وحش فعلا ما يطلعش يعمل بطل على قفانا كلنا، ومش حاتكلم عن حقوق الإنسان ولا حاتكلم على اننا عملنا ثورة وقدمنا الف شهيد عشان ماحدش يمد ايده على المصري تاني حتى لو كان مصري وحش
بس بالتعذيب كده انت مش حتاخد اي اعترافات ولا حتوصل لأي معلومات، كان عمر سليمان فلح اللي كان بيعذب بايده
ثم إن كده انت بتدي له فرصة انه يغير الموضوع، يا سيدي افرض هو بلطجي، ولا هو جاسوس، ولا هو من فلول النظام، ولا هو بيشتغل لصالح مخابرات اندونيسيا، حيطلع متعذب وضهره متشرح ومكشوف على عذريته وده كل اللي حيهم الناس، ومش حيبقى فيه مجال من اساسه انك تفتح موضوع إن فيه مندسين ولا فيه بلطجية ولا فيه جواسيس وهم شايفين قدامهم بني ادم متشرح، يبقى كده لا وصلت لمعلومات حقيقية ولا اخدت دعم من ناس ممكن تساعدك وانت بتدور على المندسين. وبعدين ينفع تفضل تشرح في بني ادم لحد ما تكتشف انه بريء زي رامي عصام وعلي صبحي اللي عرفت امبارح انه لما كتب شهادته عن التعذيب فيه حاجات كتير ما رضيش يقولها لإنه وطني ومش عايز يعمل مشاكل بين الجيش والشعب هو بس كل هدفه إنه يوصل شكواه للمجلس العسكري عشان يتحقق مع الناس اللي عذبته؟ ينفع كده يعني؟ طب وليه انا اخلق مرارة جوة ناس بتحبني وحتى بعد ما عذبتها لسه باقية على الود؟ فيه شعب كده يا ناس؟ والله ده الشعب المصري ده لقطة
والجيش المصري لقطة والله العظيم احنا عارفين، وفعلا بيغير على مصر ونفسه يرجع لها كرامتها ووزنها في المنطقة وينورها ويزهزها، بس مصر دي بيت، زي ما لازم السباكة تتصلح، لازم كمان البيت يتنضف
ومش لازم الوينج الشمال والفرود يمسكوا في بعض لإن الفريق التاني كده حيجيب جون فينا، ويمكن لو ضربنا بعض الحكم يطردنا احنا الاتنين ونلعب بتسع لاعبين وتبقى ليلة سودا
ثالثا:
زي ما بتبص على خريطة مصر وعايز ترجع لها حدود الامن القومي بتاعها اللي مبارك ضيعه
لازم تبص على الخريطة الداخلية وتتعامل بقى
دلوقت انت عندك المجموعات الآتية:
1- الشعب.. ده عسل ده، احنا متفقين على الموضوع ده، وهو اللي عمل الثورة وله مطالب
2- الروس الكبيرة الفاسدة في النظام، زي ما قلنا سرور والشريف وعزمي وعمر سليمان، ودول حتحاكمهم يعني حتحاكمهم، الناس كده روحها في مناخيرها وهم بيشكلوا عليها خطر مباشر.. وطبعا الحزب الوطني اللي حيحتحل ويتجمد كل اعضائه ويتمنعوا من الممارسة السياسية والا يبقى كده بتسلم الشعب تسليم اهالي
محاكمة مبارك ومراته اطاطا وجوز المتخلفين عياله كركر وكتكوت واجبة.. بس هم من غير الاربعة اللي فوق دول ما يسووش حاجة، شيل الناب المسموم الاول وبعدين هات لي جوز المتخلفين، وبعدين اطاطا، وبعدين يا سيدي خلي عوكل للآخر بس على الاقل هات لي فلوسه طاه بدل ما عمال تقول لي تبرعوا لأخيكم البورصة يا اهل البر والاحسان
لما الناب المسموم رباعي الابعاد يتشال مش حنشوف المناوي ولا يحيى الجمل... ولا حتى مجموعة المسخناتية اللي مضايقكم
وهو ما ينقلنا للمجموعة التالتة
3- مجموعة الساسة، وهم قسمين، قسم الاخوان، واديكم ظبطوهم، ودول تظبيطهم سهل يا عيني، مجرد ما تجيبهم تقولهم: ما تبس بقى عشان الحر.. حيسكتوا يا عيني لإن طبيعتهم اصلاحية مش ثورية
والقسم الآخر اللي انتوا عارفينهم ومضايقينكم.. آه هم وحشين فعلا، ومسخناتية، وهم اللي هزوا ثقة الناس في الجيش فعلا، وهم اللي جرأوا الناس على المجلس العسكري، وهم اللي لعبوا الفار في عب الناس، وهم اللي تعمدوا انهم ينشروا قراءات تدليسية عشان حاسين ان نايبهم في التورتة مش بيرضي طموحاتهم، كل ده صحيح، وهم دول القرد اللي كنت باتكلم عنه فوق، بس مالكمش حق تقولوا هم اللي بيحركوا الناس
الناس بتحكم بالأفعال، ولما الافعال ما بتبقاش قد كده بيميلوا للتشكك
طيب حل المشكلة دي على صعيدين، انزع فتيل التشكك بإنك تعمل للناس اللي يريحها، ونفذ طلباتهم وانت عندك ثقة فيهم انهم واقفين وراك يسندوك
الصعيد التاني، ما انت حضرتك عارف ان كل واحد فيهم عليه ذلة لا مؤاخذة، ماهو بدل ما تتنرفزوا، وتتعصبوا، وتخشوا المستشفيات، ما تجيبوا س وص وع وتقولوا لهم: بقى هالله هالله ع الجد والجد هالله هالله عليه.. آدي محاضر جلساتكم في السفارة الامريكاني، وادي الكلام اللي قلتوه هناك، وآدي كلامكم عن الجيش المصري اللي يقدمكم لمحكمة عسكرية بتهمة الخيانة العظمى، وادي حسابات الفلوس اللي اخدتوها... ولا هاه؟ احنا عارفين وساكتين، وسكوتنا مش عشان حاجة غير انكم اصلا بتدوا السفارة معلومات غلط، مش لأنكم وطنيين، بس لأنكم فتايين وارزقية، زي ما بتسترزقوا على الشعب وتفتوا له غلط كده، ورايحين السفارة تاخدوا حسنتكم، وبتقولوا لهم الكلام اللي يريحهم، وانتوا عارفين كويس قوي انكم اتكلمتوا عن الجيش المصري، وادعيتوا انكم بتقدموا معلومات، وربنا ما يجعلنا من قطاعين الارزاق، احنا سيبناكم تهوبصوا وتضحكوا على الناس لأننا اصلا عندنا عقيدة "اسرائيل هي العدو.. وامريكا اللي ييجي منها احسن من عينها"، طب بس ايه لزوم بقى الشغل اللي مش تمام ده؟ كل الحنجلة دي عشان عايزينا نضمن لكم مقاعد في البرلمان؟ طب هو احنا كنا ضمنا للاخوان حاجة؟ احنا ضمنا لهم انهم يترشحوا، ونفس الضمانة لكم وورونا شطارتكم، واحنا نحلي لكم بقكم بدل ما تتنططوا على كتافنا وتعملوا مناضلين وخبراء على قفانا واحنا ساكتين لكم من بدري، لايموها احسن ويمين الله نسرب الحاجات دي ونقطعكم من شوية العيال الهبل اللي ماشيين وراكم ونكشفكم قدام السفارة انكم كنتوا بتضحكوا عليهم وابقوا قابلونا بقى لو لقيتوا حد يتف عليكم.. خليكم حلوين كده وبلاش تدليس على الناس، احنا مش طالبين منكم تعملوا دعاية للمجلس العسكري، بس قولوا الحق، والحق ما بينا وما بينكم
اظن سهلة دي... ما تقولوليش ان الفكرة دي ما جاتش في بالكم.. آه، هي ممكن تبقى ما جاتش في بالكم، أنا لاحظت انها ما جاتش في بالكم من حاجة كده حابقى اقولها بعدين.. طب اديني جبتها في بالكم.. عداني العيب؟
4- المجموعة الرابعة اللي هي النشطاء
وانتوا زعلتوهم قوي.. ليه كده؟ هو جزاتهم إنهم بيحبوا بلدهم ومستعدين يموتوا عشانها يقوم يتعمل فيهم كده؟ افرض حتى لو حمقى، حتى لو مجانين، هو وحش ان الانسان يتجنن من كتر ما بيحب بلده وخايف عليها؟ افرض مخدوعين في ناس، معلش، ماهم غلابة، وياما شافوا بهدلة، وبقوا كل ما يشوفوا واحد ببدلة يجيلهم استبحس ويقولوا راجل محترم اهو راجل محترم اهو.. عريس يا بووووويييييي حلو جوي جوي جوي يا بوووووييي
بس ده عشان سنين نفسهم اتكسرت، وزهقوا من البهدلة والمرمطة، ليه تزعلوهم ليه؟ اه مظبوطين على لأ لأ لأ... اتحرموا كتير من قولة لأ.. ومظبوطين على محطة اعتصام اعتصام اعتصام.. ما تسيبهم يفرحوا، دول قاعدين مش شاغلين نفسهم غير ازاي يلبسوا مصر ويخلوها عروسة، وقاعدين يفكروا لها ويفكروا لبكرة حيلبسوها فستان شكله ايه؟ ودايرين على المحلات يدوروا لها على اكسيسوار يليق بيها، ومش كسبانين حاجة من ورا البهدلة دي غير انهم بيحبوا مصر، بدل ما تاخدهم في حضنك وتفرح إن وراك مجندين من الشعب يوم ما تقوم حرب تبقى ضامن ان هم دول اللي حيمشوا على الالغام، تشك فيهم وتضربهم؟ هو كل واد عامل ديل حصان تفتكره جاسوس؟ لا فيه كتير عيال عاملة ديل حصان ورجالة وجدعان ومستعدين يموتوا عشان البلد دي، مش انتوا بس اللي كافحتم طول السنين اللي فاتت عشان تحافظوا على المؤسسة العسكرية من الاختراق ومن الانكسار، هم كمان تعبوا في حياتهم كتير، وكتير عليهم قوي انهم يتعاملوا على انهم عملا.. لو عملا ما كانش بقى ده حالهم
اه بيسخنوا بسرعة، وبيشكوا بسرعة، وساعات كتير يعملوا تصرفات هيستيرية مالهاش لازمة، ويمكن فيه حاجات كتير مش عارفينها، ويمكن شوية جهلة، بس بيحاولوا يحسنوا من نفسهم، وبيحاولوا يعرفوا ويتعلموا وينموا نفسهم، وسخونتهم وشكهم والهيستيريا دي كلها بسبب انهم بيحبوا بلدهم وخايفين عليها وخايفين على الثورة ومش عايزين يرجعوا للي كانوا فيه تاني... دي معاملة يتعاملوها؟
لأ
لأ
تحايلوهم.. وتريحوهم، واللي هم مش عارفينه تعرفوهولهم، هم مش عيال.. هم رجالة، بنات وشباب.. كلهم رجالة، وقد المسئولية، ومستعدين لأي تضحية، وما هماش صيع وغاويين نوم في الشارع، وماهماش دعارة، والبنات اللي نايمة في الشارع دول مش مالهمش اهل.. دي ناس شرفا، وحافظوا على شرفهم الوطني تحت حكم مبارك زي ما انتوا حافظتم على شرفكم العسكري تحت حكم مبارك برضه
اول حاجة تتعمل ان المجلس العسكري بنفسه يطلب من كل اللي اتعرض للتعذيب انه يقابلهم كلهم، ويسمع شكواهم، كلهم كلهم كلهم، ما يناموش مقهورين كده وقلبهم واجعهم وحاسين انهم اتهانوا عشان بيحبوا بلدهم، المفروض يتكافئوا، وهم مش عايزين مكافأة، هم عايزين يشوفوا مصر عروسة وبكرة عريس، واللي مد ايده عليهم تتقطع ايده، وده يحصل بشكل عاجل.. حرام.. حرام.. حرام. ليه كده؟
ثم خلاص، انتوا مش كركبتوا بطن الناس وحكمتوا عليهم عسكري في خمستلاف قضية؟
خلاص بقى.. مش حيعملوا كده تاني، اعملوا عفو عام.. عن الخمستلاف واحد.. آه، عفو عام حتى لو كانوا بلطجية
معلش... معلش... ما البلطجي ده يا بلطج عشان جعان يا بلطج عشان مزقوق
لو مزقوق يبقى مش ذنبه، ذنب اللي زقه، هات اللي زقه وحطه في سجن عسكري ولا في ماسورة مجاري حتى
والجعان تصدق عليه، انشالله تشغله في الجيش عندك يخدم مجند سنة، مش هم خمستلاف واحد؟ شيل الحكم العسكري من عليه وخليه يخدم في الجيش انشالله عسكري مراسلة
وكفاية الرعب اللي شافوه وهم بيتحاكموا عسكري، مش حيعملوا كده تاني ابدا
الناس غلابة.. الناس غلابة..
والنشطاء اللي اتعذبوا يطيب خاطرهم، من المجلس العسكري نفسه، او حتى من المشير ذاته، يقابلهم، ويسمعهم واحد واحد، ويعاقب اللي عمل فيهم كده، وكانت خطوة حلوة جدا من الجيش انه امبارح سحب الدبابات والرسالة وصلت، واحنا شاكرين على الرسالة العاطفية دي، بس انا شخصيا مش حانام مرتاحة الا كل واحد اتعرض لتعذيب يتقال له حقك علينا على الاقل، وكل واحد مد ايده على مصري يتدور مكتب على الاقل
وفين عمرو البحيري؟
عمل ايه عمرو البحيري؟ اشمعنى ده اللي ماحدش بيسأل فيه مهما قلنا؟ هو عمل ايه لده كله؟
مع خالص حبي واحترامي
قلبين وسهم
شكرا لساعي البريد
-----------------------
بالنوسبة بقى للنشطاء
ربنا يهديكم.. بلاش حماقة
على رأي احمد رجب امبارح قال لي: كل واحد يجيب ورقة يقسمها نصين ويكتب على اليمين مميزات المجلس العسكري وعلى الشمال عيوبه ولو هو منصف المميزات حتطلع اكتر من العيوب بكتير.. هو انتوا اتظبطوا على محطة اي حد كبير تقلوا ادبكم عليه؟
نقد المجلس وقيادته كحاكم سياسي حاجة، واحترام الشرف العسكري لناس جميلها على راسنا من فوق انهم حافظوا لنا على جيش وطني ومحترم دي حاجة تانية
ايه قلة الاصل دي؟ انتوا حكم 41 سنة منايفة علمكم تقلوا اصلكم مع الناس كده؟ الجيش المصري ده المفروض انه كان يبقى اول جيش عربي ينهار لأن مصر اول الموقعين على اتفاقية مع اسرائيل، ولولا ربنا سترها معانا، ولولا القيادات عرفت تسايس مبارك وعملت معاه مقايضات كتير في مقابل انه يسيبها جيش مصر الوطني كان زمانا متبهدلين دلوقت
طلبات الثورة لازم تتحقق
واللي عايزه الشعب هو اللي يتعمل
ومافيش انسان يمد ايده على مصري تحت اي ظرف
والتظاهر حق من حقوق الانسان
واحنا مدنيين مش عسكريين عشان نتعامل المعاملة دي
واحنا ناس شرفا ومخلصين لبلدنا ما يصحش حد يحسسنا اننا عملا
كل ده على راسي على راسي على راسي.. وحقكم وانتوا دافعين تمنه من قبل الثورة
بس دي قيادات الجيش اللي مبارك وعمر سليمان وامريكا واسرائيل كانوا عايزين يغيروا عقيدتهم والعسار قال لهم خدوا معونتكم وبالسلامة، دي قيادات الجيش اللي طلب منها انها تحارب ايران والمشير قال لهم احنا مش مرتزقة، دي قيادات الجيش اللي قعدوا يعملوا البدع وينيموا في مبارك، وياخدوا الامريكان على قد عقلهم عشان يحتفظوا بمؤسسة عسكرية تضمن لنا ان لما القائد الاعلى يقول اضربوا الشعب يقولوا له: حننتحر انتحار جماعي كلنا من اكبر قيادة لأصغر عسكري
ده المشير اللي لما كلموه من ميدان التحرير وقالوا له القائد الاعلى بيقول لنا نسوي الميدان بالأرض قالهم: طب انا نازل التحرير انسفوه وانا فيه.. واسألوا اي ظابط جيش كان حاضر الواقعة، وافراد الجيش اول ما شافوه قعدوا يعيطوا من التأثر
ده المشير اللي عفا عن تلات ظباط ورجعهم شغلهم وهم عاملين حاجة اي جيش في الدنيا ما كانش فوتها لهم
وما تستعبطش وتقول ده واجبه، لأن ده واجبه صحيح، بس ده معناه انه الوحيد اللي كان بيعمل واجبه في البلد دي، وفي الحالة دي يبقى الوحيد اللي يستاهل الشكر
انتوا مش اطفال عشان يبقى ماما حلوة.. يأ يأ يأ.. ماما وحثة وحثة وحثة
وبعدين بلاش غباوة وتخسر نفسك قضيتك، ماهو زي لما الشرطة العسكرية تعذب عاطل في باطل فكده هي مش حتعرف فعلا تمسك اللي بيشتغل مع مخابرات اجنبية ويخسروا نفسهم قضيتهم لأن طبيعي الناس تدي الاولوية للتعذيب لأن مافيش انسان يستاهل التعذيب ولو كان جاسوس
انت كمان بتخسر نفسك قضيتك بأنك تقل ادبك وتتصرف بحماقة، ماهو انت لما تتعامل مع الجيش والمجلس العسكري والمشير طنطاوي على انه زيه زي مبارك، حتكون النتيجة انك تدي فرصة لحد يقول: طب على كده مبارك ممكن يكون كان مظلوم، اذا ناس دي مش عاجبها الجيش اللي بيحميها، ومش عاجبها ناس وطنية مستعدة تسمع لها، وبتعمل لهم اللي هم عايزينه، قالوا شيلوا الرئيس شالوهولهم، قالوا شيلوا رئيس الوزرا شالوهولهم، قالوا عايزين استفتاء عملوه، طلعت النتيجة مش عاجباهم راحوا عاملين لهم اعلان دستوري زي ما هم عايزين، راحوا قالوا الاعلان الدستوري وحش، لا بقى.. دول كانوا بيفتروا على مبارك بقى مدام هم كده..
والنتيجة مش حتكون ان مبارك يرجع، ممكن جدا ناس كتير تنتخب شفيق لأن انتم بتصوروا نفسكم على انكم ناس عوجين ومش عاجبكم حاجة فتخلوا الناس تتعاطف مع اي حد انتوا ضده، ويبقى "شفيق كان مظلوم على كده.. ادي اخرة الدلع، فضلوا يسمعوا كلامهم لحد ما نسيوا نفسهم وبقوا يتكلموا عن المشير"
الجملة دي انا سمعتها نصا من اكتر من حد
وعمالين الفجوة تزيد بينكم وبين الشارع.. والناس رايها فيكم ان اللي يوضيكم زي اللي ينجسكم ومش عارفين العدو من الحبيب وبس عندكم عقدة من نموذج الاب واي راجل كبير في السن عايزين تهزأوه
وورطتوا الشارع في مشكلة اخلاقية لما خليتوهم ابتدوا يبرروا التعذيب
دي طريقة تعامل غلط.. برضه حييجي بلم فيكم كده
وآخرتها واحد امبارح يقول لي على التويتر انت عميلة الجيش المصري؟ لا كده كيميا المخ حصل فيها حاجة بجد، وانا مقدرة والله الصدمات اللي مريتوا بيها، والمعاناة اللي عانيتوها، والتضحيات اللي قدمتوها، وما كانش عشمكم ابدا ان يتعمل فيكم كده، مقدرة والله، بس لما توصل اللخبطة في كيميا المخ لأن حد يقول لي انت عميلة للجيش المصري
آه.. وجاسوسة للشعب المصري، وباقف لما باسمع النشيد الوطني، وظبطوني اكتر من مرة في وضع مخل وانا بابوس العلم المصري وباكحل بيه عيني، وللأسف تم تجنيدي عبر كتاب التربية الوطنية اللي كنت باخده في اعدادي... مهزلة ... مهزلة
لأ... نعقل بقى عشان ما نفقدش مصداقيتنا، ونضر بلدنا، ونجهض ثورتنا
انتوا عارفين انتوا بتعملوا ايه؟
انتوا اي حد بيخدمكم لوجه الله بتشتموه، شتمتوا طارق البشري عشان قبل يعمل لكم تعديلات الدستور، وكان يقدر يتعذر ويقعد ينتقد وينفسن على اللجنة زي ما اللي القضاة اللي ما تمش اختيارهم قعدوا ينفسنوا على اللجنة، ولو كانت القوات المسلحة اختارتهم ما كانوش قالوا كل القرف اللي قالوه ده
شتمتوا المجلس العسكري والمشير طنطاوي اللي مبارك قال له انت غدرت بيا وانا اللي عملتك قال له: مصر اللي عملتني وعملتك.. وساند ثورتكم
شتمتوا عصام شرف اللي انتوا نفسكم مختارينه
عارفين اخرتها ايه؟ اخرتها واحد زي عمرو موسى ياخدكم على عقلكم، ويقول لكم كلام يريحكم، وفي الاخر يعمل اللي يخدم مصالحه هو مش مصالحكم
النقد حاجة وقلة الادب حاجة تانية والتخوين حاجة تالتة، اذا كنتوا زعلانين ان المجلس بيشك فيكم، انتوا كمان بتشكوا فيه.. عيب كده، هو كان عليه من ده بإيه؟
كل المطالب صح... وكل الاسلوب غلط.. ليه بقى الغباوة دي؟ يعني اقعد اعمل صينية بطاطس باللحمة واتعب نفسي وقبل ما احطها على السفرة اتف فيها؟
وبرضه المجلس العسكري مفروض يريحهم ويقول لهم اللي يطمنهم بدل الغموض ده، بالنسبة لي الامور مش غامضة انا قادرة اشوفها كويس لأني باحط نفسي مكان كل واحد، بس فيه ناس محتاجة الكلام يتقال لها بوضوح، مش عشان اغبيا، عشان قلقانة... هو غلطهم انهم قلقانين على بلدهم؟ يعني لو قعدوا على الكورنيش يحبوا في بعض ويسمعوا تامر حسني كده بقوا كويسين؟
