ليه الناس ما اتحركتش بعد الغلا؟

عشان اسباب كتير منها الضربة الجامدة على الدماغ وعدم الاستيعاب وفشل اضراب اربعة مايو، مع انهم هم اللي فشلوه يا عيني لما انضحك عليهم بكلمتين حلوين، بس الاهم من ده كله ان المصريين ولاد لذين بيعرفوا يتصرفوا
المشكلة الحقيقية انهم بيعرفوا يتصرفوا، تحت اي ظرف بيتصرفوا، وكل مصري شايل على كتفه مصري تاني وماشي بيه
وكل واحد بيعرف يقلب رزقه ويمشي حاله، يمشيها عرجة، يمشيها بتزك، يمشيها شوية ويريحها شوية، يجرها بحبل
المهم انها بتمشي في الاخر وطول ماهي ماشية باي طريقة مش بيتحركوا، ومش ح يتحركوا دلوقت يا شباب ابوس ايديكوا اهدوا عليهم شوية الناس غلابة، انا عمالة الف على الريدر مش ممكن كم الشتيمة في المصريين ده حرام عليكوا ارحموا الناس عشان ربنا يرحمكوا
هم دلوقت مشغولين بيفكروا ح يمشوها ازاي، مش ح يعترضوا ازاي، وهم بيفكروا بالطريقة دي مش عشان سلبيين ولا عشان مدمنين خوازيق ووووووكل الكلام اللي مالوش لازمة ده، بس عشان كل واحد عنده كوم لحم عايز يتنيل ياكل ويلبس ويتعلم، وهم عايزين يحلوا في الوقت الحالي ماعندهمش طاقة يتخانقوا
مش بيتخانقوا الا لما بتقفل زي الدومنة وتبقى لا بتزك ولا حتى عايزة تتجر
واللحظة دي جاية جاية، وجاية قريب قوي واقرب مما تتخيلوا الناس مش ح تعرف تعيش، ادوهم شهر واحد بس، عشان يسمعوكوا، هم دلوقت مش سامعين هم دماغهم حواليها دواير ونجوم وعينيهم محولة، شهر واحد بس

ابو الغيط

بصوا لعينيه..عمركوا شفتوا نظرة غباء بالشكل ده؟

لا والنبي...بجد بصوا..شايفين نظرة عينيه؟

الراجل ده كان حاضر اجتماع وزراء الخارجية ساعة ما السنيورة الامورة كان بيعيط إهئ إهئ
بس الشهادة لله كلنا اتأثرنا وعيطنا على عياطه، حتى وزير الخارجية الاماراتي والمغربي كانوا قاعدين بيعيطوا
وكل وزراء الخارجية متأثرين....الا ده...كان في عينيه نفس النظرة دي وتحس انه مش فاهم هو فيه ايه
واحلق شنب وليد جنبلاط ان ما كان في اخر الجلسة سأل السنيورة: هو فيه حد قريبك مات في الحرب دي وللا حاجة؟

اضحك اضحك
احلق شنب سمير جعجع ان ما كانت الولية بتضحك على غباوتك

اتهدوا بقى وبطلوا فضايح خارجية

دلوقت احنا كلنا عارفين ان الحكومة المصرية منقسمة على نفسها، هي الحقيقة مش منقسمة على نفسها هم الظاهر ماحدش فيهم بيتكلم مع التاني كل واحد بيهوبص لوحده، وكل واحد يدي تصريحات لوحده واحنا عارفين كده وستر وغطا على بعض ومستحملين حنفي وام حميدو عمالين يلعبوا بينا الكورة وخلاص
طب بتتدخلوا في الازمة اللبنانية وتفضحونا ليه، واحد من الخارجية المصرية يقول: ده شأن داخلي واحنا مش ناويين نتدخل
قبلها كان ابو الغيظ فقع كام ظرطة وقال مصر لن تسمح بتدخل ايران في لبنان، ولما مسئول في الخارجية اتسأل ايه اللي ابو الغيط بيقوله راح الراجل قال للمذيع اللي انا باقولهولك ده هو اللي ح يحصل احنا مش ح نتدخل
طب ليه الفضايح دي يا برعي ما كل واحد يخليه في نفسيته ما تخلوش الناس تهزأنا
يعني بلاش احرجكوا واقول لكوا قدروا اتدخلتوا ح تعملوا ايه يعني؟ مصر تسمح وللا ما تسمحش، مصر ايه دورها اصلا؟ ما بلاش احراج بقى
طب بلاش، قدر صحينا الصبح والحكومة المصرية كلها اجمعت على مساندة الموالاة اللبنانية، ح تساندها بايه؟ بقملها؟
طب السعودية زكيبة فلوس وبتساند الحريري بالفلوس
امريكا بتساند السنيورة وبتبوسه في بقه وهي القوة العظمى في العالم
اسرائيل بتدي جعجع سلاح
فرنسا بتدعم جنبلاط بالسلاح والفلوس
الاردن اهي مخبر تعرف تنقل لهم اخبار
انما مصر ح تساند اربعتاشر اذار بايه؟ ما تسندوا نفسكوا انتوا قادرين تقفوا؟
لازم تجيبوا لنا التهزيء؟
طب انت يابو الغيط يوم ما قلت ح اقطع رجل الفلسطينيين، اديك بتتشطر على الغلابة اللي مافيش اغلب مننا غيرهم، ومع ذلك حتى دي ما عرفتش تعملها
انت مالك بتحشر نفسك مع امريكا والسعودية واسرائيل وتعمل راسك براسهم وتقول احنا زييهم وبنساند اربعتاشر اذار زيهم؟
ولا حتى تقدر تعمل راسك براس ايران وسوريا
ما تلم نفسك بقى

شهادة لبنانية جداااااااا

ده كلام جو غانم، لبناني جدا، لبناني حتى النخاع، اللي يعرف جو يتهياله انه لو عصره ح يشر كبة ولبنة وفيروز وزياد الرحباني وفتوش وشجر ارز ونسمة هوا مافيش احلى منها في الصيف، وخفة دم لبناني خاصة جدا، جو بقى من الناس اللي، بسم الله ما شاء الله، غريب قوي، تحس انك لو طلعت مخه ح تلاقيه فص الماظ منحوت ومبرود بنظام وترتيب وملفوف بلبيسة حرير معمولة بالكروشيه بمهارة وتنسيق وجمال، وفيها الوان حلوة قوي ما تعرفش توصفها وتقعد تبص لها ومن كتر ما انت معجب بيها خايف تمسكها وبيطلع من الفص المبرود بعناية ومضات ملونة وخاطفة، اه والله، والله كمان مرة ما باب واهل مكة ادرى بشعابها
رد جو على زميل مصري كان عامل شوية ملاحظات على ما يحدث في لبنان، وهو معذور في الملاحظات دي، لان الشأن اللبناني عامل زي جهاز الكمبيوتر اللي مقفول بباسوورد ماحدش يعرفه، وبعدين يطلع في الاخر الباسوورد: تلات خمسات
ودي مدونة جو عشان تشموا ريحة لبنان فيها
وده رأي جو في اللي بيحصل في لبنان دلوقت، لا ده مش رأي، ده شرح، بيفهمنا بالظبط ايه الحكاية، ماحدش بيفهم السياسة جوة لبنان غير اللبنانيين، لان لبنان لها طبيعة خاصة، مش شبه حاجة ولا شبه حد ولا ينفع تقيسها على حد ولا تقيس حد عليها اليكم شرح الموقف من جو غانم واللي مصمم يعمل غبي بقى هو حر القعدة حرية واحنا بلد ديمقراطي زي ما انتوا عارفين ومن حق كل انسان يختار الغباء بالكم والكيف اللي يعجبه:
الأخ الكريم مسلم مصري عليكم السلام أولاً يا ربّ يقدّرني أرد عليك بشكل واضح لأني مش بمزاج المناقشة أبدا و الوضع لم يعد يحتاج أصلا مناقشة عبثية خلصنا منها منذ زمن و لو كان بعض الناس يريدون معرفة الحقائق لعرفوها ببساطة شديدة ..لكني احتراما للمقامة أولاً و أخيرا و من ثم احتراما لشخصك الكريم سأجيبك باختصار ما استطعت : يا أيها الكريم أولاً كل معلومات مغلوطة تماما و ناقصة و أنا لا ألومك لأنه كما قال السيد نصر الله البارحة و كما نعرف نحن لقد صرفت مليارات الدولارات لتشويه صورة المقاومة و المعلومات التي تتبناها حضرتك هي إحدى نتائج هذا الصرف ( غير الصحي ) ـ أنت رميت كلمة كبيرة جدا لا يعرفها أحد غيرك و هي قولك ( ثبت للحكومة أن حزب الله يتجسس عليها بشبكة الإتصالات تلك ) لو انك تعرف القليل القليل عن بيروت و عن طبيعة المقاومة اللبنانية لعرفت أن هذا الكلام هو أضغاث أحلام ..و أنت و الكثيرين لا تكلفون أنفسكم الإستماع للرأي الاخر عندما يشرح موقفه ووجهة نظره فأنت من النهاية تقول : أنا ضد حسن نصرالله ..و تقول انك ضده ليس لأنه شيعي .و أنا أقول لك بوضوح أن أي إنسان يفهم قليلا و يتابع قليلا لمجريات الصراع العربي الصهيوني و دور حزب الله فيه و يتابع ما فعلته و تفعله حكومة الأقزام و التجار و اللصوص و بائعي الخمور و الحشيش هذه ..لكان مع حزب الله قلبا و قالبا ..إلا إنسان واحد ..و هو الإنسان المتعصّب طائفيا ..و أنت تقول انك لست كذلك و أنا لا يحق لي اتهامك بذلك بكل تأكيد . شوف يا أخي الكريم باختصار: ـ حزب الله انتصر في حرب تموز .. لجأت أمريكا و اسرائيل و من ورائهما إلى تشويه سمعة هذا الحزب في العالم العربي و لم تستطع ..كـُشف بشكل قاطع أن بعض و ليس كل أفراد تلك الحكومة كانوا عملاء ميدانيين للإسرائيلين أثناء الحرب و منهم الوزير مروان حمادة وزير الإتصالات الذي أعطى الإسرائيليين بيانات بناء مجمّع سيد الشهداء على أساس أن السيد نصرالله موجود هناك ..و قصفه الإسرائيليين بأكبر كمية قذائف رميت أثناء الحرب ..لنأتي لبعد الحرب الان ..قبل أيام قليلة سرّب الإعلام الإسرائيلي أن عملية كبيرة و نوعية مخابراتية كانت تستهدف تصفية شخصية كبيرة جدا ( السيد نصرالله ) في حزب الله ألغيت في الدقائق الأخيرة لأن حزب الله استطاع كشفها عن طريق مكالمة تلفونية مع عملاء على الأرض ( ربما هذا ما تشير إليه أنت بأنه يتصنت ..و يا عيني اذا كنت زعلان انه كشفها ) و لمعلوماتك ..المكالمة التي اكتشفها حزب الله تم اعتراضها لاسلكيا و ليس عن طريق شبكة الإتصال السلكي ( انتبه ..السلكي) الخاصة بسلاح الإشارة للمقاومة ..و هذا الشكل من اعتراض المكالمات اللاسكية ..تستطيع أي جهة أو حزب لبناني القيام به .ليس حزب الله فقط ..إذن ..كشف الإسرائيليين أن هناك عملية لإغتيال قائده ألغيت في اخر لحظة و كان مشارك بها قوة كوماندوس على الأرض تابعة لأحد الميليشيات اللبنانية ( جماعة وليد جنبلاط ) و أنا لا أعطيك سيناريو من الخيال ..ابحث و ستجد ما تريده .. بعد فشل العملية مباشرة ثارت ثائرة وليد جنبلاط و أجبر فؤاد السنيورة و الحريري على إصدار قرار بإلغاء شبكة الأمان ( شبكة الإتصال) التي تحمي المقاومة و التي عمرها أكثر من عشرين عاما و يعرفون بها و كانوا موافقين عليها طول عمرهم لكن الان الضغوط الأمريكية و الإسرائيلية زادت عليهم للخلاص من نصرالله و المقاومة ..أنت لا تعرف ماذا تعني شبكة الإتصالات تلك ..إنها خطوط سلكية خاصة بالمقاومة لا يستطيع أحد التجسس عليها و تحديد مواقع المقاومين و قادتهم و هذا سر انتصار حزب الله في الحرب على اسرائيل و سر بقاء قادته في مأمن من الإغتيال .. عندما أجردك من غطاء رأسك و أضعك في مرمى النار ..هل ستقول لي سمعا و طاعة؟؟ عندما تكشف مقاومتك للعدو الذي يتربص بها ليل نهار و تجعلها بدون أدنى حماية ..ماذا تريدهم أن يفعلوا ؟ أليس إعلانا بالقتل ؟؟ علاوة على ذلك أن معلومات كشفت أن رئيس جهاز الأمن في حزب وليد جنبلاط كان هو العميل الميداني المباشر الذي كشف الشهيد عماد مغنية و أعطى المعلومات عنه لإسرائيل و استطاعت قتله .. ماذا تريد من هؤلاء أن يفعلوا ؟؟ عندما تأتي غونداليزا رايس إلى بيروت و تقول في عز الحرب أن هذه اللحظات هي ولادة الشرق الأوسط الجديد ..و تعطي و معها الحكومة اللبنانية ) فرصة اسبوع ثم اسبوعين لإسرائيل كي تقضي على اخر مقاوم ..هل تريدنا أن نسلّم أرواحنا لجورج بوش و أولمرت ؟؟ هل هذا يرضيك بما أنك ضد حزب الله لسبب لا يعرف تفسيره إلا الله .و أنت المسلم العربي صاحب القضية التي يحارب و يستشهد لأجلها أبناء حزب الله ؟؟ هل يرضيك أن ترى هؤلاء المقاومين التي فعلت اسرائيل بأهلهم مذابح لا تعد و لا تحصى ..هل تريد أن تراهم في سجون النقب التي أعلن الإسرائيليين أن جهزوها لقادة حزب الله أثناء الحرب على غرار معقتل غوانتانامو؟ أنت لا تعرف ماذا يجري في بيروت ..و لا تعرف هذه الحكومة من تضم و ما هي خلفيات المسيطرين عليها كوليد جنبلاط و سمير جعجع ..عيب علينا أن يكون بيننا مقاومين كهؤلاء و نتركهم عراة أمام أعدائهم الذين هم أعدائنا .. لا أدري ماذا أقول لك .. في الحقيقة كنت اّليت على نفسي ألا أدخل في نقاش لم يعد له جدوى عن المقاومة .. هذه مقاومة يا رجل ؟؟ هل سمعت عن أمة تهين مقاوميها و تتاّمر عليهم و تذلهم ي التاريخ كله ؟؟ أم أنكم لا ترون فيهم سوى أنهم شيعة ؟ شيء مهم سأقوله لك عن أخلاقيات المقاومة اللبنانية و انتبه له جيدا أرجوك ..عندما خرجت اسرائيل من جنوب لبنان مدحورة تركت ورائها اّلاف العملاء الذين كانت سياطهم على رقاب و ظهور أهل الجنوب ..تركتهم في العراء لمصيرهم .. هل تعرف أن حزب الله لم يضرب واحدا منهم كفـّا واحدا؟؟ لم ينتقم من أحد ..بل سلمهم للجيش معززين مكرمين ..لم يفعل كالثورة الفرنسية مثلا التي يتغنون بها .و التي قتلت خمسين ألف فرنسي في أربعة أيام لأنهم كانوا يتعاملون مع العدو .. هذه هي أخلاقيات مقاومتنا .. أما عندما تريد كشف ظهري للعدو و تتاّمر علي في وضح النهار ..ماذا تريدني أن أفعل ؟ هل تظن أننا ملائكة ؟ هم حسبوا حسابا أن حزب الله لديه حساسية عالية و خوف كبير من الفتنة الداخلية و خصوصا الفتنة بين الشيعة و السنة و التي ردعها حزب الله مائة مرة و هم يعيدون جره إليها كي يفقدونه حب الناس له ..و كلما نزلت المعارضة إلى الشارع لتطالب بحقوقها تنزل ميليشيات السلطة و تقتل منهم شبابا ..و حزب الله يقول لا بأس ..أمرنا لله ..لن ننجر إلى الفتنة .. قبل أشهر قليلة قتلوا سبع شباب في منطقة الشيّاح ..و الشباب من حزب الله و كانوا عزّل يتظاهرون لأنهم لا يرون نور الكهرباء سوى كل ثلاثة أيام ساعتين ..بينما مناطق التابعة للحريري و جنبلاط لا تنقطع عنها الكهرباء ..و حزب الله سكت و قال نحن نسلّم أمرنا لله و للقضاء ..و أخيرا؟؟؟ تأتي لتصدر قرار إعدام للمقاومين و قادتهم بتدمير شبكة إتصالاتهم الداخلية التي لا يمكن أن يتجسسوا من خلالها لا على حكومة و لا على سفارة ..لأنها شبكة ممتدة من الضاحية الجنوبية إلى الجنوب أي في مناطق عمليات و انتشار المقاومين ..و هي مصدر أمنهم ..و تقول لي دولة داخل دولة ؟؟ هذه مقاومة ..هل تعرف لماذا توجد المقاومة و ما سبب تواجدها في أي بلد من البلدان ؟ ألا تعرف أن اسرائيل تخرق أجوائنا كل يوم مرات و مرات و لا يتحرك السنيورة و يفتح فمه و يطالب بوقف هذه الخروقات ؟ ألا تعرف أن اسرائيل تدخل مياهنا الإقليمية و تخطف و تقتل صيادينا البسطاء كل يوم ؟؟ هل سمعت السنيورة و أجهزة إعلامه يذكرون ذلك ؟ هل تعرف أن أهل الجنوب محرومين من أبسط حقوق الإنسان منذ عام 67 حتى الان ؟؟و الدولة لا تمنّ عليهم حتى بالكهرباء لخمس ساعات متواصلة ؟ هل تعرف الحرمان الذي يعيشه هؤلاء فقط لأنهم مقاومين و لأنهم داسوا على رقبة اسرائيل ؟؟ حرام عليكم يا أخي .. هناك مشروع صهيوني في المنطقة و مشروع مقاوم .. انظر إلى أهل السنة الشرفاء في لبنان ..مع من واقفين ؟؟ هل تعرف ؟؟ أنا أقول لك .. إن أشرف أشراف السنة من علماء دين و سياسيين ستجدهم على تلفزيون المنار لو تابعته قليلا .. اسمعهم ..و الله العظيم حرام .. عار .. لدينا مقاومة شريفة و نريد حرقها .. هل نحن أمة تستحق الحياة ؟؟ يا أخي هذه المقاومة لا تريد منكم شيئا ..سوى انكم ترحموها فقط .. لا تكونوا أنتم و اسرائيل و أمريكا عليها ..لا يليق بأمة محمد ذلك ـ جو غانم مواطن ليس شيعي و لا سني

احمد ماهر/ المحبوسين/ الحل في الطريق

احمد ماهر شاب له اكاونت على الفيس بوك،
نعم
ايه؟ خلاص...هو ده الخبر، احمد ماهر اتخطف اول امبارح من عربيته واترن علقة عشان عنده اكاونت على الفيس بوك وكانوا عايزين يعرفوا الباسوورد بتاعته
مينا قال لي امبارح الخبر ده، والله ما قالش اكتر من كده، قال لي ان احمد ماهر اتخطف يوم الثلاثاء بالليل، اتخطف، اتخطف، اتخطف
هو احنا عايشين في بلد وللا مع مطاريد الجبل؟
دي حاجة ما يتسكتش عليها لما بني ادم ماشي في الشارع ويتخطف وينضرب وكل جريمته انه عنده اكاونت على الفيس بوك
دي حاجة ما يتسكتش عليها
دي حاجة ما يتسكتش عليها
يا اما احا بقى نهاجر من ام البلد دي
-------
المهم دلوقت المحبوسين، انا ح ادخل على موقع هشام مبارك عشان اعمل قائمة جديدة بالمحبوسين عشان فيه ناس خرجت وناس لسة وكده عايزين نجدد القائمة، مسئوليتنا اننا نعمل حملة لحد ما يخرجوا، وللا احنا نسيناهم؟
------
الحمد لله لبنان في طريقها للحل، كل ما حزب الله ياخد حتة يديها للجيش، والجيش دلوقت اتسلم معظم البلد
الحريري هرب
جنبلاط هرب
جعجع هرب
السنيورة تحت الكرسي غالبا
ياعيني ع الرجالة، طب لما هم غلابة كده، ليه الرغي الكتير؟
وطالع واحد اسمه مصباح الاحدب هو اللي بيتكلم نيابة عن 14 اذار، بس حليوة الصراحة، حليوة وشكله غبي
ههههههههه، اه والله، عارفين اللي بيبقى شكله حلو وغبي؟ افتحوا المنار، لا مش ح تلحقوا ده مشي على طول، مكانه تحت الكرسي مستنيه
عالم ما تجيش غير بالعين الحمرا
عموما الحمد لله الجيش تسلم من حزب الله معظم البلد، زعلان ليه عم الحليوة بقى؟ مش الحريري قال الجيش يتسلم البلد؟ اهو يتسلم البلد
----
ملحوظة اخيرة: ما تقعدوش تبصوا على لبنان وتتجننوا وتقولوا نعمل وقفة احتجاجية، ما تخلوش شكلنا وحش الناس مش مستعدة دلوقت تعمل حاجة، الناس مضروبة على دماغها سيبوهم لما الجوع يعضهم هم ح يتصرفوا، كل بلد ليها ظروفها خلينا في عيالنا اللي في السجن والجدع اللي اتخطف وانضرب ده ونشوف ح نعمل لهم ايه

اما بالنوسبة لنا..استنوا شوية

خلاص بقى غسالة تلاجة، لو كان ح يبقى فيه انتفاضة كانت حصلت
استنوا على الناس شوية هم مش مستوعبين، احنا يبقى تركيزنا دلوقت على المعتقلين نطلعهم ونستنى على الناس
وبطلوا شتيمة في المصريين بقى، بطلوا تقولوا على المصريين مش عارفة ايه، احنا مش ح نقرر لشعب عنده سبعتلاف سنة يعمل ايه وما يعملش ايه ولما ما يمشيش على مزاجنا نشتمه
سيبوا الناس شوية في حالهم الناس تعبانة ومجهدة، واحنا كمان محتاجين نهدا شوية خلاص، اخدنا كلنا القفا وانتهينا
اتهدوا بقى وسيبوا الناس لما يتعضوا قوي هم ح يتصرفوا واحنا معاهم، اللي خايف على البلد يسيب البلد تسيره مش هو اللي يسير البلد
مافيش حاجة ح تتعمل دلوقت وح تنجح ابدا، بس استهلاك للطاقة وترسيخ لليأس والصدمة
صنوا عليهم شوية، وعلى نفسكوا، ارحموا نفسكوا بقى انتوا كمان وكفاية ولولة وندب ندبنا وولولنا وعبرنا عن صدمتنا
كفاية
انا شخصيا ح اهدا شوية

انا خايفة

احنا بنحبك يا لبنان

تضامنوا مع الناس اللي انا ما اعرفش عنهم حاجة

من فترة اتصل بيا استاذ اسمه رامز، وقال لي انه عايز يعمل حملة لمساندة المعوقين وذوي الاحتياجات الخاصة والكلام عن مشاكلهم
وسألني اذا كان ممكن اتضامن معاه وللا لا
قلت له طبعا، بس انا ما عنديش معلومات عن الموضوع ده ولا عندي تصور او فكرة او احصاءات ولا حتى اعرف ايه مشاكلهم
وبما ان حضرتك مطلع على الموضوع ده فانا باقترح عليك انك عليك انك تعمل الاتي:
تعمل مدونة وتكتب عليها المعلومات وانا مستعدة اتبنى الحملة واشرد للبشرية
قال لي ما باعرفش اعمل مدونة قلت له دي زي الايميل قال لي معلش اعذريني انا مش باعرف اعملها ممكن اقابلك
اه قوي قوي
قابلني في استقبال التلفزيون ووراني صورة مشروع مختصر جدااااااااااااا ومصغر جداااااااااااااااااااا ومافيهوش اي معلومات ولا احصاءات ولا حتى تصور عن ايه هي مشاكل ذوي الاحتياجات الخاصة
قلت له طيب هات المشروع انزله عندي في المدونة
قال لي دي نسختي الوحيدة
قلت له طيب اكتبه على الكمبيوتر وابعتهولي على الميل
ما باعرفش اكتب على الكمبيوتر (مع انه سبحان الله عرف يكتب يشتمني في التعليقات)
طب صوره وادهوني
ولا حاجة
لا عايز يعمل مدونة ولا عايز يتعلم يعمل مدونة مع ان اي عيل ماشي في الشارع يعرف يعملها، خصوصا انه عنده ميل وعليه فهو اكيد يعرف يعمل اكاونت للمدونة
ولا عايز يديني معلومات ولا مستندات ولا مشروع
وعايزني اتبنى قضية ما اعرفش عنها حاجة خالص
وكل شوية اقبالك
مرة قابلته في التلفزيون
ومرة قابلته في نقابة الصحفيين
وكل مرة يقول نفس الكلام واقول له نفس الكلام
اديني معلومات
طب ابعتها لي
طب صور الورق اللي عندك واديهولي
كل ده مش ممكن وما اعرفش وما اقدرش والاعذار واهية
وفي الاخر دخل لي المدونة كتب لي كلام مالوش راس ولا رجلين عن اني باتخلي عن اللي بيطلب مساعدتي واني انسانة كدابة وعلى فكرة بكرة تكريم كريم البحيري ما اعرفش ايه دخل كريم البحيري، وعلى فكرة انت مدونتك انت ومينا ونورا ووائل عباس وجيمي مدوناتكم كلها مالهاش لازمة وانت مجرد بتسلوني ولو عايزة البلد تبقى احسن لازم انت تحاولي تريحي اللي حواليكي
اه والله قال لي كده
طبعا كون ان مدونتي مسلية دي حاجة تسعدني وتخليني اطير في السما
الناس كلها بقت مملة دلوقت
بس اريح اللي حواليا ازاي؟ اعمل مدونة بدالهم واضرب الودع واعرف هم عايزين يكتبوا ايه بالظبط من خلال البلورة السحرية بتاعتي واكتبه انا؟
طيب يا سيد رامز
التعليقات قدامك
احلق حواجبي واعملها تاتو لو نزلت لي معلومات عن الحملة الهلامية اللي حضرتك عايزني اتبناها
اتفضل الميكروفون معاك
اكتب المعلومات في التعليقات وانا مستعدة قدام كل الناس اهو اتبنى القضية واخدها على عاتقي
اتفضل..مش عرفت تكتب تعليق تشتمني فيه وتدور على المدونات تشتمني ؟ اتفضل بقى
مدام عرفت تتكتب تعليق يبقى اكيد تعرف تعمل مدونة
ومع ذلك، ماشي يا سيدي ما تعملش مدونة انا ح اعمل الحملة، واعملها مدونة مخصوصة واحنا اتكتب علينا سجايرنا تبجى واحدة بس جول لي اي حاجة م اللي ربنا كتبها علينا دلوقت اهو في التعليقات وانا انشرها واعمل على اساسها حملة
اتفضل
----------
ايها الاخوة الصياديون، اللي منكم يعرف رامز او يعرف تفاصيل عن المشكلة ياريت يبعت لي بس اي حاجة وانا مستعدة اتبنى الحملة دي، فعلا دي اكيد مشكلة كبيرة لاننا في مصر مش بنعامل السليم كويس فما بال ذوي الاحتياجات الخاصة، كمان اللي عندهم اعاقات في الدولة النامية اللي زينا بيبقوا قوة انتاجية معطلة لانهم عندهم القدرة والكفاءة انهم ينتجوا كتير وباصرار وبجودة لان ربنا بيعوضهم عن اعاقاتهم بملكات كتير كويسة لكن للاسف في مصر والدول النامية ما بيبقاش فيه اي اهتمام بيهم وبالتالي احنا اللي خسرانين اكتر منهم فلو حد عنده اي معلومات او احصاءات او مشاريع او اي حاجة م اللي ربنا كتبها علينا يقول لي او يبعت لي حتى ان شالله في التعليقات بخصوص معاناة المعاقين وذوي الاحتياجات الخاصة في مصر بالتحديد وانا مستعدة اعمل بقية الشغل، اجمع مشاريع مرمية على النت عن كيفية استغلال كفاءات المعاقين في الانتاج، بس انا ما عنديش معلومات بخصوص مصر
وحقك على راسنا يا حاج رامز بس لاغيني، قول لي اي حاجة

وانا معاك ياسيد حسن ومع لبنان

انا الحق ادخل بسرعة في فريق النور
اه، فريق حزب الله فريق النور، والعالم بيتغير، وانا محددة طريقي كويس، لان مابقاش فيه وقت ولا مجال للمواقف الرمادية
العالم ما بين غيلان بتاكل الناس وما بين فقراء مساكين بيستغلوا غصب عنهم او بمزاجهم
انا مع المعترين زي ما بيقولوا بلبنان
انا مع المعترين في كل حتة في العالم
انا مع الذين استضعفوا في الارض عشان انا مصدقة وعد ربنا: ونريد أن نمن على الذين استضعفوا في الأرض ونجعلهم أئمة ونجعلهم الوارثين، ونمكن لهم، ونري فرعون وهامان وجنودهما منهم ما كانوا يحذرون
طنط شاهندة مقلد كلمتني قالت لي انا اوصل لحسن نصر الله ازاي؟ عايزة اقول له احنا معاكوا وعارفينكوا وواثقين فيكوا وبندعي لكوا
قلت لها مش عارفة ح اكتب عندي يمكن رسالتك توصل باي طريقة
يا معترين الارض احنا كمان معترين ومعاكوا
يا معترين لبنان يا اسود
احنا معاكوا ووراكوا
ح تلاقوا مننا مش قادرين غير على اضعف الايمان بانهم يدعوا لكوا
وح تلاقوا مننا ناس الغيرة اكلت قلوبهم، ليه؟ لاننا معترين ومش قادرين نعمل حاجة، وبدل ما نقول معلش احنا مش قادرين بس غيرنا قادر على الاقل ندعي له ونسانده، ح تلاقي ناس مدام هو مش قادر يعمل حاجة ولا قادر يتصدى للرأسمالية الامبريالية العالمية (ايوة خلاص هي بقت وش حنجوري كده، اسرائيل وامريكا وحلفائها هم الغول الرأسمالي الامبريالي ولو مش مصدقيني شوفوا الباديكير بتاع سعد الحريري) وفيه ناس عندنا مش قادرين وغيرناين، ومدام هو مش قادر ح تلاقيه بيكسر في مقاديفكوا وبيهاجمكوا مع انه ضعيف وغلبان زيكوا
بس قصر ديل يا ازعر
معلش، اعذروه، ده غلبان
وح تلاقي ناس مستفيدة ولها مصالح وفلوس
وخلاص بقى...ليس بعد الكفر ذنب
ربنا معاكوا، وانا نازلة النقابة دلوقت والله المستعان
ولو اني مش مقتنعة قوي بوقفة النقابة دي، بصراحة يعني، بس برضه اروح لعك وعسل

فاصل

ممكن ما تحطوش امل على تكرار انتفاضة سبعة وسبعين؟ ممكن؟ عشان ما تتصدموش بس زي صدمة اربعة مايو
مش عشان الناس وحشة والله ولا حاجة، بس عشان لو كانت ح تحصل كانت حصلت اول ما غليت اسعار البنزين، على طول هوب كلوب
لكن ماحدش بينتفض في الجزمة الاول يا عم ايوب

تقرير ام زينب والفيديوهات

القوطة باتنين جنيه
الفاصوليا بتلاتة
الملوخية الخضرا باربعة
البصل بجنيه ونص
الكوسة بجنيه
السبانخ باتنين ونص
لقلقاس بتلاتة
الرز بيبتدي بتلاتة ويوصل لاربعة ونص النوع الكويس
المكروتة 400 جم باتنين ونص
السكر 900 جم بتلاتة
الخيار 2 جنيه
الزيت التحمير بتسعة ونص
الملحوظ ان فيه بعض الاغذية رخصت زي الكوسة والقوطة والخيار وفيه حاجات ضربت زي الرز والمكرونة والملوخية
والغريبة ان البضل بقى بجنيه ونص اما السجاير فطلعان تلاتينا في ايجادها
هم مش مفروض منعوا تصدير الرز عشان يرخص؟ ثم ايه السبانخ والكوسة اللي رخصوا دول؟
حد فاهم حاجة؟
دي بقى الفيديوهات بتاعة خناقة البنزينة قبل غلاء سعر البنزين بساعة واحدة

ومن حق الضعفاء ان يكتبوا تاريخهم

قاتل امين عثمان بقى رئيس جمهورية
عشان كده بقى بطل الحرب والسلام

قاتل بطل الحرب والسلام اتحمل نتيجة اختياره
وتصرفه عشان كده بقى مجرم وارهابي

زي ما اسامة بن لادن عشان قتل تلاتلاف واتهزم في حرب افغانستان بقى رمز للارهاب العالمي اللي لازم يدان صباح ومساء ومع كل اذان واقامة وقبل الاكل وبعد الاكل وقبل النوم

وجورج بوش بقى بيحارب الارهاب عشان قتل اتنين مليون واحتل الخليج وافغانستان والعراق

الاقوياء والمنتصرون هم الذين يكتبون التاريخ

واذا كنا ح ندخل في ادانة القتلة

فيجب ادانة الاقوياء والزعماء المنتصرين قبل ادانة من تحملوا نتيجة فعلهم واختياراتهم
الكل قاتل، فلماذا يدان من عوقب ويمجد من افلت من العقوبة؟

قبل ثورة يوليو بخمس دقائق كان الضباط الاحرار يصفون بالارهاب، بعد نجاح الثورة اصبحوا ابطالا، بما فيهم اللي قطع تذكرة سينما واتخانق عن عمد وعمل محضر عشان لو الانقلاب فشل يبقى هو في السليم
ولو كان انقلاب الضباط الاحرار فشل كانوا ح يبقوا في النفس السلة مع الجهاد الاسلامي والقاعدة وحنفي ابو دقة وغير ابو دقة وغيره وغيره، مع الوضع في الاعتبار ان الضباط الاحرار جات معاهم طبات، ربنا سترها معاهم، زي ما سترها مع واحد ما شاركش في الانقلاب وبقى من مجلس قيادة الثورة، ثم نائب لرئيس الجمهورية ثم رئيسا للجمهورية، وهو قاتل لنفس بريئة لم يسبق لها ان قتلت انسان، ولم يعاقب على فعلته حتى قدر الله عدالة شعرية على يد واحد من ضباط جيشه


وبما اني مستقلة ولست معنية بالتاريخ الذي يكتبه الاقوياء، لانني افخر باني من الضعفاء

فانا حرة اكتب التاريخ على هوى نفوس الضعفاء والمهزومين والمقهورين والذين يدعون الى الحرب ولا يدعون الى المأدبة

لانني لست من الاقوياء

ولا ارغب في ان اكون واحدة منهم، هو بصراحة مش ح اقدر اكون منهم، انا فقرية طول عمري

بموضوعية شديدة: احلى قصيدة في تاريخ شعر العامية المصري

وعمري ما شفت واحد وشه منور في صورة ابيض واسود زي كده

القصيدة:
منين أجيب ناس لمعناة الكلام عارفين
شبه الأمارة إذا حفظوا الوداد عارفين
شرعت سن القلم
رمحي جرح قمحي
جعلت عشقي الغنا زادي
وناس عارفين
ياليل يا عين يا وطن
يا صحرا يا بساتين
يا جرحي يا غنوتي
يا ناسي يا غايبين
موالي من غربتي اخضر
خضاره حزين
حزين كلام الغنا
والسامعين عارفين

***

آه يا زمان الخنا يا ماشي بالمعكوس
(الله الله الله.. تاني والنبي)
آه يا زمان الخنا يا ماشي بالمعكوس

فيك اي شيء ينشري
وكل شيء بفلوس
حطيت عديم الرجا
ع الخايب المتعوس
خراب وحاكم أغا
يا قهرة العارفين
(الله الله الله)
ركِب الأغا ع البلد
ركّب عليها الخوف
خاين
قليل التنا
جاهل
عديم الشوف
خان التراب والهوا
خنق الضمير ف الجوف
وداس بنعل الوطا
ع الحق والعارفين
(آه آه آه)
مين في البلد يا بلد
كان صوته من راسه
يحسب يكيد العدا
ويصون وداد ناسه
دار المدار بالخبل
وسقانا من كاسه
مين تحت الحكم الأغا
ينطق يقول عارفين
ياللي قريته الجرايد
كله كلام مغشوش
(اعد)
ياللي قريته الجرايد
كللللللله كلام مغشوش
ومركبين في الصحافة
بتوع وليها كروش
يدوسوا زر البتاعة
ينزل كلام مطروش
حمضان في حبر المطابع
وكلكوا عارفين
(الله كان في عونهم ماكانش فيه نت)

***

أصل الحكاية ولد
فارس ولا زيه
(ايوة يا سيدي قول)
اصل الحكاية ولد
فارس ولا زيه
خد من بلال ندهته
ومن النبي ضيه
(انظر الصورة..الا اذا كنت البعيد اعمى البصيرة)
خد من بلال ندهته
ومن النبي ضيه
ومن الحسين وقفته
في محنته وزيه
قدم شبابه فدا
والحق له عارفين
خالد
يابن الربيع والامل
والشمس والزينة
مين يا فتى أعلمك
فعل الخريف فينا
وكبرت برة الزمان
اللي ابتلاك بينا
نايمين على ودننا
مع اننا عارفين
صاااااااااااااح من سكون الخرس
كروان بغنيوة
الملك لك
يا فتى
يا مصري
يا حليوة
رقصت نجوم الفلك بالضي تتعانق
والشمس ويا القمر
في برجهم عارفين
(الله الله الله الله الله الله)
شيل الغطا يا عطا
عبد السلام مددين
عبد الحميد يا فتى
قطب الرجال يا حسين
داعي المروءة دعا
والعمر مش عمرين
خالد يقول صحبتي
واحنا الجميع عارفين

الله أكبر هنا
ع الباغي والجبار
طعن الفتى طعنته
خار الأغا وانهار
المجد ده ابننا
والفارس الكرار
راكب على مهرنا
والكدابين عارفين
(اعد اعد)
المجد ده ابننا
والفارس الكرار
راكب على مهرنا
والكدابين عارفين

مين يا فتى علمك
لعب العصا ع الخيل
وازاي قطفت القمر
من فوق شواشي الليل
وطبعت نجم السما
بالوشم على زندك
الاسم خالد
ولكن
عاشق
ولك هندك
ام الدلال
علمك طبع الاسود
عندك
مين يا فتى علمك
عشق الملاح والميل
هندك يا ادهم هنا
اصلك
وسلسالك
والناس يا خالد
هنا عمك
هنا خالك
يا غنوة من قهرنا
اسمك وموالك
ويا الربيع والامل
في دمنا عايشين
وليه اجيب ناس
لمعناة الكلام عارفين
واحنا الامارة
اذا حفظوا الوداد
عارفين

احمد فؤاد نجم

قسما بالله العظيم وباغلظ الايمان ما اتكتبت قبل ولا بعد كده قصيدة بالجمال ده والله والله والله كمان مرة بموضوعية شديدة لو كان اللي الف القصيدة دي واحد تاني غير ابويا كنت اتجوزته

ملحوظة: احيانا مش بامسك نفسي فح تلاقوا تعليقاتي بالاحمر
يارب تستمعوا بيها زيي
مع كامل احترامي لغليظي الحس والاحساس بالنسبة لكوا انتوا...ما تستمعوش

المدونين اتهبلوا يا رجالة

من مدونة كاريكاطظ ابقوا اقروها مدونة لطيفة قوي

الحمد لله مش انا لوحدي، بعد العلاوة جات لي حالة استبحس قعدت اهبل واعيط واضحك واكتب كلام مجانين، قلت ادخل على المدونين اشوف ينكن حد يكون ااترح ااتراح وللا حاجة
لقيت معظم الناس رد الفعل جالهم بجنان
بللا بتقترح اننا نسمع اغنية يا علاوتك يا جمالك
سووووو ساب خالد صالح واحمد السقا وخرج عن وقاره السينمائي وقال سيدي الرئيس المبجل ياخي اوبجكشن
قطة الصحراء تقريبا كل فروتها الناعمة البيضا وقعت لوحدها
ما علينا كانت عايزة تقول حاجة طلعت معاها كده

ما بدا له نزلت قصيدة قل اعوذو مد بوزو الجبان ابن الجبانة كل غدانا قام لقانا شعب طيب كل عشانا
احمد الصباغ قرر لسبب مجهول الهوية انه يتفاءل وبيقول برضه الحمد لله عندنا وائل الابراشي ومنى الشاذلي
!!!!
هو فيه كلام انهم ينزلوا على بطاقة التموين بفلوس وللا ايه؟
واحلى قفا من مواطن مطحون
وحاجات كنير بالشكل ده زي مارفل وغيرهم
وفيه مدونين فكهم التحتاني سقط منهم وجات لهم الكتمة
فيه بقى مالك واحمد عبد الفتاح
اللي جه عليهم: عايزين نعمل حاجة...ح نعمل ايه؟ نعمل حاجة يعني حد بقى يقول...اصل انا شايف اننا نعمل حاجة فحد بقى يقول نعمل ايه؟

بابا حسني
ضربة معلم والله، وتاني باشجع اللعبة الحلوة
بعد فشل اضراب اربعة مايو اللي مجدي حسين مصمم انه نجح بسبب التمثيل المشرف
احنا طبعا ح نتردد اننا ندعو لاضراب، ليه؟ احراج وكده
كمان ده خازوق معتبر، انا شخصيا حاسة انه ما ينفعش معاه اضراب وبس، حد يقول لي ايه؟ اقول له زي مالك واحمد كده
ما اعرفش بس لازم نعمل حاجة
حد يقول كده...نعمل ايه بقى؟ ها؟
هههههههههههه
هههههههههههه
هههههههههههه
اقروا بيسو كاتب ايه

ام زينب بتقول الرز غلي جنيه

تحديث من
m5m
السمك زاد سعره بين 2 و 3 جنيه
الجمبرى زاد 4 جنيه الصغير

لبن جهينة زاد 50 قرش الكيلو
الجبنة الرومى زادت

و بيقولوا السجاير زادت
:)
هو عشان بيحافظ على صحته ما بيشربش سجاير، انا عشان مدخنة، فايوة السجاير زادت، والسجاير المستوردة مش موجودة في السوق، الروثمانز مختفية تماما، الفايسروي قليلة وزادت، ليلة مراد (ال ام) زادت نص جنيه امبارح
بكرة ان شاء الله ح اسأل ام زينب على القوطة والبصل والزيت وبقية الخضار وربنا يستر
------
لسة قافلة معاها دلوقت وبتقول لي انها كانت في السوق النهاردة (سوق مساكن الزلزال في المقطم) والرز (بكل انواعه من اول الممتاز لحد اخلع سنانك بالظلط) غلي جنيه مرة واحدة
وبتقول لي الناس كلها ماشية في السوق تكلم نفسها وتقول: حسبي الله ونعم الوكيل، ربنا يجوعه زي ما جوعنا
سكتت ام زينب شوية وبعدين قالت لي: طب انت خريجة جامعة وبتعرفي في الترنت كوم (ملحوظة: ام زينب عندها وهم اني مهندسة كمبيوتر، حاولت اقنعها اني متخلفة تكنولوجيا بس هي مش مصدقة) تفتكري ايه اللي ممكن يحصل بقى بعد الغلا ده كله؟ الناس مش عايزة الفلوس اللي هو صرفها للموظفين...ينفع يرجعوها ويرجع الاسعار زي ما كانت؟ وللا تفتكر ايه اللي ح يحصل بقى؟
قلت لها: والله يا ام زينب ما اعرفش ايه اللي ح يحصل، بس انت بتقري الحوادث (ملحوظة تانية: ام زينب ما بتقراش غير الحوادث واخبار الفنانين وكانت المتابعة الوحيدة لبرنامج خلف الاسوار وتعرف اسامي كل الكومبارس، والممثل اللي ام زينب ما تعرفش اسمه يبقى اكيد مالوش اهل اصلا، ولا حتى مكتوب في السجل المدني)
قالت لي: انت بتاخديها بضحك بس انا باقرا الحوادث عشان اعرف الناس عايشة ازاي
قلت لها: طب بيني وبينك شهر يا ام زينب، في ظرف شهر ح تقري عن حوادث عمرك في حياتك ما كنتي تتخيلها
قالت لي: يا ساتر يا رب، على كده بقى اقلع البت زينب الخاتم
قلت لها: لو تقدري تلبسيها هدوم وسخة ومقعطعة اعملي كده
===
دي اخبار الرز
من سوق مساكن الزلزال
اللي عنده اخبار عن اي سلع غذائية تانية غليت يقول لنا

الحمد لله

والله ربنا ما بيقفلهاش من كل ناحية، انا اصلي امبارح بعد ما كتبت البوست بتاع لقيت العلاوة قعدت اتخيل ان الناس اخدت على قفاها وقعدت اعيط بعد صلاة الفجر لحد ما نمت وصحيت عينيا وارمة بس على اخر اليوم قابلت واحد صاحبي كان واحشني قوي وكانت قعدة طويلة والواحد اتكلم وارتاح، وعرف حاجات ريحته والله، صدمته صحيح، بس طمنتني كده اني في السليم
اصل الواحد، اللي هو انا يعني، بطبعه عادة بيشك في نفسه، يعني، بحثا عن الحقيقة، بس صديقي ده من غير ما يقصد ولا ياخد باله اصلا وصلي معلومات، من غير ما اسأله، طمنتني
على فكرة البوست ده ما يهمش حد، :) بس دي مدونتي عادي يعني انا حرة
دلوقت بعد القفا اللي اخدناه، والاهانة البالغة اللي سلخت وشنا، وهي دي اللي كانت بتخليني اعيط مش الفلوس والله
عايزين نعيد حساباتنا بقى، او على الاقل انا اعيد حساباتي في ضوء اللي عرفته النهاردة واللي مش ناوية اقوله واللي ماحدش فيكم يعرفه واللي يعرف ما يعرفش اني عرفت، حد فاهم حاجة؟ مش مهم
بقى كل حاجة في الدنيا لها قواعد
حتى التهييس له قواعد
انا كنت حاطة لنفسي قواعد في التهييس، واظن اني محتاجة اراجعها
ونظرا لان جزء من قواعد التهييس بتاعي المشاركة مع اكبر عدد من البشريات فانا ح اطرحها على الطبلية وبسم الله
القاعدة الاول: الصدق منجاة:
وانا احب المنجاة، معصورة وصحيحة، والصدق من وجهة نظري المتواضعة هي شكل القسم في المحكمة الادنبي: الحق كل الحق ولا شيء غير الحق، لان ممكن الواحد يقول نص الحقيقة ويبقى معتبر نفسه صادق، ممكن يقول الحقيقة وعليها شوية تحابيش، ويبقى فاكر نفسه صادق، بس انا باعتبر ده كله كدب
القاعدةالثانية: لا خاب من استشار:
مافيش حاجة يقينية مية في المية ولا اكيدة مية في المية غير ربنا بس، بخلاف كده كل حاجة لها زوايا وعشان كده ولان الارض كروية تلف حول نفسها كل فكرة تيجي في بالي احب اني اشرك فيها اكبر عدد من الناس عشان كل واحد شايف زاوية من ناحيته اكيد انا مش شايفها
القاعدة الثالثة: يعرف الرجال بالحق ولا يعرف الحق بالرجال:
انا ماليش كواليس، خالص، البتة، وكمان مش معنية بكواليس الناس، ولا حتى حساباتهم واهدافهم، انا معنية بان اللي بيقوله ده حق وللا باطل
وش كده يعني: انا ما يهمنيش واحد عامل حملة لمساندة كذا وكذا، عشان هو شيوعي وله اجندة عايز يخدمها، وللا هو اسلامي وله اغراض، وللا هو مسيحي وله بتنجان (انا المسيحي اللي اعرفه مافيش اهبل مني غيره) انا اللي يهمني اللي بيقوله حق وللا باطل
سيدنا معاذ بن جبل قال: اقبل الحق وان جاءك من منافق او كافر او فاجر، واحيانا تنسب للامام علي
حفظي قال لي: الشمس بتشرق من الشرق، مش عشان حفظي ابن كلب وسكري وقمارتي اعند واقول الشمس بتشرق من الغرب
والا ابقىباستعبط، حفظي بيقول ان الشمس بتشرق من الشرق عشان هو عنده اهداف دنيئة، اصله لما يقول كده ح يدخل مسابقة ويكسب فيها فلوس ح يصرفها على القمار، طب وانا مالي؟ الشمس بتشرق من الشرق سواء حفظي استفاد او انضر
مين حفظي ده؟
اتاري بقى الناس لها كواليس وقاعدين يزنبقوا في بعض من تحت لتحت،طب وانا مالي؟ انا مش طرف مع حد، انا مع الحق
القاعدة الرابعة: الحق احق ان يتبع:
انا اصلي مخي عامل زي الغسالة الفول اتوماتيك اللي على برنامج العصر، بيلف حتى وانا نايمة، لدرجة اني ساعات احلم بدواير وحاجات بتلف، ومناقشات وكلام، قلت حاجة او اقتنعت بحاجة او عملت حاجة، طلعت غلط، لازم اقول اني غلطانة واني طلعت غلط وما الاقيش لنفسي مبررات، عشان اعرف اصلح، وبما اني من الشرقية، مش من الصعيد، فانا مخي مش بيتربس، حد قال كلام معقول طلع احسن يبقى الحق احق ان يتبع، وكل حاجة في الدنيا دي الاكيد انها مش اكيد
only fools are positive
الغلط مش خطيئة، لكن الاصرار على الغلط خطيئة كبيرة
القاعدة الخامسة: الانسان فوق الاوثان والمبدأ فوق الانسان:
افرض مثلا مثلا يعني ان البيني ادم ده واحد حقير وابن كلب نتن ويستاهل ضرب القباقيب، ووقع عليه ظلم، اسيبه يولع بجاز وسخ؟ ابقى زيه اكيد، البني ادم اهم من اي حاجة تانية في الدنيا، ايا كانت الحاجة دي حتى لو كانت الكعبة المشرفة، والمبدأ ده اهم من ان الفرد نفسه شخص كويس او مش كويس، انا بطبعي باعرف الناس بمسافة، مش بادفلق يعني، مش عشان اوتيستك، بس عشان ما اكرههمش
القاعدة السادسة: الاجماع على الخطأ افضل من الانفراد بالصح:
لو كل الناس اجمعت على تصرف ممكن اشوف انه غلط، لازم اقول اني شايفة انه غلط، بس لو الناس اصرت، لازم اشارك معاهم لان الاجماع بيخلي كل الناس تتحمل مع بعض نتائج الغلط وتكبر وتتصلح مع بعض، وبالتالي ده بيخفف من وقع النتائج السلبية
انما الانفراد بالرأي دايما يكون غلط حتى لو كان صح
القاعدة السابعة: حط نفسك مكان الناس:
قبل ما تحكم على حد وللا تدينه، حط نفسك مكانه مع الوضع في الاعتبار ان اكيد له ظروف تختلف عنك، ويمكن تكون اوحش
القاعدة الثامنة: كل الناس محترمة عدا الكدابين:
والله العظيم لو واحد بيقول انا باحب اسرائيل وانا عنصري وبيتصرف بناء على كلامه يبقى محترم اكتر بكتير من واحد بيقول كلام وفي السر بيعمل عكسه، مافيش حاجة اسمها عميل، العميل هو الكداب اللي بيغش الناس بكلام وهو في السر بيعمل حاجة تتناقض مع كلامه
ده هو العميل الف وواحد
هو كان الف وواحد وللا الف ومية ولا الف تلتمية ولا ولا مليوووووون

دي القواعد اللي كنت باحاول التزم بيها طول الوقت من ساعة ما ابتديت المدونة، حتى اول تدوينة ليا كنت باتكلم فيها عن التسامح مع اي حاجة الا الكدب
وبما ان احد القواعد ان الاكيد اللي مافيش حاجة اكيد، فمش اكيد ان القواعد دي كلها صح مية في المية
وبما ان احد القواعد انه لا خاب من استشار، فقولوا لي: انا غلطانة في ايه؟
اه، انا كنت قلت في اول البوست اني عرفت معلومات طمنتني، هي ما طمنتنيش اني صح على طول الخط، هي بس طمنتني ان محاولاتي للالتزام بالقواعد دي، اللي مش اكيد كلها صح، تعتبر ناجحة بنسبة كبيرة

لقيت العلاوة لقيت العلاوة لقييييتتتتتتتتتتهااااااا

اهي

هي دي العلاوة
ح ناخدها كلنا
عشان ناخد ثواب الجماعة

انت عملت ايه يا حسني؟

ها؟ عملت ايه؟
بعبصتنا صح؟ بعبصتنا؟ ليه يا حسني؟ ليه كده؟ بتبعبصنا ليه يا حبيبي؟ ليه؟ احنا ناس كويسة تعمل معانا كده ليه؟
معلش بقى معلش استحملوني الليلة دي عشان انا من ساعة ما عرفت الخبر ده وانا في حالة جنان
فحتلاقوني كل شوية طالعة كده لوحدي
قلت ادخل انام واكفي شيري خري ما عرفتش، طول ما انا حاطة راسي على المخدة حاسة ان قفايا عمال يورم
والله العظيم حاسة اني اتسكعت على قفايا في مديان التحرير الساعة تلاتة الضهر وكل الناس شافتني وانا باتسكع على قفايا
بالظبط نفس الاحساس اللي جاني لما كنت عندي تمن سنين وكنت في جنينة الحيوانات وبالاعب النسناس واكله وهو عمال يلعب معايا واول ما اديته ضهري شد لي شعري بعنف والناس كلها ضحكت عليا، انا فاكرة اياميها حسيت باحراج فظيع وكنت عايزة اعيط ومن كتر الاحراج كتمت عياطي وقعدت اضحك
انت عملت كده ليه يا حسني؟
عملت كده ليه بجد؟ احنا عملنا لك ايه؟
سبعة وعشرين سنة تحت قانون الطوارئ وساكتين
تعذيب في اقسام الشرطة وساكتين
جوع وفقر وساكتين
بقينا قفا وملطشة للي رايح واللي جاي وساكتين
عملنا لك ايه؟ احنا غلطنا في ايه بجد كلمني زي ما باكلمك
ليه بتدعك مناخيرنا في الرصيف؟
ليه بتذلنا كده؟ ما كنتش عملت علاوة يا اخي
بتذلنا ليه وتكسر نفسنا؟
انت بتستمتع بالحكاية دي؟ بتنبسط يعني؟
مالك؟ احكي لي مشاكلك، او مشاكلنا ماهو اكيد فيه سر اشرحهولي
ومسلط علينا ابو وش زي الحمار ده استغفر الله العظيم اهي كلها خلقة ربنا كان بيكلمنا النهاردة في مجلس الشعب وهو قرفان مننا
انت طالق العرص ده علينا ليه؟ ليه؟ بتعمل كده ليه فهمني
انا عايزة افهم حد يفهمني
انا فاهمة شيكولزية هتلر وموسوليني وصدام وحتى نيرون
بس مش عارفة افهم الريس بتاعي
انجليزي ده يا مرسي؟

حنفي اخلا سبيل علاء فخري

وطبعا ام حميدة عملت له تجديد اعتقال
انما اعملي حسابك المرة الجاية لا ممكن تنزل الارض ابدا
هو امتى حنفي ح يضرب ام حميدة بالقلم وتزغرد بقى وتريحنا؟ هو الفيلم ده مش عايز يخلص ليه؟
------
ملحوظة: ماحدش يشتم المصريين ويقولوا شعب يستاهل والكلام الفارغ ده، حرام عليكوا
الناس غلبانة ونفسها مكسورة وما صدقت اي حاجة ولو بسيطة، هو احنا عشان شعب مش طماع نتشتم؟ ثم احنا مش لازم نرمي فشلنا على المصريين، الناس اصلا كانت متشائمة من العلاوة واحنا ما عرفناش نعمل دعاية صح للاضراب واحنا اختارنا يوم غلط ما تستهبلوش وتشتموا المصريين، هو سيادتك مش معانا وللا ايه؟
- انا؟ انا مؤمن والمؤمن مصاب
قلنا ستميت مرة قبل كده مافيش شعب بيغلط، لما يعمل اضراب والامن يشتبك معاه ويدافع عن نفسه تقولوا عليهم شعب همجي، ولما ما يعملش اضراب ويرضى بالتلاتين في المية تقولوا عليهم شعب خانع، حرام عليكوا هو مافيش رحمة لا منكوا ولا من الحكومة؟
الشعب المصري احسن شعب واطيب شعب وماحدش يشتم المصريين تاني واللي ح يشتم المصريين ح اطلع تلاتين اللي جابوه بالعربي والانجليزي وانا شيفونية وديكتاتورية ومافيش حرية رأي في شتيمة المصريين
اللي يشتم المصريين يبقى ابن وسخة
بس هه
وح اخلي اللي ما يشتري يتفرج عليه
واللي ما بيحبش المصريين ما يسيب البلد ويمشي ويهاجر وللا حتى يعمل مدونة يسميها
i love america
i love israel
ياللا بالسلامة بقى من هنا ماحدش يعصبني كفاية الهم اللي انا فيه لما شفت الناس بتتخانق على البنزين
مش كل واحد يفشل في التعامل مع الناس يرمي بلاه عليهم ويبقى هم اللي غلطانين...ايه القرف ده؟ احنا مين احسن مننا في الدنيا؟
مافيش احسن من المصريين في الدنيا ابدا، اي شعب لو عاش في الظروف دي كان زمانه اتحول كله لمستشفى المجانين كتر خيرنا
ماحدش يقول لي لبنان، لبنان ظروفها مختلفة، واكيد اكيد مش الفرافير اللي في اوروبا والدول المتقدمة
وايوة بقى انا باقول كلام شوفوني وحنجوري ومقرف وابن ستين كلب: الشعب المصري شعب عظيم
غصب عن عين التخين

اقول لكوا حاجة من غير ضرب

ولا شتيمة
ده مجرد خاطر خطر لي، متهيالي الدعوة للاضراب احتجاجا على ارتفاع اسعار البنزين تبقى مناسبة
دي مش دعوة دي مجرد خاطر عشان ماحدش يمسك في رقبتي
او اي حاجة بقى
نعمل حملة طيب، نعمل لهم عمل حتى
احنا ح نسكت؟ نسكت؟
كده فشخ فشخ، انا قعدت احسبها لقيت ان اللي كان بيقبض ستميت جنيه نقص حوالي تلاتين جنيه
طب بلاش اضراب نعمل حملة
الناس ح تاكل في بعضها كده ما ينفعش، انا ابتديت اشك في الحكومة، هي الحكومة عايزانا نعمل ثورة؟
لا بجد، بجد والله، هل لان الحكومة منقسمة على نفسها فعايزة الناس تعمل فوضى عشان هم يلهفوا قرشين ويخلعوا في الزحمة مثلا؟
هم عايزين مننا ايه بجد
يعني الناس رضيوا بالتلاتين في المية، مع انهم والله كان قلبهم حاسس وكانوا متشائمين ومع ذلك حطوا الجزمة في بقهم وسكتوا
بيستفزونا ليه؟ هم عايزين مننا ايه؟ كل ما الناس تهدا يجننوهم ليه؟
نعمل اي حاجة، انشالله شندوشتات حلاوة بالقشطة
ما هو يتوفروا لنا فلوس يا توفروا لنا الكلة
يا تقتلونا بقى وتريحونا ايه القرف ده، وقوع البلا ولا انتظاره
نعمل ايه طيب
طب هل مثلا نطنشهم خالص ونفوت عليهم فرصة انهم يستفزونا؟
ايه اللي انا باقوله ده؟ انا باين عليا هيست ع الآخر، والله ما عارفة اقول ايه؟ اصل اللي بيعملوه ده مش طبيعي
والله ما عارفة اعمل ايه ولا اقول ايه، اعمل ايه انا دلوقت؟
طب طب طب ايه؟ يعني يفسروا لنا طيب، ايه يعني؟ ها؟ ايه؟
نعم؟