عدم اللا مؤاغذة

اصل قهوة كتكوت كان كاتب لي تعليق وكنت حارد على التعليق بتعليق وبعدين قلت لا اكتبه بوست احسن، بيقول لي ليه جبتي سيرة السلفيين في مقال كاميليا شحاتة مع انهم هم المجني عليهم باين

حنتكلم حنتكلم ثانية واحدة

بس عدم اللا مؤاغزة انا يحق لي اخزق عينيكوا واحد واحد عشان بصراحة انا اتخنقت من ام البلد على الشعب ونفاقكوا

انا بالذات يحق لي ليه؟ عشان عدم اللا مؤاغزة انا ما قصرتش في حق

لا قصرت في حق مسلمين ولا مسيحيين ولا ملحدين ولا سنة ولا شيعة ولا سلفيين عشان الحق حق 

اللي مقصرين ومزدوجي المعايير ونصابين سواء اللي بيبثوا خطاب كراهية من اي طائفة.. ماحدش يفتح بقه معايا

عدم اللا مؤاغزة يعني

اما عن السلفيين، انا مش فاهمة السلفيين ضحايا ازاي في موضوع كاميليا شحاتة؟ ام التجارة واستثمار الموقف اللي هم فيه، وعلى فكرة انا مش ضد استثمار المواقف، بس اكيد اهداف السلفيين اهداف لا شريفة ولا محترمة ولا مخلصة ولا انسانية ولا اسلامية ولا اخلاقية ولا نيلة خالص في اي داهية.. الواحد بيدافع عنهم لما يتقبض عليهم عشان هم انسان والحق حق وغير مقبول تعذيبهم او القبض عليهم او منعهم او المصادرة على رايهم، لكن هم ما عندهمش اخلاق.. خالص يعني واهدافهم دايما طائفية ومذهبية وتفريقية واشعال فتن عشان يلهوا الناس عن الحاكم.. انتوا ليه بتضغطوا عليا وتخلوني اقول كلام مش عايزة اقوله، انا لو قلت كل شكوكي ناحية السلفيين حازعل ناس كتير، بس هم مش مظبوطين واهدافهم مش مظبوطة ووراها حاجة، مش هم بنفسهم، لكن اللي بيحركهم والاسطوات بتوعهم، ومن الاخر كده الاتجاه السلفي ما بيخدمش غير اهداف الامبريالية والصهيونية

فيه مسيحيين بيستثمروا المواقف طبعا.. طبعا، ولا اخلاقيين ومش محترمين ومش عادلين ولا وطنيين ولا يتبص في خلقتهم وبيبثوا خطاب كراهية، وحتى اللي فيهم عامل علماني عايز العلمانية على المسلمين انما هو يفضل مسيحي وطائفي ومخه قفل وشرير جدا.. إلخ .. بس هم عددهم كام وتأثيرهم ايه؟ تأثير الكنيسة جاي من القوة اللي بتديها لها الدولة مش من قوة الاقباط، ثم ان الكنيسة عمالة تخرف مؤخرا بزيادة، الظاهر ده بشوي ولا ايه، لانهم عاملين زي الهابلة اللي مسكوها طبلة وبيلطشوا، ولا ده مبارك اللي ملبسهم ولا ايه؟ المهم يعني بتصرفوا بغباوة فوق الفاشية يعني

لكن المناخ الطائفي ده نحمله لمين؟ الواحد بقى يبقى حقاني ولا يبقى منافق؟ 

ايوة الكنيسة طائفية وكتير جدا مسيحيين طائفيين طبعا، ده بقى الاتجاه السائد، ده مؤخرا اتجننوا رسمي ومخهم لسع تماما.. بس مين المسئول عن المناخ الطائفي؟ المنطق بيقول ان الاغلبية هي المسئولة عن اي مناخ في الدنيا طائفي او سلمي، والحقيقة ان الاقلية هي اللي بتتعدي من الاغلبية مش العكس، والاقلية هي اللي بتعمل رد فعل للاغلبية مش العكس، والاقلية هي اللي بتقلد الاغلبية مش العكس، ما تخليكوا حقانيين عشان ربنا يكرمكوا ولا ياخدني ويريحني منكوا بقى ايه القرف ده؟ ما تعملوا قياس كده على المسلمين في العالم عشان تفهموا غباوة المسيحيين المصريين جاية منين؟ ماهو انت لو حتعذر المسلمين بسبب الاضطهاد العالمي وتقول ان ده رد فعل تعرف برضه ان المسيحيين المصريين ده رد فعل، وزي ما فيه مسلمين بيعملوا غباوات وانا باتعاطف معاهم عشان مقدرة موقفهم، المسيحيين المصريين بقوا يعملوا غباوات كتير، طب الاغلبية بتعمل كده ليه؟ عشان على راسها نظام بيسلط عليها ناس مش شريفة ومش محترمة ومش مخلصة بتستغل الدين عشان تحفز المشاعر الطائفية

خلاص بقى اجني ما زرعت يداك، او ما زرعت أيدي الحويني وحسان والمصري ويعقوب الخ الخ الخ

يعني الهرم كده: المسيحيين المصريين اتجننوا عشان المسلمين المصريين اتجننوا، ليه اتجننوا عشان على راسمهم مشايخ مجانين، مين اللي جنن المشايخ امن الدولة، امن الدولة بيجنن المشايخ ليه؟ عشان بينفذ اوامر النظام، النظام بيدي الاوامر دي ليه؟ عشان دي اوامر "الغرب المتحضر" طب دي اوامر الغرب المتحضر ليه؟ عشان مافيش حاجة تخدم اهداف الامبريالية والراسمالية غير ان المسلمين يطابقوا الصورة اللي هم بيصدروها عنا وان يبقى فيه بينهم شقاق ونزاع وان يتم عزل المسيحيين الموجودين في المجتمعات اللي فيها اغلبية اسلامية عشان حينفعوا بعدين، يا يتجندوا طابور خامس، يا يتحيدوا وما يحسوش بانتماء، يا يبقوا حصان طروادة، اهم ينفعوا، طب ازاي يعني نخلي ناس بقالها الاف السنين عايشة في بلدها تعمل كده؟ نكرههم في بلدهم، ويحسن ان عداوته بقت مع المسلم وكذلك المسلم يحس ان عداوته بقت مع المسيحي

الموضوع ده معقد قوي لدرجة انه محتاج كل الشرح ده؟ انا بقيت اكرهكوا خلاص.. كلكوا على فكرة

بكرة تقعدوا على الحيطة وتسمعوا الظيطة، وادي دقني ان الموضوع ده عدى على خير

بصوا بقى.. بصوا.. الموضوع مش حيعدي على خير

انا باقول لكوا.. الموضوع الطائفي ده مش حيعدي على خير، ومش حنخرج منه بسلام، ومش زعبوبة وخلصت.. وبكرة تقولوا نوارة قالت

احترموا نفسكوا بقى ولايموها، لا، مسلمين ومسيحيين، مش مسلمين بس ولا مسيحيين بس، واياك حد يقول لي بقى بتساوي بين الضحية والمش عارف اي الكلام الطين ده

انا اللي ماسكة الموضوع من اوله وانا اللي عارفة امتى دول كانوا ضحية وامتى دوكهمة كانوا جلاد

خلاص يا بشوات

دلوقت كلكوا مسئولين وكلكوا محتاجين تلايموها، وما عادش فيكم ضحية لا من دول ولا دول، انتوا الاتنين دلوقت بتستعبطوا وتستهبلوا.. ولا ما عادوش ضحية، لا المسيحيين عادوا ضحية ولا المسلمين عادوا ضحية في اللحظة دي كلكم مسئولين

واسمعوني بقى

سرقة الجزم من قدام الجوامع لسه ماحدش يعرفها.. فلوس السعودية مش حتنفعكوا بحاجة

سرقة مستودع الانابيب انا بس اللي اعرفها.. ووعود امريكا برضه مش حتنفعكوا بحاجة لو بتنفع كانت نفعت غيركوا

والسعودية وامريكا الاتنين بيشتغلوا مع بعض، مش حاجة غريبة ان واحدة منهم تدي فلوس لاتجاه والتانية بتدي فلوس لاتجاه تاني قال يعني ده الاتجاه المغاير له؟ يا سلااااام يا سلااااام

لايموها بقى، وما تخلونيش افسر اكتر من كده واقول اللي لسه ماحدش يعرفها.. عشان انا ست جدعة.. وانت عارف ان انا ست جدعة 

يا فرحة امكوا بيكوا وانتوا قاعدين تتخانقوا على الحريم وتخطفوهم من بعض ... بصراحة اتفو

واتفو على الحقوقيين النصابين كمان.. ماهم دول كمان راخرين هابلة ومسكوها طبلة مش عايزين نفسر

بس خلاص ما عادش.. ما عادش الموضوع مستحمل، وما عادش فيه وقت نطنش ونقول معلش اهو احسن من قلته، معلش اصلهم مظلومين، معلش اصلهم مذعورين

لا بقى.. الكل بقى حاجة مقرفة خالص، والكل وصل لمرحلة الاستعباط