أنا باحب العراق
قضيت خمس سنين من طفولتي فيها
وباحس انها بلدي التاني
بس الحقيقة لاول مرة احس اني مش قادرة اتعاطف مع العراق
كلها كلها،
طبعا صدام عمل وسوى
أكيد
بس صدام أخد قصاص عادل جدا
يعني الحياة مش عادلة دايما
وحالة صدام من الحالات القليلة العادلة
فعلى عكس الأفلام العربي
في الحياة عادة الشر هو اللي بينتصر
والخير بينهزم هزيمة نكرااااااااااااااااااء
لكن فيما يخص صدام هو جنى كل اللي زرعه
عاش لحد ما قلبه اتحرق على ولاده زي ما حرق قلوب ناس كتير على ولادهم
اتذل زي ما ذل
اتهان زي ما اهان
اتقتل بايد الناس اللي خدمهم (الأمريكان) واللي كان لفترة كبيرة
مراهن عليهم
وكل ده بعد ما ربنا اقتص بايده
من دول الخليج خاصة السعودية والكويت
يعني عدالة السماء نزلت على استاد العراق
طيب دلوقت يعني
ممكن افهم إيه
إيه يعني
إيه
المقاومة العراقية (سنية وشيعية) كانت بادية الحكاية كويس
يعني القاعدة عملت معركة المطار وكانوا ابطال فعلا
وجيش المهدي كااااااااااان بيقتل الامريكان بس
وسنة العراق كانوا بيخطفوا الامريكان وناس من القوات الاجنبية
ويدبحوهم في داهية لانهم فعلا معتدين
ولما يقع في ايدهم واحد عربي يفرجوا عنه
بعد ما يبوسوه من هنا ومن هنا
إيه بقى؟
إيه اللي حصل
بيقتلوا بعض ليه دلوقت؟
قالوا ابو مصعب السبب
ولو اني شاكة في الموضوع ده
اهو ابو مصعب مات
بيقتلوا بعض ليه؟
سنة العراق بيفجروا المساجد الشيعية ليه؟
وشيعة العراق بيفجروا المساجد السنة ليه؟
والاتنين بيحطوا قنابل في السوق ليه؟
وليه شيعة الدنيا كلها عيدت معانا
وشيعة العراق بس هم اللي عيدوا لوحدهم؟
وليه السنة بيشتموا الشيعة وبيقولوا عليهم روافض؟
وليه بيفجروهم في عاشوراء؟
وليه الشيعة - خصوصا مقتدى المجنون ده - خطابهم طائفي كده
وبيشتموا السنة وبيقولوا عليهم نواصب؟
وليه مقتدى يطلع فتوى يقول اللي يقتل شيعي يبقى كافر؟
وليه السنة عاملين زي الاشباح ومالهمش اي جهة تمثلهم؟
وليه هيئة علماء المسلمين
اللي كانوا اسياد العاقلين
راحوا يستنجدوا بالسعودية الطائفية اللي نظام الحكم فيها عميل درجة اولى؟
ومن امتى السعودية بتنجد حد؟
وليه عايزين يدخلوا ناس تانية بلدهم؟
هي ناقصة؟
ناس مكانهم كان مفروض يبقى وشهم في الارض
ناس استحملوا طاغية تلاتين سنة وبيرموا عليه كل مصايبهم
طب لما هو اس المصايب ما خلصوش منه ليه لوحدهم؟
مين اللي بيحميه يعني شمهورش؟
كان مخاوي جن يعني؟
ماحدش فيهم يتحجج بامريكا
وهي امريكا ما كانتش بتحمي الشاه؟
وهي امريكا عارفة تعمل حاجة للسنيورة؟
خمسة وعشرين مليون مش عارفين يعملوا حاجة لفرد واحد؟
طيب اهو مات وربنا شفى صدورهم منه،
بيموتوا بعض ليه؟
ولو فيهم معتدي،
ليه مافيهمش واحد عاقل يقول: لأن بسطت يدك إلي لتقتلني ما أنا بباسط يدي إليك لأقتلك؟
إيه القرف ده
إيه اللي حصلهم؟
هم دول العراقيين صناع الحضارة؟
فين الحضارة بقى؟
ومالهم ومال الفلسطينيين بيفشوا غلهم فيهم ليه؟
ومالهم ومالنا بيأججوا المشاعر الطائفية عندنا احنا ليه؟
وليه يدفعونا تمن جنانهم وقرفهم
وعندنا ناس متخلفة تقول: الشعية بيقضوا على السنة في العراق!
وناس تانية أشد تخلفا تقول: لا ده الشيعة بيردوا على التكفيريين السنة
الحقيقة لا دول سنة ولا دول شيعة
دول عراقيين..بس
بحسبهم إنهم عراقيين عشان تعرف إنهم مجانين
الحقيقة بقى
ورغم إني عواطفجية درجة أولى
إلا إني مش عارفة أتعاطف معاهم خااااااااااااااالص
No comments:
Post a Comment