حاضر

البيان ال59 للقوات المسلحة 

الله ينور

صح الكلام ده.. اقصد النصائح اللي بتقول للقوى السياسية بطلوا تشدوا شعر بعض واحترموا نفسكم

بس والنبي خلي اللواء ممدوح شاهين يبطل يقول الشعب صوت على شرعية القوات المسلحة، لإن ده كلام مش حلو، وكأن فيه 22 في المية مش مؤمنين بشرعية القوات المسلحة؟ القوات المسلحة شرعية بوصفها القوات المسلحة اللي بتحمي البلد ومافيش مواطن مصري واحد يعتقد في عدم شرعية وجودها، ايه الكلام ده؟ 

ثم ان الشعب صوت على التعديلات الدستورية... القوات المسلحة ما كانتش نازلة في استفتاء تسأل الشعب بتحبوني ولا بتكرهوني!

اللي بيكره القوات المسلحة المصري يحب مين؟ اسرائيل؟ 

واذا كان اللواء ممدوح شاهين قال هم صوتوا على شرعية ادارة المجلس العسكري لشئون البلاد... بعد اذنه يعني، حد يقول له ان مش مبارك هو اللي نزل الجيش.. اللي نزل الجيش هم الثوار لما يوم 28 قالوا: الشرطة بتضرب فينا عايزين الجيش يحمينا واحد اتنين الجيش المصري فين.. بس الاستفتاء كان على التعديلات الدستورية.. الاستفتاء كان على التعديلات الدستورية الاستفتاء كان على التعديلات الدستوري

يعني الشعب ما قالش للدين نعم... لإن الاتنين وعشرين في المية ما كانوش بيقولوا للدين لا

وما قالش للجيش نعم.. لان الاتنين وعشرين في المية ما كانوش بيقولوا للجيش لا

لا الدين ولا الجيش ولا العلم ولا النشيد الوطني ولا ميدان سفنكس كانوا نازلين في الورقة محل التصويت.. الورقة محل التصويت لها كان مكتوب فيها مواد دستورية.. مواد دستورية.. مواد دستورية

وسواء النتيجة لا او نعم في كل الاحوال المجلس كان حيقعد امال كان حيروح فين، لكن التصويت بنعم بيحدد قعاد المجلس لحين انتهاء الانتخابات في الموعد المنصوص عليه، لكن التصويت لو طلع بلا كان المجلس حيقعد لاجل غير مسمى لحد ما يحددوا موعد تاني للانتخابات.. يعني لو كانت النتيجة طلعت لا كنتوا حتسيبونا؟ طب ايه؟ كنا حنعمل ايه يعني؟ كنا حننتخب مجلس رئاسي؟ طب ما المجلس الرئاسي حيبقى بوجود المجلس العسكري برضه، ما هي هي

وبعدين ما تخلوش اللواء ممدوح شاهين يقول للناس: ما تقولوش عليها مظاهرة حاشدة.. عشان ما كانتش حاشدة، لو كانت عشرتلاف واحد كانت حتبقى حاشدة برضه، لما تبقى 200 واحد تبقى مش حاشدة

وما تخلوش اللواء الرويني يقول لنا: الشعب هو السبب في الانفلات الامني والشرطة قايمة بواجبها على اكمل وجه.. يعني نعمل ايه في الشعب؟ نقتله ولا نرميه ولا نهجره ولا نعمل فيه ايه بالظبط؟ الشعب هو الغلطان؟ طب مش الشعب ده اللي قال للمجلس العسكري نعم؟ يعني الشعب قال للمجلس العسكري نعم وهو منفلت وقليل الادب ومحترم وابن ناس وبيعمل وقيعة بس هو كويس

والنبي خلوا العصار وحجازي هم اللي يكلمونا... بعد اذنكم يعني

وعداكم العيب في البيان ده.. فعلا القوى السياسية لازم يبوسوا بعض ويتوحدوا تاني لإن اللي بيعملوه ده قلة ادب فعلا، وحينتهي بينا اننا نبقى شبه المشهد الاخير في فيلم العار

القوى السياسية لازم يبوسوا بعض.. لايموها بقى، كسفتونا الله يكسفكم.. كده المجلس العسكري خلقه حيضيق، وكمان الشعب حيبتدي يزهق منكم وهو كفاية اللي شافه في حياته بقى، ارحموه شوية
------
اه نسيت.. والنبي المسيحيين لازم يهدوا شوية ويبطلوا يخافوا ويتخضوا كده، عشان اجيب لكم من الاخر: الجيش مش اخوان
الجيش مش اخواااااااان
الجيش مش اخوااااااااااااااان.. وبالعكس، يمكن كمان مش بيحبهم قوي، هو بيعرف يتكلم معاهم عشان هم تنظيم هرمي زيهم، لكن مش متفق معاهم في حاجات كتير
وتربية المؤسسة العسكرية وعقيدتها مختلفة كتير عن الاخوان
المفروض ان الجيش مش مسيس، بس لو مصممين تقاربوا عقيدة الجيش مع فصيل سياسي فهم اقرب للناصريين والقوميين... مش الاخوان
اهدوا شوية.. المشير مش اخوان... وان شاء الله القوى السياسية الاخرى لو شدت حيلها تقدر تاخد مقاعد كويسة في البرلمان
-------

اه.. نسيت حاجة مهمة قوي.. ماحدش يزعل المسيحيين، اللي حيزعل المسيحيين حارميه من الشباك، هم مخضوضين وعايزين حد يطمنهم، وشافوا كتير في حياتهم، وبلعوا دخان كتير وبيكحوا تراب دلوقت بقى.. واولى الناس بالتمييز الايجابي في المرحلة دي هم المسيحيين والفقرا، عشان غلابة ما عملوش لحد حاجة والكل بييجي عليهم من غير سبب.. واللي حيضايقهم ربنا حينتقم منه ويجعله عبرة عشان تبقوا فاهمين، ومش حيكسب، والله العظيم

بدل ما تقعدوا تقولوا لنا الاستقرار الاستقرار الاستقرار وانتوا مش فاهمين معنى الكلمة، الاستقرار الحقيقي ان المسيحيين يطمنوا ويرتاحوا واعصابهم تهدا وما يحسوش ان فيه حاجة بتحاك ضدهم بليل، والاستقرار الحقيقي ان الفقرا ياخدوا حقهم والرعاية اللي يستحقوها وناخد من الحرامية ونديهم بدل ما تقعدوا تشتموا في الباعة الجائلين، والشرطة ما تتعرضلهمش تاني بقى، ومش كل ما تستفقروا عيل تمسكوه وتقولوا عليه بلطجي

احسن ويمين الله ربنا حيورينا كلنا ايام سودا.. الا الافترا على الغلابة، والمسيحيين والفقرا غلابة، وما اذوش حد في حاجة، ليه هم الحيطة المايلة دايما؟