Monday, 30 May 2011

..روحوا..... لازم.. ابوس ايديكوا

لو سمحتوا روحوا، وابعتوا ناس محترمة لو سمحتوا، لو سمحتوا، لو سمحتوا، ما تبعتوش ناس حونينة من الاخر، ابعت حد يقول كل اللي في قلبه وقلب الناس 
ما تبعتش عيال بتتخض
ما تبعتش عيال معروف عنهم انهم بيسلكوا مصالح شخصية
ما تبعتش عيال قلبهم رهيف
روحوا ابوس ايديكم روحوا... احب على رجليكم روحوا، وحضروا نقط عليها اجماع وطني
ابوس ايديكم
ابوس ايديكم
مصر محتاجاكم يا ولاد
بالنسبة للمزايدات.. كده كده بيتزايد عليكم.. واصلا فيه ناس عايشة في حياتها عشان تزايد، انت رايح تخدم بلدك ولا رايح تاخد سوكسيه بما انه مسرح؟ انا لسه قبل ما امشي من على التويتر قلت لهم بعد كده كل واحد فيكم حيشكك في نسب نفسه عشان يطلع امه مش محترمة وابوه قرطاس بما انهم سلطة ابوية وعايز يزايد عليهم ويبقى ثوري
مالكوش دعوة بالناس دي، لو حد فيهم اتعرض لكم قولوا لهم نوارة اللي قالت لنا نروح واحنا وثقنا فيها وضحكت علينا طلعت عميلة الجيش ولحاسة بيادة... هاتوها فيا وانا اشيل.. بس ابوس ايديكم روحوا
مالكوش دعوة بيهم
لكم دعوة بمصر.. نقط سريعة ومختصرة وواضحة وعليها اجماع شعبي... وعيال حلوة ومخلصة وقلبها جامد اللي تروح، ومالهاش مصالح، تبقى مستبيعة على عمرها كده

at

33 comments:

  1. Mahmoud A. Metwally30 May 2011 at 17:55

    و انتى متروحيش ليه ؟

    ReplyDelete
  2. sum_1_30 May 2011 at 17:55

    طب ما تاخدوني أنا :)
    علية النعمة لو رحت و حد من الجيش عرف اني فلسطيني لياكلوني علقة ما كلهاش حمار :]

    ReplyDelete
  3. sum_1_30 May 2011 at 18:01

    as a half egyptian i want u to represent the very lil me in that gathring nawara :)
    and sorry if i called u nawara 7af

    ReplyDelete
  4. Mona30 May 2011 at 18:04

    بعد ما فرق الثوار فى جانب والاخوان فى جانب دلوقتى بيحاول يفرق الثوار فيما بينهم ....... شغل على ميه بيضا

    ReplyDelete
  5. أبوشنب30 May 2011 at 18:05

    بس المشكلة اننا نكتشف ان اللي هيروحو همه يحيى الجمل وحسام بدراوي وعبدالله كمال ومصطفى بكري ... على اساس انهم من شباب الثورة ... الموضوع عايز تركيز والناس تنكر ذاتها واللي يروح يقى حاطط مصر في قلبه ... الخوف من الفتنة

    ReplyDelete
  6. Unknown30 May 2011 at 18:10

    مش خايفة يانوارة يكون الناس دول بيقروا التاريخ كويس وحافظين كل تاريخ محمد علي مع المماليك، ومسرح الجلاء قريب قوي من القلعة عن طريق صلاح سالم

    ReplyDelete
  7. Sherif30 May 2011 at 18:19

    أنا عايزك تقولى لى بالبلدى وبعبارات بسيطة على قد فهمى المحدود, وبصراحة, إيه الصعوبة فى اختيار قيادة تمثل الثورة فى هذه المرحلة المهببة؟ المجلس نفسه ريقه نشف ولسانه ادلدل عشان يفهم الناس إنه محتاج قيادة يتفاهم معاها, وانت بنفسك قلتى إن سهولة تفاهمه مع الإخوان سببها هيكل القيادة اللى عندهم, وليست ميوله الشخصية تجاه الإخوان, يبقى إيه بقى؟ مفيش حد مؤتمن؟ مفيش حد (أو مجموعة) لا نخشى أن تبيع الثورة مقابل مكاسب شخصية؟ مفيش حد يمثلنا؟ إذا كان اختيار قيادة بهذه الصعوبة, يبقى مطلب التوحد وعدم التشرذم نفسه فى منتهى الصعوبة, ومفيش فايدة بقى, ولا إيه؟

    ReplyDelete
  8. Gihan30 May 2011 at 18:43

    يا نوارة المجلس العسكري عارف ايه الطلوب و ايه المطالب اللي عليها اجماع وطني زي مثلا عدم محاكمة المدنيين عسكريا و الافراج عن كريم البحيري و المعتقلين و اطلاق حرية الصحافة و الاعلام و الحد الأدنى للأجور و محاكمة الفاسدين و الذين تسببوا في قتل المتظاهرين.
    و مع ذلك مهما عبرتوا عن هذه المطالب في مليونيات أو في "حوارات" زي اللي أنت نفسك حضرتيها في اصرار علي عدم تنفيذ أي منها بل بالعكس مستمرون على أسلوب مبارك سواء في ضرب و اعتقال المتظاهرين و الانفراد بالقرار.
    يا رب أكون غلطانة
    و يا رب تنصر ثورتنا على كل متأمر و ماكر .

    ReplyDelete
  9. krone30 May 2011 at 18:44

    يا نواره
    محدش مشكك فى وطنيتك .. بس علشان خاطر مصر واحدة واحدة

    ReplyDelete
  10. krone30 May 2011 at 18:46

    نوارة ... اهدى شويه واحدة واحدة

    كلنا خايفين على مصر

    خلى العجلة تدور الاول

    ReplyDelete
  11. esraa30 May 2011 at 18:46

    نوارة اصلا المقابلة دي معمولة عشان المسيرة بتاعت يوم الخميس بتاعت الطلبات الجيش بيسبق لازم لازم حد يكلم ادمنز الصفحة دي الصفحة دي فيها اكتر من 50 الف مشترك يعني الادمنز بيمثلوا الرقم ده لازم حد يكلمهم عشان يروحو لانهم هيعملو المسيرة يوم الخميس و لما يوصلوا للمجلس العسكري هيقلهم انا قابلت الائتلافات امبارح فهيقولولو احنا ملناش دعوة بيهم احنا بنمثل 50 الف و الدنيا هتقع في بعضها و هيكون شكلنا نيلة الحل ان العيال دي تروح المقابلة و تقدم المطالب الي كانت هتقدمها في المسيرة حد يكلمهم بقة الصفحة اللنك بتاعها اهو http://www.facebook.com/THAWRA.MASRYA
    انت اكيد معاكي ارقام حد من الائتلاف كلميهم خليهم يتصرفوا مطلعوناش عيال في الاخر

    ReplyDelete
  12. مش فاهمه30 May 2011 at 18:58

    يا نواره مش وقت انا مش فى الأئتلاف و انا ابصر ايه لازم تروحى اذا ماكنتيش انتى تروحى مين اللى يروح ارجوكى يا نوارة احنا محملينك امانه لازم تبقى قدها انتى ناسيه الوليه ام برنيطه ولا ايه .....وبعدين مين يبلغنا و يضمن لنا الناس اللى رايحه و هم حايتأكدوا ازاى اسم النبى حارسهم ان دول بتوع الثورة مكتوب على جبينهم ولا معاهم كارنيهات الثورة ارجوكى يا نوارة لازم تروحى ولو على الأقل بصفتك اعلاميه و عاشقه متيمه للجيش

    ReplyDelete
  13. negmat lail30 May 2011 at 19:41

    روحي انتي روحي انتتي ابوس ايديكي ...يا ريت يا ريت تروحي انتي ايه المانع انا مقدرش اروح واثقة فيكي تروحي نيابة عني وعن ناس كتيرة وانت بتعرفي تتكلمي وتلمي الدور وتقولي المفيد

    ReplyDelete
  14. emy redwan30 May 2011 at 20:13

    بجد ازاى يطلبوا ريم ماجد و يطلبوا الناس تروح ؟

    ReplyDelete
  15. المواطن مصري30 May 2011 at 20:21

    مستبيعة على عمرها ايه يا نوارة؟
    انتي هتخوفيهم ليه؟
    انتي فكرتيني بمحمد علي و مذبحة المماليك!!!

    لا يا ستي المجلس عايز اولا يبين حسن نية ثانيا توحيد كل التيارات السياسية الشبابية

    و كمان عشان ما يتقالش انهم(المجلس يعني) بياخدوا قراراتهم بدون التواصل مع الشعب

    يعني من الاخر لازم الناس المنظمة الواعية اللي بتحب بلدها تروح و لا تخاف في الله لومة لائم

    عايزكم توصلوا صوتي يا شباب
    انا اقدر اوصل صوتي بنفسي لكن عندي قناعة انكم هتقدروا توصلوا صوتي احسن مني :)

    ReplyDelete
  16. hardway30 May 2011 at 20:57

    الي الاخ /Sherif said..
    اي قيادة تمثل الثورة..وهم عبارة عن مجموعات شبابية ( أصدقاء و صديقات )
    تجمعت تلك المجموعات كما كانت تتجمع علي سلالم نقابة الصحفيين أو دار القضاء العالي
    في مناسبات عديدة وجاء تجمع 25 يناير.. وفوجئوا بما حدث...مفاجأة ..و أتحدي اي شخص في مصر كلها يخالف هذا الحدث....مما ساعد علي ذلك انهيار الشرطة لوجود قيادة غير تقنية أمنيا ..وبالطبع المساندة الرئيسية للشعب المصري العظيم..وقوف هذا الشعب العملاق الفاهم الواعي المتضهد الذي صبر كثيرا علي الظلم في الميدان والزخم الشعبي الرهيب هو العامل الرئيسي والوحيد
    هو صاحب الثورة......
    وكيف تريد سيادتكم أن يكون لهم قيادة موحدة..لايمكن..لا يمكن من المستحيلات
    لماذا..؟؟ لانهم عبارة عن شراذم شبابية
    جزر متباعدة لا فكرة ..لا نظرية..لا نظام ..لا أيدلوجية ..تجمعهم......
    لا تنتظر قيادة..ولا كوادر..مش مصدقني
    أنتظر يوم الاربعاء 2001/6/1.... ووقتها تتأكد أن مفيش حاجة...
    شوية شباب متناحر متخاصم متباعد

    ReplyDelete
  17. mr_adham30 May 2011 at 21:12

    روحي يا نوارة انتي وملك عدلي ومحمد عفت وعلاء

    ReplyDelete
  18. lavender30 May 2011 at 21:32

    نواره لازم تروح الاجتماع - نواره لازم تروح

    ReplyDelete
  19. Widiman30 May 2011 at 23:39

    تسليم زينة شباب مصر تسليم أهالى رسمى فهمى نظمى

    ReplyDelete
  20. kbahey30 May 2011 at 23:43

    لازم تروحي يا نوارة

    لاااااااااااااااااااااززززززززززززززم

    موضوع النيابة العسكرية لمدنيين دة مرفوض تماما سواء بثينة او ريم او حسام

    الافراج عن كل المعتقلين

    تطهير شامل بدءا بالداخلية و كل قيادات العادلي، و بعدين النيابة زي اللي امر بحبس فريد حشيش و بعدين القضاء عشان عادل عبد السلام جمعة و عبد العزيز عمر ما يمسكوش اي قضايا

    و بعدهم المحليات و الجامعات و الاعلام

    كل دة عشان الامن يرجع و الدنيا تمشي

    روحي الله يكرمك، على الاقل تقولي لنا حصل ايه، و خدي ورقة و قلم عشان ما تنسيش

    ReplyDelete
  21. DIY CNC31 May 2011 at 00:36

    مدبحة الجلاء2011

    ReplyDelete
  22. DIY CNC31 May 2011 at 00:38

    بس بس كفايا هزار عرفة اناممتهيئلى حبقو نفس الناس الى راحو قعدو مع البلوفر الى هما محدش يعرفهم خالص

    ReplyDelete
  23. arabian_faithful31 May 2011 at 00:54

    ياريت تكونى سمعتى إئتلاف شباب الندامة طلع قال أيه مع يسرى فودة

    أنا برضه نفسى أعرف مين دووووووووووووول مين اللى وصاهم علينا !!!!!

    طيب أنا أفوضك أنتى تتكلمى عنى
    طيب لوجمعتلك 10 ألاف توقيع ترضى تروحى أنتى تتكلمى والنبى
    أعملك مسيرة وتروحى أنتى والنبى بدل إئتلاف شباب الخيبة دول

    وبصراحة بقى والله العظيم أنا فرحت موووووووووت لما الأخوان قاللهم روحوا ألعبوا بعيد خلاص حنرش ميا هنا

    روحوا معاهم والنبى أنتى يانوارة وخدى معاكى جزمة قديمة علشان أى حد يقول للجيش خليك مأنسنا شوية كمان تنسليها فوق دماغ اللى خلفوه وتقوليله معلشى دى وصية الناس اللى بتكلمنى :)

    ReplyDelete
  24. arabian_faithful31 May 2011 at 03:32

    أنا مش قصدى أهاجم حد ولا أتصيد الأخطاء لحد
    بس مش دول اللى حيتحكموا فى مصير البلد و مش دول اللى يتكلموا بإسمنا و والله العظيم الناس مستحملة وشايفة وساكته بس لو الحكاية نزول للشوارع يعنى لونزلنا بأكتر من 2 مليون نطالب بالإتزام بنتيجة الإستفتاء و موعد الإنتخابات علشان نضمن أن اللى حيتكلم حيمثلنا وتأكيد ثقتنا المتناهية فى القيادة العسكرية حترحمونا لوجه الله تعالى و تخرسوا شوية !


    http://www.youtube.com/watch?v=E0D2pDC7BxQ&feature=player_embedded#at=29

    ReplyDelete
  25. arabian_faithful31 May 2011 at 03:36

    لازم كلكم تقروا المقال ده

    علشان لما فهمى هويدى يتكلم يبقى الباقى لازم يسمع

    http://www.shorouknews.com/Columns/Column.aspx?id=466344#Note

    و لما أستاذنا كلنا سلامة أحمد سلامة يتكلم برده يبقى الكل لازم يفهم لوجه الله

    http://www.shorouknews.com/Columns/column.aspx?id=466346


    بقى أنا أسيب دول يا أستاذتنا كلنا وأروح أقرا للأشكال الضالة التانية بزمتك و دينك

    ReplyDelete
  26. Rawash Amr31 May 2011 at 04:27

    انا معاى اخرة ليله من غير مذاكرة وتتحرق الدبلومة على الكتب انا عملك منشن فى تويتر عليه رقمى كلمينى ارجوكى هحللك معضله المجلس العسكرى واللقاء انا مش عايز التعليق يظهر بس رقمى اهو 0127099194 كلمينى وحيا نجم
    هو بيتكلم عن فرق تسد انا معاى حل يخلينا تانى ايد واحده كلنا مسلمين واقباط وائتلافات وشعب ومثقفين وغيرهم ويخليه تانى ميقولش دول مش بيعبروا عن الثورة ولا حد يقدر يقول دول فلول ومشفنهمش والكلام البايخ ده
    كلمينى ارجوكى

    ReplyDelete
  27. AYMAN31 May 2011 at 06:05

    الشعب هو المشكلة
    الشعب أكثر وعيا مما يظن البعض المتجاهل والمتعالي عليه فمثلا قد نبدو متخلفين في تنظيم الطوابير ولكن لا يعلم الكثير أن السبب الأول هو ظلم من يعطي الخدمة للناس المتراصة فقد تقف طابورا طويلا وفجأة تجد شخص يدخل مباشرة بدعوة من مقدم الخدمة نفسه بداعي إنه من طرف فلان مما يفسد الرغبة في النظام هذا مثال بسيط ولكن أجزم بتحضر شعبنا حتى أقلهم تعليما إن لم يكن تحديدا هؤلاء هم أفضلنا لغياب المصلحة ونقاء الفطرة، فلا تخافوا فالشعب رفض الوصايه

    ReplyDelete
  28. احلام جوليا31 May 2011 at 07:56

    ممتاز ممتاز ممتاز عداهم العيب والي ميروحش يبقى هو الي غلطان يالله يا نواره انت وبلال فضل مثلونا هناك يالله يا نواره جمعوا نفسكم بسرعة وروحوا واطلبوا محاكمة مبارك ولجنة دستورية واقصاء اعضاء الحزب الوطني من العمل السياسي على الاقل 5 سنوات ولجان لدراسة تجنيس اهل العريش بالجنسية المصرية مش كل حاجة عملها نعمل عكسها بدون دراسة ادرسوها الاول واحذروا معبر رفح اتفتح قدام اسرائيل وخونة من فلسطين زي ما اتفتح امام المرضى والمساكين والفلسطينين الشرفاء لازم تبقى في رقابة مفتحش الباب الفاصل بين الحجرتين من غير ما اكون حذر كده خدو ا بالكم من مصر وحياه مصر بلاش عناد حبوها بجد وخافوا عليها

    ReplyDelete
  29. Dr.issamo31 May 2011 at 08:07

    يا نوارة روحي

    انتي لازم تروحي

    ولازم انتي واللي زيك

    تتحملوا المسؤلية وتمثلونا

    عايزين نشوفكم كمان في مجلس الشعب

    ReplyDelete
  30. Dr.issamo31 May 2011 at 09:24

    الحوار
    الحوار
    الحوار


    بلاش نقعد نكلم في نفسنا ونشد ف شعرنا

    من غير ما نتحاور

    لازم نتحاور ونفهمهم ونديهم حلول

    لانهم معانا وجزء من ثورتنا مش ضدنا

    ReplyDelete
  31. إعادة التفكير31 May 2011 at 10:20

    نوارة اولا انتى لابد ان تذهبى ثانيا انا عاوز اروح ومش مشترك فى اى ائتلاف ولاحزب ولكنى مشترك فى الائتلاف الاكبر والاهم وهو مستقبل مصر ..انا مصرى ومن الثوار ومهموم بالشان المصرى ومتابع جيد جدا لكل سنتيمتر حدث من 25 يناير حتى اليوم واعتقد انى فاهم المجلس والاخوان والائتلافات والفضائيات ..مش عارف اروح ازاى ومين يدعونى للذهاب..هاسيب لحضرتك صفحتى عالفيس بوك ولو هينفع اروح ابعتيلى رسالة على الاينبوكس بالاجراءات او الدعوة او تاكيد ذهابى لان العدد الف فقط
    د/ هشام صلاح
    صفحتى عالفيس بوك
    دكتور هشام صلاح
    http://www.facebook.com/profile.php?id=100000383224721

    ReplyDelete
  32. fifi31 May 2011 at 11:39

    لازم تروحى أنا حطيت إسمك لو سمحتى لازم لازم لازم تروحى إنت منظمة وبتشرحى وبتوصلى وجهة نظرك صح... ربنا يهديكى وتحضرى إنت واللى عايزاهم يحضروا بس أهم حاجة جدو الجمل و الإخوان والسفله يين ومرض.سى دى مايحضروش ..والمؤتمر حيمشى زى الفل بإذن الله...سلام

    ReplyDelete
  33. د. هانى احمد31 May 2011 at 20:30

    لابد من قيادة منتخبه من كل مجموعات الثوار تنقل مااتفق عليه الثوار وليس مااختلفوا عليه الى المجلس العسكرى لتنفيذه.. من غير كده فكما مجدكم الشعب لقيامكم بالثورة فسوف يحتقركم لانكم تضيعوها بخلافاتكم وتخوينكم لبعضكم واهمال خق الشعب فى ان يكون لثورته قائد فرد او مجموعه منتخبه... خسبى الله ونعم الوكيل فيكم اذا ظللتم على تشرذمكم

    ReplyDelete

Note: only a member of this blog may post a comment.