الى قيادات الاخوان: انقذوا الجماعة.. وارحلوا

تحديث:

ربنا يسعد ايامك يا د. عصام العريان ويهدي الحال ويروق الجو وينور سكتك يا مصر

-----------
ييجي واحد يقول لي: وانت حارقة نفسك عليهم ليه يعني؟

ما احرقش نفسي ازاي؟ مش ولاد بلدي؟ وشفت شباب الاخوان بعيني وهم مخيطين من كل ناحية وعمالين يجروا ناحية القناصة وهم بيزكوا على رجلهم ويقولوا: الى الشهااااااادةةةة؟ وواحد سعودي حكى لي انه كان جاي مصر عشان معرض الكتاب يوم 28 لقى الناس بتثور قام قال لمامته انا قاعد بقى معاهم، وقعد معانا في التحرير وواحد اخواني بيزك وبيقول الى الشهادة وهو بيجري مسك ايده وقال له: يالا يا اخي الى الشهادة قال له: يا عم حل عني انا سعودي وكنت جاي اتفسح لقيتكم بتستشهدوا. 

:))))))

وفوق ده كله تنظيم سياسي قوي.. ما هواش اقوى التنظيمات بحيث يقدر ينفرد لوحده بالساحة السياسية، واهو يوم الجمعة اثبت ان لو القوى كلها اتكتلت ضده تقدر تعزله لو عايزة

وده مش حلو.. مش مبسوطة انا كده، لا غالب ولا مغلوب.. لا غالب ولا مغلوب يا مصريين، انا لا عايزة الاخوان ينفردوا بالساحة، ولا عايزاهم يتحاصروا، لا هم ولا اي فصيل سياسي تاني، من اقصى اليمين الى اقصى اليسار، افتكروا الست اللي احنا مش عارفين اسمها وكانت بتصرخ على الجزيرة: مصر محتاجاكم يا ولاد.. مصر محتاجاكم يا ولاد... ياللي ما حافظتوش على البلد

ايوة.. مصر محتاجة كل الناس، زي ما الميدان كان محتاج كل الناس، واحنا دلوقت مش في وقت ينفع فيه النهش المتبادل ده، احنا لسه محتاجين للاجماع الوطني بتاع التحرير، لسه لسه.. لسه ما خلصناش حاجة، لسه البلد في حالة سيولة، لسه لسه.. اصبروا، حتقطعوا في بعض بعدين، مش دلوقت

اللي بيحصل ده رونج رونج رونج

ايه اللي بتعملوه ده يا اخوان؟ ايه ده؟

بقى هالله هالله ع الجد والجد هالله هالله عليه.. قيادات الاخوان دي على العين والراس تاريخها وكل حاجة بس مش نافعة الاخوان في المرحلة دي، وبصراحة اكتر، اللي قدم التضحيات واللي دماغه اتفتحت واللي مات هم شباب الاخوان، اللي حسن البنا كان في سنهم لما عمل الجماعة... ما عادش فيها كسوف، ياما اعملي معروف، قومي افتحي له الباب

قومي يا قيادات الاخوان افتحي للشباب الباب.. ولا اناديله ياما أما

ايه اللي حصل ده؟ ها؟ ايه ده؟ كل ده عشان مظاهرة؟ هو حد كان رفعكم بالمسدس وقالكم شاركوا فيها؟

اسمعوني بقى عشان ما يسبقش السيف العذل زي ما حصل مع السلفيين وماشيين يقولوا مش بناكل ودان وربنا وربنا ما بنشرب دم مسيحيين وكتاب الله المجيد

بقى كان واضح ان السلفيين بيتفرد لهم عشان يتحرقوا، واقول مهما اقول ما اخدتش من السلفيين غير الشتيمة وانا كنت بانصحهم لوجه الله

خلصوا السلفيين كده وامبابة كانت اخر شوت ليهم

دلوقت لازم الاخوان يتحرقوا.. واتحرقوا بالحركة اللي عملوها، ما تقعدوش تدفنوا راسكم في الرمل وتقولوا واااالاااااا يهمنا، ولا اساسا نزل في المظاهرة دي غير خمستلاف، ولااااااا احنا هنا اصلا.. ولاااااا يفرق معانا اساسا

لا بقى.. لا.. انتوا حظكم احسن من السلفيين عشان انتوا تنظيم هرمي وينفع يعاد هيكلته

ايه بقى؟

ناس اعلنت عن مليونية يوم 27، وانتوا من الاخر كده اتفقتوا مع الجيش انكم مش مشاركين.. قشطة، ايه سوء الادارة ده؟ ليه تطلعوا نفسكم اندال ومبلغاتية وتقولوا كلام مليان هلاوس سمعية وبصرية وكدب كدب كدب.. الكدب وحش جدا على فكرة، ربنا يعافينا يعني يا رب وما يكتبش على حد انه يكدب سواء كان واعي او ساهي، ده طعم الصدق في البق زي السكر.. ليه الكدب ليه؟ احسن حاجة الواحد يقول كل حاجة، بالتفصيل، وبامانة، كده انت ضامن انك في امان.. الصدق منجاة

عارفين سوء الادارة جاي من ايه؟ ومن غير زعل؟ من العقول القديمة، اللي حتعمل في العيال اللي فتحوا دماغهم على مصر نفس اللي اتعمل سنة 54 و65.. ليه كده؟ هو اتكتب عليهم يعني؟ قضاء وقدر؟ 

انتوا مستعيلينهم ليه دول شباب زي الفل ودماغهم توزن بلد وبيعرفوا حاجات كتير انتوا ما تعرفوهاش وعندهم قدرات هايلة لادارة اي ازمة

بصوا بقى.. انا حانصحكم وتشتموني وانبسط عشان انا بانبسط من الشتيمة عشان اخد الثواب كله من ربنا وماحدش يديني ثواب بكلام حلو

اولا: شبكة رصد دي تتقفل فورا.. لا مش تتعدل، تتقفل، ما بقتش نافعة، ما بقاش لها اي مصداقية وبقى لما ييجي منها اي خبر يقولوا: شوفوا لكم مصدر تاني دي اخوان فشارة

انتوا بقى شوفوا لكم منفذ تاني غير رصد

ثانيا: موقع اخوان اون لاين، كل الهبل اللي حصل فيه ده يتم التحقيق فيه فورا، وتنزلوا اعتذار على الموقع

اسمعوني بقى.. تاني حاجة تنجي الانسان بعد الصدق انه لما يغلط يقول انا غلطت.. كده انت في سليم السليم، الكبر بطر الحق وغمط الناس، وانتوا عملتوا الاتنين.. اعتذروا، الاعتذار يكسر الكبر ويدخلك جنة الدنيا والاخرة ويخلي الناس تحترمك واللي ما يحترمش اللي بيعتذر هو نفسه مش محترم، اللي يغلط يراجع نفسه ويغير موقفه فورا ويتراجع عن الغلط اللي عمله وما يتكسفش من اللي مش محترم اللي بيعتبر ان الجدعنة انك تفضل ماسك في موقفك حتى لو كان غلط.. ده مش محترم ده

ثالثا: كنوا بقى شوية عشان الناس روحها في مناخيرها منكم.. وبطلوا ادعاء انكم مالكين الشارع ده، الكلام ده بيستفز الناس، افتكروا احد اسباب حرق السلفيين انهم كانوا بيقعدوا يقولوا احنا مع الناس والناس احنا واحنا الناس ونبقى نقابلكم في الصناديق الشفافة وغزوة الصناديق والكلام ده، الطريقة دي بتستفز كل الاطراف وكل الناس وبتخليهم ينفروا

افتكروا ان البرادعي اتشتم لما واحد من حملته قال البرادعي احد اسباب الثورة، ولما راح الميدان بعدها قابلوه وحش قوي

اي حد بيعمل وصي على الشارع بيتلفظ، فوقوا بقى، الناس ما عادتش زي الاول تاني، ومش قابلة زعامات ولا قابلة ان كفة ترجح على كفة

رابعا: اجتماع عاجل كده بتقارير صادقة وواضحة.. اللي يعملها شباب الاخوان نفسهم التقارير دي، عشان القيادات اخدت على انها تضحك على نفسها، لا.. الشباب اللي انتوا مستعيلينهم دول هم اللي يكتبوا لكم تقرير مفصل بما حدث في ادارة ازمة جمعة 27 ويكتبوا لكم توصياتهم

خامسا: القيادات الكبيرة دي تتنحى.. معلش.. كل الكبار بيمشوا دلوقت، ومش حيترموا في شرم ولا حاجة، يشكلوا لجنة حكماء يبقى دورها استشاري وما تبقاش هي اللي بتصنع القرار

سادسا: يتم نقل القيادة لشباب الاخوان فورا، مش حاقول المرشد يبقى في سن البنا وقت ما اسس الجماعة (22 سنة وعمل كل حاجة وخلصها ومات 43 سنة.. ايه العضام الكبيرة دي بقى اللي ماسكة الجماعة؟).. يا سيدي ما يقلش عن 33 سنة وما يزيدش عن 40 سنة، عشان يكون خلص كول كورسات الكتب اللي بتقروها لهم، عدانا العيب كده؟ ومافيش حاجة اسمها مرشد مدى الحياة، يقعد عشر سنين بحد اقصى وبعد كده يتم انتخاب مرشد تاني في حدود السن ده، وعندكم في السن ده اعداد كبيرة وناس زي الفل، وبعدين هم دول العيال اللي دايرين في الشوارع وبينزلوا البلاعات، وانا شخصيا لما بانزل اي بلاعة بالاقيهم، وهم دول اللي بيعملوا الجهد في الشارع اللي بتتآلطوا بيه على بقية الناس، وهم دول اللي راح منهم شهدا، وهم دول اللي منهم جرحى، يبقى هم اولى ياخدوا القرار مدام ايدهم في الشغل

ومن غير زعل كده، دماغهم انضف كتير، ما عندكم عشرميت واحد كان يقدر يحل المشكلة دي من غير ما يستفز كل الناس دي عليكم وتروحوا تستفزوا الناس وتطلعوا بيانات فظيعة وبعدين ترجعوا تقولوا بيتصيدوا لنا، وتضغطوا على اعصاب شباب الاخوان وتخلوهم يرددوا الكلام ده ويبقوا محرجين ولما يتزنقوا في المناقشة ما يردوش مش لانهم ما بيعرفوش يردوا بس لانهم مش مقتنعين باللي بيقولوه

يا سيدي انت ما كانش فيه داعي ابدا انك ما تنزلش يوم 27، اجيبها لك على بلاطة، ما كانش فيه داعي ابدا انك تعمل اتفاق انك ما تنزلش

خالص يعني، وبعد كده اللي يتكلم مع الجيش الشباب برضه، اركنوا بقى انتوا شوية من غير زعل كده ولكم كل الاحترام، عشان حتى لو حيعملوا اتفاق يعملوا اتفاقات مافيهاش الشرقة اللي انتوا فيها، فيه فرق احساس الى جانب فرق الفهم

الكبار بيفرحوا قوي باي حد مسئول في البلد يتعامل معاهم على انهم مش محظورة وبينهاروا على اعصابهم وبيعملوا اي حاجة تنطلب منهم

الشباب، زيهم زي بقية شباب البلد دلوقت، حاسين انهم في السما، وانهم يقعدوا على البساط ويختاروا ست البنات، ومبروك عليكي انا.. ده انا فلة وبطل واحط رجل على رجل والدنيا كلها تجيلي لحد عندي، ده انا مشيت اسرائيل تكلم نفسها، وخليت امريكا تنافقني وتشتري رضايا وانا مش راضي كمان

فهمتوا؟

يعني حتى لو عايز تعمل صفقات، ما تبعتش واحد شرقان كده.. تبعت واحد مناخيره في السما عشان يجيب لك شروة عدلة بدل الوكسة دي

انتوا بتتصرفوا غلط، ومش عارفين حاجة، برضه من غير زعل.. ولا بزعل بقى.. اه مش عارفين حاجة ابدا، في عز ما العيال كانت بتموت في التحرير رحتوا اجتمعتوا مع عمر سليمان عشان فرحانين ان اخيرا نظام مبارك بيتعامل معاكم ومش بيقول عليكم المحظورة، ايه سقف الطموحات المتدني ده؟ العيال انا كنت شاهدة وهم حيموتوا كمدا في التحرير لما عرفوا بالمصيبة دي وكل واحد فيهم قعد يلطم على وشه من حماقة التصرف

انتوا مش عارفين حاجة.. مش عارفين حاجة ابدا، ولا عارفين تتصرفوا

يعني مثلا اضرب لك مثل باللي حصل في يوم 27، لنفرض انك خلاص رحت اتورطت واتفقت انك مش نازل

هات بقى اي واحد من اللي انت مستعيلهم دول، احمد عبد الفتاح - اخر عهدي بيه كان اخوان، ولا طفشتوه؟ طفش؟ على الله ما يكونش طفش - ولا احمد سمير، ولا احمد نصر حتى ابعت استدعيه، ولا اي حد من العيال الحلوة المطقطقة دي

وقول له دبرني يا وزير احل المشكلة ازاي؟

طبعا انا مش عارفة كل واحد فيهم حيحل المشكلة ازاي، بس انا واثقة انه كان حيحل المشكلة باقل الخسائر ويمكن بمكاسب كمان، ومش عارفة بالظبط الخطة اللي كان حيحطها وكان حيعمل ايه؟ بس عارفة بالظبط كل واحد فيهم كان مش حيعمل ايه

1: ولا واحد فيهم كان حيقول "عرفني.. قال لي انت مخبر يالا" اللي انتوا قلتوها في البيان دي.. ازاي تروح تتفق مع الجيش وبعدين تجيب سيرة الجيش في البيان؟ ايه الغباوة دي؟ اي حد من الشباب دول ولا كان حيجيب سيرة الجيش اساسا، لا بالخير ولا بالشر

2: ما كانش حد فيهم ابدا حيتهم القوى اللي نازلة بإنها بتقفز على ارادة الشعب والشارع ويتكلم نيابة عن "شعب مصر بأكمله"، بالعكس، كان اول استفتاحنا حيبقى احنا بنحترم كل القوى اللي نازلة ومؤمنين بحريتهم في التعبير ومشاركينهم في كتير من المطالب، وبنطالب معاهم بحقهم في التظاهر، لكن عندنا اسباب لعدم النزول.. الا وهي.. ويروح راصص اسباب محترمة مالهاش علاقة بالتخوين ولا بالتلطيش في الناس ولا بـ"الوقيعة".. وقيعة ايه؟ مين اللي قالكم تكتبوا التعبير الفاكس ده؟ ايه القلش ده بجد؟

3: ما كانش حد فيهم ابدا حيعمل الحملات البدائية العبيطة دي عشان يحشد لعدم النزول وينزل ناس بميكروفونات عشان ما تنزلش ويوزع الورق العبيط اللي خليتوهم يوزعوه وهم في نص هدومهم كده

خالص.. بالعكس.. كان حيخش دخلة محترمة، وبعدين يسرد اسبابه لعدم النزول، وانا اؤكد لكم ان احمد سمير مثلا لو كان كتب البيان ده كان كل اللي قراه ما نزلش.. عشان بيعرف يتكلم.. بيعرف يتنيل يتكلم مش يهطرس ويحط شطة في ودان اللي بيسمعه ويخليه يبقى عايز يلطشه بالالم ويرفع الضغط عند كل اللي بيقراه ويسمعه.. هو راح فين الجدع؟ انا من ساعة الموضوع ده وشايفاه خفيان؟ ايه؟ محرج منكم ولا طفشتوه راخر؟ ما هو كل عيل فالح حتطفشوه بقى

وبعدين انتوا ليه اساسا تورطوا نفسكم في انكم ما تنزلوش؟ كان جرا ايه لو نزلتوا؟ بتعملوا اتفاقات ليه؟ مش قلنا نبطل الحركات دي؟ ويا ريتكم بتعرفوا تخبوا وتدكنوا، الا كل حاجة تتفضحوا عليها

بلاش

ما عملتوش زي المجلس العسكري نفسه ليه؟ "احد قيادات القوات المسلحة" قال وماله؟ انزلوا، لا.. ده احنا كمان عايزينكم تنزلوا عشان ننفذ طلباتكم، وراحوا قالوا لنا: ويالا احسن شباب.. احموا نفسكم، واللي عايز يبات سابوه يبات كمان.. وادي اليوم خلص والدنيا ميت فل وسبعتاشر

ولا الناس اتخانقت مع المجلس، ولا حد شتم الجيش، ولا اي حاجة، فلة كده فلة.. مين اللي لبس؟ 

ااااااه.. انتوا اللي شيلتوا الليلة كلها، والناس سابت كل خناقاتها ومسكت فيكم

مسكت فيكم ليه؟ عشان لاسباب غير معلومة وغير مبررة وغير مفهومة قررتوا تتصرفوا زي الحزب الوطني

ايييييييييييه ده؟ ايييييييييييييييييييييييييييهههههههههههههه ددددددددددههههههههههههههههههه؟

انتوا ازاي تطلعوا د. عصام العريان يقول 30 الف؟ وازاي تتخانقوا على الاعداد بالطريقة الطفولية دي؟ ايه الهيافة دي؟ وازاي في الاول تقولوا خمستلاف وبعدين عشرتلاف وبعدين تلاتين الف وتمشوا تدوروا على الجزيرة مباشر وعلى العربية وتقولوا للناس قولوا انها 30 الف؟ ما كل حاجة بتتفقس.. وانتوا في القنوات دي بتتعاملوا مع صحفيين.. فاهمين يعني ايه صحفيين؟ يعني شغلتهم الاساسية انهم فضحية، وفضحوكوا ومشيوا في كل حتة يقولوا الاخوان بيتصلوا بينا وبيقولوا لنا نقول كذا

ومن غير ما هم يقولوا، انتوا ازاي تكتبوا على موقع اخوان اون لاين الكلام ده؟ وازاي د. عصام العريان يقول كده؟ وازاي تعملوها خناقة اعداد بالطريقة دي؟ هو حد بيعد نفر نفر؟ ويوصل بيكم الامر انكم تقولوا اصلا الميدان ما يشيلش اكتر من 200 الف؟ انتوا اتخبطوا في مخكم؟ انتوا بتضربوا مشاركتكم انتوا في الثورة؟ انتوا ناسيين ان اول واحد اقترح كلمة "مليونية" دي كان البلتاجي؟ يعني بتقولوا على نفسكم ان انتوا كنتوا بتكدبوا لما قلتوا مليونية بس عشان تقولوا ان حتى لو الميدان مليان كده ماهماش مليون؟ 

يعني انتوا عايزين تنسفوا شرعية الثورة من اساسها عشان يطلع اللي كانوا في الميدان قليلين من غيركم؟ فرقتوا ايه عن اللي قالوا ايام الاستفتاء: اللي قالوا لا هم الثوار واللي قالوا نعم هم اللي كانوا ضد الثورة؟

ايه التخريف ده؟ طب ايه؟ نروح نجيب مبارك تاني ولا ايه؟ 

مش نافع كده.. مش نافع خالص.. كده الكل حيطلع خسران

اتكلوا على الله بقى.. وصبحي صالح ده حد يسكته، الراجل طالع يحلف كدب على الهوا؟ 

لا بقى.. كنوا شوية.. كنوا وعيدوا هيكلة التنظيم عشان يفلح، والا العيال اللي راسها اتفتحت دي، يا حتطفش منكم وانتوا مالكوش غيرهم، يا حيتلبسوهم في حيطة حرام عليكم

تاني الخمسين قفا اللي على سهوة.. ما اتعلمناش من ايام 52 ان مافيش نجدة لاي فصيل او مجموعة غير الاجماع الوطني، وان اي فصيل او مجموعة تسول له نفسه انه ممكن ينفرد بالسلطة او ياكل من تعشيم بانه ينفرد بالسلطة اخرته وحشة، طمعنجي بنى له بيت فلسنجي سكن له فيه

القوى السياسية الاخرى حتندبح لو الاخوان اتصفوا، ولو الاخوان طمعوا حيتصفوا، والمعادلة دي سهلة وبسيطة على فكرة وواضحة، انا مش فاهمة ايه الصعب في فهمها؟ 

وايه الصعب في فهم اننا دلوقت مش وقت مشاحنات سياسية والحوار الفاكس بتاع: علمانية ولا اسلامية اللي كان على العاشرة مساء ده؟ علمانية ايه واسلامية ايه هو احنا عندنا دولة من اساسه؟ احنا كل اللي عندنا دلوقت وقفات احتجاجية وظباط.. مارشات عسكرية وقرآن.. ولو فضل السجال الفاشل ده مرسي الزناتي حيتهزم يا منز

والدولة اللي حتتبني حاجة من الاتنين مالهاش تالت:

يا دولة ائتلافية توافقية بين كل القوى السياسية بمبدأ لا غالب ولا مغلوب.. وتبقى دولة ديمقراطية مدنية مافيهاش حد كعبه عالي على التاني، وبصريح العبارة اكتر، كل واحد صباعه في بق التاني وده التشكيل الوحيد اللي يصب في مصلحة الشعب الغلبان ده اللي عمره ما شاف يوم عدل.. ارحموه بقى

يا دولة عسكرية بقى اخر ما المجلس العسكري يزهق منكم ومن تفاهاتكم وخناقتكم على الاعداد اللي في الميدان، ويقولكم يالا ياض بقى انت وهو من هنا جاتكم خابط ده انتوا معاتيه وحتضيعوا البلد، وده اللي عملتوه من ستين سنة وبرضه الجيش قالكم يالا ياض انت وهو جاتكم خابط ده انتم معاتيه وحتضيعوا البلد

احنا حنعيده تاني؟