لارا فابيان

:) مجنونة رسمي

راااااااااااااائعة، غناها جمال مطلق، ومرستان اصلي

بقينا ملطشة للي رايح واللي جاي حتى روبرت فسية

ما تحل عنا يا عم بوب وسيبنا في حالنا، انت ح تفضل كل شوية تهزأنا؟ وللا من قعدتك معانا اتعلمت قلة الادب؟ هو احنا ناقصينه؟

المشكلة في العقل العربي؟

لا

حلوا انتوا بس عنا واحنا نبقى زي الفل، في المنطقة بتاعتنا الدول المحاصرة مستواها الاقتصادي والتنموي اعلى من الدول اللي عاملة علاقات كويسة مع الغرب

سوريا، سوريا اللي المفروض انهم غلابة قوي، حالهم احسن من حالنا، ومستوى المعيشة عندهم مرتفع اكتر مننا، ونسبة الفقر عندهم اقل، وعندهم انتاج وزراعة، بنستورد منهم قمح وفول، ما تجيش القاهرة اللي معمول فيها قلة ادب من المستثمرين الاجانب لما جوعوا تلات ارباع الشعب وتقول "المشكلة في العقل العربي" عشان ما عندهمش انتماء

ايران لما مستوى الفقر عندهم وصل تمنتاشر في المية عمالين يلطموا ويصوتوا ونزلوا يموتوا نفسهم في الشارع

وماحدش اتوكس غير مصر ولبنان والاردن عشان مشينا البطال مع الدول الغربية والبنك الدولي وبنك الاحتياطي العالمي والمعونة الامريكية حللللللللووووووووااااااااا عن سماااااااااااانااااااااااااااا

دماغنا بقى انت شوية، احنا اصلا نازلين شتيمة في نفسنا من غير حاجة مش ناقصاك انت كمان تطول لسانك علينا

ادي اخرة قلة ادبنا على نفسنا كل واحد رايح جاي ياخد من بقنا ويبيع علينا وامي دايما تقول لي: من دعا الناس الى ذمه، ذموه بالحق وبالباطل

لم تعابينك بقى انت زودتها قوي

وماحدش يدافع، دي قلة ادب، ونصب، وقطع لسانه لما يقل ادبه علينا، احنا نشتم نفسنا مايجيش الخواجة يشتمنا كأنه ح يعلمنا، وقال ايه؟ اتفاجئ لما جه مصر ولقى ان شباب جامعة القاهرة مخهم نضيف، اه، وجزمتهم انضف من مخك كمان يا سي فسية

والسنة اللي فاتت برضه قل ادبه علينا وعديناها له وقلنا ده عتاب محبة لما قال علينا فاسدين ونصلي ونرتشي ونصلي ونعذب، طب ده كلام علمي وللا كلام مصاطب؟ يعني هو كان عمل احصائية ولقى ان البني ادم لما يصلي لازم يعذب ويرتشي؟ وماحدش يقول لي اصله داعم للقضايا العربية، هو ح يمن علينا يعني؟ بياخد تمن دعمه لينا بانه يهزأنا، هو احنا يعني من قلة الاسياد اللي مستعبدينا رايحين نأجر اسياد كمان؟ ثم ان تقارير التنمية دي جلال امين شخرمها وشركها وخلاها ما تنفعش ببصلة، وايه اللي يخلي روبرت فيسك بيفهم احسن من جلال امين، جلال امين متخصص في الكلام اللي هو بيقوله وما بيقولش كلام جزافي من غير دراسة ولا احصائية زي اللي بييجي سايح ويمشي من عندنا يهزأنا

كفاية بقى قفانا اعرض

------------

هيه هيه هيييييييه، انا شمتانة، اما نشوف صحاب اسرائيل اللي بيشحتوا منها ح يعملوا ايه لما الوكالة اليهودية تفلس

-------------

ولما هم فالحين قوي زي ما كل الناس موهومة، مالهم ملحوقين على التطبيع قوي كده؟ المفروض انهم جزيرة الديمقراطية وجنة الله على الارض واحنا تواليت الشيطان على الارض، يبقى ح يموتوا يعملوا تطبيع كامل معانا ليه لو كانوا عدلين فعلا؟

خليك انت يا سونة اعمل كل التنازلات وادي دقني ان ابنك فلح، يعني يمرروه ويجيبوه رئيس ممكن، لكن ح يركبوا له مخ؟ ح يركبوا له احساس؟ ح يخففوا له دمه؟ ح يحببوا فيه الناس بالعافية؟ يعني ابوسك منين يا بخرا؟ ح يعيدوا تصنيعه ازاي ده؟ 

اشوف فيك يوم يا لطفي

زمااااان ايام ما كنا بضفاير، واحدة صاحبتي اتقدم لها عريس قال لها: حسني مبارك اذكى رئيس جه مصر

قامت رفضته

هي الحقيقة مش رفضته هي قامت وسابته في وسط ماهو بيتكلم، وانا باطالبها من موقعي هذا انها تدور على عنوانه وتبعت له جواب اعتذار، عشان طلع معاه حق، لان الراجل ما قلهاش حسني مبارك اكتر واحد بيحب المصريين، هو قال لها اذكى رئيس حكم مصر

مشاعره ناحية المصريين بقى هي ما ادتوش فرصة انه يشرحها لها

ايه كانت مشكلة حسني مبارك اول ما مسك مصر؟ (غير انه بيكرهنا لله في لله من غير ما نعمل له حاجة) الجماعات الاسلامية المؤمنة بوجوب الثورة على الحاكم الظالم، ولولا انهم اتغابوا في اليات الثورة دي وده اللي قلل شعبيتهم، لكن هم في الاول كانوا لهم تعاطف كبير بين الناس عشان ناس مؤمنة، وبتقول كلام معقول من وجهة نظر الشعب، لاننا طول عمرنا شعب متدين، والدين جزء اساسي من حياته، بعد كده الناس كرهتهم لما اتهبلوا ومشيوا يفرقعوا بغباوة واصابوا مصريين وحرموا كل حاجة، بس في الاول كان فيه تعاطف معاهم (خصوصا انهم كانوا دايما يستشهدوا بثورة سيدنا الحسين اللي شتموه بعد كده لما "تابوا" واحنا هنا في مصر: مدد يا حسين مدد)، جه بقى سونة لقط الخيط ده، وبالتوازي مع القبضة الامنية والامعان في كسر نفس الناس عشان ما تبقاش لها عين تفتح فيه

قال لنا: مش انتوا عايزين دين؟ انا ح اجيب لكوا دين يا ولاد دين...

وراح مسنجف لنا دين وطلق علينا مجموعة من الدعاة وفق خطة ما تخرش المية

الطبقة اللي معاها فلوس واللي تقدر تعمل شحن، او توعية، او مشاريع، او حتى ضميرها يأنبها انها بتاكل في قتة محلولة وغيرها مش لاقي العيش الحاف، طلق عليهم دعاة الفضائيات يصوصوا لهم ويريحوا لهم ضميرهم من خلال استنزاف طاقاتهم في الهبل:

شنط رمضان

هدوم يوزعوها

بطاطين

ويقعدوا بقى يعبوا في الرز والفاصوليا البيضا سبع ساعات ويرجعوا هلكانين وفرحانين وحاسين انهم عملوا اللي عليهم وزيادة، وبكده، لا حلوا ولا ربطوا، وبقوا منزوعين الفتيل، وضميرهم مرتاح، وحاسين انهم احسن من بقية الشعب كمان (وبيشتموا في الشعب بغباوة) وانا عندي واد بيضرب بانجو وضميره مأنبه احسن الف مرة من واحد ما بيعملش حاجة خالص ومقصر وحاسس انه سيدنا عمر وسيدنا ابو بكر في طلعه واحدة

افيد لي انا كمواطنة، على الاقل ممكن اللي بيضرب بانجو ده يجيله يوم ويفوق، لكن اللي بيضرب شنط رمضان عمره ما ح يفوق

الفقرا بقى عمل فيهم ايه؟ اااااه حسبي الله ونعم الوكيل فيك يا عوكل

فتح عليهم ماسورة دعاة سلفيين معاتيه بياخدوا لستة خطواتهم من ساعة ما يصحوا لحد ما يناموا من الامن، الواحد فيهم بالدبلون، ما قراش حاجة في حياته غير الرحيق المختوم، وهو اصلا بيشتهجى "زاراعا"، وكلهم بلا استثناء بيقولوا بحرمة الثورة على الحاكم، والاكتر من كده، طالعين في مودا جديدة يقولوا سيدنا يزيد (ههههه يعني يا عوكل انت عارف انك زي يزيد؟ بالشفا) و"ان خروج الحسين على يزيد لم يكن فيه اية مصلحة لا في الدنيا ولا في الدين" وكل حاجة حرام بقى

الفقرا، زيهم زي اي انسان يتحط في مكانهم، غضبانين، وقرفانين، وزهقانين، ولانهم بني ادمين مش كلاب، حاسين ان مافيش عدل لما يبقى هو بيدور في الزبالة على اكل وواحد تاني راكب مصفحة، وحكاية دي ارزاق دي مش داخلة دماغه، حط نفسك مكانه، لو عشت عيشته مش ح يدخل دماغك ابدا ان ربنا هو اللي عمل في الناس كده وان دي مجرد ارزاق

عشان كده بيروح البيت ينزل في مراته ضرب لما يعدمها العافية، وعشان كده بيخانق دبان وشه وماشي بالسنجة ونفسه ومنى عينه يقول لحد مساء الخير فيقول له مساء النور: وكمان بتقول مساء النور؟

عادي، ده سلوك انساني طبيعي

طب بدل ما يقع في ايد واحد يقول له: وانت ايه اللي يصبرك على العيشة دي؟ بدل ما تضرب مراتك ما تاخد حقك بدراعك يا اخي، بتستقوى على مره؟

وتقوم ثورة جياع (اللي كان مفروض تقوم من حوالي خمس سنين وفات وقتها) فات وقتها ليه؟

عشان عنده واحد في الجامع بيخليه يضرب مراته برضه، وبدل ما يضربها من غله وبعد شوية لما يبص لوشها الازرق تصعب عليه وضميره يأنبه ويحتقر نفسه زي ما كان بيحصل له زمان، لا، هو بيريح له ضميره بانه يقدر يضربها عشان تتنقب، يقدر يضربها عشان كلمت جارهم، يقدر يضربها عشان ما قامتش صلت الضهر، وفي الحالة دي، لما يبص لوشها الازرق مش ح يحس الاحساس اللي كان بيحسه قبل كده، ح يحس انه مجاهد في سبيل الله

وبدل ما يمسك السنجة وينزل بيها على رجل اعمال وللا عضو مجلس شعب

هي هي السنجة خليها في ايدك، بس انزل بيها على المسيحيين، يستاهلوا، عشان عباد الصليب وعشان بينصروا

حاجة كمان، الفقير ده عنده احساس بالدونية وانه مهان ومالوش كرامة، بدل ما يقع في ايد واحد يقول له: انت انسان ولك كرامة زيك زي غيرك، لا، سعادة الشيخ بيقول له: انت مسلم، انت من شعب الله المختار، والمسيحيين دول كفار، وح يروحوا النار، انت احسن منهم، واذا حطينا في الاعتبار ان المستوى الاقتصادي للمسيحيين اعلى من المسلمين، نقدر بقى كده نشنير المسيحيين تماما: البلد بلدنا وهم كفار واحنا مسلمين وهم معاهم فلوس واحنا لا؟ هجوووووم

الله؟

طب والنسوان والمسيحيين ح يفضلوا ينضربوا ويسكتوا

النسوان اه، ح ينضربوا ويسكتوا، ح يعملوا ايه؟

المسيحيين، لا دول في جيبنا، واحنا مقسمين تقسيمة عدل، الكنيسة لها شعب الكنيسة، واحنا لنا بقية الشعب نطلع تلاتينه

وانا احب اقول حاجة هنا ح تزعل المسيحيين، ومش مهم يزعلوا، انا ح اجي ايه في اللي بيحرقوهم، يعني استحملوني شوية دول كلمتين، انا ايدي فاضية اهي من غير سنج

الكنيسة مسئولة مسئولية كبيرة قوي عن عزل المسيحيين وحرمانهم من حق المواطنة اللي بجد لانها قبلت الصفقة مع مبارك، وبتتحامى في مبارك اللي هو اصلا مسلط عليهم اللي بيعملوا فيهم ده كله، والمسيحيين مش مستفيدين، كباراتهم بس هم اللي مستفيدين

الكنيسة بتتصرف مع المسيحيين على انهم شعبها وهي سلطة سياسية كمان مش بس سلطة دينية، هي مش قعدة عرب دي، دي دولة، والمفروض ان فيها قانون

كام مرة في هجوم على المسيحيين الكنيسة تدخلت واجبرت المصابين بالتنازل عن المحاضر؟ هي ايه اللي يخصها الكنيسة تتدخل في حاجة زي دي؟ واحد ضرب واحد حل المشكلة في القسم وساحة القضاء مش في الكنيسة

بلاش

مال الكنيسة ومال انها تدعم مبارك وللا غير مبارك؟ هي حزب سياسي؟ دي مؤسسة دينية، مالها هي ومال الانتخابات؟

ااااه لبعدين الاخوان ييجوا

همم، طب ايه اللي ح يحصل لهم اوحش من اللي حاصل دلوقت يعني؟ يعني فيه ايه اكتر من انهم مش بيترخص لهم ببناء كنائس ولما بيصلوا في البيت بينضربوا؟ فيه ايه اكتر من ان الامن يروح للناس يقول لهم انصروا دينكوا؟ فيه ايه اكتر من ان كل مسيحي يهج من ام البلد يبقى موصوم من انه من "اقباط المهجر" يعني خاين وعميل وعايز بلده تحتل؟

بلاش

مال الكنيسة تتدخل وتقول انا امنع وجود حزب مسيحي؟ هم مالهم؟ الكنيسة دي الناس بتروح تصلي فيها وهي المرشد الروحي بتاعهم، وفيما يخص العقيدة المسيحية بالذات الكنيسة مش مفروض تتدخل بالطريقة دي في السياسة، كده هي مش مدية فرصة لاي قانون انه يتنيل ياخد مجراه

ومش مفروض المواطن المصري المسيحي يحس ان حمايته في الكنيسة، المفروض ان حمايته في القانون، فيه جريمة حصلت اول امبارح، وانا من حقي، كمواطنة، اعرف مين المتسبب في الجريمة واعرف انه ح ينال جزاءه القانوني مظبوط

تيجي بقى الكنيسة تتدخل وتجبر الناس يتنازلوا عن المحاضر و"نحلها ودي" وحبايب؟ لا مش حبايب، ماحدش عاد بيحب حد دلوقت، الناس روحها في مناخيرها

وعوكل ماسكهم من خناقهم، وبيلعب بالنار عشان يمرر ابنه دلوقت ولما ابنه يمر ح يحلها بانه يكتم نفسنا كلنا وكأن مافيش حاجة حصلت

وعوكل ما يهموش يلعب بالنار ولا يهمه ان المسامير لما تتشال ح تسيب مكانها اخرام عمرها ما ح تتصلح

عشان هو بيكرهنا

هو اذكى واحد حكم مصر

واكتر واحد بيكره المصريين، واحنا ما نهموش في حاجة، ما نهموش في حاجة ابدا، لو موتنا بعض وفضينا البلد يبقى خير وبركة: ما انتوا كتير

تاني حرق بيت مسيحي الناس بتصلي فيه "من غير ترخيص"

تحديث:
احلى تعليق على الخبر بتاع الجزيرة واحد كاتب كدهو:
ayman


نحن المسلمين نضرب ونهان في كل مكان ولي سؤال عندما دافع رجل عن زوجته ضربتة الشرطة الالمانية امام ابنة والناس اجمعين لان المسلمين هناك اقلية فماذا تفعل الشرطةهنا مع الاقلية؟

طب يا جماعة، ماهو الراجل كتر خيره قال لكوا اهو، صح، انت صح، عشان بنتضرب في العراق وافغانستان وفلسطين وبنضطهد في اوروبا يبقى من حقنا ناخد فرصتنا بقى احنا كمان نضرب الناس ونضطهدهم، اسمعوني يا جماعة اسمعوني، انا اضرب، اضرب والنبي اضرب، يعني ح نعيش عمرنا كله نتضرب؟ مالناش نفس احنا كمان؟ وللا تف علينا الكلب؟
ييجي واحد غلس يقول لي طب ما تتشمللوا كده على امريكا واوروبا واسرائيل اللي بيدوكوا بالجزمة القديمة المتعاصة في الكنيف ويأكلوهالكوا بعد ما ينسلوها على دماغكوا، بتتشطروا على الغلابة ليه؟ اقول له عشان حضرتك حمار، هو كده، هم يتعافوا علينا واحنا نتعافى على اللي عندنا، حق ربنا
اكفر بقى، ما انت تلاقيك مسيحي 


والترخيص ده بيتاخد من مين لما الواحد يحب يصلي للي خلقه؟

الجزيرة واخدة بيان الداخلية ومنزلاه زي ما هو وللا ايه؟ اشتباكات طائفية؟

حصل فيها ايه؟

اصابة اربعة

مين؟

اتنين مسيحيين واتنين شرطة
ودي اشتباكات ايه دي اللي طرف واحد بس هو اللي مصاب ومعاه الشرطة؟ على اساس ان المسيحيين كانوا بيلسعوهم باللبانة؟

والله ما عارفة اضحك وللا اعيط

نص الخبر اهو

اعتقلت قوات الأمن المصرية عشرات الأشخاص عقب اشتباكات بين مسلمين ومسيحيين في قرية بمحافظة المنيا جنوبي البلاد، أسفرت عن سقوط أربعة جرحى هم اثنان من المسيحيين واثنان من الشرطة وفق مصادر أمنية.

وقالت مصادر الشرطة إن الاشتباكات اندلعت بعدما هاجم مئات المسلمين في قرية الحواصلية (200 كلم جنوب القاهرة) عقب صلاة الجمعة منزلا اتخذه مسيحيون كنيسة دون ترخيص، وحاولوا إحراقه لكن الشرطة منعتهم.

وتدخلت الشرطة بإطلاق الغاز المسيل للدموع لتفريق المشتبكين من مسلمين ومسيحيين (قصدهم تدخلت عشان تشيل السادة المسلمين من فوق المسيحيين). ونقلت وكالة رويترز للأنباء عن مصادر أمنية أن الشرطة تعقبت طرفي الاشتباك واعتقلت 37 شخصا أغلبهم مسلمون (اغلبهم؟ ده مفروض ان فيه مسيحيين مقبوض عليهم؟ عشان عملوا ايه؟ مناخيرهم معووجة واستفزت اللي هاجموهم؟)، في حين ذكرت وكالة الصحافة الفرنسية نقلا عن مصادر الشرطة اعتقال عشرين شخصا.

وأغضب مسيحي في القرية مسلمين في وقت سابق هذا الأسبوع بعدما أعلن أنه سيحول منزله المكون من أربعة طوابق إلى كنيسة (هو اللي غلطان، لو كان قلبه بيت دعارة ما كانش حد كلمه، عشان بيت الدعارة مالوش ترخيص)، وفق ما نقلت وكالة الصحافة الفرنسية عن مسؤول رفض الكشف عن اسمه.

وأكد مسيحيون أن المبنى الذي استهدفه المهاجمون كنيسة لم تحصل على ترخيص بعد، لكن مسلمين أشاروا إلى أنه بيت موظف مسيحي يدعي أنه قس (يا سبحان الله، بيته وهو حر فيه، يوقع محفظته مطرح ماهو عايز).

وتشهد العلاقات بين المسلمين والأقلية المسيحية في مصر اشتباكات دامية بين الحين والآخر بسبب نزاعات على بناء الكنائس أو حدود الأراضي أو علاقات الرجال والنساء.

(او بسبب خبط في كتفه وما قالوش سوري سوري سوري، او بسبب بياكلوا زيت تلاتربع السنة وبيخلصوا كل الزيت والمسلمين عايزين يحطوه على شعرهم، او بسبب ان معظمهم قصيرين والمثل بيقول كل قصير مكير، او بسبب انهم... كده غلسين، ياباي، سم كده) 

وكانت اشتباكات مشابهة اندلعت في قرية جنوب القاهرة بعدما أقام قس في منزله قداسا في يونيو/ حزيران الماضي، مما أسفر عن جرح 18 شخصا واعتقال 35 آخرين.(اغلبهم مسلمين برضه؟)

---------------

شوف بقى، وهم خارجين، من صلاة الجمعة

باكرر، من صلاة الجمعة، كانوا بيصلوا، وجد المجموع نفسه في حالة روحانية عظيمة، حالة روحانية عميقة، حالة روحانية خلتهم طايرين، مش قادرين يستحملوا الحالة الروحانية اللي هم فيها، يعملوا ايه؟ يسيبوا نفسهم كده لحد ما يطقوا من كتر الروحانيات؟

راحوا هاجمين على بيت لواحد مسيحي عمله كنيسة، بس ايه؟ من غير ترخيص

وزي ما تقول كده، السادة المهاجمين، بيحبوا القانون، بيموتوا في القانون، القانون ده نني العين من جوة، وزي ما تقول برضه، اصل مصر دي كل حاجة فيها بترخيص، كل حاجة ماشية زي ما الكتاب بيقول، كل حاجة لها ورقها وقانونها، البلد مش سايبة

احنا ولا فخر، نعتز باننا ما عندناش بيوت بتتبني من غير ترخيص اسمها عشوائيات

ولا عندنا محلات بتتفتح من غير ترخيص

ولا جراج من غير ترخيص

ولا زاوية صلاة من غير ترخيص

احنا بلد التراخيص، الترخيص احنا واحنا الترخيص

نموت نموت ويحيا الترخيص، اللي يفرط في ترخيصه يفرط في شرف بنته، وشرف بنته زي ورق الترخيص، ما يترخصش الا مرة واحدة، واللي مالوش خير في تراخيصه مالوش خير في امه، وقال على رأي المثل: رخصت فلان؟ ايوة.. حرقته؟ لا.. يبقى ما رخصتوش

طبعا المسيحيين "ادعوا" ان دي كنيسة من غير ترخيص

بس المهاجمين قالوا: لاااا، ده بيت لموظف مسيحي "بيدعي" انه قس

وطبعا هم زعلانين قوي عشان بيدعي انه قس، لانهم خايفين على شرف القسوسية من واحد موظف مدعي، واللي ما نرضاهوش على نفسنا ما نرضاهوش على غيرنا، وزي ما احنا ما بنسمحش لواحد خريج تجارة انه يبقى داعية ديني، ما نسمحش لموظف مسيحي يدعي انه قس

وهو ايه اللي يخليه يبقى قس هو؟ احسن مننا في ايه عشان يبقى هو قس واحنا لا؟ وهو مش موظف في مصلحة القسوسية، هو موظف في مصلحة تانية، يبقى بيكدب ليه؟

وبعدين ايه لزوم الاستفزاز؟ لا خلينا بقى موضوعيين، المسيحيين مستفزين ليه؟ ليه يبقى موظف وعنده بيت من اربع طوابق؟ وليه يحوله كنيسة؟ وليه عايزين يصلوا طيب؟ وبعدين ليه كده التفرقة دي؟ عايزين يصلوا ما يصلوا في الجامع يعني مع المسلمين، لازم كنيسة يعني؟ ايه التشدد ده؟ ثم هم مسيحيين ليه بقى؟ ما كل الناس مسلمة هنا، خالف تعرف يعني؟ ايه الغلاسة دي؟ 

ايه الحكاية بقى؟

ايه الحكاية؟ اعرف بقى، انا ما اديش عقلي لغيري ابدا، مين اللي بيحط شطة في ودان الناس ويخليها تعمل كده؟ (مشيها ودان المرة دي) مين؟ ماهو ماحدش يقنعني ان الدولة ما تديش تراخيص لبناء كنيسة ولما الناس تصلي في بيت ده يغيظ اي واحد مسلم، اي واحد، اي واحد في الدنيا، ما بقالنا الف وربعميت سنة المسلمين بيصلوا في الجامع والمسيحيين بيصلوا في الكنيسة، ايه اللي يغيظ في كده؟

ومين اللي وزهم في صلاة الجمعة عشان يخرجوا من الصلاة بدل ما يروحوا يتغدوا يروحوا يحرقوا الناس من غير سبب في "اشتباكات" حيث كان المسيحيين بيزعقوا زي الغول ويقولوا: شيلوه من فوقي لاموته

حسبي الله ونعم الوكيل فيك ياللي في بالي

حسبي الله ونعم الوكيل فيك، من امتى الغلبان بييجي على الاغلب منه الا من ساعة ما ربنا حدفك علينا؟

ولا سعودي ولا ياباني شركة طنطا ح ترجع تاني

مرعي بتاع الكلمة غطى جزء من اضراب شركة عمال طنطا للكتان والزيوت

انا اليومين دول سنتمنتالية مهترئة زيادة عن اللزوم، بقيت اتضايق قوي، هم بيعاملونا كده ليه؟ فيه في الدنيا بلد الشعب فيها يعتصم عشان عايز يشتغل والحكومة تقول له لا، خليك كده عواطلي؟ نفسي ادخل جوة دماغك يا عوكل واعرف ايه اللي بيدور فيها

اكيد له عذر ما، او تبرير ما، في الكورس اللي باخده عند رأفت الميهي كان بيقول لنا على رسم الشخصيات: اوعى ترسم شخصية سودا، مافيش شر مطلق، كل انسان له اعذار ومبررات واسباب تخليك تتعاطف معاه، حتى ابليس لما ربنا وصفه اداله مبرراته وعمل له تاريخ.

يمكن يكون الكورس ده هو اللي مخليني سنتمنتالية مهترئة بزيادة كده؟

طيب يا عوكل، لو سمحت خليني اشوف مبرراتك زي ما شفت مبررات ابليس على الاقل، بتعمل فينا كده ليه؟ هو احنا وحشين؟ هو احنا طلباتنا ايه غير الستر ولقمة العيش، والناس عايزة تشتغل، نفسها تشتغل يا اخي، ده احنا شعب اي حكومة في الدنيا تتمناه

بتعمل كده ليه؟

الناس بتقول بالروح بالدم نفديك يا كتان، انا عمري ماشفت كده في اي حتة في الدنيا

مرة ابليس طلع لعوكل وقال له: انا عندي ليك فكرة تعملها في الشعب ده.... هات ودنك: وشوشوشوشوشوش

راح عوكل قال له: طب اسمع الفكرة دي، هات ودنك..وشوشوشوشوشوشوش

قام ابليس قال له: لا يا شيخ حرام عليك

هو سيادتك مش معانا وللا ايه؟

انا مستنية مرعي (مش بتاع الكلمة مرعي المدون) بينزل فيديوهات اعتصامات العمال في طنطا وح انزلها لكوا عشان بس نقدر الناس حق قدرها

انا مش كل ما ح امشي وللا اتكلم مع حد اسمع شتيمة في "الشعب المصري" زي الشيخ عبد الباري: هو ربنا عماكوا من شوية؟

- هو سيادتك مش معانا وللا ايه؟

- انا؟ انا مؤمن، والمؤمن مصاب

انا عايزة اعرف هو احنا مالنا؟ اقصد الشعب المصري اللي بيتشتم عمال على بطال من مواطنين من الشعب المصري برضه، وللا هم فاكرين نفسهم لوردات انجليز؟ ايه اللي وحش فينا في سياق ظروفنا؟ وايه المصلحة في هدم نفسية المصريين وتحطيمهم واصابتهم باليأس والقاء اللوم عليهم في كل حاجة؟ عشان يبرأوا مين؟ يبرأوا مبارك، وللا يبرأوا امريكا واسرائيل اللي مشغلين مبارك؟ وللا بيسبقوا قبل ما حد يقول لهم: يا فشلة؟ طب ولزومه ايه؟ ادي احنا بنتعكز على بعض، هو احنا لينا حد غير ربنا؟ هو احنا لينا دولة وللا سفارة وللا مجتمع مدني يسأل علينا من غير اجندة وللا قانون بيطبق؟ احنا لنا مين؟ احنا اللي اتعمل فينا لو اتعمل في جبل كان اتهد، هو فيه حد في الدنيا بيتعمل فيه ده كله ويطلع سليم؟

والناس لا هم "عبيد" ولا متخلفين ولا اي حاجة، اللي احنا فيه يخلي الناس تمشي تموت بعض في الشارع

ثم يا اخي ما تشوف نفسك يا اخي، ما تشوف نفسك، يعني هاذوها المجموعة اللي مصممة تحطم معنوياتنا لما بيقولوا: شعب متخلف، شعب سلبي، شعب شرير، شعب قاسي، شعب وسخ، شعب بلا بلا بلا

قصدهم ايه؟ قصدهم ان كل الناس وحشة وهم اللي كويسين؟ طب ولما هم كويسين ما عملوش حاجة عدلة ليه؟ وللا بيبرروا لنفسهم تقصيرهم بان الشعب هو اللي وحش؟ انا مش عايزة اعرفهم الناس دي تاني، اللي بيتكلموا كده، ما يكلمونيش تاني عشان بعد ما باقفل معاهم باعيط وبطلت ادخل المدونات اللي بتتكلم كده عشان ما اعيطش

ده ظلم

ماهو يا انت شايف نفسك وسخ ما تعممش على الشعب كله وتقول شعب وسخ، خليك راجل كده وشجاع وقول انا عيل وسخ واللي له عندي حاجة ييجي ياخدها

يا انت شايف نفسك انضف من كل الناس، اديني امارة بقى وقول لي انت عملت ايه يا عم عرابي، على وشك يبان يا نداغ اللبان، طب احنا كلنا وحشين وزبالة وانت فين بقى يا باني الاهرامات وبرج القاهرة والسد العالي في تلات ساعات وتمنتاشر دقيقة؟ ما تكنس الزبالة

اللي مش عاجبه البلد وشعبها يفارقنا من غير شر ويرحمونا من الطراش في ودن الناس وارسال رسائل سلبية لهم عشان يحطموا معنوياتهم، فشرتوا، لا عشتوا ولا كنتوا، احنا عندنا سبعتلاف سنة، مش كام كلب مهزومين وعينهم مكسورة وفضايحهم الله اعلم بيها ورسوله والمؤمنون جميعا يبقوا هم دول احنا ويتعمموا علينا، كل شعب فيه ناس وحشة، وفي وقت الفيضان الزبالة بتقب على وش المية، معلش، بكرة تروق وتحلا بـ"أما ما ينفع الناس فيمكث في الأرض" بس الغمة تزول، وح تزول ان شاء الله، عدا علينا اوحش منها وكله طلع في الغسيل وما يفضلش من بني ادم غير ذكره وعمله واقل ارزقي امي بيسعى على اكل عيشه احسن وانضف واشرف من المتقعرين اللي بيشتموا فيه وهم ما يقدروش يقفوا وقفته في الشمس نص ساعة بس، ويحشر المرء مع من احب، اللي بيحب الخواجات يشبع بيهم
الرسول كان بيقول: اللهم احيني مسكينا وامتني مسكينا واحشرني في زمرة المساكين
وانا كمان يارب وانا والنبي كمان يارب

الرسالة دي جات على التويتر من منعم تقريبا وعرباوي نقلها

RT @3arabawy تعالوا نبعت احنا فاكسات للنائب العام لسرعة الافراج عن عياش ابو خليل ومجدي سعد وده رقم الفاكس 0225774716

عندي سؤال والله

لو الحاخامات اللي تاجروا في الاعضاء البشرية لناس يهود زيهم محتاجين اللقمة، وواحد قبل على نفسه وهو حاخام، بيقف قدام ربنا وبيعلم الناس الحلال والحرام وكلام ربنا، انه ياخد كليته ويديله فلوس عشان ياكل او لو الناس الحلوة دي كانوا شيوخ مسلمين

كان ح يبقى ايه الوضع في الاعلام الامريكي ومع دلاديل امريكا هنا اللي سكتم بكتم طبوا ساكتين انشالله دايما؟

تخيل كده ان علي جمعة مثلا بيتاجر في الاعضاء البشرية، او حتى محمد حسان يا سيدي، انشالله حتى محمد حسين يعقوب، فيه اكتر من كده بقى؟ تخيل حتى شيخ الازهر اغتصب طفل وللا باع كلية واحد من اسطبل عنتر، تخيل العالم كله كان ح يبقى واقف على رجل ازاي؟ وبرنارد لويس بقى كان ح يلعلع، ودوجلاس موري اللي بقه مغروس لجوة وشه وبيتكلم زي ميسز ماجوياه، وهنا بقى، هنا، مطبلاتية امريكا واسرائيل، انا عايزاكوا تتخيلوا معايا بامانة احسن يكون بس عندي احساس مبالغ فيه بالظلم وللا حاجة، وانا اصلي الحاجات دي بتزعلني ونفسي بتصعب عليا فخليكوا معايا كده، لو دول كانوا مش شيوخ مسلمين، مسلمين وبس، اسمهم محمد واحمد وعمر وما بيركعوهاش وسكرانين على طول، بلاش، مش مسلمين خالص، مسيحيين عرب، بني بس، لونهم اسمر زي اللي اتقتل عشان كان معلق صورة البابا شنودة لان القاتل افتكرها صورة بن لادن، وبيتكلموا اي لهجة عربي، كان ايه اللي ح يحصل؟

تخيييييييييييييييييييييييييييييل

على فكرة احنا مدام بينتشنير كده كده يبقى نعمل اللي احنا عايزينه بقى

شعب الله المنشار

اسرائيل بتاخد من امريكا بس ستة مليار دولار سنويا، غير اللي بتاخده من الاتحاد الاوروبي، غير اللي بتاخده من تحت الترابيزة من الحكومات العربية، غير اللي بتاخده من الجمعيات اليهودية في العالم كله، غير قضية الفساد اللي فيها حاخامات (حاخامات يعني رجال دين يهود) اللي بيتاجروا فيها باعضاء الناس ويغسلوا اموال مسروقة من قوت الناس (وغالبا الناس دول اللي هم احنا على رأس القائمة) ويبعتوا لاسرائيل، غير فلوس العراق اللي بتكب عندهم بعد ما حصل اللي حصل

وهم كلهم على بعضهم تعدادهم يقارب السبعة مليون، منهم مليون ونص عربي، وبقالهم ستين سنة على ده الحال، اليابان بنت نفسها في كام سنة؟ كل ده ودي احوالهم الاقتصادية:

Poverty and Hunger


Of the 2.1 million households in Israel, one of every four Israelis –1.6 million people – lives below the poverty line. Close to half of them are working in full or part-time jobs and are still unable to provide the basics for their families. This Passover, charity organizations say they saw a 40 percent increase in the number of people asking for help. In Jerusalem nearly 1,000 people a day come to four soup kitchens at which hot meals are served.


• One-third of Israeli children, some 777,400 in number, live in poverty-stricken families, according to the National Insurance Institute (February 2009). Israel ranks among Western countries with the greatest percentage of poor children.
• The number of working families under the poverty line continues to rise, from 45.7percent in 2007 to 66.4percent in 2008.
• In 2005, the poverty line for a single person was about $445 per month; for a family of five, it was $1,337. A minimum-wage earner in Israel brings in approximately $883 per month; taxes can reduce that number almost to the poverty line.
• Over 70 percent of the minimum wage earners in Israel are women.
• 75 percent of poor families cannot afford medicine and 70 percent are dependant on food donations.
• 80 percent of Israelis living on support provided by aid groups are below the hunger line.


One of the saddest and most telling statistics is this: 44 percent of those polled by Latet, a food aid organization, stated they cannot imagine breaking out of the cycle of poverty, and believe that their children will also grow up to be poor.

 

انا مندهشة وفاتحة بقي كدهو

انا عايزة افهم ليه؟ ليه يعني؟ عندهم فساد اكتر مننا؟ ما بياخدوا فلوس اكتر مننا، وتعدادهم قد تعداد شبرا، ازاي احصائيات الفقر بتاعتهم تبقى زي بتاعتنا؟ وبيتنططوا علينا ليه بقى؟ الفلوس بتروح فين؟ لا بجد، انا باكرر تاني انا تافهة، الحاجات دي تضايقني قوي

ايه الفشل ده؟ انا ما احبش الفشل، وجزيرة الديمقراطية دي عاملة زي ابن العمدة اللي فضل يسقط يسقط يسقط لحد ما اخر مرة في الامتحان حطوا له ورقة الاجابة جنب ورقة الاسئلة وعايز يغش من اللي قدامه برضه، قام اللي قدامه قال له:

- عايز ايه؟ ماهم حاطين لك ورقة الاجابة

- ايوة يعني نعمل فيها ايه؟ نحط لها اسئلة؟

حرام والله

طب والله العظيم حرام، حرااااااااااااااااااااام، حرااااااااااااااااااااااااااام احنا نعيش في الذل ده وسبع صنايع والبخت ضايع كله لجل عيون ابن العمدة الخايب،

شعب الله المنشار

طالع واكل نازل واكل وياريته محوق

يا عيني علينا والله، ربنا ما يرضاش بكده ابدا

---

سؤال بس والله، هم بيقولوا اسرائيل من اكتر الدول "الغربية" اللي فيها فقر اطفال! ودي برضه من ضمن الحاجات التافهة اللي بتضايقني

ان اسرائيل عاملة زي الواد الـ....فوزي. لما نقول لهم ايه حقكوا في الارض دي يقولوا احنا شرق اوسطيين ومناخيرنا طويلة زي مناخيركوا وولاد عمكوا

لما يقولوا لهم بامارة ايه بتاخدوا كل الفلوس دي من الدول الغربية وبامارة ايه الدول الغربية تميزكوا عن بقية الشرق الاوسط يقولوا احنا الممثلين للحضارة الغربية في المنطقة

ما يعملوا عملية ويقرروا هم سالي وللا سيد

----

بياخدوا من الاسرائيليين اكتر من خمسين في المية ضرايب؟ هو احمد نظيف اسرائيلي وللا ايه؟

---

نسوانهم بيقبضوا اقل فلوس؟ طب الرجالة بتصرف يعني وللا برطات؟

----

خمسة وسبعين في المية من الاسر الفقيرة بتشحت الاكل؟ يعني ما يقرب من تلت الاسرائيليين بيشحتوا الاكل؟

احسن يكونوا حاسبين الفلسطينيين معاهم، لا ما يتهيأليش، اللي في الاراضي الفلسطينية بيتقال عليهم بالستينيان تيريتوريز

-----

امال هم عايشين ليه؟ وكل الفلوس اللي بتتهلب دي ومجوعين الناس؟ ناسهم؟

مش نافع كده والله

طب والله العظيم ما نافع ابدا

وقع وثيقة تفكيك اسرائيل.... بجد بقى، يعني ده انت حتى لوشبشب لامريكا المفروض يصعب عليك اليهود اللي جوة اسرائيل لو احنا مش صعبانين عليك

تجارة في الاعضاء البشرية لدعم النشاط الديني

تحديث:
المتورطون في عملية الفساد كلهم متصلين بحزب شاس الاسرائيلي

تحديث: الجزيرة بتقول ان الفلوس بتروح لاسرائيل
والخبر ده بيقول ان المتبرعين اسرائيليين (المتبرعين بالكلاوي) اسرائيليين
In separate money laundering complaints, several rabbis from Brooklyn and
New Jersey were charged with offenses ranging from the trafficking of kidneys from Israeli donors to laundering proceeds from selling fake Gucci and Prada bags.
طب ايه دخلهم بقى هم؟ يعني اذا كان المتبرعين اسرائيليين والفلوس بتدخل لاسرائيل دول ايه اللي حشرهم وهم في نيوجيرسي؟ انا لازم فاهمة حاجة غلط

في نيوجيرسي، حاخامات اخدوا اعضاء بشرية وتاجروا فيها مع مجموعة من المسئولين السياسيين لدعم المؤسسات الدينية اليهودية ده غير غسيل الاموال

المتبرعين كانوا اسرائيليين

!!!!!!!!!!!!!!!!!!!!!!!!!!!!!!!!

لا كده انا مش فاهمة: حاخام ياخد كلية يهودي يبيعها؟ طب حاخام ليه؟ هو حد كان جبره؟

غسيل الاموال شغال، رشاوي، ابتزاز، اي حاجة تجيب فلوس ماشي، حاخام يتاجر في اعضاء امميين ماشي برضه مفهومة، لكن حاخام يتاجر في اعضاء يهود ليه؟

انا اصلي، كما سبق وذكرت تافهة، اتضايقت قوي من النقطة دي بالذات، فيه واحد يبقى عدوك وبتكرهه لكن بتحترمه، عشان ممكن افاكره تبقى عنصرية، ممكن يبقى سفاح ابن كلب، لكن مخلص للي هو مؤمن بيه (حتى لو مؤمن ان الزبالة تتاكل) ومخلص لناسه

لكن الوساخة دي بقى تضايق بجد، انا باتضايق من اللي مش محترمين، لما يعملوا كده في هيود زيهم وهم حاخامات امال احنا بقى بيتعمل فينا ايه وماحدش قايل لنا؟

نتانياهو بيغني صوت الجماهير

ياريت تركزوا في المقطع بتاع فايدة كامل

باسم اتحادنا

قوم يا كفاحنا

قول للصهاينة المعتدين

راية العروبة

عرفت نجومها

من عام تمانية واربعين

حررنا الاوطان

وميحنا الخدام

ما بقاش فينا عميل بيردد

صوت اسياده

هييييييييييييه

اللي فيه حيل يعيط بقى يعيط بدالي، انا تعبانة النهاردة

احنا عاملين زي اللي طلعت الحجاز تحج وبعتت لاهلها انها راجعة بعد غيبة والكل واقف مستني الحاجة في المطار وقلبهم عامر بالايمان وفجأة لقوا الحاجة نازلة على سلم الطيارة ببدلة الرقص

ايه موضوع عبد الرحمن عياش معتقل دي؟

تحديث:
mrmeit: عاجل : ترحيل عبد الرحمن عياش إلي أمن الدولة بالمنصورة وترحيل مجدي سعد إلي أمن الدوله بلاظوغلي

حد يعرف ايه الحكاية؟ علا من غزة دخلت وسابت الخبر ده

ليبرمان اتجنن يا عيني خالص

الراجل تخطى مرحلة الاستفزاز وابتدى يصعب عليا، بقى عشان يسكت الناس اللي بتقول له ما تتوسعش في المستوطنات (ماحدش قال له يفك المستوطنات اللي مفروض تتفكك اصلا) ماشي زي عبده مشتاق يوزع الصورة دي

امين الحسيني قاعد مع هتلر، وبيقول الصورة دي ح تحرج الدول الغربية وتخليهم يبطلوا يطلبوا منه ما يبنيش مستوطنات!!!! ايوة يعني الصورة دي محرجة في ايه؟ مش فاهمة، بيبوسه من بقه مثلا؟ قاعدين عريانين في الجاكوزي؟ ايه وجه الاحراج للدول الغربية ان امين الحسيني قاعد مع هتلر؟ طب ماهو كان رئيس المانيا وزعماء العالم كلهم قعدوا معاه بما فيهم ممثلين لبلاد الحلفاء، واتعشوا معاه كمان.

طب فين صورة ايكمان وهو قاعد مع بن جوريون؟ وفين اتفاقية هآرفا اللي بين العصابات الصهيونية وبين هتلر عشان يقتل اكبر عدد من اليهود قوم اليهود يطفشوا على فلسطين؟

والاهم من ده كله، فين الصور دي

ثم ايه الفرق ما بين تشرشل وديجول وما بين هتلر غير بس ان هتلر اتهزم؟ طب ما انجلترا قتلت عشرة مليون هندي، يعني الصهاينة لما اتعاونوا مع انجلترا كانوا بيتآمروا ضد الهنود؟ ثم ايه دخل ده كله ببناء المستوطنات؟

ايه شغل النسوان البلدي ده؟ 

يعني هو عايز يثبت ان اليهود دمهم خفيف ونكتية مثلا؟ ماهو توزيع الصورة دي مالوش معنى غير ان الراجل يا دمه خفيف يا مهبوش يا عمره العقلي تسع سنين وتمن اشهر وفي خامسة اول

قال لك مشائي قلبه قلب خساية

اه وربنا، احمدي نجاد قال كده

انا والله العظيم تلاتة ما فاهمة لهم حاجة العالم دي، وكل واحد فيهم جارر له وراه مليون بني ادم وماشي في الشارع، وبيزعقوا

كلهم بيزعقوا

حد يفهمني الخبر ده عشان انا ام محمد ومش فاهمة حاجة

موسوي بيقول بمنتهى الـ....منتهى الإيه مش عارفة، بيقول انتوا امام حكومة كل "الإيليت" ح يرفضوا التعاون معاها ومن ثم فعلينا اننا نبص لمصلحة الناس

ناس؟ ناس منين وانت بتقول الايليت؟ وللا هو سلو بلدهم ايليت؟

وبعدين ده ينفع يعني؟ ينفع ان زعيم سياسي يقول الكلام ده كده وش؟ هم مش دايما الزعماء السياسيين بينصبوا على الناس ويقولوا: انا من الشعب والى الشعب، انا م البلد ديييييييييي وانا م البلد دييييييييييي بلد ابوووووويا وجد جدييييي

وكدهون يعني؟ هو ينفع واحد يتكلم باسم النخبة ويبقى زعيم سياسي؟ طب ما تقولش يا عم، طب انتوا يا سيدي بلد كلها ايليت في ايليت وربنا يسعدكوا ويزيدكوا ويبارك لكوا، احنا بقى ناس غلابة، والسياسيين بتوعنا حافظ مش فاهم، ييجي واحد فيهم يقول لنا الكلمتين دول نطلع عليه ناكله بسنانا، ده ح يبوظ علينا السياسيين بتوعنا بالطريقة دي

جه بقى خامنئي اتخانق مع نجاد اكمن نجاد عين نسيبه مشائي نائب

هو ينفع الواحد يعين نسيبه؟ مش ده غلط وكده؟

الاغرب انهم مش زعلانين عشان مشائي نسيبه، هم زعلانين عشان مشائي قال: احنا اصدقاء كل الشعوب ومافيش بينا وبين الشعوب اي ضديات حتى الشعب الاسرائيلي

 على فكرة انا مش شايفة فيه حاجة التصريح ده؟ ده تصريح سياسي لبلد بتقول الموت لاسرائيل وبتضرب وتلاقي، مش شايفة انه تصريح غلط ولا حاجة، هو مش مسئول مصري اللي قال كده، ده مسئول ايراني، فيه فرق

الحاجة التانية اللي مضايقاهم انه عمل احتفال فيه واحد بيقرا قرآن ووراه واحد بيعزف على الطنبور

هههههههههههههه، الله يحظه، طبعا هم اتضايقوا واعتبروها اهانة للاسلام وللقرآن، هو باينه لاسع مشائي ده

ييجي بقى احمدي نجاد يقول ايه: فيه ناس كتير بتسأل انا عينت مشائي ليه، وفيه الاف الاسباب من ضمنها انك لما تكلمه تحس انك بتتكلم مع نفسك وقلبه زي المراية

يا ضنايا، ده انا الدمعة فرت من عيني، وهو عايز يتكلم مع نفسه نجاد ليه؟ ده حتى الستات بتتخانق مع اجوازها: هو انا باكلم نفسي؟ وبعدين ماهو يقدر يكلم نفسه فعلا ولا الحوجة لمشائي، ما ييجي يمشي في وسط البلد عندنا ويكلم نفسه زي الناس اللي باشوفها في وسط البلد كل يوم، هههههههههههههه والله عمالة اضحك من ساعة ما قريت الخبر اللوذعي ده، ويعني ايه قلبه زي البفتة البيضا وقلب خساية، يا عم ما انت ناسبته والحمد لله ربنا يهني بنتك بيه

مال ده ومال انه يبقى نائب؟

الاغرب والاغرب، ان الرئيس له كذا نائب، نائب اول، نائب تاني، نائب تالت، مش عارفة كام واحد، بس هم كتير يعني

تقريبا الشعب كله نائب، بس مشائي ابو قلب زي قلب الخساية هو النائب الاول

المتحدث باسم البرلمان قال: ح يمشي يعني ح يمشي، احنا سلطة اكبر من سلطة رئاسة الجمهورية، والقرار جاي من مجلس العلماء باين ما اعرفش ترجمته ايه

system of ruling clerics

يااااااااااااه، يعني الرئيس لا بيحل ولا بيربط اهو، امال كانوا عاملين الباللو ده كله ليه؟

وبعدين لا الحكومة بتسمع كلام خامينئي ولا المعارضة بتسمع كلامه، وبس مطلعين على نفسهم سمعة ان خامينئي ده الكل في الكل ومخليين الناس تعايرهم بيه ويا بتوع الملالي يا بتوع الملالي وطلع يا عيني الراجل ماحدش بيسمع كلامه خالص وكل واحد ماشي بدماغه

ايه ده؟ مين دول؟ بيزعلوا من حاجات ما تزعلش ويقولوا كلام ما يتقالش ويفرحوا بحاجات تضايق كل ده ويزعقوا، احنا كان ايه اللي حشرنا في الهلولة دي؟

هو ده طبيعي يعني؟ اصل ممكن اكون انا اللي مكبرة الموضوع وللا مثلا مش نايمة كويس

هم ح يقفلوا جوانتانمو بعد كام قرن؟

وتيفود كمان؟

ده ايه العسل اللي احنا فيه ده؟ انفلوانزا خنازير وطاعون وتيفود؟

اختصر وقول شامبانزي

احنا لازم بقى نبقى محترمين

باي طريقة

نعمل حلف الفضول، مابينا وبين بعض كده وطظ في الحكومة كل مجموعة تعمل ما بينهم وبين بعض اللايحة العرفية بتاعتها، وماحدش يبقى ريس على حد

في الشغل، في العمارة، يبقى فيه كده قانون عرفي اخلاقي

زي مجتمعات الارياف والمناطق الشعبية زمان

ماحدش يشتكي من اخلاق اي حد تاني

اي بلد في الدنيا اقتصادها معتمد على البقشيش والسمسرة مش ح يبقى فيها ناس عندهم اخلاق، عشان لا الشحاتة ولا الحنجلة بتنتج بني ادمين محترمين

ماحدش بقى يكلمني على الدين، وللا الاخلاق، وللا قيم، ولا البلد مافيهاش رجالة، ولا فيها رجالة

احنا اتسترنا في السبعينات عشان كان فيه فرصة ان بعض المصريين يسافروا الخليج ويضخوا فلوس للبلد، لكن تجريف الاراضي وهدم الصناعة ابتدى من السبعينات، ولولا سفريات الخليج كان زمان البلد دلوقت معتمدة على....ما تخلوناش نتكلم

وعمالين يتمادوا في الخطة الاقتصادية اللي ابتداها السادات ودلوقت وصلت لذروتها

خصوصا بعد ما العراق (اللي كانت ساترة بيوت كتير برضه) اتهدت على دماغ المصريين ورجعوا هربانين وشقا عمرهم راح عليهم

يعني مافيش فرصة ان واحد يشتري حتة ارض ويزرعها

ولا حتى يعمل صناعة صغيرة

ودلوقت البلد بتاكل عيشها منين؟ من ناس تيجي من برة تصرف فلوسها علينا، يا نمد ايدنا وناخد تيبس (دلوقت الناس بقت تقول على الشغل: طالع لي "حسنة" كويسة منه) يا نهنكر ونشتغل سماسرة ونطلع كوميشن

دي مش شغلانات، دي سفالة، وانحطاط، وقلة ادب، وكل حاجة بقت معتمدة على البقشيش والسمسرة، حتى الطب، والهندسة، والفن، والصحافة، ده التدوين بقى كده، كل حاجة، كل حاجة

صلي بقى وربي دقنك وصوم اتنين وخميس، وحج بالفلوس اللي انت شاحتها كل سنة، مهما تعمل، انت عايش عيشة مش محترمة ومش ح تبقى محترم، انت متسول وفي احسن الحالات شماشيرجي بتطلع بسبوبة

من هنا بقى لحد ما ربنا يفك اسرنا من الورطة اللي ورطها لنا السادات وبينفذها مبارك بكل الاخلاص والتفاني - مما يجعله الوحيد اللي مخلص في شغلته ومهمته في البلد

نستحمل بعض بقى، نستحمل بعض على قد ما نقدر، ما نمشيش نشتم في اخلاق الناس، شوف اخلاقك الاول، اكيد اتأثرت بشغلانتك يعني، واللي مرتاح سنة يستحمل اللي تعبان اكتر منه، ما تبقاش راكب عربية مكيفة وتتخانق مع سواق ميكروباص وسواق عربية نص نقل وسواق تاكسي، احترم نفسك وخلي عندك كرامة - لما تفتري على الاضعف منك (حتى لو غلطان) يبقى انت بني ادم لا عندك كرامة ولا عندك دم ولا احساس، كتر خيره انه ما رفعكش بالمطواة عشان ياخد حقه، ما تبقاش راجل وتتخانق مع ست، ما تبقاش شاب وتتخانق مع راجل كبير (حتى لو قليل الادب - مش عارفة ايه اللي حصل الرجالة الكبار بقوا قلالات الادب قوي - بس استحمله بكرة تبقى قده) ما تبقاش مسلم وتتخانق مع مسيحي، ما تبقاش قوي او مرتاح شوية او عندك اي امكانية على اي مستوى وتتخانق مع الاضعف وللا الاتعب وللا الاعجز، احترم نفسك، لا بنشتغل شغلانات محترمة، ولا عايشين في بلد محترمة يبقى على الاقل نتصرف بشكل محترم عشان بس يبقى فيه امل

دي بلد لا فيها انتاج ولا فيها قانون يعني مافيهاش اي حاجة تخلي البني ادم عنده مرجعية اخلاقية، حتى الدين بيتفسر على مزاج صاخيب المخيل، وفيها ناس تعبانين، نساع بعضينا شوية، ونستحمل بعضنا شوية

لو الرحمة كمان راحت من البلد يبقى دي بلد ليه بقى؟ يبقى مالهاش لازمة اصلا، ربنا ح يجيب ضرفها، ولو جاب ضرفها مش حلو علينا 

You should take your certificate

- You got 99 percent in Sanawyya 3amma?

ده كلام مذيعة في البرنامج الاوروبي

وهي بلسانها بتقول انها بتشتغل بقالها سنين في الاذاعة

مش عارفة اسم ثانوية عامة بالانجليزي، مع ان الناس من زمان بتقول: اخدت البكالوريا

baccalaureate

فبتقولها ثانوية عامة بالعربي: يو جوت ناينتي ناين برسنت ان ساناوية عامة؟

كويس انها ما قالتش

secondary general

وللا حاجة

وبعدين واحد انطس في عقله واتصل وقال انه بيشتغل وبيدرس قامت اتنحررت وقالت له

- Even if you work with big salary, you should take your certificate

وبعدين نزلت من العربية بقى، مالحقتش اسمع بقية النصايح الابوية، بس اقدر اتوقعها:

listen to my talking my son, no body will benifit you, God give your mother and father health and long age, but they are not living for you, God is the best knower what is in tomorrow, you can't guarantee, you work today, maybe tomorrow the friend of the work dies, his sons close the company, you don't ensure time, your certificate in your hand security from time, I am like your big sister and I talk to you to your interest, God saffice you from treachery of time my brother.... I am happy for your connection, your night is egg, salute me on your mother and say to her blessed on success.

كفى بك ذلا أن تعيش وترغما

أيها الناس، إن رسول الله صلى الله عليه وسلم قال: من رأي سلطانا جائرا مستحلام لحرم الله، ناكثا لعهد الله، مخالفا لسنة رسول الله صلى الله عليه وسلم، يعمل في العباد بالإثم والعدوان فلم يغير ما عليه بفعل ولا قول، كان حقا على الشيطان أن يدخله مدخله. ألا وإن هؤلاء قد لزموا طاعة الشيطان، وتركوا طاعة الرحمن، وأظهروا الفساد، وعطلوا الحدود، واستأثروا بالفئ، وأحلوا حرام الله، وحرموا حلاله، وقد أتتني كتبكم ورسلكم ببيعتكم، وأنكم لا تسلمونني ولا تخذلونني، فإن أقمتم على بيعتكم تصيبوا رشدكم، وأنا الحسين بن علي بن فاطمة بنت رسول الله، نفسي من نفسكم وأهلي من أهلكم، فإن لم تفعلوا ونقضتم عهدي، وخلعتم بيعتي، فلعمري، لقد فعلتموها بأبي وأخي وابن عمي مسلم بن عقيل، والمغرور من اغتر بكم.

.............

سأمضي وما بالموت عار على الفتى

إذا ما نوى خيرا وجاهد مسلما

وواسى رجالا صالحين بنفسه

وخالف مثبورا وفارق مجرما

فإن عشت لم أندم وإن مت لم ألم

كفى بك ذلا أن تعيش وترغما

الامام الحسين في خطبته لاهل الكوفة

http://egyworkers.blogspot.com/2009/07/blog-post_2044.html

http://arabist.net/arabawy/2009/07/19/miners/

http://www.youm7.com//News.asp?NewsID=119834

http://www.youm7.com//News.asp?NewsID=119805

http://www.youm7.com//News.asp?NewsID=119800

http://www.youm7.com//News.asp?NewsID=119804

الظلم ظلمات يوم القيامة

كل اسراء ومعراج وانتوا طيبين

 

رسالة من معبر رفح

عند مهندس مصري

انت ايه مشكلتك بالظبط يا مفيد يا فوزي؟

كاتب مقال في الاهرام انما ايه، لوز لوز لوز، انا والله ما بقيت فاهمة ايه اللي مزعله حاليا دلوقت؟ نموذج للكلام وعكسه ولا خطبة اوباما

انا ح اعمل حاجة، ح انشر المقال - كنوع من انواع التعذيب - ح تلاقوا الجملة وعكسها بعد شوية في المقال، عشان اسهلها ح الون جملة ما بلون معين وبعدين الون الجملة اللي عكسها بنفس اللون لان فعلا قراءة هذا المقال نوع من انواع النشاط الذهني زي ما بتحل السودوكو والكلمات المتقاطعة وتعليقاتي ح تبقى مايلة.... زي بخت البلد دي

أعطني أذنيك يا قداسة البابا‏..‏

(حرام عليك هو ناقصك؟)

بقلم : مفيد فوزي

أعتذر لك لأني يوما ما طالبتك بأن تقنن ظهورك الإعلامي وكنت أطالبك بنهج البابا كيرلس الروحي‏,‏ يبدو ـ ياسيدنا ـ أن هذا الزمان ليس زمان البابا كيرلس‏,‏ زمان السماحة الساكنة القلوب وليس زمان من ضربك علي خدك الأيسر‏,‏ فأدر له الأيمن‏,‏ كان وجودك علي الساحة ضرورة مهما بلغت عامك السابع والثمانين‏,‏ فأنت قوة معنوية روحية‏,‏ مد الله في عمرك‏,‏ ليتذكرك الشعب القبطي بما أنجزت وما لم تستطع انجازه‏,‏ وربما كنت في صمتك‏(‏ مرغما‏)!‏

هناك يا قداسة البابا شنودة‏,‏ مشكلة لا يحلها عناق المشايخ والقساوسة أمام عدسات التصوير ولا تحلها الكلمات الطيبة في المحافل الرسمية وعبر مآدب الوحدة الوطنية في شهر رمضان الكريم‏,‏ هناك مشكلة تطفو من حين لآخر علي السطح وتعكر الصفو‏,‏ لعلها الهاجس للكتابة لك بحبر المحبة‏,‏ فمصريتي قبل ديانتي‏,‏ وانتمائي لوطني قبل انتمائي لديني‏,‏ وأظن أنك علي علم وأعرف إلمامك بكل الأمور أن الاذاعة البريطانية سألت مستمعيها في العالم العربي ومصر علي الأخص عن انتمائهم للوطن أم الدين فجاءت النتيجة‏78%‏ انتماء للدين قبل الوطن‏,‏ ولابد أن سمعت التعليق القائل‏(‏ التعاطف مع ماليزي أكثر واقعية‏)‏ وأعرف أنك تتألم ولكن في صمت من كلمات غير مسئولة تتطاير مع أن معظم الحرائق من مستصغر الشرر‏,‏ وأنا أتفهم موقفك من‏(‏ الحرائق الصغيرة‏)‏ التي تنشب هنا أو هناك وأتفهم افتقادك لأرضية فكرية فيها ثقافة‏(‏ قبول الآخر‏)‏ تطفيء هذه الحرائق قبل أن نصبح‏(‏ لبنان‏)‏ أخري‏,‏ ولن نكون ما دمنا ننزل الي الجذور‏.‏

إن شباب الأقباط لجأوا الي مدونات النت مثل شباب آخر وأعطاهم النت كشاشة حرية التعبير أكثر من القنوات الطبيعية إعلاما وصحفا وشاشات‏,‏ وكنت أتمني‏(‏ وجودا‏)‏ إعلاميا منتظما مصريا لقساوسة هم مصريون قبل أن يكونوا أقباطا‏,‏ فالشاشة المصرية لكل المصريين‏,‏ حتي الشيخ الجندي المتنور‏,‏ هذه قناعته‏.

(الحتة دي تقريبا هو كان بيملي المقال وبعدين جاله تليفون فالسكرتير كتب مكالمة التليفون جوة المقال، كويس ما كتبش: قهوة مظبوطة يا محمد - حاضر يافندم - متشكر)

وأعرف ـ يا قداسة البابا شنودة ـ تفهمك البعيد النظر لمصر كدولة مدنية وليست دينية ومن هنا أدرك مدي الألم حين تعطيني حقوق المواطنة الحق في الصلاة في شقة ثم يقال‏(‏ إنه غير مرخص‏)‏ لها‏,‏ ومنذ متي صار للصلاة لرب الكون ترخيص رسمي؟

وفي برنامجي حديث المدينة حرية أشيد بها‏,‏ سمح بها نظام مبارك الذي فتح النوافذ والابواب‏,‏ وقد سألت في البرنامج شخصيتين مرموقتين‏,‏ هما فضيلة المفتي ووزير الاوقاف عن تعداد الاقباط في مصر وكانت الاجابات ليس لدي أرقام لأكون دقيقا هل جهاز الاحصاء الرسمي عاجز عن الارقام الدقيقة؟ هل هو من اسرار الدولةالعليا؟ لاأظن‏!‏

أذكرك ياقداسة الباب بحدوتة مصرية صغيرة وتحفظ قداستك تفاصيلها كنت قد سمعتها من السفير السياسي الراحل أشرف غربال حين رافقك لمقابلة بروتوكولية مع الرئيس الأمريكي جيمي كارتر‏,‏ وقال أشرف غربال‏(‏ عام‏79)‏ إن قداسة البابا يمثل‏3‏ ملايين قبطي في مصر وقمت أنت بتصحيح المعلومة للرئيس الأمريكي قائلا‏:‏ بل‏(11‏ مليونا ياسيدي الرئيس‏),‏ تتذكر قداستك توابع هذا التصحيح وما عانيته قداستك في زمان آخر‏,‏ مبارك طراز آخر لحاكم لا يفرق بين قبطي ومسلم‏.‏

واذا كانت المشاحنات تناولت دير أبوفانا‏,‏ فالحلول الجذرية لا السطحية تئدها تماما واذا كان دير أبوحنس قد عاد إليه اسمه الحقيقي القديم قبل تغييرها الي الياسمين‏,‏ فهذا وعي سليم أنت تمجده وتؤيده وتدعو ـ في صلواتك ـ لعدم النيل من مصر عبر‏(‏ أزقة ضيقة‏)‏ هي الجهل والقصور في الفهم والتشدد القادم بروموت كنترول‏,‏ هذه القضايا محفوظة في ذهنك المتوقد ياسيدنا قبل أن تكون ملفات بلا حراك حتي تأتي حريقة جديدة‏.

(حد يشرح لي المقتطف اللي فوق ده عشان واحدة خريجة خامسة ابتدائي)‏

ويبقي‏(‏ أقباط المهجر‏)‏ ولعلك تتفق مع بطرس غالي حين قال إنهم‏(‏ مهاجرون مصريون‏)‏ لهم قوة اقتصادية وعلمية وحضارية تسهم في انجاز مصر‏..‏الألم‏,‏ ووجب حذف اسم‏(‏ اقباط المهجر‏)‏ باستثناء قلة حاقدة فرضت عليهم حوادث معينة موقفهم‏.‏ إن حنانك وأبوتك ضرورة قومية لإزالة أي التباس عليهم ويعيدهم لأحضاننا بعد غيبة جغرافية‏.

يا قداسة البابا اغفر لهم حين يكتبون‏(‏ الكتاب المكدس‏)‏ بدلا من الكتاب المقدس‏,‏ اغفر لهم حين يؤجلون القضايا بطعم الاعناق الكاذبة والقبلات أعرف أن صمتك هو صمت الحكماء‏,‏ وانت رئيس شرعي للكنيسة الارثوذكسية في العالم مثل بابا الفاتيكان والكاثوليك‏,‏ أنت غير قابل للتحجيم أو التعتيم‏,‏ ومحصن ضد الانعزال لأنك مسئول عن الرعاية الروحية للشعب القبطي وهو ليس بملايين قليلة‏,‏ اما عن‏(‏ عدالة‏)‏ المناصب في الدولة وإسنادها لمصريين أقباط‏,‏ فهذا دور القيادة السياسية الواعية لمخاطر تجاهل النسبة والتناسب ويصل أذنيك همس الأقباط‏.‏

قداسة البابا شنودة الثالث‏,‏ أنشر خطابي لقداستك علنا بحرية في‏(‏ الأهرام‏)‏ حاضن كل التيارات الفكرية القلقة علي مصر من اندلاع نيران فتنة تأكل الأخضر واليابس ما لم يكن يقينا أن الأقباط‏(‏ مشاركون‏)‏ ولا يخضعون لمنطق الأقليات‏,‏ فالمسيحية في أرض مصر بالجغرافيا والتاريخ‏.

---------

زي ايند

-------

ايشي خيال يا ناس، يا مشاء الله، ده ايه الفتوح ده كله، ده انت لقطة، انا عايزة جملة مفيدة

وعايز البابا شنودة يقرا الكلام ده؟ على اساس انك بتروح عنه وبتقدم له فاصل كوميدي؟ المقالة دي اسبلها واشرب ميتها

انت منين يا سيد بتقول ان البابا شنودة له حق في الظهور الكتير وانك بتعتذر عشان طلبت منه الاحتجاب ومنين بتقول له صمتك صمت الحكماء؟

ومنين تقول له ده مش زمن من ضربك على خدك الايسر ادر له الايمن ومنين ترجع تقول له اغفر لهم يا قداسة البابا؟

ومنين بتقول الشعب القبطي ومنين بتقول بلدي قبل ديني؟ هي البلد دي فيها شعبين وللا ايه؟ وبعدين ترجع تقول نلغي اسم اقباط المهجر، يا سبحان الله، منظمة مسمية نفسها منظمة اقباط المهجر، طب على الاقل هم لهم حق هم مصريين اقباط وفي الهجرة انما انت بتتكلم عن جزء من الشعب المصري وتقول عليه "الشعب القبطي" وده ايه بقى؟ شعب طالع له شعب وللا ايه؟ وبعدين ترجع تقول احنا مش اقلية، الله ما ترسي لك على بر، انت من الشعب القبطي وللا انت مش اقلية؟

وبعدين زعلان من الناس عشان بتقول الدين قبل الوطن وترجع تقول مصر مسيحية جغرافيا وتاريخيا

وبعدين منين زعلان من الناس عشان بتقول انا باتعاطف مع ماليزي ومنين بتقول الكنيسة دي مش مصرية بس دي مسئولة عن كل ابناء الطايفة في كل حتة في العالم؟

انا عايزة جملة مفيدة، جملة مفيدة

النقطة الاهم من كده

اهم نقطة الحقيقة في البازل ده، منين البوليس بيهجم على الناس ويقول لهم مش مرخص لكم بالصلاة (للي مش مصريين دي مش نكتة ولا كانوا بيهزروا معاهم، عملوا كده فعلا) ومنين عصر مبارك الذي لا يفرق بين مسلم ومسيحي؟

يعني ظباط الشرطة اللي قالوا للناس ما تصلوش دول تبع نظام مين؟ هوجو تشافيز؟ الشرطة اللي استثارت الناس على المسيحيين من غير سبب وقالت لهم دول بيعملوا اجتماعات وعايزين ينصروا البلد روحوا انصروا دينكوا، دول تبع انهي دولة؟ تبع دولة الملالي الدينية؟  ثم هي الدولة الدينية هي اللي بتمنع الناس من الصلاة وممارسة شعائر الدين؟ يعني فرنسا وتركيا دول دولة دينية؟

ثم منين نظام مبارك فتح الشبابيك والمناور ومنين المفتي ووزير الاوقاف مش عارفين تعداد المسيحيين؟ يعني فتح كل الشبابيك وشباك تعداد المسيحيين هو ده اللي مستنيين لما يزيتوه؟

ثم ازاي مافيش ارضية مشتركة لقبول الاخر وازاي في نفس الوقت عمرنا ما ح نبقى زي لبنان؟ 

انا يا عم الكتكوت مش فاهمة منك ولا كلمة، ايه مشكلتك بالظبط

لما مبارك ما بيفرقش بين مسلم ومسيحي، ولما مبارك شال الشيش والازاز وركب قبنوري، ولما الاهرام بيتسع صدره لكل التيارات الفكرية

ايه مشكلتك انت بالظبط؟

وازاي الصورة وردية كده وازاي الناس بتتحرق عليها البيوت وهي بتصلي بتحريض من الامن؟ هو الامن ده اسرائيلي مثلا؟ 

وبعدين تقول له اسكت وترجع تقول له اتكلم، وتقول له خد موقف وترجع تقول له سامحهم، ثم ايه اللي دخل بتوع النت دلوقت حاليا في الحوار ده؟ وايه اللي جاب سيرة ابو حنس وياسمين ودهب وفيروز هانم؟ مالك فيه ايه؟

باقول لك ايه؟ سيب البابا في حاله ‏

اتكلمنا عن فيلم جد؟ تعالوا نتكلم عن الكوميديا بقى

هي دي مش كوميديا، دي اسمها فارس، مسرحية هزلية

اسرائيل تتهم لبنان بمساعدة حزب الله اللبناني!!!!!!!!!!!!! وانا من موئعي هذا، باتهم محمد ابن الجيران باني شفته ماسك ايد مراته وبيتمشوا على الكورنيش، شفتهم بعينيا استغفر الله العظيم، وغالبا العيل اللي كانت شايلاه على كتفها المدام، المحترمة، بنت الناس، المتعلمة بتاعة المدارس، غالبا، والله اعلم، انه استغفر الله العظيم ابنها، وابنها، استغفر الله العظيم، من جوزها، انا مش عايزة اظلم، بس تفسروا بايه انه كان ماسك ايدها على الكورنيش وهي شايلة العيل وبيقول لها يا ماما؟ تفسروا بايه المهزلة دي؟

الا الشرف، واحلى من الشرف مافيش يا اه يا اه

مش عارفة ليه لما قريت الخبر ده افتكرت الفيلم بتاع محمر فؤاد اللي كان بيغني فيه "رقاصة رقاصةةةة" وكانت قصته ان جورجينا رزق كانت بتخون حبيبها محرم فؤاد مع جوزها ابو سوالف وشنب رفيع، يا ترى ايه العلاقة، يمكن عشان جورجينا رزق لبنانية برضه؟

لو دكر روح احكي يا شهرزاد

الفيلم ده مش ح يعجب اي راجل مصري الا في الحالات الاتية:

يكون موضوعي خالص وما يهتمش بالرسالة اللي الفيلم قد ما يهتم بصناعته نفسها

(ومين في الدنيا موضوعي؟)

يكون ما عندوش عقد ذكورية خالص بسبب التربية، او على الاقل عرف يعالج نفسه

(ماحدش يرفع ايده... كداب)

يكون رايح يتفرج على مناظر ومش هامه اي حاجة في الفيلم تانية

بما اني مش انا اللي مشتومة في الفيلم فاقدر اقول انه عجبني من الناحية الفنية جدا والله، وعجبني يسري نصر الله اكتر حاجة، عشرة على عشرة يعني

نجيب من الاخر، الفيلم رسالته: البلد دي مافيهاش رجالة وعشان كده ده حالها

(بصرف النظر عن رأيي الشخصي انا شايفة ان حالها هو اللي عمل في الرجالة كده مش العكس)

هو جايب الخط الاساسي بتاع المذيعة المشهورة ومضفر فيها كويس قوي التلات حكايات وجايبهم بتسلسل مظبوط، عامل فيهم تباين بس مافيش تشرذم وبيركز فيهم على نقطة واحدة: الفرق ما بين الفحولة والرجولة، ودماغ الرجالة (انا اسفة يا شباب ده الفيلم مش انا) اللي فيها صراصير وفاكرين ان مهمته في الحياة انه يـ....على قد ما يقدر، بغلظة شديدة، من ابن البلد الصنايعي للصحفي، للموظف المحترم، للوزير، وانه مدام ربنا مديله صحة يبقى يقدر يغش ويخون ويستغل ويستندل وياخد فلوسها، وكل ما كبر في المقام كل ما ندالته كبرت معاه، وعلى الجانب الاخر برضه فيه تنويع في الستات بس مافيش شخبطة، برضه مركز على نقطة الست اللي هي هابلة، وعايزة جواز وحب وسند وواحد تعتمد عليه سواء بنت بلد وللا موظفة وللا من علية القوم وللا حتى ست متحققة مهنيا ومشهورة وناجحة، والخيبة برضه، كلهم ستات خايبة وقللات الحيلة، هو راسم كل شخصية بحيث تلاقي التعليق الواحد المناسب: مهما كانت ولية برضه. ومربط ده كله بالنسيج الاجتماعي والهرم السياسي. وبما ان الشخصيات اللي اختارها مفهومها عن الرجولة هي انه يبقى دكر مش راجل فلما حد فيهم بيتحكم في البلد بيعمل فيها اللي بيعمله في الست اللي بتقع تحت ايده، الاتبزاز العاطفي والاستغلال الجنسي اللي بيعمله في الست بيعمله في بلده وفي مجتمعه.  

صحيح التضفيرة مظبوطة قوي، مافيش لحظة ملل، مافيش حتة زيادة تقول مالهاش لازمة، مافيش حتة تقول فيها: ايه ده؟ متركب مظبوط جدا كأنه عامل رسم هندسي، بس المحتوى فيه دم وقتل وجنس وسياسة كتير، لو كان اي مخرج تاني عمله غير يسري نصر الله كان ممكن ترجع، مافيش اي رسايل مباشرة، على غير العادة عن وحيد حامد، يمكن يكون بقى يسري شال الجمل المباشرة اللي بتتحط في الحوار بتاع وحيد حامد عادة.

الجوازة دي نجحت، مابين المحلل السياسي السوداوي والفنان المرهف قوي لدرجة الابهام الاتنين خلفوا فيلم حلو.

انا مش ح احكي الفيلم عشان ما احرقوش وعشان هو ما يتحكيش، لو اتحكي بقيقي كده ح تضايق وتقرف لانه مكركب كمية ندالة ووساخة ووضاعة فوق الوصف، بس لما يتشاف حاجة تانية، فيه مشاعر كتير قوي، ومركبة، ومرهفة، الستات مرسومين حلو قوي، احلى من الرجالة، يمكن الرجالة استمبات شوية ما عدا عم البنات التلاتة اللي رغم ظهوره بشكل مختصر بس مرسوم حلو قوي وله ابعاد وفيه ملامح انسانية، بقية الرجالة مختلفين في المظهر لكن في تركيبته النفسية هو مبروز الندالة وانعدام الرجولة والنطاعة، ههههههههههه مش عارفة جاب كل الانطاع دول منين؟ بس مافيش ابعاد كتير لشخصياتهم غير شخصية الزوج بس هو اللي مرسوم كمان كويس قوي، بحيث ما تكرههوش، ماهواش رمز للشر والندالة، هو اتصرف بندالة لان فيه مقدمات ما تبررش بس تفسر. يمكن ما كانش عنده وقت يرسم الشخصيات الرجالي قوي وعملهم شخصيات عابرة لانه ركز قوي على رسم شخصيات الستات، ورسمهم بتعاطف شديد وانسانية وعمق، حتى خيبتهم وغباءهم وضعفهم متبررين ومتفسرين. ورغم كده مافيهمش ولا واحدة جبانة وهي الصفة المضادة تماما لكل الشخصيات الرجالي اللي موجودة، مافيهمش ولا واحد لا خايب ولا غبي ولا ضعيف بس كلهم جبنا.  

التركيب يشد من اول لحظة لاخر لحظة لدرجة ان لما الاستراحة جات في السينما اتضايقت، الفيلم لازم اشوفه تاني لان كل لقطة عامل فيها لوحة تشكيلية وعامل حاجات في الخلفية لها معنى ما لحقتش اركز فيهم كلهم لان كنت مشدودة طول الوقت ايه اللي ح يحصل بعد كده.

المزيكا كانت حلوة قوي واحد اسمه حاجة كروان، مش فاكرة ايه، هي تيمة واحدة بس حلوة.

انا مش عارفة لو مخرج تاني غير يسري نصر الله عمل الفيلم ده كان ح يطلع ايه؟ كان ح يبقى زفت، لانه صعب، الافلام يا تركز على الاحداث يا تركز على المشاعر والتأمل، هو عامل الاتنين في الفيلم، والفيلم سوداوي وكاره للبشر (الذكور منهم، لالالالالاااااا وانا لأأأأأ الللللللللللل) وفيه سياسة كتير والسياسة بايخة في السينما وحاجة زي دي لو اتعملت مع مخرج عادي كنا زهقنا وطرشنا واتلخبطنا واكتئبنا وطلع تلاتينا، انا مش عارفة هو عمل ايه بالظبط ابهجني واسعدني كده مع اني فضلت اعيط بعد الفيلم بربع ساعة

الممثل اللي عمل دور الزوج انا مش عارفة اسمه بس كويس قوي، لدرجة اني انا نفسي اتغشيت فيه مع اني عارفة من القراية عن الفيلم انه ح يطلع ندل، بيعرف يعبر من غير كلام احسن ما يعبر بالكلام، عرف يقفش الشخصية ويعرض وجهة نظرها اللي هي ندلة وجبانة ووضيعة بس تعرف تعذرها

البنات التلاتة كانوا هايلين، بس الولد، برضه اللي انا مش عارفة اسمه، بيقلد احمد زكي بزيادة، مش ح ينفع كده، ده ابنه ما بيقلدوش

حسين الامام، هههههه عسل، بس ما عرفش يغشني في الاول، من اول لحظة باين انه نصاب، بس احلى مشهد موتني من الضحك بتاع: ح اتجوزك، هو دايما حضوره حلو، مش ممثل فظيع ولا حاجة، بس له طلة وخفيف على القلب، سوسن بدر رائعة، كالعادة، البنت التونسية اللي مش عارفة اسمها ممتازة ومتشربة المشاعر ومطلعاها بهدوء شديد من غير صويت ولا عياط ولا تشنجات مع ان هي اللي دورها صعب قوي لانه مليان تنقلات في المشاعر وفي وقت قصير قوي خصوصا انها هي بادية بدايتها الخاصة ومكملة حكايات الستات اللي قبلها اللي هم ما كملوهاش للاخر، فاهمين مني حاجة؟ يعني هو ابتدى بسوسن بدر، ووقفها في العلاقة عند محطة معينة، جه على التلات بنات، اداهم بداياتهم وعدوا على محطة سوسن بدر ووقفوا بعدها بمحطة كمان ونزلوا، الاخيرة بقى اخدت بدايتها هي وعدت على محطات اللي قبلها وكملت للاخر خالص، فعبء الاداء كان مضاعف عليها، اللحظات اللي هي شكت في نفسها وصلني الاحساس وعرفت تخليني انا نفسي اشك. محمود حميدة غشني عرف يغشني ببراعة. 

الغريبة ان منى زكي ما كانتش في اروع حالاتها، مش ح اقول وحشة طبعا هي ممثل كبيرة، بس هي تقدر تعمل احسن من كده، يعني انا باقارن ما بين اداءها هنا واداءها في "عن العشق والهوى" مافيش نسبة، اولا في الاول كان المفروض الابتسامة الثابتة دي تبقى ابتسامة ثابتة بتاعة واحدة متعودة على الاضواء، مش عارفة ادتني احساس انها ابتسامة مذهولة كده، وبعدين، هي المفروض ان الشخصية دي بتبتدي بابتسامتها المستقرة وتبتدي تتدرج وكل حكاية تعمل اسقاط وتنور لها على جزئية من جوازتها هي وصفة في شخصية جوزها هي كانت بتتغاضى عنها، ومع كل حكاية في اكتشاف في حياتها هي المفروض يتطور في اداءها لحد ما بتوصل في قبل الاخر انها تعيط على الهوا. ما وصلنيش الاحساس ده، فجأة لقيتها قبل الاخر اتشنجت وعملت انفعال زايد والست الاخيرة بتحكي لها، والانفعال كان مدي طابع تعليمي، مش مفروض ان الشخصية دي شخصية ناصحة، المفروض ان الحكايات دي بتخليها تتأمل نفسها ولما بتقول تعليق لشخصية بيبقى كأنها بتقوله لنفسها، ما عجبنيش المشهد ده مع انه كان مهم، وما كانتش هي واللي قدامها ماشيين على وبرة واحدة، البنت كانت بتحكي بهدوء وابتسامة حزينة ومرارة مكتومة كان المفروض رد الفعل يناسب الفعل. 

في تعاملها مع جوزها حسيت انها استفزازية، مش قوية، المفروض، اظن يعني، ان المقصود من الشخصية انها تبقى ست قوية وتبقى المفارقة انه رغم قوتها وصلابتها الظاهرة ورغم دلع جوزها فيها نتفاجئ في الاخر انها من جواها "مهما كان ولية برضه" وان الراجل العسولة ده ابن ستين كلب زيه زي الباقي. لكن هي خلطت ما بين القوة وما بين التحدي، كانت نظراتها فيها قدر كبير من الاستفزاز وادتني احساس انها نكدية مع ان الشخصية والحوار المكتوب لها مش كده. المفروض انها بتحبه وقرفانة منه في نفس الوقت. مش عارفة كانت محتاجة تقعد مع الشخصية اكتر من كده. او يمكن يسري كان محتاج يحكي لها عليها اكتر من كده، لانه واضح انه اتحكم في كل الممثلين جدا والظاهر سابها تعتمد على نفسها فبقت هي في ناحية والباقيين في ناحية تانية. 

لما الممثل يبقى اصلا كويس ويقل في فيلم تبقى غلطة المخرج، عشان كده ح اخصم من العشرة على عشرة درجة وتبقى تسعة على عشرة

:)

لو دكر روح اتفرج على احكي يا شهرزاد.........وامممممممممسسسسسسسسسك اعصاااااابك واوعى تتهور  

حد يعرف اسم المزيكا دي ايه؟ ومين اللي مألفها؟

دي

واللي فاتت مش هي دي عشان ماحدش يلخبطهم على بعض

انا عايزة المزيكا اللي في اول فيديو

حاااااااااضر حاااااااضر

مش عايزين يسيبوني في حالي العيال دي، منذر دخل امبارح وساب لي لنك ابناء مصر، شفت الحوار وما قرتوش، وقلت له والنبي يا منذر طلعني انا من الموضوع ده

وقلت ابقى في حالي

قوم تدخل لي مها سكوت ح نصوت عشان عارفة اني باحبها وما اقدرش اكسر لها كلمة وبررررضه تسيب لي اللنك

واضطريت اقراه

اسيبكوا في حالكوا بقى؟ ارحمكوا؟

وانا مين سابني في حالي؟ ومين رحمني؟

اللنك اهو

والحديث اهو اتفضلوا:

أحمد ماهر في حوار حصري لابناء مصر بعد عاصفة لن تمروا...دي مش حركة مجدي حسين- الجزء الثني

كتبها Amy

الأربعاء, 15 يوليو 2009 18:53

قام بعمل الحوار: محمد هانئ

قام بالتفريغ: أمة الله

علي هامش الحوار:

- لم يكن احمد مرحبا بلقائي مع نور حمدي بعده لاعتراضه علي شخص نور كناشط سياسي

- بدا الحوار في التاسعة والربع مساء و انتهي قرابة الحادية عشر

- بعد ايام معدودات من مدح احمد ماهر لجريدة الفجر ، اصدر المكتب الاعلامي للحركة بيان يتعجب من مشاركة الفجر في حملة تشويه الحركة!!!!!!!!

الجزء الثاني

هانئ- صربيا...بتمثلك ايه ؟ و لما تسمع الكلمة دي و المشاكل الي علمتها صربيا من قبل حتي محمد عادل ما يسافر

ماهر- رايي الشخصي ان سفرية صربيا كانت مهمة ومفيدة جدا

هانئ-لمين؟

ماهر-للحركة..دعوة جاتلي كناشط سياسي مصري معروف...من بداية تكوين الحركة جمعت الناس وقلنا ان فيه نموذج لازم نمشي وراه ونعمل زيه..عصيان مدني سلمي يغير نظام الحكم بطريقة سلمية و قعدنا مدة بالفعل ندرس التجارب ده ونشوف ايجابيتها..لقينا ان فيه حلقات مفودة في التجارب ده مش عرفين نوصل لها ازاي..بمجرد ما لقيت الدعوة ع النت مبعوتة لناشطين كتير..حرنكش..وائل عباس..و اخرين بعتها لجميع اعضاء الحركة لأنها تجربة مفيدة و احنا الحركة الأقرب لصربيا و التغيير اللي حصل فيها حيكون مفيد اننا نشارك في حاجة زي ده..الناس بعتوا ورقهم و كان الشرط ان لازم يكون حد ضامن لهم فمضيت علي ورقة واحدة ضمانة للي حيسافر مش حيعمل مشاكل هناك.. ارسلتها علي النت لأعضاء الحركة و الوحيد اللي استجاب عادل و بعد كده لما خصل مشاكل أرسلت وقلت اننا كحركة ملناش دعوة و ابعتوها لأي حد من السياسيين اللي أرسلتموها لهم قبل كده و حنا ملناش دعوة بالموضوع و أي حد حيسافر باسم الحركة يعتبير سفره ملغي بالنسبة لي انا مش ضامن حد..بعد كده عادل سافر بصفته مدون مصري و بعض المدونين زكوه بانه مش حيعمل مشاكل هناك..أنا عن نفسي لو جه السفر ده تاني مقتنع جدا ان اللي حيسافر حيستفيد علم و محدش يقدر يفرض علينا أجندة من الخارج نهائيا

هانئ-يعني عادل مكنش مسافر تبع الحركة..باسم و ميدزي مش مسافرين تبع الحركة بالرغم من ان مصادري في امريكا أكدت كذب كلامك وقالت أن بسام وميدزي كانوا مسافرين باسم 6 أبريل و معروف انهم منها و اتكلموا عن تجربتها..و لن تمروا بيقولوا انك لما تكون مسافر تابع لحد حتتكلم باسمه مش مسافر باسم 6 ابريل حتتكلم باسمها ليه؟

ماهر-ممكن ناس مسافرة تبع اي حاجة ان كان عضو في الغد أو في أي جماعة أخري ممكن تتكلم باسمها بصفتك ناش’ سياسي لكن المشكلة انهم معروفين انهم أعضاء في 6 ابريل..فين الأزمة هنا؟

هانئ-الأزمة ان لن تمروا بيقولوا ان كنت عارف ان فيه منظمة زي ما انت وصفتها في الثريدات المسربة من الانبوكس بتاعك ع الفيسبوك بانها بتهدف لخلق جيل لا يدعوا الي العداء مع اسرائيل بل و حيساهم في بناء ما يسمي بالشرق الأوسط الكبير..ورغم علمك بالكلام ده ارسلت الناس لفريدوم هاوس

ماهر-وقت سفر باسم وميدزي ماكنتش المعلومات ده موجودة نهائيا..كل اللي اعرفه عن فريدوم هاوس انها بتتعامل مع أغلب منظمات المجتمع المدني في مصر ثم بعد كده أثيرت مواضيع فسألت ناس اعرفهم منهم اللي قاللي ان الكلام ده هجص و متفبرك و ناس تانية قالت علي موضوع الجيل الغير معادي لاسرائيل ده فبعت مايل لباسم ان فيه ناس بتقول كذا و كذا ركز في العلم وبس واحنا مبنخدش اجندات من حد

هانئ-نرجع لموضوع التمويل..قلت انك طلبته بشكل غير مباشر..و لكنك في رسائل الفايسبوك قلت انك ندمت

ماهر-طلبت ده هي بين قوسين قصة مين اللي مين أرسل في طلب التمويل

هانئ-ماشي..يعني انت مقلتلش لحد شوفلنا الناس هناك ايه استعدادهم لتقديم تمويل

ماهر-محصلش..فيه ناس اتطوعت وحاولت تساعد

هانئ-نقدر نقول زي الدب اللي قتل صاحبه

ماهر-فيه ناس كتير شايفه الموضوع ده عادي جدا و 99% من منظمات حقوق الانسان بتاخد تمويل من بره

هانئ-لكن فلوسهم بتتوزع هنا في السفارة و اساميهم معروفة و بيروحوا السفارة بموافقة الحكومة المصرية

ماهر-كل المنظمات بتاخد من أمريكا و غير امريكا

هانئ-خلينا في أمريكا..طب وليه الندم؟

ماهر-الندم حصل فعلا لما الراجل قاللي انا كلمتهم قعدت يومين أقول ايه المشكلة هو احنا احسن من الناس اللي بتاخد الفلوس و يحطوها في جيبهم..لا انت كده حتبقي زيهم..طيب م احنا حناخد الفلوس و حنستخدمها في طباعة الورق و الاستيكرز و تمويل الحملات الكبيرة اللي حتفيد مصر..بس انت كده حتبقي زيهم و ممكن بعد كده وصلت لقرار الرفض وبلغته للراجل

هانئ-واحد ندم علي حاجة يبقي أكيد عملها

ماهر-الندم يكون علي عمل مش نوايا..محدش يحاسبني علي دردشة ولا خواطر

هانئ-وسوسة يعني؟

ماهر- أصله مينفعش..بفرض اني عملت هاك عليهم حلاقي بلاوي سودا حلاقي ضياء بيتكلم عن كذا و مين بيتكلم عن مين؟؟

هانئ-و هو انت معملتش يا احمد؟

ماهر-عادل بيقول انه عمل محاولة و خرج حاجات و انا لمته علي ده

هانئ-لن تمروا بتقول عادل هو اللي بدا

ماهر-وهو عادل نشر؟

هانئ- هم بيقولوا مش مهم انك تنشر المهم انك دخلت شقتي وعرفت خصوصياتي سرقت مسرقتش ده قضية تانية..زعلان انت ليه ما انتم اللي بداتم

ماهر-و خصوصيتي انا مالها و أنا معملتلهومش حاجة

هانئ-و علي البادئ تدور الدوائر

ماهر-يقتحموا عادل...المفروض انهم شافوني وانا بلومه

هانئ-مهم شافوا الحاجات ده بعد م عملوا هاك عليك

ماهر-يقوموا ينشروا عقابا لي!!!!...مش سياسية ايه ده...كل ده حجج وتبرير

هانئ-ندخل في نقطة صعبة شوية و هي أصحاب المدونات اللي انت اتهمتهم انهم بياخدوا فلوس من بره وذكرت بالخصوص أسماء وائل عباس و محمود صابر(حرنكش) و اتهمت الاسمين دول بالذات انهم بياخدوا الفلوس و بيصرفوها علي الشقق والعربيات..و انت النهاردة في وسط كلامك قلت ان فيه ناس بتاخد تمويل من بره عشان تعمل أفلام هل كنت تقصد محمود صابر؟

ماهر-معنديش فكرة عن الموضوع ده وده مجرد كلام سمعته وقلته لواحد صاحبي في الخاص لا أذعته ولانشرته ده كانت مجرد دردشةفي لحظة انفعالية و كان ضياء الصاوي السبب لانه هو اللي شوه لي صورة وائل و محمود

هانئ -يعني انت واخد الكلام ده من ضياء وهو اللي اتهم الاتنين دول بالذات بانهم بياخدوا تمويل من بره واحد اشتري بيه عربية والتاني عمل فيلم...صح؟

ماهر-ده اللي حصل تقريبا أنا كنت بتلكم ع الخاص مش العام مع صديق و لما ضياء نشر الحاجات ده كان عشان يشوه صورتي قصاد وائل و صابر وبعد كده قلت لصديقي ده أنا كلمتهم و بعد اللي اتنشر اعتذرلتهم و قلتهم انا أسف ع اللي قلته في حقكم

هانئ- لكن اللي سمعته ان مش انت اللي اعتذرت و ان وائل عباس اتخانق معاك يوم لقاء اوباما

ماهر-لا..انا اللي اعتذرت لوائل قبلها و بعتله ع التوتير و كلمته علي التليفون وقلتله انا بعتذرلك يا وائل و محدش يقدر يزايد علي وطنيتك و ده كان بعدها بأيام و ضياء راحلهم وقال ماهر بيقول عليكم كذا و كذا و انا قلتلهم أسف و الكلام ده اتفال في لحظة انفعالية

هانئ-و موضوع الخناقة مع وائل؟

ماهر-مش صحيح انا مقابلتش وائل يومها و لا حتي رحت لقاء اوباما ..و عمر ما حصل عراك مع وائل

هانئ-انتا متهم بأنك بتحاول تقصي الناس بتاعة لن تمروا من الجروب و هو مش ملكك-علي حد تعبيرهم-..انت قفلت الجروب و منعت الرسائل و طردتهم بره

ماهر-لن تمروا أعلنو انهم حيخرجوا بره المجموعة و بعد كده دخلوا يشتموا

هانئ- و ده كان امتي؟

ماهر-بعد 6 أبريل في الفترة اللي قال ان حصل مشاكل و لو مش عايزني في الحركة هاخرج و العرض ده قدمه مرتين المرة الاولي رفضت و المرة التانية قلتله زي ما انت عايز و بعدها اعلن الانفصال

هانئ- والجروب اللي اتقفل هم يتهموك انك حاولت تضيق عليهم...بتقفله بصفتك ايه؟

ماهر-بصفتي الكرياتور بتاع الجروب و الأدمن و مؤسس الحركة

هانئ- هم بيقولوا ان ماهر قد يكون مؤسس الحركة لكن في نفس الوقت هي مش ملكية خاصة بل ملك لكل الناس زي ما انت نفسك قلت

ماهر-ملك لكل واحد يوافقك علي مبادئ الحركة وده اللي قلته في الأول لما كنت بلف علي المحافظات..اللي يوافق يدخل لكن اتك تخدعني و تعمل انك موافق و انت غير كده و عايز تحتلها بحزبك يبقي مينعش تقعد في الحركة..

هانئ-لكن هم بيقولوا احنا مبنخدش لحسابنا احنا عندنا يسار واشتراكيين ثوررين و ناصريين و حتي سلفية

ماهر-هم بيحاولوا يميلوا بالحركة لأفكار اخري..اللي بيعملوه اسمه هدم..حد يخاف علي الحركة و يبعت للجرايد بهذه الصورة المستمرة!!

هانئ-هم بيقولوا احنا مشكلتنا مش مع 6 ابريل لكن مع احمد ماهر هو اللي بيضيق علينا..احنا اعضاء في 6 أبريل و مش حنسيبها

ماهر-حيرجعوا يعملوا ايه..يخلوها حركة اسلامية؟

هانئ-يعني انت مشكلتك انهم حيعملوها حركة اسلامية قومية؟

ماهر-أه طبعا المبادئ اللي قلتها ان الحركة بلا أيدولوجية لكن تقبل جميع الايدولوجيات

هانئ-لكن الحركة كبرت و بقت اوسع من مجرد كلام مكتوب علي جروب

ماهر-وفيه وثيقة تأسيسية اللي مش موافق عليها يخرج بره

هانئ-انت كده بتكرر نفس غلطتهم -من وجهة نظرك- و بتحاسبهم علي نوايا ..هل هم اعلنوا انهم حيحولوا 6 أبريل الي دولة اسلامية؟؟

ماهر-ده مش مجرد نوايا لهم سوابق في كذا مشروع عملناه نلاقيهم كاتبين شباب 6 أبريل و حزب العمل...و مجدي حسين مجدي حسين في كل حاجة..احنا مش حركة مجدي حسين ..هو معتقل سياسي زيه زي كريم عامر او مسعد أبو فجر ناس محترمة ودعاة حرية لكن مش حنفضل داعيمين احزب العمل ومجدي حسين بس...

هانئ-هم بيقولوا أن مشكلتهم مع احمد ماهر و لو مشي مش حياخدوا الحركة للاتجاه اللي مخوفك ده مأكدين ان لن تمروا تضم من أقصي اليمين الي أقصي اليسار

ماهر-طيب ما يعملوا حركة لوحدهم

هانئ-بيقولوا و احنا ليه نمشي هي 6 ابريل ملكية خاصة؟

ماهر-طيب م أحمد هو اللي عمل الحركة و احمد هو اللي دعاهم و هو اللي جابهم من علي القهوة...المجموعة الفاعلة في المجموعة لسه موجودة و دور مجموعة لن تمروا كان هامشي و لو مشيوا لن تتأثر المجموعة..هم اللي عملوا مشاكل بسبب اضراب 6 أبريل و أصدروا بيانات مزورة أذوا سمعة الحركة و نشروها في البديل والدستور أن 90% من الناس حتشارك في الاضراب

هانئ-يعني الاستبيانات اللي اتنشرت كانت مزورة؟

ماهر-ايوة و هم اعترفوا بعد كده وقالوا اننا عملناها ع القهوة

هانئ-أنت شايف ان اضراب 6 أبريل السنة ده كان له لازمة و لا ضرب مصداقية اضراب 6 أبريل 2008؟

ماهر-طبعا هزها..لو كان اتعمل بشكل جامع يدرب الناس علي الاحتجاج و يعمل ائتلاف بين القوي السياسية كان حينجح لكن بالشكل اللي اتعمل اكيد كان حيفشل

هانئ-طب وافقت ليه..هل هم ضغطوا عليك؟

ماهر-أساليب ابتزاز و تزوير و تدليس و كانوا جايبين فيديوهات لملايين العمال حتشارك

هانئ-يعني انت السنة دي مكنتش عايز اضراب عام في 6 أبريل؟

م-أبدا..كنت عايز حدث احتجاجي بصورة شبابية مبتكرة تعمل جذب للشباب و تنشر بين الناس ثقافة الاحتجاج و يكون حدث جديد يشد الناس مش نفس الاسم المكرر و تشارك فيه كل المعارضة لان المعارضة كانت رافضة فكرة الاضراب العام

هانئ-الناس شايفة ان أحمد ماهر كاي بيرمي شباب الحركة في فعاليات ملهاش لازمة غير ان يتقبض عليهم علي سبيل المثال حادثة الأغاني الوطنية والطيارات الورقية علي الشاطئ اضافة لاحتجاج كفر الشيخ خاصة ان الشباب اتقبض عليهم قبل 6 أبريل 2009 بايام معدودة

ماهر-لن تمروا هم السبب في كده

هانئ-في ايه بالضبط؟

ماهر-بالنسبة لاسكندرية احنا فعلا كنا رايحيين نعمل حدث احتجاجي عالبحر..و اتمسكنا و مع كده سمّع جدا..و ناس كثيرة انضمت لينا و ساعدتنا و وقفت معانا في المحكمة..كفر الشيخ اللي قام بالمشكلة نور حمدي اللي في لن تمروا..أصر علي توزيع بيانات في العيد..قلناله ان التوزيع له أصول قال لا لو انتم حتسكتوا أنا مش حاسكت و نزل وزع ورق بمفرده و هو معندوش خبرة في التوزيع اللي له أصول وبقاله شهور في السياسة..و قعدنا نجري وراه لمدة أسبوعين لحد ما خرج من السجن..ده حاجة..في كفر الشيخ نفس الحال نور وشمس الفخاخري..احنا كنا متفقين التوزيع يكون بشكل معين وزع هو بطريقة عشوائية في وسط الجامعة فالبنات اتمسكوا..متفقين ان فيه حاجة اسمها مجموعة اعاشة للسهر علي راحة المعتقلين وتوفير الطعام والمحامين للمعتقلين اضافة للدعم الاعلامي...قعدوا يزعقوا ويبتزوا كل من لم يذهب لكفر الشيخ انه عميل وخاين و تخلي عن البنات..فخلوا منسقي المحافظات يسافروا لهم يوم 4 أبريل

هانئ-يعني هم اللي كانوا السبب في فشل اضراب 6 أبريل اللي هم كانوا طالبينه؟

ماهر-هو كان فيه سوء ادارة منهم ...و لكنهم عملوا حجة غريبة ان اضراب 6 أبريل فشل عشان الناس كانوا معتقلين و أظن أنهم كانوا مخططين لكده

هانئ- يعني انت شايف ان الطقم بتاع العمل ليه تعامل امني؟ ولا هو مجرد تقابل مصالح؟

ماهر- تقاطع مصالح و استغلال و ناس بتسخن الموضوع و ناس بتدي تعليمات

هانئ- ما هم هيقولولك ازاي احنا الي ممسوك عندنا مجدي احمد حسين الي متقدم لمحاكمة عسكرية ممكن تقضي علي مستقبله السياسي كله، بتتهمنا اننا شغالين مع الامن؟

ماهر- بيتم استغلالهم و اكيد الامن فرحان بهذا الموضوع

هانئ- لأ وضحلي النقطة دي: بيتم استغلالهم ولا فيه تعاون مع الامن؟

ماهر- قد يكون بعض افراد لن تمروا من افراد حزب العمل ليهم تعاون امني و بيسخنوا الموضوع كل شوية. و قد يكون بيتم استغلالهم امنيا. و في كل الحالات الامن هو المستفيد و النظام هو المستفيد لاننا داخلين علي معركة حاسمة الفترة الجاية فمن مصلحة الامن و الحزب الوطني ان ميكونش فيه حاجة اسمها 6 ابريل .

ما تنكرش ان الموضوع كان يتحل وديا. سواء بالانفصال سواء بالتراضي . بس كان يتحل وديا. لمصلحة مين التشهير الاعلامي بالمنظر دا؟ لمصلحة مين؟ هل دا حل المشكلة؟ هل دا حل اساس المشكلة؟ هل دا بناء للحركة؟

هانئ- هل انت شايف ان احمد ماهر خلاص كدا دوره انتهي مع 6 ابريل ولا احمد ماهر هيكمل . ولو وصلنا لنقطة ان 6 ابريل تستمر بس احمد ماهر يمشي، هتعمل ايه؟

ماهر- انا حتي الان هكمل في الحركة و بعيد بناء الحركة بتنظيم جديد و عارف اخطاء الماضي من خلال عام مضي و هتشوفوا نتايج هتبان في الاعمال القادمة. دي حاجة. و بفرض ان احمد ماهر ما بقاش هو منسق 6 ابريل و لكن يكفيه ان هو من اسس 6 ابريل و لن اعارض اي شخص اخر منسق طبقا لمستجدات طبقا لظروف او طبقا لرغبة الاعضاء الحقيقيين للحركة.

هانئ- يعني هل انت شايف ان الحرب بتاعت لن تمروا دي حرب علي احمد ماهر ؟

ماهر- حرب لتدمير احمد ماهر سياسيا

هانئ- يعني مشكلتهم مع احمد ماهر

ماهر- هم عندهم احزابهم الي بيمارسوا من خلالها سياسة. هم عايزين يدمروا احمد ماهر سياسيا . دا واضح جدا في اسلوبهم في النشر الاعلامي المستمر . المجهود دا لو كانوا بذلوه في اي حملة كانوا كسروا الدنيا. لما يبعتوا لكل فضائية و يتصلوا بالمسئول فيها و يبعتوا لكل جريدة و يتصلوا بالصحفي و يقابلوه و يتصلوا بالناس واحد واحد. دا لو كانوا عملوه في اي حملة كانوا بنوا مصر كلها

هانئ- احمد هل انت راضي عن تعامل الصحافة معاك؟ يعني في الازمة دي بالذات انت بتقولي ان دا اول حوار انت تعمله مع ان المشكلة دي حاصله نقول دا الاسبوع التالت او الرابع

ماهر- اول حوار ازاي؟

هانئ- يعني هل انت عملت حوارات تدافع فيها عن نفسك؟ حد طلب منك تيجي تدافع عن نفسك؟

ماهر- فيه جرايد محترمة زي الفجر ، الصحفي نفسه محترم حتي لما نشر ما نشرش رأي لن تمروا نشر التفريغ و جاب لن تمروا قالوا كلام و قال الاسبوع الجاي هيكون رد علي الموضوع كله. فدا تعامل مهني كويس جدا.

فيه مثلا اليوم السابع تعاملها المهني سئ جدا لانها بتاخد كلام لن تمروا

هانئ- من محمد عبدالعزيز بالذات

ماهر- تمام..فيه مثلا العربي الناصري بتنشر الكلام كانه حقائق مسلمه

هانئ- هل دا ليه علاقة بوليد خيري؟

ماهر- طبعا. عصام سلامة صديق شخصي من سنوات لوليد خيري. بره مصر موقع تابع لحزب العمل، المسائية. جرائد كتير بياخدوا كلام بدون حتي ما يتصلوا بيا او يسالوني. الي بجد بحترمهم مهنيا الفجر و موقع ابناء مصر. فيه جرايد تانية قالت ملناش دعوة بالخلاف دا زي الدستور

هانئ- يعني انت شايف ان حسام هندي اكيد كان عنده الحاجات دي من بدري لان معروف ان حسام هندي من اعضاء 6 ابريل وفي نفس الوقت صحفي شاطر

ماهر- ما بعتوش بس لحسام هندي. بعتوا لحسام هندي و ابراهيم عيسي و عمرو بدر

هانئ- وهم ما رضيوش يدخلوا نفسهم في الحوار

ماهر- لأ قالوا مش هنساهم في تدمير حركة

هانئ- هل انت راضي عن تعامل احمد ماهر في الازمة دي؟

ماهر- لو كنت اخطأت في بعض الاشياء زي اني فكرت في موضوع التمويل دا لفترة و رفضته. دا كان خطأ مثلا. لكني اخطأت خطأ جسيم ان انا سمحت لناس مخربين بالاستمرار رغم ان بقية الاعضاء منذ فترة طويلة جدا بيطالبوا بخروجهم لانهم مخربين لانهم بيعطلوا شغل و لانهم بيتريقوا. كمثال عملنا حاجة في الحسين كانت بصوت اغلبيه، نزلنا الحسين و عملنا حفلة هناك و جبنا عود و شباب كتير انضموا للحركة منها وكان حدث آمن و عمل اسم كويس للحركة عشان ده مخالف لتوجه حزب العمل عشان الموسيقي . انا غلطت ان انا ما خرجتهمش.

هانئ- هل انت شايف انك اتأخرت في الرد علي الكلام دا؟ او انت رديت في مكان مش صح؟

ماهر- ازاي؟

هانئ- يعني انت دلوقت رديت علي معظم النقط الي اثيرت. طبعا النقط الي تهمنا لأن فيه نقط مش من حقنا ان احنا نتكلم فيها دا اكيد. لكن انا بقول انا ما شفتلكش حوار طلعت فيه دافعت عن نفسك . ما ردتش علي الناس دي ببيان شخصي حتي علي الحاجات الي اتنشرت

ماهر- ما يهمنيش الاعلام كتير. في الاخر هيبان كل الشغل و هيبان الي غرضه الشغل و الي غرضه الاصلاح فعلا. بركز اكتر في بناء الحركة و الشغل الحقيقي. مش كل ما واحد يتكلم هقعد ارد عليه

هانئ- هل تنكر ان الناس لما بقت بتقابلك و بالذات الشباب، فيه ناس صورتك عندها اتهزت؟

ماهر- الناس الي عارفاني من زمان بتتكلم معايا بلهجة الناصح. اغلب اعضاء الحركة الموجودين دلوقت بيقولوا بفرض ان احمد ماهر اخطأ بس ماينفعش حد غيره يكون موجود

هانئ- الجبهتين قعدوا يهددوا و كل واحد يقول انا هنشر ومفيش حاجة اتنشرت لغاية دلوقت. محمد عادل بالذات هدد بانه يوم الحسم و النشر ومافيش حاجة اتنشرت. محمود الششتاوي هدد بالنشر ومافيش حاجة اتنشرت

ماهر- ما نشر كل حاجة

هانئ- محمود الششتاوي فيه حاجات نشرها و فيه حاجات لسه ما نشرهاش

ماهر- ما اتنشر كله في الجرايد

هانئ- لأ مش كل اللي وصللي.انتوا ما اتبعتوش سياسة الهجوم ليه؟

ماهر- كدا نبقي بندمر نفسنا.نقعد نرد عليهم و نتفرغ بدل ما يكون هدفنا هو تحرير مصر وازاي نواجه الحزب الوطني و ازاي نوقف مشروع التوريث ونقعد نواجه ضياء الصاوي و لن تمروا و طبعا دا هبل.احنا كدا بندمر نفسنا. احنا نسيبهم يشتموا زيهم زي الحزب الوطني و زيهم زي اي حزب وخلاص و نشتغل. مجهودنا الاحسن هو الاستفادة من الاخطاء و بناء حركة شعبية حقيقية علي ارض الواقع

هانئ- 6 ابريل 2010 هل ابتديت تجهزله من دلوقت؟ ولا هتراجع نفسك؟ انت السنة دي بتقول هتعمل شكل مختلف عن الي حصل.

ماهر- كلام سابق لاوانه وكل الاقوال مطروحة . لسه ما اتفقناش علي حاجة.

هانئ- اعادة التشكيل او الهيكلة الجديدة للحركة هل هتضم الاسلاميين فيها؟

ماهر- معنديش مشاكل مع شخصيات اسلامية . معنديش مشاكل مع الاخوان او اخرين لكن كل من ساهم في التشهير بأسم الحركة بالتأكيد مش هيكون موجود.

هانئ- يعني انت بتقول ان العمل غير مرحب بيه في 6 ابريل؟

ماهر- كل من ساهم في التشهير. و اعتقد لو مجدي حسين لو كان بره السجن مكنش هيسمح بتصرفات المراهقين الي اتعملت.

هانئ- واليسار ايه وضعه في الحركة؟

ماهر- اليسار موجود. فيه يساريين شغالين معانا و منهم اصدقاء علي المستوي الشخصي. وانا عضو و أحد مؤسسي حركة تضامن. اليسار مفيش مشاكل بالنسبه له. لكن وليد خيري لا يمثل اليسار، وليد خيري ييمثل نفسه او يمثل المجموعة المصرية ضد الصهيونية او بعض الافكارالقديمة من الفكر الناصري القومي. مينفعش نقول ان خيري هو اليسار.

هانئ- الحركة متهمة- او ما يعتبرش اتهام- بأنها بتحاول التمسك بالمنهج الليبرالي ودا الي خلي الكلام يطلع علي علاقتها بأمريكا.

ماهر- الكلام دا مش حقيقي. الكلام دا اصلا من البداية واحنا جيل ما بعد الايدولوجيات و متفقين ان الي خرب مصر هو التعصب والتحزب لايدولوجيا او فكرة او حزب معين. الناس تقسم بعض يقولولك انت ليبرالي ولا اشتراكي؟ لو ليبرالي هشتغل معاك لو اشتراكي مش هشتغل معاك. دا بالفعل الي اضر المعارضة في مصر واضر الحركة الحزبية في مصر.احنا حنستمر في نهجنا بالاتاحة لجميع الافكار طالما موافقة مع علي المبادئ المذكورة للحركة خلاص يبقي يشتغل عليها. مش موافقين ما يشتغلوش عليها. يعني لا اقصاء ولا ليبرالية ولا توجه ناحية امريكا . وانا اصلا لا ليبرالي ولا معترف اصلا بالتحزب والتعصب لفكرة معينة.

هانئ- هل رغبة احمد ماهر في الزعامة هي الي مخلتوش ينضم للغد زي ما عملت اسراء؟

ماهر- اسراء عضوة في الغد من زمان

هانئ- وانتوا 6 ابريل اتعرض عليكم الانضمام؟ ايمن نور ما عرضش عليكم الانضمام بعد ما خرج؟

ماهر- لأ

هانئ- ما حصلش؟

ماهر- ايمن نور كان بيبحث عن كوادر و مش بيدور علي حد ينضم للحزب

هانئ- وجهة نظر ايمن نور في الي كان حاصل دا ايه؟ اكيد انت سمعت رأيه

ماهر- متكلمش فيه خالص

هانئ- هل 6 ابريل ممكن تقف ورا مرشح بعينه في الانتخابات الي جايه؟

ماهر- جميع الافتراضات مطروحة. يعني انا ضد فكرة اننا نقعد نركز علي فكرة "الثورة" "يسقط مبارك يسقط مبارك". لما نشوف كذا سيناريو و كذا مسار بالتوازي و نشوف ايها اقرب للواقع. يعني لو ساندنا مرشح حقيقي في انتخابات الرياسة. او عملنا انتخابات موازية او طرحنا فكرة بديلة لتعديل الدستور. كل دا بيؤدي للتغيير. احنا مؤمنين جدا بموضوع التغيير.

هانئ- يعني انت اميل للتغيير الهادئ بدلا عن التغيير الانقلابي . اميل الي تغيير الافكار عن تغيير الارض بشكل يدوي سريع؟

ماهر- احنا بنسعي لتغيير من اجل الديمقراطية. يعني بنسعي لفترة انتقالية و شخصية مستقلة او مجموعة مستقلة تدير البلد لفترة انتقالية ودستور جديد يكون مستقل عن اي ايدولوجية وقوة تحمية مالهاش ان اي حد يحكم بعد كدا يغير الدستور . الكلام دا بيحصل ازاي؟ يحصل عن طريق انتخابات و عصيان مدني، يحصل عن طريق ثورة ،يحصل عن طريق انتخابات موازية. بيحصل عن طريق تغيير في الدستور والقوانين. كل الامور متاحة

هانئ- احمد ماهر اقل من التلاتين دلوقتي

ماهر- 28

هانئ- لا يجوز دلوقت انه يترشح لمجلش الشعب. ايمن نور دخل مجلس الشعب و هو في التلاتينات. هل ممكن نشوف احمد ماهر مرشح لمجلس الشعب عن 6 ابريل؟ خاصة ان 2010 مش بعيدة.

ماهر- امممم. القواعد السياسية الي حطها النظام اشبه بالحرث في البحر و الاعتماد عليها هيكون جزئي و ليس كلي. مش هعتمد علي انتخابات كوسيلة تأهيل. قد تكون الانتخابات دي احدي وسائل المساعدة في مشوار التأهيل. و استبعد هذا الكلام . هذا الكلام سابق لاوانه.

هانئ- يعني انت شايف ان 6 ابريل مش ممكن توصل لمرحلة انها تقدم مرشحين عالاقل خالص للمجالس المحلية؟قد يكون دا تكتيك معين يعني مطروح في الفترة القادمة؟

ماهر- مش مطروح .ما اتناقشناش فيه بس قد يكون تكتيك معين.

هانئ- طيب احمد ماهر هقولك اسمي و تقولي انت تعرفه ولا لأ و ايه علاقتك بيه. وبما انك قلتلي ما اذكرش اسامي ..مؤلف كتاب عشان ما تنضربش علي قفاك

ماهر- اعرفه و بحترمه

هانئ- و علاقتك بيه ايه؟

ماهر- بندردش مع بعض

هانئ- يعني مش هو الشخص الي اتبرع بموضوع تقيدم الدعم؟

ماهر- امممم...سؤال يتجاوب عليه يعني؟ (سكت لعدة ثوان) ليه كدا؟

هانئ- سؤال صعب قوي؟

ماهر- هههههههه (مرت نص دقيقة حتي الان) مش هو الشخص الي اتبرع بطلب التمويل

هانئ- طيب هل انت شايف يا احمد ان علاقتك بالخارج ممكن تضرك الفترة الجاية؟ انت دلوقت قلتلي انا معروف في الخارج

ماهر- زي ما الامن دلوقت بيستغل علاقة المنظمات و الاحزاب زي ايمن نور او حزب الجبهة لتصدير فكرة ان هم عملاء للخارج و بتاع. نفس الكلام بيعمله حزب العمل بحذافيره. بتعمله مجموعة لن تمروا بحذافيرها. تدمير شخص عن طريق تشويه صورته . لكن علاقتي بالخارج عن طريق اعرف منظمات شبابية مش اكتر و علاقات دولية

هانئ- يعني مش حكومات

ماهر- مش مع حكومات نهائي

هانئ- ولا مع منظمات مجتمع مدني؟

ماهر- اعرف ناس في مجتمع مدني

هانئ- ناس ولا منظمات؟

ماهر- ناس

هانئ- اصل انا ممكن اعرف رئيس الجمعية مثلا وابقي انا كدا اعرف الجمعية كلها

ماهر- انا ما اعرفش رؤساء جمعيات خالص

هانئ- مدير البرامج مثلا؟

ماهر- ولا مدير البرامج. كل الي اعرفه شباب زيي بندردش عالنت و بنتكلم ازاي نقدر نخدم قضيتكوا عن طريق النشر الاعلامي او عن طريق لو تعرفوا محاميين.

هانئ- يعني انت بتقول كل الناس الي تعرفها بره شباب

ماهر- اه. شباب بيكون اعضاء في منظمات او حركات مشابهة في بورما و في كوبا وفي بوليفيا و في دول كتير.

هانئ- بس هي يا احمد المشكلة الاسامي الي انت ذكرتها دي نقدر نقول انها جبهة الممانعة العالمية ضد امريكا. يعني انت بتقولي دولة زي كوبا معروفة بمركزيتها. فأنا لما اجي اتكلم...

ماهر- (مقاطعا) انا علي فكرة مش ضد امريكا

هانئ- انا بقولك مصدر من مصادر الاتهامات

ماهر- احمد ماهر و كحركة يعتبر ان اسرائيل هي العدو الاول والاخير للعرب و دولة محتلة و...و... و كل يوم فيه مذابح للفلسطينيين . امريكا دولة بتساند اسرائيل و دولة بتبحث عن مصالحها ولا يهمها غير مصالحها. لكن لازم تفرق بين حاجتين : امريكا كأدارة امريكية و شعب امريكي و منظمات و مجتمع مدني في امريكا و غير امريكا و احنا في عصر مفتوح بنتكلم و نشوف الناس دي كلها فيه حاجة اسمها عميل و مجند لاجندة و الكلام دا كله . بنتناقش و بنشوف و شغل الافراد طلها. انا مقتنع بفكرة اترك نافذتك مفتوحة لجميع الافكار و لكن لا تسمح لفكرة بالقفز اليها. مش هسمح لفكرة او لحد معين يفرض عليا اجندة سواء من جوه او من بره كحزب معين او من بره مصر. مقتنعين بفكر معين كناس بتعمل من اجل الديمقراطية. مقنعين بكذا و كذا و كذا وكذا و كذا فعلاقتنا بافراد عن طريق دردشة و استفادة من خبرات . ماليش علاقة بحكومات. و علاقتي مع المنظمات الحقوقية الاجنبية بيكون عن طريق نشر او دعم علمي او سياق تجارب او تبادل خبرات او دردشة و دعم حقوقي او دعم اعلامي او بيان يصدر . مش اكتر من كدا

هانئ- يعني الموضوع كله صداقات نقدر نقول بريئة

هانئ- احمد لو الوقت رجع بيك نقول لمدة شهرين تلاتة كنت هتغير ايه من الحاجات الي حصلت دي كلها؟

ماهر- كنت هخرج المخربين قبل ما يخربوا

هانئ- هل الكلام الي انت قولته عالاينبوكس بتاعك كنت هتقوله ولا هتتراجع فيه؟

ماهر- هو بالتأكيد هكون اكثر حرصا اكثر حرصا في الفيس بوك و دردشتي عالفيس بوك. كنت هعمل زي زمان بقي نتكلم عالقهوة بدل ما نتكلم عالفيس بوك.

هانئ- لو قلتلك يا أحمد سؤال توقعت اي هسألهولك و ما سمعتوش مني؟ او ايه النقطة الي تحب تضيفها

ماهر- اضيف بس ان لو هدفهم اصلاح الحركة مكانوش شهروا بيها اعلاميا بالمنظر دا. مفيش حد قلبه علي حركة معينة و يشهر بيها. دا سلوك حد عايز يخرب و مش همه الحركة و عنده تنظيمه الي هو عايزه يا اما يسيطر يا اما يهدم.

هانئ- يا فيها لا اخفيها

ماهر- اه

هانئ- لو قلتلك يا احمد بأمانة قيم لي نسبة الصدق في اللي انت قلته تديلها كام في المية؟

ماهر- 90 في مية

هانئ- و 10% ؟ تكتيك سياسي؟

ماهر- اه

هانئ- الف شكر يا احمد . و سعيد باللقاء معاك

ماهر- العفو

- زا ايند -

انا ماليش دعوة بكل التفاصيل دي كلها

انا ليا رجاء عند الجميع، اللي اساميهم ذكرت في الحوار واللي اساميهم لم تذكر في الحوار

كفااااااااااااااااااااااييييييييييييةةةةةةةةةةةة هبببببببببببللللللللللللللللل

كفاية هبل

كل اللي حصل ده ولا له اي لازمة، ولا كان له لازمة الناس تهيك على بعض، ولا له لازمة الناس تشتم في بعض بالاسماء، ده اسمه هبل، ده هبل

بس ليه ده حصل؟ عشان مافيش اساس ولا فيه ثوابت ولا فيه تحديد لهدف واحد معين الكل يجتمع عليه، والاهم من ده مافيش مصارحة بين الاطراف، كل واحد داخل بدماغه، ومافيش استراتيجية ولا فيه ناس مظبطة دماغها على حاجة واضحة وده اسمه هبل، تاني ده هبل

مافيش حاجة اسمها عيني فيه واخيه عليه، يعني احنا ح نبتدي من اولى ابتدائي:

امريكا وحشة

واسرائيل وحشة

وحسني مبارك وحش عشان هو بتاع امريكا واسرائيل وبيعمل فينا ده كله عشان هو بتاعهم

ولو امريكا جابت للعراق ديمقراطية يبقى تجيب لنا احنا ديمقراطية، اذا كانت هي اللي جايبة حسني مبارك

والفريدم هاوس وتابع للسي اي ايه ووحش وهدفه الاساسي خلق جيل يقبل بوجود اسرائيل في المنطقة وماحدش بيضحك على اجهزة ده جهاز مصروف عليه مليارات عشان يشخ في دماغ الناس ماهواش شاب بيقول لك تعالى نشرب شاي في بيتي وانت تروحي معاه عشان ماحدش يقدر ياخد من البنت غير اللي هي تديهوله

ح تطلعي حامل

ومش ح نعرف نسقطك..... انت مالكيش اهل يسألوا عليك يابت؟

والعلام ملقح في كل حتة، ماحبكش العلام بتاع السي اي ايه، ما بيعلمش حاجة حلوة ده، الفريدم هاوس ده هو السبب في خلق جيل من داخل الاتحاد السوفييتي يفككه

احنا انصح من الاتحاد السوفييتي؟ 

والمعونة الامريكية وحشة دي هي المعونة اللي مقعدة حسني مبارك على قفانا وحشة وحشة وحشة

كخ كخ كخ

الله ينتقم منك يا حسني انتقام عزيز مقتدر، هو اللي صاب الناس بالهبل ده

واخيرا

لموا التعابين بقى، عملاء ايه؟ دول حتى لو حبوا يجندوا عملاء ح يفشلوا بالهبل اللي احنا فيه ده

حد يروح صربيا؟ طب لما ينزلوا السوق ح يشتروا ايه هدايا لولاد اخواتهم؟ جماجم؟