لو دكر روح احكي يا شهرزاد

الفيلم ده مش ح يعجب اي راجل مصري الا في الحالات الاتية:

يكون موضوعي خالص وما يهتمش بالرسالة اللي الفيلم قد ما يهتم بصناعته نفسها

(ومين في الدنيا موضوعي؟)

يكون ما عندوش عقد ذكورية خالص بسبب التربية، او على الاقل عرف يعالج نفسه

(ماحدش يرفع ايده... كداب)

يكون رايح يتفرج على مناظر ومش هامه اي حاجة في الفيلم تانية

بما اني مش انا اللي مشتومة في الفيلم فاقدر اقول انه عجبني من الناحية الفنية جدا والله، وعجبني يسري نصر الله اكتر حاجة، عشرة على عشرة يعني

نجيب من الاخر، الفيلم رسالته: البلد دي مافيهاش رجالة وعشان كده ده حالها

(بصرف النظر عن رأيي الشخصي انا شايفة ان حالها هو اللي عمل في الرجالة كده مش العكس)

هو جايب الخط الاساسي بتاع المذيعة المشهورة ومضفر فيها كويس قوي التلات حكايات وجايبهم بتسلسل مظبوط، عامل فيهم تباين بس مافيش تشرذم وبيركز فيهم على نقطة واحدة: الفرق ما بين الفحولة والرجولة، ودماغ الرجالة (انا اسفة يا شباب ده الفيلم مش انا) اللي فيها صراصير وفاكرين ان مهمته في الحياة انه يـ....على قد ما يقدر، بغلظة شديدة، من ابن البلد الصنايعي للصحفي، للموظف المحترم، للوزير، وانه مدام ربنا مديله صحة يبقى يقدر يغش ويخون ويستغل ويستندل وياخد فلوسها، وكل ما كبر في المقام كل ما ندالته كبرت معاه، وعلى الجانب الاخر برضه فيه تنويع في الستات بس مافيش شخبطة، برضه مركز على نقطة الست اللي هي هابلة، وعايزة جواز وحب وسند وواحد تعتمد عليه سواء بنت بلد وللا موظفة وللا من علية القوم وللا حتى ست متحققة مهنيا ومشهورة وناجحة، والخيبة برضه، كلهم ستات خايبة وقللات الحيلة، هو راسم كل شخصية بحيث تلاقي التعليق الواحد المناسب: مهما كانت ولية برضه. ومربط ده كله بالنسيج الاجتماعي والهرم السياسي. وبما ان الشخصيات اللي اختارها مفهومها عن الرجولة هي انه يبقى دكر مش راجل فلما حد فيهم بيتحكم في البلد بيعمل فيها اللي بيعمله في الست اللي بتقع تحت ايده، الاتبزاز العاطفي والاستغلال الجنسي اللي بيعمله في الست بيعمله في بلده وفي مجتمعه.  

صحيح التضفيرة مظبوطة قوي، مافيش لحظة ملل، مافيش حتة زيادة تقول مالهاش لازمة، مافيش حتة تقول فيها: ايه ده؟ متركب مظبوط جدا كأنه عامل رسم هندسي، بس المحتوى فيه دم وقتل وجنس وسياسة كتير، لو كان اي مخرج تاني عمله غير يسري نصر الله كان ممكن ترجع، مافيش اي رسايل مباشرة، على غير العادة عن وحيد حامد، يمكن يكون بقى يسري شال الجمل المباشرة اللي بتتحط في الحوار بتاع وحيد حامد عادة.

الجوازة دي نجحت، مابين المحلل السياسي السوداوي والفنان المرهف قوي لدرجة الابهام الاتنين خلفوا فيلم حلو.

انا مش ح احكي الفيلم عشان ما احرقوش وعشان هو ما يتحكيش، لو اتحكي بقيقي كده ح تضايق وتقرف لانه مكركب كمية ندالة ووساخة ووضاعة فوق الوصف، بس لما يتشاف حاجة تانية، فيه مشاعر كتير قوي، ومركبة، ومرهفة، الستات مرسومين حلو قوي، احلى من الرجالة، يمكن الرجالة استمبات شوية ما عدا عم البنات التلاتة اللي رغم ظهوره بشكل مختصر بس مرسوم حلو قوي وله ابعاد وفيه ملامح انسانية، بقية الرجالة مختلفين في المظهر لكن في تركيبته النفسية هو مبروز الندالة وانعدام الرجولة والنطاعة، ههههههههههه مش عارفة جاب كل الانطاع دول منين؟ بس مافيش ابعاد كتير لشخصياتهم غير شخصية الزوج بس هو اللي مرسوم كمان كويس قوي، بحيث ما تكرههوش، ماهواش رمز للشر والندالة، هو اتصرف بندالة لان فيه مقدمات ما تبررش بس تفسر. يمكن ما كانش عنده وقت يرسم الشخصيات الرجالي قوي وعملهم شخصيات عابرة لانه ركز قوي على رسم شخصيات الستات، ورسمهم بتعاطف شديد وانسانية وعمق، حتى خيبتهم وغباءهم وضعفهم متبررين ومتفسرين. ورغم كده مافيهمش ولا واحدة جبانة وهي الصفة المضادة تماما لكل الشخصيات الرجالي اللي موجودة، مافيهمش ولا واحد لا خايب ولا غبي ولا ضعيف بس كلهم جبنا.  

التركيب يشد من اول لحظة لاخر لحظة لدرجة ان لما الاستراحة جات في السينما اتضايقت، الفيلم لازم اشوفه تاني لان كل لقطة عامل فيها لوحة تشكيلية وعامل حاجات في الخلفية لها معنى ما لحقتش اركز فيهم كلهم لان كنت مشدودة طول الوقت ايه اللي ح يحصل بعد كده.

المزيكا كانت حلوة قوي واحد اسمه حاجة كروان، مش فاكرة ايه، هي تيمة واحدة بس حلوة.

انا مش عارفة لو مخرج تاني غير يسري نصر الله عمل الفيلم ده كان ح يطلع ايه؟ كان ح يبقى زفت، لانه صعب، الافلام يا تركز على الاحداث يا تركز على المشاعر والتأمل، هو عامل الاتنين في الفيلم، والفيلم سوداوي وكاره للبشر (الذكور منهم، لالالالالاااااا وانا لأأأأأ الللللللللللل) وفيه سياسة كتير والسياسة بايخة في السينما وحاجة زي دي لو اتعملت مع مخرج عادي كنا زهقنا وطرشنا واتلخبطنا واكتئبنا وطلع تلاتينا، انا مش عارفة هو عمل ايه بالظبط ابهجني واسعدني كده مع اني فضلت اعيط بعد الفيلم بربع ساعة

الممثل اللي عمل دور الزوج انا مش عارفة اسمه بس كويس قوي، لدرجة اني انا نفسي اتغشيت فيه مع اني عارفة من القراية عن الفيلم انه ح يطلع ندل، بيعرف يعبر من غير كلام احسن ما يعبر بالكلام، عرف يقفش الشخصية ويعرض وجهة نظرها اللي هي ندلة وجبانة ووضيعة بس تعرف تعذرها

البنات التلاتة كانوا هايلين، بس الولد، برضه اللي انا مش عارفة اسمه، بيقلد احمد زكي بزيادة، مش ح ينفع كده، ده ابنه ما بيقلدوش

حسين الامام، هههههه عسل، بس ما عرفش يغشني في الاول، من اول لحظة باين انه نصاب، بس احلى مشهد موتني من الضحك بتاع: ح اتجوزك، هو دايما حضوره حلو، مش ممثل فظيع ولا حاجة، بس له طلة وخفيف على القلب، سوسن بدر رائعة، كالعادة، البنت التونسية اللي مش عارفة اسمها ممتازة ومتشربة المشاعر ومطلعاها بهدوء شديد من غير صويت ولا عياط ولا تشنجات مع ان هي اللي دورها صعب قوي لانه مليان تنقلات في المشاعر وفي وقت قصير قوي خصوصا انها هي بادية بدايتها الخاصة ومكملة حكايات الستات اللي قبلها اللي هم ما كملوهاش للاخر، فاهمين مني حاجة؟ يعني هو ابتدى بسوسن بدر، ووقفها في العلاقة عند محطة معينة، جه على التلات بنات، اداهم بداياتهم وعدوا على محطة سوسن بدر ووقفوا بعدها بمحطة كمان ونزلوا، الاخيرة بقى اخدت بدايتها هي وعدت على محطات اللي قبلها وكملت للاخر خالص، فعبء الاداء كان مضاعف عليها، اللحظات اللي هي شكت في نفسها وصلني الاحساس وعرفت تخليني انا نفسي اشك. محمود حميدة غشني عرف يغشني ببراعة. 

الغريبة ان منى زكي ما كانتش في اروع حالاتها، مش ح اقول وحشة طبعا هي ممثل كبيرة، بس هي تقدر تعمل احسن من كده، يعني انا باقارن ما بين اداءها هنا واداءها في "عن العشق والهوى" مافيش نسبة، اولا في الاول كان المفروض الابتسامة الثابتة دي تبقى ابتسامة ثابتة بتاعة واحدة متعودة على الاضواء، مش عارفة ادتني احساس انها ابتسامة مذهولة كده، وبعدين، هي المفروض ان الشخصية دي بتبتدي بابتسامتها المستقرة وتبتدي تتدرج وكل حكاية تعمل اسقاط وتنور لها على جزئية من جوازتها هي وصفة في شخصية جوزها هي كانت بتتغاضى عنها، ومع كل حكاية في اكتشاف في حياتها هي المفروض يتطور في اداءها لحد ما بتوصل في قبل الاخر انها تعيط على الهوا. ما وصلنيش الاحساس ده، فجأة لقيتها قبل الاخر اتشنجت وعملت انفعال زايد والست الاخيرة بتحكي لها، والانفعال كان مدي طابع تعليمي، مش مفروض ان الشخصية دي شخصية ناصحة، المفروض ان الحكايات دي بتخليها تتأمل نفسها ولما بتقول تعليق لشخصية بيبقى كأنها بتقوله لنفسها، ما عجبنيش المشهد ده مع انه كان مهم، وما كانتش هي واللي قدامها ماشيين على وبرة واحدة، البنت كانت بتحكي بهدوء وابتسامة حزينة ومرارة مكتومة كان المفروض رد الفعل يناسب الفعل. 

في تعاملها مع جوزها حسيت انها استفزازية، مش قوية، المفروض، اظن يعني، ان المقصود من الشخصية انها تبقى ست قوية وتبقى المفارقة انه رغم قوتها وصلابتها الظاهرة ورغم دلع جوزها فيها نتفاجئ في الاخر انها من جواها "مهما كان ولية برضه" وان الراجل العسولة ده ابن ستين كلب زيه زي الباقي. لكن هي خلطت ما بين القوة وما بين التحدي، كانت نظراتها فيها قدر كبير من الاستفزاز وادتني احساس انها نكدية مع ان الشخصية والحوار المكتوب لها مش كده. المفروض انها بتحبه وقرفانة منه في نفس الوقت. مش عارفة كانت محتاجة تقعد مع الشخصية اكتر من كده. او يمكن يسري كان محتاج يحكي لها عليها اكتر من كده، لانه واضح انه اتحكم في كل الممثلين جدا والظاهر سابها تعتمد على نفسها فبقت هي في ناحية والباقيين في ناحية تانية. 

لما الممثل يبقى اصلا كويس ويقل في فيلم تبقى غلطة المخرج، عشان كده ح اخصم من العشرة على عشرة درجة وتبقى تسعة على عشرة

:)

لو دكر روح اتفرج على احكي يا شهرزاد.........وامممممممممسسسسسسسسسك اعصاااااابك واوعى تتهور