ولا سعودي ولا ياباني شركة طنطا ح ترجع تاني

مرعي بتاع الكلمة غطى جزء من اضراب شركة عمال طنطا للكتان والزيوت

انا اليومين دول سنتمنتالية مهترئة زيادة عن اللزوم، بقيت اتضايق قوي، هم بيعاملونا كده ليه؟ فيه في الدنيا بلد الشعب فيها يعتصم عشان عايز يشتغل والحكومة تقول له لا، خليك كده عواطلي؟ نفسي ادخل جوة دماغك يا عوكل واعرف ايه اللي بيدور فيها

اكيد له عذر ما، او تبرير ما، في الكورس اللي باخده عند رأفت الميهي كان بيقول لنا على رسم الشخصيات: اوعى ترسم شخصية سودا، مافيش شر مطلق، كل انسان له اعذار ومبررات واسباب تخليك تتعاطف معاه، حتى ابليس لما ربنا وصفه اداله مبرراته وعمل له تاريخ.

يمكن يكون الكورس ده هو اللي مخليني سنتمنتالية مهترئة بزيادة كده؟

طيب يا عوكل، لو سمحت خليني اشوف مبرراتك زي ما شفت مبررات ابليس على الاقل، بتعمل فينا كده ليه؟ هو احنا وحشين؟ هو احنا طلباتنا ايه غير الستر ولقمة العيش، والناس عايزة تشتغل، نفسها تشتغل يا اخي، ده احنا شعب اي حكومة في الدنيا تتمناه

بتعمل كده ليه؟

الناس بتقول بالروح بالدم نفديك يا كتان، انا عمري ماشفت كده في اي حتة في الدنيا

مرة ابليس طلع لعوكل وقال له: انا عندي ليك فكرة تعملها في الشعب ده.... هات ودنك: وشوشوشوشوشوش

راح عوكل قال له: طب اسمع الفكرة دي، هات ودنك..وشوشوشوشوشوشوش

قام ابليس قال له: لا يا شيخ حرام عليك