وايه اللي عمل احمد عز ذكي بقى؟

انا مستغربة قوي من ان الناس كلها عمالة تقول احمد عز ذكي، انا عايزة اعرف ايه اللي عمله ذكي يعني، عشان مش بيرد على ولا سؤال وعامل زي عم ايوب وكل ما يتسئل سؤال يقول: مش سماحين مات؟ اكل اتناشر كيلو بسبوسة وحتة قشطة قد كده...مش البت سنية طفشت..ادتها قش ساخ تشتري حشرين بيضا وتلات تلتال لحمة طمحت في الباقي طفشت! ده ذكاء يعني؟ ده ذكاء يبرر ان الواحد يبقى عنده مليارات، طب على فكرة كل فلاحين مصر بلا استثناء واحد عمرهم في حياتهم ما يجاوبوا على اي سؤال يتسئلوه ولا حتى: تحب تتعشى ايه؟ اشمعنى فلاحين مصر طلعان تلاتين اللي جابوهم وماحدش فيهم عرف يعمل المليارات دي؟
يعني اذا كانت الناس بتدور على سبب منطقي يعرفوا بيه هو ايه اللي خلاه يبقى عنده المليارات احب اقول لهم ان السبب المنطقي ما يصحش يتقال في مدونة محترمة من صاحبة مدونة محترمة بتكتب على كي بورد محترم على كمبيوتر محترم وبيقراها ناس محترمين زي حضارتكوا ماعدا الاستاذ بهيج طبعا اللي مش عارفة اذا كان عارف اني عارفاه ومش عايزة اقول اسمه واسم مدونته اللي مش باعتبها وللا لا؟ وزي ما انا مش باعتب مدونته ياريت ما يشرفنيش تاني ويروح يهيج في حتة تانية وللا هو حيث ان ماحدش بيصرف عليه اليومين دول وماحدش معبر قرعته في الجزمة القديمة فقاعد فاضي لي ومخليني اعمل مودريشن؟ جته نيلة هو واحمد عز في ساعة واحدة