مصر حتبقى حلوة.. ومش عايزين فردوس عبد الحميد في الليلة دي

:)

تصدقوا بالله، في اجواء مباريات كرة القدم الاستفتائية دي انا مبسوطة اخر حاجة

مبسوطة مبسوطة مبسوطة مبسوطة... جدااااااااااااااااااااااااااااااااااااااااا

وان شاء الله، مطمئنة مطمئنة مطمئنة مطمئة، جداااااااااااااااااااااااااااااااااااااااااا

وفخورة فخورة فخورة فخورة، جدااااااااااااااااااااااااااااااااااااااااااااا

- مبسوطة:

عشان ياخويا.. سواق التاكسي، وسواق الميكروباص، والبياع في كشك السجاير، ومنادي العربيات اللي بيركني، والبواب، وبتاع كروت الشحن، اذ فجأتن بيتكلموا كلهم عن الاعلان الدستوري، والتعديلات الدستورية، والبرلمان، والرئاسة، بعد ما كانوا بيتكلموا عن اصابة ابو تريكة، وتشكيل المنتخب، ومشاكل ميدو مع حسن شحاتة، وبقى نجومهم دلوقت يسري فودة وبلال فضل وابراهيم عيسى والبرادعي وسليم العوا وفهمي هويدي وطارق البشري، بعد ما كان نجومهم متعب وبركوتة

:) 

مبسوطة قوي الحمد لله.. عشت لحد ما شفتها.. واخدتهم الجلالة لدرجة ان واحد وقفني في الشارع وقال لي: يا استاذة، انا مألف دستور وعايز اقراهولك.. مش حياخد عشر دقايق

انا باحلم؟ حد يقرصني

- مطمئنة

عشان النتيجة اللي حتطلع حتبقى في مصلحة مصر، للأسباب الآتية:

1- الناس روحها المعنوية مرتفعة جدا، وكلهم عايزين يشاركوا، وكلهم حاسين ان لهم قيمة، وان صوتهم مسئولية، وحيرانين كده ومحتاسين، والحيرة دي معناها احساس فظيع بأن اللي حيقوله حيعمل مستقبل بلد، مش رايح يهلل في الظيطة وخلاص

2- الناس فاتحة التلفزيونات وعمالة تسمع من ده ومن ده، ومش بيشتروا اي حاجة من اي حد، وعندهم حالة تشكك مش بتنيمهم الليل، بس بتنيمني انا مرتاحة، طول ماهم قلقانين ومتشككين كده انا مطمئنة، ومش قابلين اي كلام من اي حد، واي حد يحاول يمارس عليهم سلطة بيطلعوا في مصارينه.. صحيح في ناس نزلت بلطجية وبتوزع فلوس من الفريقين بتوع نعم ولا، اللي هم الوطني والوفد بدون ذكر اسماء، الوطني بينزل بلطجية وبيوزع عشان الناس تقول نعم، والوفد بينزل بلطجية وبيوزع برضه عشان الناس تقول لا، معلش اعذروهم، دي الطريقة اللي يعرفوها ومش عارفين يواكبوا العصر، وصحيح الاخوان بيعلقوا يفط يقولوا فريضة شرعية وبعدين يرجعوا يقولوا: لا مش احنا والله.. واللي بيخليهم يقولوا لا مش احنا ان الناس ما عادتش قابلة حد يكلمها كده تاني، وصحيح فيه قساوسة بتقول رجاء محبة في المسيح تقولوا لا.. بس برضه بيرجعوا في كلامهم عشان الناس ما عادتش قابلة حد يكلمها كده تاني

وانا لا قلقانة من وجبات الوطني والوفد، ولا قلقانة من شرع الله ومحبة المسيح، لأن انا لسه بابرم في الشارع وباتكلم مع الناس، وشايفة ان الناس بتعتبر ان دي طريقة منفرة، وبقت الطريقة دي تستفزهم

ولو سمحتوا، اللي مش متأكد من كلامي، ينزل دلوقت حالا، يلف لفة ويسأل الناس ويتكلم معاهم، وبالتحديد يسأله عن الوجبات والبلطجية وشرع الله ومحبة المسيح واسمع يا عم احلى كلام اللي عمرك ما كنت تتخيل انك حتسمعه ابدا

3- ربنا واخد باله من مصر

والله العظيم تلاتة ربنا واخد باله من مصر ومش حيعمل لها غير الحاجات الحلوة وبس

انا بقى مصدقة مساعد وزير الدفاع الاسرائيلي اللي قال: ثورتا مصر وتونس صنعتا بيد إلهية

ومافيش اي حاجة وحشة حتحصل لمصر ابدا تاني ان شاء الله.. انا شخصيا مش عارفة اتوقع النتيجة ابدا، لأني سألت ناس كتير، قالوا لا، وسألت ناس كتير قالوا نعم

واسباب لا للناس في الشارع كانت ممتازة، مالهاش علاقة بأمراض النخبة اللي خايفة من الأخوان خالص، اغلب الناس في الشارع اللي قالت لا قالت: لو عندي تفاحة بايظة مش حاقعد  اشيل الحتت البايظة عشان اكلها وانا عندي فرصة اني اشتري تفاحة جديدة

واغلب الناس اللي قالوا نعم اسبابهم محترمة جدا ومالهاش اي علاقة بأعداء الله والمادة التانية والهلاوس السمعية والبصرية بتاعة البيانات السلفية، اللي قالوا نعم قالوا باللفظ:

لما يبقى عندي شارع منور عارف حيوديني فين حامشي فيه بدل ما اخرم من شوارع جانبية ويمكن تطلعني على مكان غلط

ده كلام الناس العادية في الشارع، اللي بقالي كام يوم بامشي اسألهم، وكتير منهم مش متعلمين تعليم عالي، وفيه منهم مش متعلمين خالص

اللي قاعد على النت بس بيتشاءم وله حق بصراحة.. حاجة مقرفة: تخوين، وتكفير، وتطاول، واجواء ماتش الجزائر خالص

اللي بينزل الشارع يتكلم مع الناس في احياء مختلفة بيتفاءل.. وانا بادعوكم سيبوا النت شوية - خصوصا الفيس بوك - وانزلوا اتكلموا في الشارع، امشي على رجليك شوية، المشي رياضة

بس عشان خاطر تتفاءل وتطمئن

- فخورة:

انا مش عارفة احنا ما عندناش ثقة في نفسنا ليه؟ بعد كل اللي عملناه ده ولسه شاكين في نفسنا ليه؟ 

لا.. لا مالناش حق ابدا

طب كنا شاكين في نفسنا ايام المجحوم عشان كان كاسر نفسنا وقاهرنا ومحطم معنوياتنا.. لكن علمنا ثورة نزل فيها 20 مليون مواطن باعتراف القوات المسلحة، وقدمنا شهداء، وقدمنا تضحيات، وخلعنا مخلوع، وجبنا مناخير امريكا الارض، بعد ما كانت بتيجي الست هيلاري تدينا اوامر غير قابلة للمراجعة، بقت جاية تتمشى في ميدان التحرير وتقول لنا: ده انا قاسم اخوك يا علي.. بوسة بوسة، وامن الدولة بقى عامل زي الولية اللي غرق دراها، وبعد ما كان بياخد الناس في بحر الظلمات تحول الى عصابات بلطجية هابلة، حتى مش عارفة تبلطج، وكل شوية يتقفشوا والناس تنزل فيهم ضرب لما يبان لهم صاحب، وبقى اخر امن الدولة انه يعاكس في التليفونات ويعمل اكاونتات على الفيس بوك عشان يقول للناس: ده احنا جامدين قوييي.. بعد ما اخدوا علقة ما اخدهاش حرامي في مولد، واسرائيل قاعدة تلف حوالين نفسها وتقول مين اللي جاب القلعة جنب البحر، وبسببنا مسئول ملف الشرق الادنى في السي اي ايه اتحول للتحقيق، وبسببنا، الاتنين المسئولين عن ملف مصر في الموساد اترفدوا، وبسببنا مساعد وزير الدفاع رفع ايديه لفوق وقال حكمتك يا رب، كل ده ولسه مش واثقين في نفسنا وعمالين نقول: لبعدين الناس تتأثر بعبود الزمر، لبعدين الناس تتأثر بيحيى الجمل، لبعدين الناس تتأثر بالأخوان المسلمين، لبعدين الناس تتأثر بأون تي في، لبعدين الحزب الوطني يرجع، لبعدين امريكا تحتل البلد

عيب

عييييييييييييييب

عيييييييييييييييييييييييييييب

كان اولى الناس تتأثر بتامر بتاع غمرة: يوم الخلاص من مييييين.. بلاش السلوجان ده

انا مش عايزاكم تبصوا لنفسكم البصة دي، انا عايزاكم تثقوا في نفسكم اكتر من كده، وتعرفوا ان ربنا معانا وحيسترها معانا ان شاء الله، وتعرفوا اننا عملنا حاجة حلوة، وحنعمل حاجة حلوة، ومصر دي حتبقى قمر، وعروسة

هي مزة اصلا.. اذا كانت ايام المجحوم قعدت تلاتين سنة ما تستحماش وكانت مزة برضه وفيها الطمع واللي رايح واللي جاي يعاكسها وماحدش سايبها في حالها

امال بقى لما حميناها وكيسناها، وبنلبسها فستان الفرح، ولسه بقى حنسرح لها شعرها، دي حتبقى فشر مارلين مونرو

--------

احنا كلنا رايحين الاستفتاء ده ان شاء الله

مش بس حنشارك بعد التكال على الله

كمان حنحمي اللجان بتاعتنا من بلطجية فتحي سرور وصفوت الشريف وزكريا عزمي بعد ان تواترت انباء عن نيتهم في اطلاق بلطجية لافساد الاستفتاء

قد تكون مجرد اشاعات عشان يخوفوا الناس ويبقى نأبهم على شونة، احنا مش بنخاف من حد

وقد تكون حقيقة ويبقى بلطجيتهم جم لقضاهم اساسا... تحالى لحمو يا حبيبي، انا عايزاهم يفضلوا ينزلوا في بلطجيتهم كده لحد ما يخلصوا على ايدينا ويقعدوا هم عريانين

وكلنا حنقبل نتيجة الاستفتاء عشان ده اختيار الشعب المصري ان شاء الله

انا شامة ريحة مش كويسة في بعض نشطاء النت اللي اصلا مش عاجبني خالص وحاسة انهم مش على مستوى الشارع

حاسة انهم ناويين لو النتيجة طلعت مش على مزاجهم انهم يعملوا زي المنتخب المصري لما اتهزم قدام الجزائر ويطلعوا فردوس عبد الحميد تقول قلعوا لنا البنطلونات

اللي حيعمل كده يبقى بيعمل جريمة في حق مصر، وفي حق الشعب المصري

ولازم يتأكد ان الناس مش حتبقى معاه في التصرفات دي.. زمن التسخين بالازاز اللي في تي شيرت محمد فؤاد عدى وولى

احنا كلنا قابلين النتيجة اللي ماحدش لحد اللحظة دي عارف يتوقعها خالص، واستطلاعات الرأي كلها بتيجي متناقضة تناقض فظيع

شايفين استطلاع الرأي ده

<<<<<<<<

ده بيقول ان النتيجة حتبقى لأ

وانا حابقى فرحانة بالنتيجة دي لو طلعت، وعارفة انها حتبقى لصالح مصر، مع اني حاصوت بنعم

وفيه استطلاع رأي تاني في مكان تاني بيقول ان النتيجة حتبقى نعم

وعارفة ان اللي حيصوت بلأ حيبقى فرحان بالنتيجة وعارف انها في صالح مصر

ولا انا، ولا اللي بيصوت بلا عارف النتيجة حتبقى ايه... طب ده ولا حتى القوات المسلحة عارفة النتيجة حتبقى ايه، وكل شوية استطلاعات الرأي اللي هم بيعملوها تطلع لهم بنتيجة عكس اللي قبلها

بس احنا كلنا المفروض نبقى فرحانين :)

انا شخصيا فرحانة قوي قوي قوي قوي قوي قوي قوي قوي... الحمد لله

وعندي ايمان بالله، وثقة في الشعب المصري

اهم حاااااجة: نشارك كلنا

وكل واحد يخلي باله من لجنته كأنها ضناه اللي خلفه