محاولة لإرهاب "الجمهورية" جرت أمس محاولة فاشلة لإرهاب جريدة "الجمهورية" ورئيس تحريرها محمد علي إبراهيم.. تظاهر عدد محدود لخليط متنافر من قوي المعارضة
أمام مبني الجريدة بشارع رمسيس احتجاجاً علي تغطيتها لوفاة الشاب خالد سعيد الذي ابتلع لفافة بانجو وأثبت الطب الشرعي وجود آثار للحشيش ومخدر الترامادول في دمائه..
قاد المتظاهرين أحمد سعد دومه الناشط والمدون وبمشاركة بثينة كامل الإعلامية الشهيرة وعايدة سيف الدولة ذات الميول الشيوعية
وضياء الصاوي المنتمي لحزب العمل المجمد نشاطه والمحسوب علي جبهة مجدي أحمد حسين.. وكان أبرز الإعلاميين من الفضائيات العربية مصطفي كفافي من قناة "الجزيرة" الذي حاول التسجيل مع صحفيين بالجريدة لإظهار التعاطف الشعبي مع خالد سعيد الذي زعم المتظاهرون أن الجمهورية شوهت سمعته لكنهم رفضوا طلبه. عكست الهتافات انفلاتاً خلقياً وترويعاً للصحفيين وأصحاب الفكر
.. ردد المتظاهرون شتائم للصحافة القومية منها "قولوا للسلطة تلم كلابها.. وثورة مصر بأيدي شبابها" و"ياصحافة أمن الدولة.. الصحف القومية عار للديموقراطية".. وندد المتظاهرون بتقرير الطب الشرعي مرددين "لا شرعي ولا طب.. التحليل كدب * كدب".. ورفعوا لافتات تندد بوزير الداخلية وبالقيادة السياسية. (نسيوا يكتبوا الهتاف: عيشوا بشرف جتكوا القرف) استمر تواجد المتظاهرين نحو الساعة. وتردد أنهم سيكررون التظاهر في أماكن أخري هذا الأسبوع بالقاهرة والإسكندرية ضد السلطات والنظام وصحيفة "الجمهورية".. وتعد هذه المظاهرة تحديداً أول مظاهرة للإرهاب الفكري ضد صحيفة مصرية.. الطريف أن مدبري التجمع ينادون بالحرية والديموقراطية والرأي الآخر. لكن يبدو أنهم يريدون أن يقتصر ذلك عليهم دون غيرهم. .
Mesh 3andi 3arabi 3la el gehaz da
matensosh bokra galset el 7okm fi el gedar el sa3a 9 fi el ma7kama el destoria, ana motafa2la ba3d ma el gedar et7'ara2 lamo3'za
امال انا باحبه ليه؟ عشان بيلبس في الحيطة ولا بيهمه.. بصراحة جامدة جدا، الحادثة مشهورة، بس حتى حمقاء زيي تخاف من بلطجية الحويلي اللي دخلوا له وكتبوا له تعليقات يقولوا له انت شيعي كأن شيعي دي شتيمة، بس هو مش بيهمه الحاجات دي، لا وواحد مسأف قوي دخل يقول لهم: لا مش شيعي، الشيعة بيحبوا ابو هريرة وبيكرهوا عمر هههههههههههههه... بس جدع يا ابو خليل اديله ما تريحوش
بمناسبة الجزيرة التي اشترتها شركة يملكها وزيران (أحدهما سابق والآخر حالي ) وبمناسبة تعاقد وزارة مع مؤسسة خاصة يملكها أو أحد شركائه وزير هذه الوزارة، وبمناسبة مسئولين يعملون في البزنس وأولاد مسئولين يبزنسون ويتربحون بالبزنسة مع الدولة شخصيًا، أحب أن أهدي هذه الواقعة للجميع خصوصًا للذين يسافرون منهم للعمرة كل شهر كأنها رحلة إلي مارينا ويحجون لبيت الله الحرام كل عام متخيلين أن الله عز وجل يقبل حجة من مستغل أو مزور أو مدلس أو ظالم أو مبزنس سياسي، لنبدأ:
كان الكل ينتظر ماذا سيحدث، الجميع يرقب هذا المشهد الذي انتظروه طويلا، يا تري ماذا سيجري؟ وكيف سينتهي؟
استدعي الخليفة عمر بن الخطاب -رضي الله عنه- الصحابي أبا هريرة -رضي الله عنه -وكان أبو هريرة وقتها واليًا علي البحرين وفي مشهد رهيب مهيب، حضره عدد قليل من الصحابة جري الحوار التالي في بيت الخليفة عمر أمير المؤمنين:
عمر( غاضبًا) :علمت أني استعملتك (عينتك) علي البحرين وأنت بلا نعلين (عينتك وكنت حافيًا يومها) ثم بلغني أنك ابتعت أفراسًا (خيولاً) بألف وستمائة دينار. أبوهريرة ( في لهجة هادئة ورقيقة): كانت لي أفراس تناجت (أنجبت وتكاثرت ) وعطايا (منح) تلاحقت.
عمر منفعلاً في عنف: حسبت لك رزقك ومؤنتك (حددت لك راتبًا كفاية عليك) وهذا فضل فأده (ما كسبته زيادة لابد أن ترجعها وتعيدها).
أبوهريرة (يقاوم ويتخلي عن الرقة): ليس لك ذلك يا أمير المؤمنين (مش من حقك ومش من سلطتك).
عمر (في حسم وحزم): بلي (حقي طبعًا) ووالله أوجع ظهرك (أضربك).
ثم قام عمر فعلاً وقد بان غضبه واشتدت ثورته وأمسك بالدرة (أداة تشبه العصا أو ربما تكون مثل الكرباج) واقترب خليفة المسلمين من الصحابي الوالي أبي هريرة ثم صعقه بها (ضربه) حتي سال الدم من أبي هريرة أمام الصحابة المذهولين الملتاعين المأخوذين بعمر وقوته وإصراره.
عمر (وقد وصل لذروة الحسم): ائت بها (هاتها فورًا).
أبو هريرة (في ضعف وهزيمة): احتسبها عند الله (استعوض ربنا فيها واتركها لي).
عمر: نعم، ذلك لو أخذتها من حلال وأديتها طائعًا (كنت أتركها لك وأحتسبها عند الله لو كانت حلالاً)، لكن يجبي الناس (يعطونك الفلوس ) لك، لا لله ولا للمسلمين (إنهم يمنحونك المال ويشاركونك في الشغل، لأنك الوالي ويسعون إليك وإلي التقرب منك ) انهض فائت بها !
وما كان من أبي هريرة إلا أن رد لبيت المال كل ما تربح به وحصل عليه في ولايته عند صلاة الصبح واستغفر لأمير المؤمنين (طلب المغفرة من عمر)..
هذا دين عمر بن الخطاب أما ما نعيشه فهو دين الحكام !!
هو عوكل عايز ايه بالظبط واحنا نعملهوله بدل ما البلد عمالة تسقط حتة حتة كده، وقوع البلا ولا انتظاره، نسخطها له قرد؟ نولع له فيها؟ نعمل ايه عشان يحل عنا بدل ما احنا قاعدين كده نتفرج عليها وهي عمالة تفيص مننا
انا كنت اتكلمت عن ان فيه ناس بتفهم ومش بتحس، وفيه ناس بتحس ومش بتفهم، وفيه ناس لا بتفهم ولا بتحس
وكنت اتكلمت عن غباوة المخ وغباوة القلب وقلت ان الاتنين يؤدوا لنفس النتائج، زي ما برضه نباهة المخ تؤدي لخلاصة نباهة القلب مع اختلاف الاليات شوية بس النتيجة النهائية واحدة
بس ما قلتش انا اقصد مين، غير لصحابي بقى، ما قلتش اقصد مين عشان اللي بيحسوا وما بيفهموش ما يزعلوش، لانهم بيحسوا بقى فحيزعلوا
بس انا خلاص مش قادرة مش قادرة مش قادرة بسبب اللي حصل لي امبارح
كان بقالي يومين قافلة الموبايل عشان حاسة اني تشبعت بالاحداث وعايزة افصل طبعا فيه ناس قالوا لي مالك يابنتي واليكم نصوص الحوارات
يلاحظ انه فهم على طول ان الضغط السياسي هو اللي اثر على حياتي الشخصية، ويلاحظ انه فهم وجه التأثير من غير ما اشرح كتير، ويلاحظ ان كل اللي همه اني اخد صور بما اني قلت له بقيت كويسة خلاص يبقى نتكلم في الشغل بقى
-------
حوار مع صديق تاني اسلامي:
ايه يا نونو؟ خضيتنا عليك
- كان عندي اكتئاب
اكتئاب؟ ليه؟ قولي لي مين اللي زعلك وانا اطلع لك عينه.. اكيد فيه حد زعلك، انا عارف الاشكال الوسخة اللي حوالينا
------
يلاحظ ان قلبه حنين جدا والله، وقال لي يا نونو، مش يا جميل اللي تحسسك انها بتتقال لكل الناس، وفعلا مخضوض عليا لانه اتصل كتير، ومتعاطف جدا، لدرجة انه عايز يروح يتخانق مع اشخاص مالهمش وجود بفرض انهم زعلوني من غير ما يفهم انا مالي، مع ان مافيش حد زعلني وبقالي مدة طويلة مش باتعامل مع اشكال وسخة وقفل معايا وهو لسه مش فاهم انا كنت مكتئبة من ايه، بس متعاطف جدا وكل شوية يسأل عليا
-----
واكيد ماليش صحاب ليبراليين، واكيد لو ليا مش حاتكلم معاهم في حاجة لاني اي حاجة حاقولها حيقولوا لي: وقعتي بيان التغيير؟ لو وقعتي مش حتكتئبي
بس انا عندي تلاتة صحابي بيفهموا وبيحسوا... كل شوية اقول لهم اوعوا تموتوا
فنون ومالك وغادة جبر
طب والله تلاتة بيفهموا ويحسوا في الزمن ده كتير يعني، ربنا يخليهم والنبي يا رب
جرنال الجاموسية مغيب عن الواقع تماما، اسمععععع علك تستفيد:
درس قاس من الإسكندرانية لجمعية التغيير مسرح عرائس البرادعي سقط بالثلاثة
فتيات جميلة وبثينة أفسدن صلاة الجمعة
(ههههههههههههه دي جامدة اخر حاجة)
مدير الوكالة السابق ونافعة ونور تركوا أنصارهم في الحر لتناول الغداء في مطعم فاخر الإخوان هربوا من المهزلة.. وحقائق مفزعة حول أسرة القتيل الاسكندرية - كريم صلاح: أعطي السكندريون درسا قاسيا للبرادعي وأنصاره من جمعية التغيير بغيابهم عن المسرحية السياسية التي أعدها مع رفاقه بمسجد سيدي جابر حيث كان يروج أن الملايين سوف يكونون في انتظاره ولم يزد عدد من انتظره علي 400 شخص. كما كشف غياب الإخوان عن ساحة المسجد وحضور عدد لا يزيد علي 100 منهم عن الموقف الحقيقي للبرادعي في الشارع ولم يتجاوز عدد الذين تجمعوا لاستقباله 400 نصفهم من حركة 6 أبريل والغد الذين حضروا من القاهرة مع أيمن نور والبرادعي للتغطية علي خفوت الاستقبال. وقد تحولت صلاة الجمعة إلي هرج ومرج بفعل أنصار الجمعية الوطنية للتغيير حيث تجمعت فتيات جميلة اسماعيل وبثينة كامل بمدخل المسجد ومنعن المصلين من الدخول ووزعن منشورات الحركة وطالبن بعقد لقاءات تليفزيونية للحديث عن خالد سعيد.
اعتلي شباب الحركة سور المسجد مطالبين بسرعة انهاء الصلاة.. وفي داخل المسجد لم يكن الأمر مختلفا حيث فوجيء المصلون بأحد أنصار الحركة يحاول أن يصعد المنبر لولا أن المصلين تصدوا له.
وبعد الصلاة انطلقت الهتافات التحريضية لأنصار جمعية التغيير والغد و6 أبريل ولم يستمعوا لنداء إمام المسجد بتأجيل الهتافات لدقائق احتراما لجنازة كانت بالمسجد ورفض أعضاء الحركة طلبه وانطلقوا في هتافهم حتي خرج من المسجد أبطال مسرحية العرائس السياسية أيمن نور وحسن نافعة وأسامة الغزالي حرب وحمدين صباحي وصابر أبو الفتوح يرفعون أيديهم لأعلي في حركة مسرحية يؤديها الممثلون عند تحية الجمهور وعلي مسافة قريبة كان في انتظارهم أبو العز الحريري الذي حرص علي الظهور علي خشبة المسرح بالهتاف ضد النظام ولم تستمر الوقفة أكثر من نصف ساعة ولم يتصد الأمن للمتظاهرين وتركهم في حرية كاملة. ووسط التزاحم من أعضاء الحركة حول أبطال المسرحية خرج الدكتور البرادعي من المسجد بسرعة ليخترق الكردون الأمني دون أن يرد التحية علي أنصاره وتوجه إلي مطعم جانجل بسيارته المرسيدس الفارهة ليتناول غداءه مع أبطال المسرح العبثي. تاركين شباب الحركة تحت حرارة الشمس الشديدة يطلقون الهتافات المدربين عليها وهم يرفعون صور قتيل البانجو خالد سعيد. ووسط الزحام ظهرت جميلة اسماعيل التي أعلنت أمام كاميرات التليفزيون ان تقرير اللجنة الثلاثية التي شكلها النائب العام لاعادة تشريح جثة خالد سعيد وانتهي إلي أن الوفاة بسبب ابتلاعه لفافة بانجو لا يخصهم وانهم سيضعونه في سلة المهملات في تحد غريب لسلطة القانون واجراءاته مدعية انهم يشكلون لجنة ثلاثية أخري من أطباء من خارج مصلحة الطب الشرعي لتشريح الجثة. أعلن أيمن نور لعدد من أنصاره علي كافتيريا بمنطقة استانلي انه يقوم بتجميع مبلغ 120 ألف جنيه لاعطائها لأحد الأطباء الشرعيين الذين خرجوا للمعاش لاعداد تقرير مغاير لتقرير الدكتور السباعي. كان البرادعي قد توجه لمنزل أسرة خالد سعيد بكليوباترا حيث قدم تعازيه وكشفت تلك الخطوة منه والاهتمام الأمريكي بالقضية معلومات جديدة حول أسرة خالد سعيد وهي ان شقيقه أحمد الذي سافر إلي أمريكا منذ سنوات كان قد تنازل عن جنسيته المصرية ليحصل علي الجنسية الأمريكية وأصبح اسمه اليكسندر ستيفان وعندما حاول خالد سعيد السفر له غير اسمه أيضا إلي خالد استيفان وسجله في ادارة الهجرة الأمريكية. الغريب ان أعضاء الجماعة المحظورة وقفوا خلف تلك القضية الكاذبة الخاصة بوفاة خالد سعيد برغم علمهم بجنسية شقيقه وتنازله عن الجنسية المصرية
اخصصصصصصصصصصصصصصصصص
خالد سعيد طلع مسيحي؟ واسمه استيفان روستي؟ ضريب بانجو وترامدول ومسيحي والنسوان بتحبه وبتعطل الرجالة عن الصلاة عشانه؟ ايه يعني؟ نلحق نقفل على السيرة قبل ما يطلعوه شيعي وشاذ وبتاع نسوان وعيال ومالوش في النسوان وبهائي وشيوعي وعنده ايدز؟ .
واقروا الفاتحة لابو العباس يا اسكندرية يا اجدع ناس
تحديث: هتافي المفضل
تحديث: يا رووووووحييييي.. ايه العسل ده.. الحزب الوطني عمل مسيرة موازية وواخد معاه عربية اسعاف والنبي والنبي تتفرجوا.. حلوة قوي، وجايبين معاهم عربية عروسة مزوقينها ببوكيه ورد عثل عثل عثل جميلة ياختي
طب بقى نصيحة لوجه الله عشان برضه احنا بينا عشرة واخوة وعيش وملح، ما تعملوش كده تاني عشان ما تضحكوش عليكوا الناس بقى دي مظاهر تتحط قدام دي
انتوا فاكرين الثورة حتقوم من غيري؟ اهي محاولتكوا فشلت اهي
ده فيديو على الفيس بوك ومحمد توفيق جاب لي فيديو من اليوتيوب
ما عرفتش اكتب حاجة امبارح عشان كنت راجعة تعبانة وبعدين لما رجعت سمعت كلام زي الطين ضايقني فدخلت اتقلبت نمت
الشهادة لله انا ما كنتش متوقعة ابدا ان مظاهرة امبارح تنجح ولا تتم خالص، كنت فاكرة انها حيحصل فيها زي اللي حصل ايام مظاهرة التعديلات الدستورية اللي سببت لي صدمة عصبية مش قادرة انساها، بس قلت حانزل برضه، وطبعا لاني لخمة وموكوسة بطبعي قعدت احاول القح جتتي على اي حد يسحبني في ايده:
مالك تاخدني معاك المظاهرة؟
لا...
حسام تاخدني معاك المظاهرة
انا مش رايح
يا جماعة حد ياخدني معاه المظاهرة
ماحدش رضي يعبرني عشان عارفين اني حالخمهم في المظاهرة وانا اصلا لخماهم في حياتهم كلها، مافيش غير سلمى سعيد حبيبتي اللي بحماس شديد قالت لي تعالي معايا يا نونة، بس ما اعرفش مين ابن ال... اللي وشى بيا عندها وخلاها تتهرب مني في اخر لحظة
جمال عيد قال لي عدي عليا في المكتب وانا اخدك المظاهرة، الوقت اتأخر ما لحقتش اروح له المكتب وقعدت الف في ميدان التحرير
كلمت عايدة سيف الدولة وفهمت منها انهم في قصر النيل قلت لها استنوني قام سبحان الله قالت لي في وشي كده: لا مش حنستناكي!
ايه المعاملة دي؟ المهم محمد واكد اخد منها التليفون وقال لي: لا... حنستناكي... تعالي ياللا
في اخر لحظة المكان اتغير لان جيش عرمرم كان في ميدان التحرير قدام كنتاكي والميدان متقفل خالص كأن اسرائيل حتحاربنا
احنا مشينا لحد ما وصلنا عند الشارع اللي كان فيه جرنال البديل زمان، واروى مرعي بتكلمني وتقول لي انتوا فين؟ قال بتسألني انا احنا فين على اساس انا اللي حاشرح لها الشوارع، قلت لها: احنا هنا... ماشيين في شارع كده
وطبعا البنت فضلت تعافر عشان تعرف توصل لنا
انا بانصحها نصيحة اخوية لوجه الله... تدور لها على مرشد غيري، هي مش شايفة من كتر وكستي الناس بتتهرب مني ازاي؟
وصلنا عند الشارع ده قام لقينا بتاع تلاتين اربعين واحد متجمعين ورحنا فجأة مشينا في مسيرة الناس تسمع يسقط يسقط حسني مبارك وتنضم في الاول الامن حاول يجري ورانا واحنا في الشارع بس الحمد لله العدد كان بيزيد فلقوا نفسهم مش عارفين يسيطروا، مشينا من شارع لشارع تاني مش عارفة اسمه، بس حتى بالامارة عدينا على قهوة البورصة، ومشينا في شارع تاني، وبعدين قالوا تعالوا ندخل من الشارع ده، كان شارع جانبي، تقريبا قالوا لي ده باب اللوق او حاجة زي كده، بس ناس المجموع مشي في شارع تاني وقالوا لي ان ده شارع شريف، المهم كان غلط نمشي في شارع شريف ده عشان بيوصل على ميدان التحرير حيث الثكنات لو كنا كملنا في الشارع التاني اللي على جنب مش اللي على طول كانت المسيرة بقت اطول واكبر، بس عموما انا كنت مبسوطة قوي
المسيرة ابتدت تلاتين اربعين خلصت وهي حوالي خمسمية ستمية
ما كانش زمان الناس بتنضم كده
الامن قفل علينا شارع شريف ونزل ضرب في العيال وقبض عليهم وسمعنا صوت بنت بتصوت وبعدين مشينا من شارع شريف ده وبقينا نجري لحد ما وصلنا لحتة انا عارفاها دي.. اسمها شارع الشواربي
كل ده واروى مرعي بتحاول توصل لنا وكل ما تمشي في حتة يضربوها
اتضربت كتير قوي ومافيش فايدة عندها اصرار تيجي برضه.. البت دي بميت راجل على فكرة، ومن غير صياح ولا باللو، بهدوء شديد كده واللي يشوفها يفتكرها الكتكوت المفترس ما توحيش ابدا بشدة البأس دي
المهم لما سلمى شتمت الظابط خفنا عليها لان الراجل عرف وشها وبقينا خايفين يحطها في دماغه، قلنا لها يا سلمى ما تمشيش لوحدك
كل ما نمشي دي تعمل زي البطة اللي لسه فاقسة وتروح سارحة بعيد لوحدها، واروح اسحبها من ايدها: يا سلمى ما تمشيش لوحدك لو سمحت
ومالك كل شوية يكلمني.. طب ما كان ييجي معايا، عمري ما حاسامحه ابدا عشان خلا شكلي عار على التويتر وانا باترجاه ياخدني معاه وهو قالبني، بس هو عموما قعد في مركز هشام مبارك يلم اسماء المعتقلين وبعدين جالنا على النقابة بعد كده
الاول قلنا حنروح على مركز هشام مبارك، جينا نروح على هشام مبارك قام واكد واحنا معديين قال فيه حاجة دار القضاء العالي اهي
رحنا ما لقيناش حد، بس المدرعات اوهمتنا ان فيه وقفة هناك
كان عددنا قليل بتاع خمستاشر واحد وللا حاجة، والعيال كانوا حيتخانقوا مع الحرس بتاع دار القضاء عشان عايزين يمشونا
المهم لقينا صعوبة في اننا نعمل وقفة عن القضاء العالي بعددنا القليل ده وبقينا نتصل ببعض عشان نلم بعض على نقابة الصحفيين واحنا ماشيين لنقابة الصحفيين مشي جنبي لزق مخبر طول بعرض لابس ازرق زي الكشافة وعمال يتصنت عليا وانا باتكلم في التليفون وكان ناقص يلزق ودنه في التليفون زي المخبر اللي كان ماشي جنبي انا وعبد الرحمن فارس قبل كده وعايدة بتكلمني في التليفون: انتوا رايحين فين
وده لازق ودنه وبيلمع اكر
طبعا قلت لها انا مروحة حاقول لها انا رايحة النقابة؟ لا ما انا ناصحة يعني، هو صحيح فضل ماشي ورانا لحد ما شافنا رايحين النقابة بس انا حبيت اعمل تمويه، انا دايما باعمل تمويه وبانصح غيري بالتمويه في التليفونات المتراقبة، على التليفون وش كده: ما تبقاش تبين ان معاك تليفون وابقى خبيه عشان تعرف تكلمنا لو اتقبض عليك.. اعمل زي فلان، ماهو بيعمل كده.... لحد ما الناس تقفل السكة في وشي بعد ما يقولوا لي: ده كلام يتقال في التليفون ده؟ طب اعمل ايه طاه؟ ما انا عايزة اوصل لهم معلومة حاوصلها على النت وللا على التليفون وللا وانا ماشية معاهم في الشارع والمخبر جنبي؟ مافيش غير اني ازنقهم واحد واحد في الحمام عشان اقولهم اللي عايزاه.. وللا مراقبين الحمامات كمان؟
رحنا على النقابة لقيناهم مقفلين النقابة فهتفنا برة الكوردون راحوا فاتحين لنا بسرعة عشان يدخلونا
المرة دي العيال ما حدش فيهم كان خايف، الكل كان غضبان خصوصا انهم ضربوا ناس كتير، ضربوهم وهم شايلين صورة خالد سعيد وهو متشوه، الظاهر احساسهم ان دي بجاحة ما بعدها بجاحة خلاهم يقولوا وان شالله يموتونا زي خالد سعيد
لما كنا وصلنا النقابة كان عددنا زاد شوية، بتاع تلاتين واحد، هوب هوب بقينا حوالي تلتمية ربعمية وفضلنا قاعدين معتصمين عشان يفرجوا عن اللي قبضوا عليهم
فيه ناس ما كانتش في المسيرة جات وناس من اللي كانوا في المسيرة اتفرقوا، بس لاول مرة عدد الناس اللي في المسيرة يبقى اكبر من عدد الناس اللي على سلم النقابة
بالرغم من زعلي على الناس اللي انضربت، بس انا فرحانة باليوم بتاع امبارح قوي
طبعا انا جربوعة ولما الدنيا ليلت والعيال ما خرجتش لسه قلت لهم: هيييييه حنباااااات... صح؟ صح؟ حنبات على السلم؟
كل الناس احولوا كده في وشي وامل رمسيس قالت لي: انا كنت فاكراكي مناضلة طلعتي عندك مشاكل في البيت ومش عارفة تطفشي
بس طبعا ماحدش ساندني في فكرة نومة الشارع دي غير محمد واكد مجيبا: طبعا لو ما خرجوش حنبات.. هي دي محتاجة مناقشة؟
العيال بقوا يتصلوا بينا ويقولوا لنا انهم رموهم على الدائري بعد ما اخدوا كل فلوسهم وبطاقات بعضهم بلغت كمال خليل في ساعتها فراح باصص للظباط وقال لهم: عيشوا بشرف جاتكوا القرف هههههههههههههه
الا صحيح ياخدوا فلوسهم ليه يعني؟
لقينا واحد جاي في المظاهرة معاه صورة على الموبايل لواحد اسمه هاني خيري متعذب تعذيب السنين ومصورين ضهره لدرجة ان عايدة سيف اللي ما بتشوفش في حياتها غير التعذيب اتفزعت لما شافت الصورة
بيسان كساب اخدت الصورة واخدت نمرة هاني وان شاء الله بقى ينزلوها في الدستور
للاسف بقى كلهم خرجوا وما عرفناش نبات :)) ياللا الجايات اكتر من الرايحات ان شاء الله
بس على فكرة.. الجايات فعلا اكتر من الرايحات
الغريبة ان التغطيات ما كانتش كويسة قوي
اون تي في بس غطت كويس قوي على حسب ما سمعت ما شفتش، سمعت من الناس اللي جات في الوقفة على سلم النقابة ان الجزيرة غطت وحش، اتصلت بسمير عمر قام اتنرفز عليا وقال لي انا عامل تقرير طويل وطلعت على الهوا
النهاردة اظن الصحف ما لحقتش تنزل كل حاجة، يمكن ينزلوا بكره
يارب يكون حد من العيال صور المسيرة، كانت كبيرة وحلوة وناس كتير عادية من الشارع انضمت وما كانوش خايفين
وعلى فكرة بقى على فكرة، احب اقول لكل الناس اللي تهربت مني زي ما بيتهربوا من الديانة وما رضيوش ياخدوني للمظاهرة خصوصا مالك اللي قعد ينظر لي عشان يتهرب مني: انا مش احسن واحد تروحي معاه المظاهرة.. وحسسني اني خانقاه في حياته، اني صحيح لبخت محمد وكل ما يحاول ينتحر اصوت: يا لهوي انت حتسيبني؟ بس لولا كده كان اتعجن واتقبض عليه زي كل مرة، والمرة دي بقى كانوا بياخدوا الفلوس والبطاقات يعني حرقة قلب... ساعات بيبقى ليا منفعة، هو زهق شوية :) بس عمل الخير قعد له في عينه وعافيته ورجع البيت سليم يعني عندي ملحوسة رفيعة الا احنا ما نشبهش المعارصة الايرانية اللي عملوا لنا عليها باللو وحدوتة؟ الا ما شفت السي ان ان ولا البي بي سي ولا اي حد اهتم بينا زي ما كانوا مهتمين بالمعارصة الايرانية اللي كنا كل ما نكلمهم على التويتر يقولوا لنا يا عرب يا جرابيع
انا مش عارفة اكتب التعبير ده في اي جرنال، كل ما اكتب "النزر اليسير" في اي جرنال، حتى في الدستور اللي فيها مصححين كويسين، يروحوا مغيرينها الى "النذر اليسير" النذر جاية من انذار
ده على اساس ان ظباط الداخلية ما بيفوتوش فرض؟ واللي قتله بالطريقة دي بقى كان بيحمي المجتمع من الحشاشين؟ ده انا لما شفت جثته افتكرته من الفلسطينيين اللي ماتوا بالفسفور، دي ايدين بني ادمين عادية اللي عملت فيه كده؟
فيه جريمة ابشع من جريمة قتل خالد سعيد بالطريقة دي، جريمة تبرير الجريمة
محاولة اقناع الناس بانه يستاهل يموت كده عشان كان مجرم والصاق التهم بيه، مش بس تشويه لانسان بريء مات بالظلم
ده تشويه لنفسية الناس، لان الناس حتبقى على فريقين، يا اما يقولوا حتى لو مجرم ما يستاهلش، يا اما ناس تقول ماهو كان مجرم وما يستاهلش نزعل عليه
دي جريمة.. دي جريمة في حق المجتمع وحق الانسانية وبقالهم سنين بيعملوا فينا كده لحد ما تحولنا الى شعب من الحلاليف ماعندوش دم ولا احساس ولا مشاعر كله بسببهم كله بسببهم
كله بسببهم
عمرنا ما كنا كده عمرنا ما كنا بالقسوة دي
بس اعتماد تبرير الجرائم دي والزن على دماغ الناس بيها ومحاولة انهم يمنطقوا كل السفالات اللي بيعملوها هو اللي وصل الناس انها تبقى غليظة الحس وقاسية عمالين يغذوا الناس بحقارة حقارة حقارة عشان ينزعوا من قلوبنا الرحمة ويحولونا لكائنات حقيرة زيهم
للاسف مافيش قانون يعاقب على جريمة تبرير الجريمة
بس انا بقى شايفة ان تبرير الجريمة اوحش من الجريمة نفسها ويستحق عقوبة ضعف العقوبة على الجريمة
لو حد من صحابي بقى رئيس جمهورية حاخليه يطلع قانون على الموضوع ده جنازة الشهيد خالد سعيد.. اطلبوا له الرحمة:
تحديث: طلعوا كلهم الحمد لله حسام الحملاوي الشرطة كسرت له مشط رجله لما حاولوا ياخدوا منه الكاميرا وهو قاوح معاهم :(( تحديث: مالك عدلي ومالك مصطفى ومحمد واكد اتقبض عليهم انا نازلة رايحة لهم تحديث: علي حسن زيتون من ضمن المقبوض عليهم تحديث: اسماء جديدة لمن قبض عليهم: حازم نصار هاني الجمل هاني الحسيني شادي هاني الحسيني فيه ناس راحت ميدان التحرير، وفيه مظاهرات في الشوارع الجانبية ------- سماح اسحاق اتاخدت من طلعت حرب وانضربت واغمى عليها من الضرب وهي في المستشفى ومش عارفين اسم المستشفى فيه حداشر متظاهر اتقبض عليهم من المظاهرة اللي قدام لاظوغلي، الاسماء اللي وصلتني لحد دلوقت:
عمرو عز وعمرو علي احمد عيد احمد بدوي عمر الهادي الامن مش بيضرب وواضح ان فيه تعليمات ان ماحدش ينضرب، طب امال ازاي العيال اتخطفوا من وسط المظاهرة كده واستسلموا والناس سابتهم يتقبض عليهم؟ المظاهرة حوالي 200 الى 250 والامن كردن عليهم بحيث يقسمهم الى تلاتة ايمن نور جات له ازمة قلبية ومشي ولسه لو فيه حاجة تانية حاقول لكوا عليها
توجهت أمس القافلة التي نظمتها القوى السياسية المصرية للمساهمة فى جهود إنهاء الحصار المفروض على القطاع منذ عام ٢٠٠٧ متوجهة لمعبر رفح في التاسعة من صباح الجمعة ١١-٦-٢٠١٠. وشارك في هذه القافلة ما يقرب من ٣١٠ أشخاص من الطلبة والعمال والشخصيات العامة والصحافيين والنشطاء الذين حملوا معهم معونات رمزية حُرِم القطاع منها بسبب الحصار الاسرائيلى وامتناع مصر، بدورها، عن إدخال هذه المعونات. كما شاركت في تنظيمها كل الجهات المصرية التي تعمل في مجال دعم القضية الفلسطينية من أحزاب ومنظمات سياسية وجهات نقابية.
وأتى تحركنا هذا فى أعقاب قرار مصر الذى صدر يوم ١ يونيو ٢٠١٠ بـ"فتح معبر رفح" إلى "أجل غير مسمى"، و هو القرار الذى إن طُبِق كما روج له الإعلام لانتهى حصار غزة ومعاناة أهلها بشكل شبه كامل وفوري، وهذا ما دفع بعض الصحف الرسمية لوصفه بـ"ضربة معلم." وكنا نظن أن معبر رفح هو المنفذ الوحيد لقطاع غزة (أو لأكثر من مليون ونصف فلسطيني) إلى العالم الخارجى الذي لا يخضع لتحكم الكيان الصهيوني المباشر، وذلك لأنه المعبر الوحيد الذى يقع على الحدود المباشرة بين مصر وقطاع غزة. وكنا نظن أن القاهرة تملك قرارها وحقها فى ممارسة كافة أعمال السيادة على أراضيها وحدودها التي طالما تغنت بها في مواجهة الفلسطينيين، وعليه تستطيع رفع الحصار عن غزة، إن أرادت ذلك.
لكننا فوجئنا عندما وصلنا إلى معبر رفح بسلطات الأمن المصرية تمنعنا من العبور، وتعللت في ذلك بأكثر من سبب إجرائي غير حقيقي في بادئ الأمر مما دفعنا للاعتصام أمام المعبر حتى ظهر السبت ١٢-٦-٢٠١٠. ثم أخبرتنا هذه السلطات في نهاية الأمر أن سبب رفضها لعبورنا إلى غزة هو عدم حصولها على موافقة سلطات الكيان الصهيوني، وقبلها كانت قد منعت قوافل غذائية وأخرى تحمل مواد بناء يحتاجها القطاع بشدة من دخول من معبر رفح وحجزتها في مدينة العريش وأصرت على دخولها من معبر العوجة الخاضع للسيطرة الصهيونية (ورأينا آخر هذه القوافل الغذائية وهي تمنع في نفس اليوم الذي منعنا فيه؛ ١٢-٦-٢٠١٠).
وهو ما أكد للجميع أن الطرف الحقيقي الذي ما زال يتحكم في معبر رفح هو الكيان الصهيوني وبتنسيق كامل مع السلطات المصرية وذلك بموجب الاتفاقية شبه السرية الموقعة بينهما في أول سبتمبر ٢٠١٠ والمعروفة باسم "اتفاق فيلادليفي". والذي عقد بغرض فرض الحصار والرقابة الأمنية الصارمة على الحدود المصرية مع غزة بما فيها معبر رفح وهدفه الأول والوحيد هو حماية أمن الكيان الصهيوني.
ونؤكد على أن معبر رفح لم يفتح بل هو مغلق في وجه المواد الغذائية والإغاثية ومواد البناء وفي وجه الفلسطينييين عدا الحالات المرضية الحرجة والحالات الإنسانية وهو بالطبع مغلق في وجه المواطنيين العاديين من المصريين والعرب وباقي شعوب العالم ولا يفتح إلا للشخصيات الإعلامية الهامة ثم يغلق بعد أن ترحل الكاميرا ووسائل الإعلام.
ونعلن أن ما حدث إنما يزيدنا إصرارا علي كسر الحصار وفتح المعبر فتحا دائما من أجل إسقاط اتفاقية فيلاديلفي وكل اتفاقيات كامب ديفيد ونطالب بتوقيع اتفاقيات معابر مصرية فلسطينية مستقلة عن الولايات المتحدة وعن العدو الصهيوني.
إن ما يشاع عن فتح معبر رفح غير صحيح وما يتم تصويره من بضائع وأفراد وهم يتحركون عبر ما المعبر ليس أكثر من تمثيلية من إخراج صهيوني هدفها هو تنفيس الرأي العام.
القافلة الشعبية المصرية لكسر الحصار المفروض على غزة
بس باختصار كده، انا لسه راجعة من قافلة فك الحصار عن غزة بعد ما بتنا ليلة قصاد المعبر على الاسفلت (مش عارفة ليه الاسفلت سخن والجو برد؟) في الاول قالوا لنا حماس يوم الجمعة بيجيلها الاولاد ومراتاتهم يتغدوا عندها وبتقول لكوا عدوا علينا في يوم تاني ما يكونش جمعة
تاني يوم ظابط قال للمفاوضين من القافلة ان اسرائيل مش موافقة على دخولنا وبصراحة بقى هو ده اللي حايشهم
طب اسرائيل تعرفنا احنا منين عشان توافق وللا ترفض؟ واشمعنى وافقت على الجزائريين واليونان واي حد الا المصريين يعني؟ بينها وبينا ايه؟
وإذ بي أفوجأ ياخويا ان منى الشاذلي طالعة تقول منعوهم عشان التصريحات
تصريحات ايه؟ احنا ناس رحنا لا بينا ولا علينا على اساس ان المعبر مفتوح لقينا نفسنا نايمين على الرصيف وبعدين رجعنا بخفي حنين
تصاريح ايه اللي طلبوها منا؟ اعدم بن اليعازر ان كان فاتحونا في اي من الكلام دهون يعني
المهم انا في حالة خرف كامل بعد يومين لا اكل ولا نوم.. نتكلم بالليل نتكلم بالليل
تركيا وإيران تحالفوا ونازلين هبد في الاكراد ليه؟ يبقى لهم عين هم الاتنين ازاي يلوموا على اسرائيل ويصفوها بعدم الانسانية وهم بيعملوا في الاكراد اللي اسرائيل بتعمله في الفلسطينيين؟ يرضي مين ده كل يوم على الله الاكراد يضربوا كده؟ وحجة حزب العمال الكردستاني دي زي حجة حماس
اللي بيموتوا مش حزب العمال الكردستاني، اللي بيموتوا اطفال ومدنيين وابرياء
انا مش شماتة ولا مهللاتية زي ايتام الديمقراطية الامريكية ودلاديل الحزب الوطني
دي نصيحة محب
"يا أيها الذين آمنوا لم تقولون مالا تفعلون، كبر مقتا عند الله أن تقولوا مالا تفعلون"
تركيا وايران يتقوا الله في الاكراد، على الاقل عشان يبقى لهم مصداقية لما يتصدوا لاسرائيل
الحمد لله الموضوع طلع مش اكتر من خناقة بين راجل ومراته وواضح انه اتصلح اخر حاجة، عشان فيه صحفية امبارح كلمتني وقالت لي انها كانت راكبة المترو وعيل صغير طلع وقعد يوزع ورقة عليها تردد قناة الياغمة الجديد ومكتوب عليها: قناة الرحمة باقية
ياااااااااااااااااااااااه هم وانزاح
انا كنت باعاني من فكرة اني حييجي يوم واضطر اتضامن مع محمد حساد
بس بسم الله ما شاء الله يعني ده صلح بحمل كمان... توزيع منشورات واستغلال اطفال كمان في المترو؟ اه يا امن ... وللا بلاش عشان امي بتقرا المدونة، ابقى اقولها لهم على التويتر
وده لو كان بيان البرادعي كان زمان الواد ده اتلم في الاحداث وكل ركاب العربية الحريمي معمول لهم قضية دعارة
ما انا عارفة انهم فوق ان لهم اجندة معينة تبع اللي بيدفع قلالات الذوق وجلياطين وشبعة من بعد جوعة
ما قلت لكوا انا الكلام ده
حسام الحملاوي قدم استقالته من المصري اليوم بعد ما عمل لهم موقع المصري اليوم الانجليزي من اول: استعنا ع الشقا بالله لحد ما بقت الناس تقرا النسخة الانجليزي وما تقراش العربي عشان النسخة الانجليزي مهنية اكتر
الشهادة لله اول ما عرفت ان حسام استقال خمنت انهم عملوا معاه اللي عملوه مع امي، يعني اتدخلوا في شغله او زي ما عملوا مع امي ما نشروش مقالها تيجي تتصل باي حد ما يردش عليها لدرجة السويتش يقول لها الناس كلها مشيت :)) كأنها رافعة عليهم قضية نفقة
وبصراحة بقى سكت زي ما سكت على اللي حصل مع امي عشان انا شايفاهم يستاهلوا، ما ده صلاح دياب، وكولن باول حاطط لهم وديعة، وكل شوية يغيروا في سياسة الجرنال على حسب اللي بينقطهم، واللي بتعملوه ده غلط
مثلا امبارح ام زينب قالت كلمة مهمة قوي يا ريت الناس النضيفة تحطها حلقة في ودنها: المصري اليوم كويسة، والاستاذة بتكتب فيها، لو ما كانتش تعرف انهم ناس نضيفة ما كانتش كتبت عندهم
عرفتوا بقى؟ عرفتوا بقى نظرية: مش مهم باكتب فين المهم باكتب ايه.. دي نظرية فاشلة؟ انتوا بتدوا سمعة كويسة لناس ما تستاهلهاش
حد كان متوقع اي خير من انتخابات مجلس الشورى؟ ده ايه السذاجة دي؟
اقول؟
اللي راح سافر وقعد شهر برة ده... مش احنا كنا اولى بالشهر ده يقعد هنا ويحشد الناس قبل الانتخابات ويعمل اي حاجة؟ انشالله يحاول يحشد مراقبة شعبية على الانتخابات، يقترح علينا نهبب ايه في الانتخابات؟ مش لو كان قاعد وعمال يشحن في الناس كان زمان الانتخابات دي هيصة وبوليكة وفضيحة عالمية بدل ما احنا قاعدين كده اتخيطنا وماحدش حاسس بينا؟
حنعمل ايه احنا دلوقت؟ حيسافر شهر قبل انتخابات مجلس الشعب؟
انا حاسة ان في اشتغالة، يعني اذا انتخابات مجلس الشورى راحت مننا حتى من غير ما نعمل عليها هلولة لان طبيعي اي هلولة حتتعمل عليها الناس حتضحك... حتقول امال كنتوا متوقعين ايه؟ ما لو كان واقف جنبنا كنا نتوقع، على الاقل نتوقع مظاهرات
البي بي سي، والاندبندنت، والسي ان ان متبنيين موقف وسائل الاعلام الاسرائيلية واللي هي يعني اعلام متخلف الى ابعد الحدود
كاتبين يقولوا الضحايا ضربوا الكوماندوز واعتدوا عليهم
وعشان تعرفوا ان الشعوب زي ما احمد شوقي قال عليهم في "مصرع كيلوباترا": ياله من ببغاء عقله في اذنيه
الناس اللي بتعلق على المواقع دي عمالة تقول وتكرر وراهم الكلام
الحمد لله يارب الحمد لله يارب، عشان اللي شمتوا فينا لما كنا بنكرر ورا وسائل الاعلام من غير ما نعقل الكلام
اهو كل الناس كده اهو
فيه حاجة اسمها قوات كوماندوز خاصة تعمل انزال على سفينة مساعدات وتقول اعتدوا على قوات الكوماندوز؟
ايه الجملة اساسا؟ هم مش مكسوفين يكتبوا الكلام ده؟ واسرائيل دي مش مكسوفة تنزل فيديوهات للعيال وهم بيحدفوها بالنبل ويضربوها بالعصي وهم نازلين عليهم في مياه دولية؟ امال يعملوا ايه؟
طب ما احنا لما الامن بيهجم علينا بنضربه
يقوموا يموتونا؟
واذا كانت البي بي سي والسي ان ان بجلالة قدرها والاندبندنت شايفين ان ضرب الكوماندوز المسلح اللي هجم على الناس بعد ما اخترق مياه دولية مبرر كافي لقتل عشرين شخص منهم خمس ستات
على كده ده نجاد ملاك لا ينقصه الجناحين كمان
ماهو كانت حجته انهم حرقوا البلد وكسروها وضربوا الباسيج وقتلوا عشرين واحد منهم كمان
طب ده انا اللي نجاد صعبان عليا مش شايفة ان ده عذر ولا مبرر عشان الباسيج تقتل 72 متظاهر غير مسلحين
انتوا بتلخبطونا ليه؟ يعني ضرب القوات مبرر للقتل يا سي ان ان انت والبي بي سي؟
طيب قولوا كده بقى
ومن حق القوات انها تخترق مياه دولية وهي مسلحة بدعوى انها بتحمي نفسها؟
طب قولوا كده بقى
اتكل على الله يا نجاد
خد لك طيارة وفي وسط البحر كده ووقف مركب امريكية حاملة اسلحة لاسرائيل واهي مركب مسلحة بقى مش مدنية وموت اللي عليها
واياك حد يفتح بقه
وللا اخترق المياه الدولية واقطع الشبكة اللي عاملها اوباما للمعارضة ولو حد اعترضك اقتله واياك حد يفتح بقه
واحنا بقى ما نعرفش ننزل في الشارع عشان اي ظابط حيتبلى علينا ويقول ضربناه ويموتنا في الشارع
