حان الآن موعد الاعلان الكامل عن نظريتي

انا كنت اتكلمت عن ان فيه ناس بتفهم ومش بتحس، وفيه ناس بتحس ومش بتفهم، وفيه ناس لا بتفهم ولا بتحس

وكنت اتكلمت عن غباوة المخ وغباوة القلب وقلت ان الاتنين يؤدوا لنفس النتائج، زي ما برضه نباهة المخ تؤدي لخلاصة نباهة القلب مع اختلاف الاليات شوية بس النتيجة النهائية واحدة

بس ما قلتش انا اقصد مين، غير لصحابي بقى، ما قلتش اقصد مين عشان اللي بيحسوا وما بيفهموش ما يزعلوش، لانهم بيحسوا بقى فحيزعلوا

بس انا خلاص مش قادرة مش قادرة مش قادرة بسبب اللي حصل لي امبارح

كان بقالي يومين قافلة الموبايل عشان حاسة اني تشبعت بالاحداث وعايزة افصل طبعا فيه ناس قالوا لي مالك يابنتي واليكم نصوص الحوارات

حوار مع واحد صاحبي شيوعي:

ايه يا جميل؟ مالك؟ 

- لا ابدا كان عندي ااكتئاب

ليه؟ ما الناس بتتحرك اهي

- لا بس الظاهر تشبعت

اه فهمت قصدك.. طب وبقيتي كويسة وللا لسه؟

- اه بقيت كويسة.. رحت مقابر الفدائيين في بورسعيد وفرفشت نفسي

طب كويس.. اخدتي صور؟ 

-----

يلاحظ انه فهم على طول ان الضغط السياسي هو اللي اثر على حياتي الشخصية، ويلاحظ انه فهم وجه التأثير من غير ما اشرح كتير، ويلاحظ ان كل اللي همه اني اخد صور بما اني قلت له بقيت كويسة خلاص يبقى نتكلم في الشغل بقى

-------

حوار مع صديق تاني اسلامي:

ايه يا نونو؟ خضيتنا عليك

- كان عندي اكتئاب

اكتئاب؟ ليه؟ قولي لي مين اللي زعلك وانا اطلع لك عينه.. اكيد فيه حد زعلك، انا عارف الاشكال الوسخة اللي حوالينا

------

يلاحظ ان قلبه حنين جدا والله، وقال لي يا نونو، مش يا جميل اللي تحسسك انها بتتقال لكل الناس، وفعلا مخضوض عليا لانه اتصل كتير، ومتعاطف جدا، لدرجة انه عايز يروح يتخانق مع اشخاص مالهمش وجود بفرض انهم زعلوني من غير ما يفهم انا مالي، مع ان مافيش حد زعلني وبقالي مدة طويلة مش باتعامل مع اشكال وسخة وقفل معايا وهو لسه مش فاهم انا كنت مكتئبة من ايه، بس متعاطف جدا وكل شوية يسأل عليا

-----

واكيد ماليش صحاب ليبراليين، واكيد لو ليا مش حاتكلم معاهم في حاجة لاني اي حاجة حاقولها حيقولوا لي: وقعتي بيان التغيير؟ لو وقعتي مش حتكتئبي

بس انا عندي تلاتة صحابي بيفهموا وبيحسوا... كل شوية اقول لهم اوعوا تموتوا

فنون ومالك وغادة جبر

طب والله تلاتة بيفهموا ويحسوا في الزمن ده كتير يعني، ربنا يخليهم والنبي يا رب