النظرية التآمرية في قضية هالة مصطفى المستحية

تقدروا تعتبروا ان البوست ده هطرسة وتخريف، واللي مالوش مزاج يقرا تخريف ما يقراش البوست ده

فيما يخص قضية هالة مصطفى الصحفية اللي قابلت السفير الاسرائيلي والهلولة اللي معمولة عليها

انا واحدة بالعب شطرنج وسودوكو كتير لحد ما بقى تفكيري ملتوي، خدوا كلامي للآخر وارموه في الزبالة بعد كده: التمثيلية دي معمولة في اطار التنازلات اللي قدمها عوكل بعد مقابلته مع نتانياهو والمباحثات السرية اللي في امريكا

انا تقديري ان السيدة هالة كانت كبش فداء، وانا مش بادافع عنها، دي من مجموعة كوبنهاجن وتطبيعية وكل حاجة، بس كانت مستحية

او بقول اخر، ما جاتلهاش فرصة تقول الكلام اللي هي قالته امبارح في العاشرة مساء

وزارة الخارجية ورطت هالة مصطفى في مقابلة سفير الكيان الصهيوني في مؤسسة الاهرام، وهي كل النقطة انها في مؤسسة الاهرام (اللي هي وكل اللي فيها عايشين على قفايا ومن ضرايبي وبياكلوا وبيشربوا ويلبسوا ويقعدوا في التكييف من فلوسي والحقيقة ما بتقدمليش غير اسامة سرايا صفرا واخطاء مطبعية في المانشيتات اللي بالفونت الاحمر) وبعدين ادت تعليمات لعبد المنعم سعيد (اللي هو كمان من مجموعة كوبنهاجن يعني وما يتخيرش عنها) انه يعمل لها هيصة وبوليكة في النقابة

قوم هي تضطر تقول: الله؟ واشمعنى انا؟ هو انا لوحدي؟ ده فلان وفلان وفلان كمان، والسفير الاسرائيلي قال لي انا مستعد اديك قائمة بالصحفيين اللي لهم علاقة بالسفارة الاسرائيلي.

ويبقى فيه فرصة للاصوات المعارضة للائحة اللي ضد التطبيع انها تعلي صوتها، ويبتدوا يقولوا الكلام الطين اللي بيتقال من ساعة ما الموضوع ده ابتدى:

هي لائحة نقابة الصحفيين دي قرآن؟ يعني ايه رعب التطبيع اللي عاملينه للناس ده؟ اسرائيل دي مش احنا عاملين معاها سلام؟ ازاي الدولة عاملة معاها تطبيع كامل ولما صحفية تقابله تتعاقب؟ انا ما عملتش حاجة في السر........

اللايحة تتغير............ اممم هو ده بيت القصيد

ودي مش مؤامرة من جواسيس ولا عملاء، دي الدولة نفسها بتعمل هزة للنقابة وعايزة تطرح المادة اللي ضد التطبيع للمناقشة تمهيدا لان المادة دي تتلغي، او على الاقل تتجمد: "النقابة يجب الا تشكل قيدا اضافيا على الصحفي، كفانا قيودا"!!! قال يعني، واللي بيقول كده مين؟ صحفي في الاهرام والله نسيت اسمه من كتر ما نرفزني

القرد اللي من الاهرام قال: هو انتوا عملتوا استفتاء على المادة دي واخدتوا رأينا؟ اعملوا استفتاء وشوفوا كام صحفي موافق على اللايحة دي، اعملوا تصويت!!!!! هي اللايحة دي منزلة؟

وجمال فهمي يقول له سلاح مقاطعة

يقوم يرد ويقول: دي وجهات نظر

فاهمين بيحصل ايه؟ بيحصل المعتاد لما يحبوا يغيروا حاجة، يعملوا له زمبليطة عشان يهتز في دماغ الناس ويتحول الثابت الى امر قابل للنقاش، وانا ماعنديش مانع ان ده يتعمل في اي حاجة، الا في اسرائيل

والدليل على هطرستي دي، ان كل ابطال المسلسل من الاهرام

هي الفكرة كلها، ان المقاطعة ثابت من ثوابت النقابة، والحكومة عايزة تهزه عشان اتفاقات حصلت بين عوكل والنتن، وعوكل واوبابا، وكالعادة ما بيقولناش حاجة هو، هو بيعمل في صمت، والبلد بتتسرسب من بين ايدينا من غير ما نحس، زي كل حاجة فاتت هي مصر من تلاتين سنة زي دلوقت؟ مصر من عشر سنين زي دلوقت؟ وانا اللي شايفاه ان اي تطور بيحصل في صالح اللي عايزه عوكل، كل اللي عايزه هو اللي بيمشي في الاخر

عايز يجيب جمال

وقالوا له في اموركا اكسر الجليد اللي ما بين المصريين واسرائيل

ربنا يستر بقى، انا مش عايزة حاجة من النقابة غير انها تحجر وتنشف دماغها وتعمل ودن من طين وودن من عجين وتحط فردة جزمة في مخها

التخريف خلص

خدوني على قد عقلي، بس اهم حاجة اللائحة دي ما تتغيرش، ومافيش صحفي يفلت من عقاب المادة دي، وهو كده، شغل صعايدة يعني

وملحوظة: انا مش بانصح الناس تحط جزمة في دماغها وانا حاطة علبة بودرة، انا كمان حاطة في دماغي جزمة

يعني من الاخر كده ماحدش يناقشني في المقاطعة او الثبات على اللائحة، مش عايزة اسمع كلام فارغ

وزي ما قال نصر الله: اذا لم نستطع ان نقاتل فلسنا مجبرون على الاستسلام