محسن السكري قتل سوزان تميم بسلاح ايران النووي

اغلب الظن، لأن زي ما مي سمعت ابو الغيظ ونقلت عبقريته الفذة لنا عشان تبقى ما بتحرمناش من حاجة، سلاح ايران النووي هو اللي مخلي اسرائيل ما تتخلاش عن سلاحها النووي، مع ان اسرائيل ابدت حسن نيتها اكتر من مرة، اقربها النهاردة لما نتانياهو عبر عن مشاعره الفياضة والمسالمة تجاه العرب حيث قال ان القدس عاصمة موحدة لاسرائيل، يعني الناس اهو، قلبهم زي اللبن الحليب، ومع ذلك ايران بتفشل كل المجهودات العربية واللي من ضمنها تقديم عرض استربتيز لاسرائيل كمكافأة لها على تجميد المستوطنات، خللي الناس تنباساط

وعليه، فغالبا سلاح ايران النووي هو السلاح المستخدم في قتل سوزان تميم، واكيد محسن السكري ده شيعي رافضي، وكمان عاطف المناوي (طبقا لكلام احمد شقير والله اعلم) ده مدسوس من ايران عشان يجيب لهشام طلعت اعدام

على فكرة، هو عاطف المناوياللي جاب لهشام طلعت اعدام، انا سمعته بنفسي عند وائل الابراشي، ووائل الابراشي فقد هدوءه المعهود وكان ح يقوم يلبسه الكرسي عشان بيتكلم كده:

كان فيه يا استاذ وائل قضية من كام سنة، كان فيه ايه؟ قضية من كام سنة، كان واحد وزير في الدولة كبير، كان ايه؟ واحد وزير في الدولة كبير، جه اتحبس واخد مؤبد (بيكتب الكلام اللي هو نفسه بيقوله) اتحبس واخد ايه؟ مؤبد، جات مراته اتقتلت، (بيكتب تاني) جات مراته ايه؟ جات مراته اتقتلت، ومش ح اطول عليك ولا ح اخد من وقتك، جات النيابة تحقق، جات النيابة ايه؟ تحقق، قامت (بيكتب تالت) قيدت القضية ضد مجهول..هاه؟ قيدت القضية ضد ايه؟ قيدت القضية ضد مجهول....لحد ما وائل الابراشي قال له: ايوة يعني ده ايه علاقته بالكلام ده؟

ح اقول لك ح اقول لك... ح اتخصر اهو، قامت بعد كام سنة...بعد ايه؟ بعد كام سنة

طيب هو لو وقف قدام القاضي يقول له:

هشام طلعت..هشام ايه؟ هشام طلعت، بريء، ماله؟ بريء، (ويكتب المرافعة اللي هو كاتبها تاني) وانا ح اقول لك بريء ازاي، انا ح اعمل ايه؟ ح اقول لك بريء ازاي

طب ما القاضي لازم يحكم بالاعدام عليه وعلى موكله وعلى العيلة كلها يعني

وهو غالبا المناوي ده متدرب في ايران، وهو غالبا ايه؟ غالبا متدرب في ايران، عشان يخسر القضية، عشان ايه؟ عشان يخسر القضية يقوم نتانياهو يزعل وايه؟

ايوة بالظبط كده

يدينا اعدام