قال بيقول لك 99 في المية من النقض في احكام الاعدام تقبل

 

وانا مش عارفة يعني ايه اللي مزعل عمرو اديب قوي كده، طب انا واحدة سنتيمنتالية مهترئة، بس ده قاتل، وانا مش ضد احكام الاعدام، ويستاهل الاعدام، عشان دي بني ادمة، بس ينفع اني اتعاطف معاه من الناحية السنتيمنتالية المهترئة

لكن هو زعلان ليه؟ هو عمرو اديب سنتيمنتالي مهترئ؟ ده عامل زي معلقين الكورة 

ثانيا..... واسمع انت عشان بتحب الكلام

قال بيقول لك خير اللهم اجعله خير المحامي آمر ابو هيف عضو مجلس شعب ان تسعة وتسعين في المية من نقض احكام الاعلام عفوا، الاعدام، بتقبل فراح عمرو اديب قال له: ويتخفف الحكم

قام قال له (واسمع انت عشان بتحب الكلام ده): وممكن ياخد براءة خالص

هو الراجل قال حاجة؟ هو بيقول ننكن، ننكن

وده ننكن يحصل ازاي؟ لما ياخدوا القضية في دايرة تانية خاااااااااااااااااااااااااالثثثثثثث، قووووم تعاد المحاكمة من اول وجديد

همممممم ادي احنا مستنيين

اصل الكلام كدهون مش راكب على بعضه، الكاتب محمد صفاء عامر، بيقول محكمة النقض بتشوف استخدام مواد القانون اذا كان صح وللا لا ومالهاش دعوة ده اعدام وللا سجن، وده الكلام الاقرب للمنطق، وعلى فكرة ده الكلام اللي قالهولي ناصر امين ايام محاكمة اسلام نبيه لما كنت خايفة من النقض، وقال لي غالبا النقض لا يقبل في القضايا اللي فيها القاضي بيغيب ويفلي في ملف القضية بالطريقة دي

بس طبعا زي ما احنا عارفين، مدام عضو مجلس الشعب قال ننكن ياخد براءة يبقى ننكن ياخد براءة، خصوصا ان المحامين بتوع المتهمين مصممين يقولوا ده مش حكم ده قرار! اي والله عليكوا، بيقولوا كده

حقة يا عيال لو اخد براءة، دي تبقى مسخرة، والمسخرة الاكبر لو اخد خمس سنين

عموما على ما ينظر النقض ح يكون املي اتحقق واللي في بالي اتعظ ان شاء الله