هو ابويا وفهمي هويدي سابوا الدستور ليه؟/ تعليق ام زينب على الازمة

انا كل ما افتح الاقي المقال قديم، قلت الواد جيمي ما بينزلش مقالات بابا على النت ليه؟ وبعدين لما رحت له النهاردة سألته قال لي انا سبتهم، ليه يا بابا؟ ما بيردش؟ وبعدين قال لي ما فهمي هويدي كمان سابهم

طب سبتهم امتى؟

تاني يوم بيان النائب العام ضد حزب الله!!!! ليه هو حصل حاجة يابابا؟

قال لي ما اعرفش

!!!!!!!!!!!!!!!!!!!!!!!!!!!!!

وبعدين لقيته مش عايز يتكلم، هو حد يعرف ايه اللي حصل؟ هو ابويا صحيح بس مش بيقول لي كل حاجة

وهل ده له علاقة بان بابا لو اخد فرصة يكتب عن موضوع حزب الله مش ح ياخد موقف بين البينين؟

ثم فهمي هويدي ساب الدستور ليه

معلش يعني هي الناس كانت بتشتري الدستور ليه غير عشان فهمي هويدي وبابا؟ حاجة غريبة

-------

تعليق ام زينب على الازمة بين حزب الله والحكومة المصرية:

الهي يولعوا... الهي يحرقهم ولا الكلب... الهي يولع في كل غيطان ابو الغيط قادر يا كريم، ده انا تفيت على امه، الهي ربنا يبقى يبتليهم بمصيبة، ملاعين السما السبعة ولاد الـ.... ربنا يبقى يزيحهم.. والنبي يا رب ما تعمل فينا حاجة احنا مالناش ذنب، ده نصر الله ده التراب اللي بيمشي عليه يطهرنا

ام زينب... مين ملاعين السما السبعة دول-

ايوة ملاعين السما السابعة الراجل وابنه وابو الغيط الهي يولع له في غيط الدرا، ونجيب سرور

نجيب سرور؟-

ايوة مرشح السيدة زينب

قصدك فتحي سرور-

ايوة حسبي الله ونعم الوكيل ومفيد شهاب الدين بتاع الخارجية وصفوت الشريف كبير الـمـعـ.... بس حسن نصر الله مش غبي، هو عارف اننا مالناش دعوة

يارب مالناش دعوة يا رب، والنبي ما تنتقم له مننا، بس انتقم له منهم... ده البلسم حياتنا، وكتاب الله بادعي له اكتر ما بادعي لابويا، ده المية اللي بترطب على قلبي.. اهو الادان ادن اهو كلمة الحق قال لك الله اكبر على كلامي... انا قلت له يدن؟ عشان تعرفي انا صحيح مش متعلمة بس باحب ربنا وباحب الرسول انت لابسة صورة حسن نصر الله؟ هاتيها

يا ام زينب ما عنديش الا الدبوس ده، ح ابقى اجيب لك عقد-

شوف والنبي هبلي، رحت بيروت كذا مرة وما اخدتش بالي انه بتاع دبابيس برضه والنبي تجيبي لي صورته

حاضر يام زينب-

انت النت دوت كوم دي ناس كتير بتشوفها؟

ايوة-

ونصر الله بيشوفها؟

مش عارفة يام زينب-

اصل انا عايزة اقول له كلام... احسن يدعي علينا... وعايزة اطلع دين ولا الـ... اللي بيشتموه... هو ينفع الواحد يفتح مدونة وهو دبلون صنايع؟

بابا: لا لازم يبقى معاكي ثانوية عامة والا مش ح تتفتح في ايدك

والنبي؟ يا خسارة، طب اامنك امانة، تقولي للناس كلها ان حسن نصر الله التراب اللي بيمشي عليه يطهر روسنا كلنا... انا ما باحبش حد زيه

هو حسن نصر الله ينفع يبقى ايه؟

يعني ايه يا ام زينب؟-

وبعدين ابتدت تقول كلام مش ح اكتبه على المدونة عشان ماحدش يحل دمها فقلت لها: لا يا ام زينب ما ينفعش اللي بتقوليه ده

هي: بصي انا باقول لك اللي في قلبي، هو بيعمل كل حاجة زي النبي، بيحارب الكفرا، وابو الغلابة، وقاعد بعيد عن المسخرة اللي ملت الدش، وعايش لربنا، وحفيد النبي... يبقى ايه؟

يبقى زي التابعين للرسول يا ام زينب-

يعني كويسة التابعين ده وللا وحشة؟ يبقى هو تابعين

بس ده بيقولوا عليه كافر يا ام زينب-

كافر؟ حسبي الله ونعم الوكيل... ده هم اللي كفرا ولاد مـتـ... هم على كده ح يحببونا في الكفر

------------

همممممممممممممممم معلش يا عوكل، الخطة فشلت، على الاقل مع ام زينب